اتحمدلت وقمت عمتي وهناء قالن لي ماتأكلي يابت قلت ليهن الحمد لله شبعت مشيت المطبخ ختيت الشاي جاء محمد جاب الصينيه وشال الشاي قال لي اتكلمت مع ابوي وبكرة لبعد الظهر كدا المفروض نكونو مرقنا .... عاينت ليهو وقلت ليهو انت بقيت تقرر براك يامحمد ؟ قال لي اقرر براي كيف ياساجده انا اي شيء بعملو لمصلحتنا انا شغال لشنو شغال لنفسي؟ ما شغال لينا كلنا وبكرة لو جونا اطفال م عاوزين مستقبلهم ؟ انتي من قمتي في بيت اسرة ومن اتزوجنا هسي دي سنه وبرضو طلعتي من بيت اسرة ودخلتي في بيت اسرة عشان كدا انا عازرك ومتفهم ردة فعلك لكن انتي كمان حاولي تفهميني ،، قال كلامو وطلع خلاني واقفه محتارة .
شلت الشاي صادفت هنا في الباب طلعنا شربنا الشاي جاء محمد وعمي قعدو معانا ومحمد طوالي فتح موضوع السفر دا لأمو .... وبقو يتناقشو في الموضوع قال ليها زاتو م ح نشيل شيء غير ملابسنا وحاجاتنا الضروريات ،، باقي الأغراض ح نخليهن قاعدات في حتتهن وقت ما نرجع داك نرجع .... قالت ليهو والله م عارفه اقول ليك شنو لكن ربنا يوفقكم ويعدل طريقكم ح تخلو لينا البيت شين والله .
في الليل داك اتصلت لناس امي وريتهم والصباح بعد شربنا الشاي بدينا نلم في حاجاتنا هو يعاين لي وانا صارة وشي .... جاء مسك يدي كنت بطبق في الملابس قال لي اقعدي قعدت في السرير قعد جنبي ،، قال لي شوفي ياساجده ااي هي صاح فرقة الأهل حاره واي شيء لكن انا بوعدك نجي كل فترة والتانيه وحتى لو انا م قدرت اجي ح اتصل لمسلم او اخوكي سامي واحد فيهم يجي يسوقك تجي تسلمي وتقعدي فترة وترجعي .... للحظه حسيت بالإطمئنان شوية ابتسمت وقلت ليهو طيب اتفقنا عاين لي وضحك قام على حيلو ورجع يطبق في ملابسو قال لي بليدة خلاص قلت ليهو انا ياغياظ .
سمعنا صوت ناس بسلمو برا قلت ليهو ناس امي جوا خليت الهدوم وطلعت برا سلمت ليهم .... قعدت معاهم حبه وجات مرت اخوي ساعدتني الظهر اذن صلينا وودعناهم وطلعنا ،، محمد سايق ومشغل اغاني قلت ليهو لا عليك الله شغل قرآن قال لي حاضر انتي تأمري غير الأغنيه بقرآن هو مركز قدامو وانا بقيت بعاين برا في الطريق طبعاً عشان دي اول مره اطلع من منطقتنا دي بقيت بعاين للشارع مره نجي ببيوت ومره شجر ، ومره صحراء لمن نعست ونمتا .
صحيت على صوت محمد وهو بقول لي ساجده قومي وصلنا فتحت عيوني عاينت برا لقيت المكان كله بيوت وقدامها اعمده فيها انوار وعلى الناحيه الشرقيه في فسحه مضلمه .... محمد نزل وقال لي انزلي نزلت طلع مفتاح من جيبو فتح باب البيت الكنا واقفين قدامو فتح الباب كبير وقال لي خشي دخلت وهو مشى ساق العربيه دخلها جوا وقفل الباب ،، نزل الشنط واداني مفاتيح قال لي بالمفتاح الأحمر دا افتحي الباب .
مشيت على الباب فتحتو اول مافتحتو حسيت بنسمات هواء بارد لامست جسمي رغم إنو برا الجو ساكن مافي هواء .... البيت انوارو شغاله لكن المرواح م كانت شغاله استغربت الهواء دا جاء كيف قلت بسم الله وخشيت جوا " الهول " ومحمد دخل وراي قال لي تعالي فتح باب الغرفه ودخل الشنط انا بقيت بعاين للبيت بتفحص م بعرف ليه م كنت مرتاحه ،، ختى الشنط وطلع قال لي ح اقفل الباب واجي انا شغلت المروحه الفي الغرفه وقعدت في طرف السرير محمد جاء قال لي ح اخد دوش واجي انوم والله فتران فتر مبالغه قلت ليهو تمام.
دخل الحمام انا قلت انا زاتي المغرب والعشاء م صليتهم خليني امشي الحمام التاني شلت غيار من الشنطه وطلعت مشيت كان في غرفه وقدامها حمام ..... دخلت وقفلت الباب بديت الحمام حسيت الباب فتح وتاني قفل لمن اتهجمت بقيت بعاين ليهو الغريبه انا قفلتو كويس ،، استحميت سريع سريع وقمت طالعه عاوزة افتح الباب حلف كان يفتح مهما حاولت ابا يفتح فجأة اللمبه الفي الحمام طفت من الخلعه جسمي كله بقى يرجف وقلبي بقى يخفق بسرعه بقيت بدق في الباب وبنادي لمحمد .
في الظلام داك م شايفه اي حاجه وانا كرهتي الضلام بخاف منو شديد بعد مسافه حتى محمد جاء فتح لي قرب نفسي يكتم .... بقيت بتنفس بصعوبه مسكني طلعني برا وشغال لي بسم الله ياساجده قولي بسم الله م حصل شيء انا جنبك ،، ساقني مشينا الغرفه وانا برجف جاب لي مويه بقيت ابكي قال لي قولي بسم الله انتي كويسة ؟ حركت راسي بمعنى نعم قال لي انتي ليه مشيتي هناك كنتي تستنيني او كان تقولي لي انا بستحم قبلك دامك مستعجله ،، روقي م حصل شيء .
بعد مسافه حسيت نفسي احسن قمت اتوضيت وصليت وجيت رقدت عاين لي قال لي انتي كويسة؟ قلت ليهو كويسه بس قفلت النور خلعتني وانت عارفني بخاف من الضلام ..... نمنا صحيت بالليل حسيت بيد لمستني في وشي فتحت عيوني لقيت الغرفه مضلمه قمت مخلوعه قلت ليهو محمد محمد قوم طافي النور مالك انت؟ قام نور فلاش تلفونو قال لي ساجده قولي بسم الله انا م طفيتو والله يمكن الكهرباء قطعت ول كدا قلت ليهو انت هسي ختيت يدك في وشي؟ بقى يعاين لي ،، قال لي انا نايم يديني ديل يمكن يمشن اي محل بقت على وشك وبقى يضحك قال لي نوري بتلفونك انا طالع اشوف الكهرباء مالها .... قلت ليهو مستحيل م بقعت جايا معاك.