رواية بيت جنب المقابر
الجزء الثالث3 الفصل التاسع9
بقلم دانيا
قمت جاري على ساجده حسيت بحاجه مسكتني من رقبتي بي ورا وسحبتني للخلف قبل ما اتلفت عليهو قلت ليهو عرفتك من البدايه كذاب وم قصدك مساعدتي للحظه حسيت قبضتو على رقبتي رخت طوالي استقليت الفرصه وقبلت عليهو قلت ليهو رأيك شنو ؟! بقى يعاين لي بإستغراب شديد ابتسمت إبتسامه خفيفه وقلت ليهو اتصدمت ولشنو يا عم " ايها العجوز " ؟! ضحك في وشي ضحكه ساخره وبعدها قال لي بعترف ليك اول مره اقابل إنسي زكي ... ولكن ح تشرح لي او اسألك عرفتني كيف ؟ .
عاينت وراهو لمحت الإتنين الكانو معاهو اختفو لكن م استغربت عارفهم من الاعيبو عامل فيها جني زكي ... قلت ليهو عاوز تعرف انا عرفتك م بشر كيف ؟ من زمن لاقيتك اول مره اصلاً انا لمن خشيت المقابر م كان فيها زول وتاني حاجه انا كنت بتلفت بعاين لكل الإتجاهات وانا متأكد جوا سور المقبره م كان في زول ،، يعني انت ظهرت فجأة لو كنت جاي من الغرفه حقت الغفير زاتو انا كنت شفتك قبل تصلني .
وكمان انا لمن مشيت الفندق لو انت إنس بالجد انا حاجز غرفه فوق في الفندق م تحت وكمان انا اول مااخش قاعد اقفل الباب وراي بالمفتاح يعني بالباب م بتقدر تخش وبالشباك م ممكن لأنو الغرفه فوق م تحت .... وقت كنت بتجي تصحيني من النوم بكلماتك المسيخه ديك " الوقت مناسب لزيارة الأحبه " وانا لمن اصحى م قاعد القاك في بشر بختفي؟ .
وكمان كل مااجي بصادفك في وشي دي مستحيل تكون صدفه .. ولاحظت لخطواتك م بتطلع صوت زي خطوات البشر العاديين ،، وبالنسبه لغرفة القفير القلت لي إنك ساكن فيها انا بحثت عنها قبل اجي وعرفت إنو القفير مات مقتول والسبب مجهول حتى الشرطه م قدرت تعرف ولمن دخلتني الغرفه اتأكدت من المعلومه لأنها باين عليها ليها سنين م اتسكنت وم تنسى البيت الجنب المقابر كل ما ادخلو بلقاك وراي ... وكمان المشاهد الأنا شفتها في المرايا لساده وهي بتتحول انا واثق إنها م حقيقيه ودا شيء من تصويرك انت عشان تخوفني وتخليني ابعد لأني واثق مافي بشر بتحول.
ضحك بإستهتار وقال لي طالما انت عارف دا كله بعدا سمعت كلامي ونفذت وجيت معاي ليه للموت مثلاً ؟ قلت ليهو بنبرة كلها ثقه لا م للموت انا جاي اطلع مرتي منكم .... للحظه ملامحو اتغيرت وبدأ يرجع لأصلو بقى عباره عن كائن بأرجل حيوان ووجه بشري زو قرون ومخالب ،، وقت شفت منظرو وشكله الجديد للحظه قلبي رجف بس قلت اثبت يا محمد لا مجال للخوف .
فجأة اتغرت ملامحه ورجع على هيئه بني ادم واصغر من شكله الكان عليهو بقيت بعاين ليهو بدهشه وهو كان تركيزو في محل تاني .... كان بعاين وراي بطريقه غريبه عاوزة اتلفت اشوف هو بعاين لشنو باللهفه دي ؟! وقبل اقبل وراي مسكني من يدي لمن حسيت بألم شديد في يدي عاينت ليدي لقيتو مطلع مخلب طويل وقارسو في يدي لمن دمها سال ،، حاولت اسحب يدي منو كان ماسكها بقوه .. رجعت عاينت ليهو ولسه كان بعاين في نفس المكان طق جات على بالي فكره وقلت " ساجده" ؟ .
غمضت عيوني شديد من شدة ما يدي واجعاني وقلت " بسم الله الرحمن الرحيم " فجأة حسيت قبضتو اتفكت فتحت عيوني م لقيتو عاينت مكان هو كان بعاين مافي اي شيء غير شباك صغير مقفول مشيت عليهو فتحتو للحظه حسيت بنسمه هواء بارده في وشيء بس م قادر اشوف شيء من الظلام المكان وراء الشبكان مظلم شديد م باين لي اي شيء هبشت جيبي عشان اطلع تلفوني م لقيتو .