رواية بيت جنب المقابر
الفصل الثالث والثلاثون33
بقلم دانيا
قاعدين نشرب في الشاي ومتمحنين في الوضع ، جات ملك نازله من فوق وهي بتنادي ياخالتي الحقي امي تعالي شوفيها م قادره نحرك لا يد لا رجل ياخالتو تعالوا شوفها.
كلنا قمنا مخلوعين وجرينا جري فوق الغرفه لقينا خالتي راقده في السرير وم قادره تتحرك اتصدمنا من المنظر لسه امبارح كانت معانا كويسة للعلم هي م بتعاني من اي مرض.
امي جات كابسه عليها وبتبكي يااختي الوحيده مالك الحصل عليكي شنو ، رفعوها ابوي والبراء نزلوها تحت ختوها في العربيه مشو المستشفى مشت امي وملك وابوي ، ابوي قال للبراء خليك مع اخواتك في البيت وانتبهو على نفسكم ونحن ح نطمنكم على وضعها ، دخلوها المستشفى وعملوا ليها فحوصات الدكتور قال اصابها شلل نصفي بسبب التوتر ، والأضطراب النفسي المريضه محتاجه جو هادي وم لازم تتوتر ، م خرجوها خالنها في المستشفى ومتابعين حالتها وبدوها في العلاجات وامي وملك قاعدين معاها.
نحن بقينا قاعدين في البيت م فاهمين شيء إسراء قالت لينا معقول بسبب كلامها الامبارح عن حادث ناس عمتي دانيا حصل معاها كدا؟ بقينا نفكر في الموضوع راسي بقى يودي ويجيب ، قلت ليهم عمتنا دي الحصل معاها شنو م عاوزننا نعرف مش زمان قالوا راجلها عمل حادث وجابو المستشفى لمن وروها هي طلعت من البيت بالعربيه وسايقه بأقصى سرعه وبعدين عملت حادث وهي كمان اتوفت ول في حاجه غير كدا؟
قالوا لي والله شكلها دي م الحقيقه شكلو في حاجه اكبر من كدا، قلت ليهم طيب تعالوا نتصل ل إلين بت عمتي دانيا ونسألها يمكن هي بتعرف ، اتصلت ليها وفتحت الاسبيكر سلمنا عليها وقلت ليها عاوزين نسألك عن موضوع ، قالت لي اها الموضوع شنو قلت ليها قبل 15 سنه صاح انتي كنتي صغيره عمرك سبعه سنه بس بتكوني متزكره او حبوبتك سلمى بتكون حكت ليك الحاصل شنو وكيف ماتو عمتي دانيا وعمو محمد والحوادث الحصلت ليهم كان سببها شنو ، قبل اتم كلامي انوار الغرفه بدت تنور وتطفي نحن بقينا نعاين للمبات بزهول وخوف وبقينا نعاين لبعض بأستغراب ، بعد شويه اللمبه ضربت وعملت صوت قوي زي صوت الطلقه وإلين هنا بتقول الو الو آيه انتي كويسه الو عاوزة ارد ليها التلفون طار من يدي ووقع اتكسر تقول واقع من سابع درو إسراء خافت وبقت ماسكه يدي وانا اطرافي بقت بارده زي التلج من الخوف.
قلت ليهم ياريتنا م قلنا لأبوي نقعد وم نرحل البحصل داكلو بسببنا خالتي دخلت المستشفى