رواية بيت جنب المقابر
الجزء الثالث3 الفصل العاشر10
بقلم دانيا
بقيت واقف وبعاين بهناك للشباك فجأة ظهر لي ضوء خافت من خلالو قدرت اشوف المكان بوضوح اتضح لي كأنها دي غرفه وقفت مستغرب وقبل اتوكل وانط من الشباك هبشت جيوبي واتأكدت من الحاجات الجيت بيهن قعدات وبعدها قلت بسم الله وختيت رجلي في الشباك ورفعت التانيه ونطيت طوالي واول ما نطيت ادركت إنو المسافه الكنت شايفها قريبه هي في الواقع بعيده شديد استغرقت عدة ثواني قبل ما اصل الأرض واول ما وقعت وقعت على ضهري للحظه سمعت صوت عظام ضهري وهي بتصدر صوت وكمية الألم الحسيت بيهو قمضت عيوني بشدة قلت خلاص يا محمد سلسلتك الفقريه اتكسرت .
فتحت عيوني على صوت صرااخ عالي بإسمي الصوت المابغباني "صوت ساجده وهي مخلوعه بتكورك بإسمي محمد " اتلفت على مصدر الصوت بلهفه رغم الوجع واتخلعت لمن شفتها واقفه وهي بتعاين لي وخاته ايديها على خشمها وجسمها يرجف .
حاولت تجي علي قدر ما حاولت ترفع رجليها خطوة من الأرض م قدرت كأنها مسمره في الأرض "رجليها ملتصقات بالأرض " بقيت بعاين لرجليها بصدمه كبيرة ومستغرب هي ليه م قادره تتحرك ؟؟! حاولت اقوم من الأرض عشان امشي اصلها عاوز اقوم م قدرت الوقعه كسرت جسمي ... رفعت عيني عاينت لساجده الكانت بتبكي بحرقه قلت لا يا محمد لازم تقيف بصعوبه قدرت ارفع ضهري من الأرض ورقدت على جنبتي اليمين سحبت نفسي لمن وصلت للحيطه ثبت يدي الشمال في الحيطه وحاولت اقوم فجأة سمعت صوت ضحك بطريقه ساخره رفعت راي عاينت لقيتو دا نفس الشيطان الخطف ساجده .
بقيت بعاين ليهو لأول مرة بفرح بشوفتو لأني كلي ثقه إني جبت الحاجه البتخليني اقدر اقضي عليهو كلياً نزلت يدي من الحيطه ودخلتها في جيبي لقيتو فاضي للحظه قلبي رجف ... وحسيت بالخوف " كيف يعني العشبه مشت وين ؟ كانت في جيبي " هبشت جيبي التاني لقيت فيهو علبة الكبريت وانا متأكد قبل اقفذ العشبه كنت خاتيها في جيب والكبريت في جيب كيف م القي غير الكبربت ،، الجن عقب كان واقف وبضحك جاء قعد قدامي وقال لي " وين ثقتك بنفسك القبيل ديك ؟ " .
بقيت بعاين ليهو وفي اضاني بتردد صوت ساجده وهي بتبكي وبتقول لي محمد طلعني من هنا ،، فجأة عيني وقعت على إتجاه الشباك شفت العشبه الجبتها معاي عشان انهيهو بيها واقعه جنب الحيطه .... بقيت بعاين ليها وبعاين للجن الكان قاعد قدامي ولسه مستمر ينضم بكلماتو المستفزة وبعد استفزاني كتير بالكلام قام من جنبي ومشى وقف ورا ساجده بقيت بعاين ليهو عاوز اشوف فهمو شنو عارفو م بقدر يأذيها ،، وهي كانت بتكش منو وبتحاول تبعد منو وهو واقف وبعاين لي ومبتسم إبتسامه خبيثه .
رفع يدو بكل ثقل دم وقباحه ختاها على رقبة ساجده وهي بتحاول تبعد عنو .... حسيتو إستفزاني شديد بالحركه دي استجمعت كل قوتي واتسجعت قمت من الأرض وانا كل تركيزي على العشبه ،، لمن شافني م مركز معاهو قبل على مكان انا بعاين لمن شاف العشبه فجأة ملامحو اتغيرت ورجع لشكله الطبيعي " ملامحو الشيطانيه " انا من شفتو ركز عليها بقيت احبي في الأرض عشان اصلها وصلت قريب منها فجأة جاتني منو ضربه قوية رجعتني لمكاني القبيل صدمتني بالحيطه لمن راسي لفى وعيوني بقن يشوفن طشاش .
وساجده بهناك بقت تصرخ وتبكي للحظه قربت استسلم للموت عاينت لساجده نظرة اخيرة قبل عيوني تغمض .... دموعها الماليه وشها وبكائها بحرقه فتحت عيوني بتعب وقلت ليها بصوت يكاد يختفي ساجده س ساجده ات ات اتحسبني عشان تتحرري وجيبي العشبه من الأرض بسرعه ،، م كانت بعيده بس حسيتها م سمعتني حاولت اعلي صوتي عشان تسمعني بس قدرتي على الكلام تكاد تنعدم ... رفعت يديني في شكل زول عاوز يدعي وفجأة بقيت بشوف سواد وبعدها عيوني غمضن