رواية بيت جنب المقابر
الفصل الخامس عشر15
بقلم دانيا
اثناء ما قاعدين نتونس جاء البراء داخل من برا وبقى ينادي اسراء يا اسراء ، قالت ليهو نعم جاء قال ليها انتي البطلعك بالليل دا شنو قالت ليهو انا؟ كلنا بقينا نعاين ليهو مستغربين امي قالت ليهو انت جنيت ياولدي مافي زول فينا طلع نحن من المغرب كلنا قاعدين هنا ، قال ليها كيف يعني هي دخلت قدامي هسي كانت ماشه قدامي بنادي ليها عامله فيها م سامعه امي قالت ليهو والله ياولدي مافي زول طلع ، بقى يكورك ويجوط وبقول دخلت قدامي بخطوتين ياامي يا آيه اسراء مشت وين انتي قولي ، قلت ليهو والله يااخوي ما طلعت من جينا من المدرسه م طلعنا محل اثناء ما انا بتكلم قاطعت كلامي اسراء وقالت لينا شفتو كيف خلو العطر كمان بقوا يتنكروا بهيئتي برضو وبقت تبكي .
قال ليها كيف يعني قصدك شنو انتي بتتكلمي عن منو ؟ امي قالت ليهو دقيقه ياولدي انا بفهمك وبقت تحكي ليهو في الاحداث الغريبه القاعده تحصل معانا من يوم جينا لحد الان وهو واقف مزهول بين مصدق وم مصدق قال ليها ابوي عارف؟ ، قالت ليهو ااي لكن قال م بنقدر نرحل قبل نبيع البيت ، قال ليها كيف يعني دي فوضى بالمناسبه كيف يعني نعيش مع بعض مستحيل انا هسي بتكلم مع ابوي وبكره الصباح ح نطلع من هنا م ح نقد هنا اكتر من كدا تاني اثناء ما بتكلم ابوي جاء .
طبعاً ابوي اول ما يجي ويسلم علينا ويخش يستحمى ويرتاح شويه زول فينا بقدر يناقشو في حاجه مافي، لكن المره دي ابوي اول ما جاء من برا سلم علينا وقعد معانا البراء استلمو بالكلام وقال ليهو نرحل نرحل مافي اي خيار تاني ، ابوي قال ليهو ياولد اصبر بكره الجمعه ويوم السبت جاي زبون يشوف البيت انتوا بس ادعو انو يعجبو ونبيعوا عشان نرحل من هنا .
الصباح بعد الفطور امي قالت ماشه للجيران الجدد مع جاراتنا يحمدلو ليهم السلامه ويباركو ليهم السكن الجديد اسراء قالت ليها ماشه معاكي قالت ليها تمام شويه وطلعوا مشو وانا وامنيه قاعدين نذاكر وقت الصلاه قرب جو راجعين اسراء بقت تحكي لينا انو عندهم بنتين وولد البنات بقرو في الثانوي والولد في الجامعه، البنات ظريفات شديد بقو صحباتها وشالو رقمها وقالوا ليها نبقى على تواصل لكن قالت لينا قاعدين كدا ولدهم جاء داخل لقى الحريم قاعدات ولااا سلام عليكم م قالها طلع مشى شكلو مفتري وشايف روحو م حبيتو بقينا نضحك فيها قلت ليها والله يااختي