رواية بيت جنب المقابر
الفصل السادس عشر16
بقلم دانيا
اسراء بقت تحكي لينا عن ود الجيران الجدد انه مفتري وم سلم عليهم ، بقينا نضحك عليها انا وامنيه ، قلت ليها والله انتي يااختي م هينه ظلمتي الولد بتفكيرك يمكن اتحرج لمن شافكم وم عرف يعمل شنو عشان كدا طلع.
بالليل جينا عاوزين ننوم امنيه قالت لي يعني خلاص بكره ح يجي زول يشوف البيت واذا عجبو ح يشتريهو ، قلت ليها اكيد ح يعجبو ويشتريهو لانو البيت دا حلو شديد بصراحه.
اسراء قالت لينا بتمنى يعجبو ويشتريهو ، على كلامها دا اول ما قالت كدا لمبه القرفه بقت تنور وتطفي لعدة ثواني طوالي ضربت ، اول ما اللمبه طفت القاهم الاتنين جو قعدو معاي في سريري من الخوف ، نورت الفلاش حق التلفون قلت ليهم قولوا بسم الله .
انا ح انزل تحت اقول للبراء يجي يركب لمبه قالو لي نحن م ح نقعد برانا بعد شويه نسمعوا صوت رجلين ماشه علينا بقينا بقينا التلاته متلميين وماسكين في بعض واطرافنا بردت من الخوف ، بعد شويه الصوت اختفى واللمبه نورت .
بقينا محتارين الحاصل شنو معقولة يخربو لينا ويرجعوا يصلحوا سبحان الله ، قلت ليهم انا بصراحه فهمت الحاصل شنو كل ما نجيب سيرة بيع البيت هم بغضبوا معناه م عاوزننا نمشي اتعودو علينا .
الجيران ولدهم الحكت لينا عنه اسراء نايم في السطوح ، الصباح انا قمت طالعه على الدكان لقيتو واقف برا قدام بيتهم م اشتغلت بيهو مشيت الدكان.
لمن جيت راجعه لقيتو في الطريق قال لي السلام عليكم قلت ليهو وعليكم السلام ، قال لي عاوز اكلمك بي موضوع ، قلت ليهو عفواً انا بعرفك؟ يات موضوع بكون بينا قال لي انتي فهمتيني غلط انتي مش امك واختك الصغيره امس جونا في البيت ، قلت ليهو جوكم تاني اتزكرت قلت ليهو انتوا الجيران الجدد؟ قال لي ااي .
امبارح بالليل وانا نايم في السطح شفت اختك دي كانت واقفه في سطح بيتكم وبتعاين لي وانا مستغرب في الحركه دي ، وكنت عاوز انبهها عليها لانو م صاح ، انا لسه واقفه وم مستعوبه الود دا بقول في شنو قلت ليهو يا ود هوي دا كلام شنو البتقول فيهو دا انتي مجنون ول م نصيح انا م بسمح ليك تتكلم عن اختي
اوعك ، وانت هسي وقفتني في نص الطريق عشان تتكلم في اختي جريء لكن واوعك تكرر حركة زي دي تاني، قاطع كلامي قال لي يابت هوي انا م بكذب فاهمة ولا دي حركات اولاد مني ، وعلى فكره انا م غالبني الصباح اجي ادق باب بيتكم واشكي لأبوكي