رواية بيت جنب المقابر
الفصل الرابع والثلاثون34
بقلم دانيا
قاعدين في الغرفه محتارين نعملوا شنو، قلت ليهم انا ماشه بيت ناس سهى بجي هسي إسراء اديني تلفونك لو في اي حاجه اتصلوا لي من تلفون امنيه ، نزلت ماشه على الباب لقيت البراء قاعد برا بقى يعاين لي قبل ما يسألني قلت ليهو ماشه بيت ناس سهى وجايه قال لي م تتأخري وانتبهي على نفسك وود الجيران دا لو لاقاكي اوعك تعايني ليهو حتى قلت ليهو حاضر وطلعت .
مشيت لقيت سهى براها قاعده في البيت امها في بيت الجيران الجدد ، بعد دخلت وقعدنا نتونس قلت ليها ياسهى انتوا من زمان ساكنين هنا صاح قالت لي ااي انا من قمت هنا ، قلت ليها معناها بتعرفي قصة بيتنا دي شنو سهى انا حاسه انو ناس الحي ديل كهم عارفين وداسين مننا الحقيقه وبقولوا لينا جن مسلم لكن دي م حركات مسلمين هسي بسببهم خالتي راقده في المستشفى ونحن كل يوم مخلعين وقصة ود الجيران دي برضو وكمان بتنكرو بهيئتنا والله نحن تعبنا منهم وكمان م خلونا نبيع البيت.
حسيت بيها اتوترت من كلامي وقامت على حيلها وبقت تفرك في يدينها مع بعض ، قالت لي مافي حاجه داسنها منكم انتوا بس شغلوا قرآن واخدو حزركم وربنا يحفظكم ، وقفتا على حيلي وقلت ليها سهى على الاقل انتي م تعملي كدا انتي بتعتبرينا زي اخواتك وامي بتعتبريها امك عليك الله احكي لي البيت دا قصتو شنو.
عاينت لي بنظره حنيه وتعاطف قالت لي خلاص اقعدي بحكي ليك لكن م تقولي سهى حكت لي والله ح تنتقم مني وتقتلني عديل يمكن ، انا هنا اتفآجأت وقلت ليها تقتلك منو يابت هي منو هي قصدك شنو ، قالت لي اهدي ح احكي ليك الصراحه البيت دا ياآيه اصلاً كان في حدود المقابر يعني جزء من ارض البيت دي كانت داخله في المقابر والجزء دا كان حفرو فيهو قبر ودفنو فيهو بيت بتزكر الكلام دا قبل عشره سنه ووقت جاء صاحب القطعه اعترض اعتراض تام قال كيف المقابر تصل لحد حدود قطعة الارض حقتو .
اعترض وجاب ناس الاراضي والشرطه ومحاميين واتجرجر في النهايه وصل للهو عاوزو خلى الحكومه تقرر ترجع ليهو الجزء من ارضو الدافنين فيها ، وكمان عملو بينو وبين المقابر شارع على اساس الشارع دا ح يكون الفاصل بيت البيوت وبين المقابر وكل القبور الكانت داخله في ارضه والشارع رحلوها من مكانها ، وبعدها بشهرين الراجل عمر البيت دا وسكن فيهو بقت تظهر ليهو حاجات غريبه شديد وقرب يجن وقبل ما يفوت الاوان ويدخل في مصيبه اكبر طلع من البيت سريع وعرضوا للبيع ، وبعدين انتوا جيتو اشتريتوهو ، وبعدها ناس الحي واللجنه قررو م يفتحوا الموضوع داك نهائي ويدسوا منكم عشان هم مفتكرين اذا البيت قعد فاضي والارواح دي ساكناهو يمكن تسبب خطر على اهل المنطقه.
انا بسمع في كلامها دا من الخلعه لمن حسيت راسي بقى تقيل وحيلي مات ، وم قادره اصدق البسمعو دا شنو