رواية بيت جنب المقابر
الفصل العشرون20
بقلم دانيا
ابوي والبراء مشو على اتجاه المخزن وكان لسه الصوت مستمر في الصراخ ابوي وجهه مسدسو على اتجاه الباب وفتح الباب وخشى جوا ونحن هنا بقينا نرجف من الخوف وماسكين في امي
ابوي طلع ماسك زول من يدو وجاريهو لبرا ، الزول شغال يقول عليك الله م تقتلوني والله معليش تاني م بسرق وبقى يبكي ابوي قال ليهو مالك بتصرخ وانت جاي تسرق في حرامي بطلع صوت ، قال ليهو اول ما جيت ناطي ودخلت جوا في حاجه ضربتني ووقعتني في الارض وجرتني للغرفه الهسي دي والدنيا ضلام م شفها لكن متأكد م كان زول دي حاجه ضخمه اكبر من الزول .
ابوي قال للبراء جيب حبل مشى جابو الزول بقى يقول خلوني عليك الله والله تاني م بسرق انا عندي اطفال صغار محتاجين لي بعد كلام كتير وتحنيس ابوي فكاهو وخلاه يمشي قال ليهو لو فكرت تجي هنا بالغلط تاني م برحمك .
الصباح الاحد طلعنا ماشين المدرسه وقفنا برا منتظرين العربيه ، نشوف ليك ود الجيران جاي طالع محشش ماشي الجامعه عاين لينا كدا وتاني قام مشى م اشتغل بينا ، اسراء قالت لينا والله لو م ناس الحله وابوي هسي بطلع كان اتكلمت معاهو ، قلت ليها يابت مالك ومال المشاكل انسي موضوع اصلاً لو هو عاوز يتكلم مع ابوي كان جاء .
امي بقت قاعده براها في البيت كلنا طلعنا بقت ترتب وتجهز في الغداء وبعد خلصت مشت على الحمام عاوزة تستحمى وتصلي الظهر الباب دق فتحتو لقتها دي الجاره الجديده ام الولد فضلتها جوا وبقن يتونسن وعملت الجبنه المره قاعده تتونس بعد شويه قالت لأمي انتي عندك كم بت امي قالت ليها تلاته قامت قالت ليها م تفهميني غلط لكن في واحده منهن يومي بالمساء بتطلع السطوح وبتعاين على اتجاه بيتنا وانا ولدي دا بطلع السطح بزاكر هناك وكم مره لمح البت واقفه م اشتغل بالموضوع لكن من الظاهرة دي اتكررت قلنا احسن نوريكي عشان تعرفي الحاصل ، امي ولا صدقت هاجت وكوركت فيها وبقت تقول ليها بناتي مربياهم احسن تربيه وم بسمح ليكي تتكلمي فيهن والمره بقت تقول ليها انتي فهمتيني غلط وانا م قصدي كدا واثناء النقاش داك في حاجه طاخ ادت المره كيف لمن قربت تقع ياساتر استر امي بقت بس واقفه في صمت وبتعاين للمره خلت الجوطه زاتو بس بقت فاتحه خشمها وبتعاين فيها عاوزة تقول ليها والله انا م دخلني وم ضربتك المره من الصدمه ختت يدها في خدها ومرقت فاتت امي ماشه وراها حلفت