قال لي دقيقه خليك هنا ونوري بتلفونك بمشي اشوف الكهرباء مالها طوالي نزلت من السرير قلت ليهو مستحيل م بقعد براي .... نور الفلاش في وشي وبقى يضحك قال لي ساجده انا م متخيلك جبانه كدا ورح طيب شال التلفون ومشى قدامي وانا ماشه وراهو مشينا شافها تحت السلم قال لي الكهرباء دي شكلها قطعت كدي ورح برا نشوفها عند الجيران شغاله ،، ماشه وراهو قبل نصل باب الهول حسيت بحاجه طقشتني في كتفي زي الزول الجاء ماشي بجنبك وطقشك .
لمن اتجهمت صرخت ومسكت في يد محمد قوي هو زاتو اتهجم نور وجه النور علي وقال لي بسم الله يابت مالك ؟ قلت ليهو في حاجه ضربتني في كتفي بقى ينور الفلاش على كل الإتحاهات مافي اي شيء وانا برجف من الخوف .... قال لي وينا وينا الحاجه الطقشتك دي ياساجده يابت الناس كدي سمي باالله واهدئي ماممكن معاكي تتخلعي الزمن كله الليله الله يستر بسبب كوابيسك دي يمكن م اقدر انوم انا بكره عندي شغل ،، انتي انا معاكي وانا خايفه وترجفي كدا وتتوهمي اشياء اصلاً مافي طيب انا ح اقدر اخليكي براكي كيف .
بتكلم كدا البيت نور والكهرباء جات عاين للنور وقال لي الحمد لله ياها الكهرباء جات يلا ورح ننوم ومشى على الغرفه طوالي مشيت وراهو دخل ورقد في السرير بقى يعاين لي ..... قال لي تعالي نومي مافي اي حاجه وحتى لو جات حاجه انا ما موجود ياهو قاعد معاكي تخافي من شنو ؟ عيوني دمعو مسحت دموعي ومشيت نمتا قال لي اطمني خالص مافي اي حاجه دي كلها اوهام بسبب الخوف الفي راسك دا وانا م عارف خايفه لشنو نحن م اول ناس نسكن برانا انتي قايله البيوت دي كلها فيها اُسر ،، نومي وم تفكري كتير .... قلت ليهو طيب ، قبلت قادي وبقيت بفكر في كلامو حسيتو منطقي بس كمان م قادرة اتجاهل الحاجه الحصلت .
الصباح قمت لقيت الشمس اشرقت زاتو قلت معقولة شالتني نومه للدرجه قمت سريع سريع دخلت استحميت ومشيت المطبخ .... عملت الشاي جاني في المطبخ قال لي صباح الخير قابلتو بإبتسامه وقلت ليهو صباح النور ،، بقى يتبسم قال لي ايوه دي ساجده البعرفها متفائله ومبتسمه دائماً قعدنا شربنا الشاي بقى يوصف لي قال لي الجيرانا اللصق معانا من ناحيه الشرق ديل قاعدين والمن الناحيه الشماليه برضو ومن الناحيه الجنوبيه قطع الشارع ديل قاعدين يعني الحله عامرة ويمكن الحريم لو عرفو بوجودك يجوكي وتتعارفن وتتماشن اخير ليكي من تقعدي براكي .
اها وصحي من الناحيه الغربيه دي مغابر ....انا من قال لي كدا حسيت حيلي برد م بعرف لشنو قلت ليهو مقابر؟ بقيت بعاين ليهو بطريقه كدا عرف إني اتوترت من السيرة قال لي ااي يعني شنو عادي ،، قلت ليهو النبي فيك يامحمد من الأماكن دي كلها م لقيت غير هنا جنب المقابر كمان للحظه مخي بدأ يربط الأحداث والتفاؤل كله اختفى .... قال لي يابت شغلي قرآن في البيت من تلفونك لو بتخافي لحد ما المساء بجيب ليك معاي سماعه يلا انا طالع ،، طلعت معاهو جنب الباب ساق العربيه ولوح لي بيدو ومشى .
عاوزة اقفل الباب طلعت الجاره الجنوب مننا طوالي بيناتنا الشارع رفعت لي يدها سلمت لي وقالت لي سكنتو هنا؟ قلت ليها ااي قالت لي خلاص بنجوكي بعدين نشرب معاكي الجبنه قلت ليها كويس .... خشيت جوا وانا راسي مزدحم بالتساؤلات غسلت عدة الشاي واحترت زاتو اعمل شنو واقضي اليوم كيف قلت احسن شيء امشي اتصل لناس امي وناس هنا اتكلم معاهم بدال ما اقعد ساي ،، خشيت الغرفه عاوزة اشيل التلفون جرس الباب دق مشيت عليهو قلت معقولة الحريم ديل جن بالسرعه دي فتحت الباب لقيت مرا يعني م كبيرة بتكون عمر كم وعشرين لابسه عبايه سوداء وطرحه سوداء سلمت عليها للحظه جاني احساس غريب عاينت ليها كانت بتعاين لي بنظرة حادة .
وماسكه يدي فكيت منها يدي وقلت ليها اتفضلي قالت لي رسلني ليكي محمد عاينت ليها بإستغراب شديد قلت ليها محمد ؟ لشنو مرسلك وبعرفك من وين هو ؟ قالت لي انا شغاله قصدي بنضف وبغسل وبكوي وكدا جيت عن طريق صاحبه معتز قلت ليها م عندي شغله انا هسي لو احتجت ليكي بكلم محمد يكلمك وقفلت الباب .... حسيت قلبي مقبوض لأنو البت دي م شبه واحده شغاله دخلت جوا قلت اتصل لمحمد اسألو شلت التلفون بطبز فيهو حسيت بظل وراي