رواية بيت جنب المقابر
الفصل التاسع عشر19
بقلم دانيا
قلت ليها رايك شنو نتكلم معاهم ، بقت تعاين لي بأستغراب وبقت تضحك فيني ، ضربت امنيه على كتفها ضربه خفيفه وبقت تقول ليها اختنا جنت ، قاطعت كلامها وقلت ليها اسكتي هم بكونو سامعننا لكن م بعرف كيف ح يردو علينا.
قلت ليهم اسمعوني رجاءً انتوا عاوزننا نقعد معاكم هنا في البيت دا لو عاوزننا اعملوا حركه حركو اي شيء عشان تدونا اشاره ، بعد قلت الكلام دا الكرسي الجنب درج المزاكره اتحرك، اسراء وامنيه بقو يعاينو للكرسي بي خلعه ويعاينو لي ، قلت ليهن شفتو هم عاوزننا نقعد معاهم ، تاني قلت ليهم طيب طالما عاوزننا نقعد معاكم نحن موافقين لكن بشرط م تأزونا وم تسألو اسراء لو موافقين اعملوا حركه تاني الكرسي اتحرك قلت ليها شفتي ارتاحي تاني مافي زول بسألك ، وهي لسه بتعاين لي وبتبلع في ريقها قالت لي انتي بالجد اختي آيه ول واحده تانيه ، قلت ليها اجي يابت مالك خلاص خليتهم وقلبتي علي انا ، قالت لي م كدا لكن مستغربه كيف قدرتي تتخاطبي معاهم قلت ليها احم احم دي مهارات ، امنيه قالت ليها آيه طالعه زكيه وحكيمه لأبوي وبقينا نتونس ونضحك قلت ليهم بعدا يا شاطرات رايكم شنو ترجعوا لغرفكم؟.
امنيه قالت لي بعد نتكلموا مع ابوي في الموضوع ، نزلنا تحت لقينا ابوي قاعد في الصالون مع البراء جينا داخلين التلاته بقى يعاين لينا قال لينا تعالوا موضوعكم شنو احكو لي ، امنيه قالت ليهو ياابوي نحن عاوزين نقول ليك انو نحن طوالي اسراء تمت باقي الجمله قالت ليهو عاوزين نعيش هنا .
قال ليها كيف الكلام دا الغير رايكم شنو قالت ليهو بس حبينا البيت بالرغم من كل شيء لكن اتأقلمنا انت رايك شنو قال لينا انا معاكم وراي من رايكم وراحتكم اهم شيء قلنا ليهو تسلم لينا ياابوي ربنا يديمك تاج على راسنا قال للبراء وانت رايك شنو ؟ قال انا م عندي راي لكن بكره اوعكم تجو تشكو من حاجه قلنا ليهو تمام .
بالليل ونحن نايمين سمعنا صوت كوراك في الطابق التحت قمنا مخلوعين التلاته قلنا الحاصل شنو ، جري نزلنا تحت من شده الخوف والخلعه الواحدة رجلينها م شايلنها ، نزلنا ليقنا ابوي وامي والبراء كلهم قامو مخلوعين من الصوت دا جاي من وين لقيناهو الصوت طالع من غرفة المخزن ابوي قال لينا خليكم هنا انا بمشي اشوف في شنو ، البراء قال ليهو انا ماشي معاك مشو بإتجاه المخزن وابوي كان شايل المسدس حقو