رواية بيت جنب المقابر
الجزء الثاني2 الفصل الرابع4
بقلم دانيا
واقفه جنب السرير عاوزة اشيل التلفون حسيت كأنو في خيال واقف وراي قلبي بقى يخفق بسرعه اتشجعت وسريع عاينت وراي م لقيت اي شيء في اللحظه دي دمي جمد في عروقي حسيت نفسي م براي في الغرفه دي كأنو في زول معاي بس الغرفه فاضيه م شايفه زول انا .... شلت التلفون قمت طالعه برا قبل اصل باب الغرفه الباب قفل بقوة لمن اتهجمت قربت اقع من طولي ،، فجاة حسيت بيد باردة زي التلج مسكتني من يدي لمن جسمي رجف والتلفون وقع مني سحبت عاينت شمالي مافي حاجه م شايفه حاجه بس قادرة احس بالإيد الماسكاني دي سحبت يدي بقوة لمن رجليني فقدو توازن وطقشت الحيطه براسي .
تاني م وعين غير على صوت جرس الباب بضرب فتحت عيوني حاسه راسي تقيل شديد عاينت لقيت نفسي راقدة في السرير قمت على حيلي وانا خاته يدي في راسي قلت انا ليه نايمه وكيف جيت نمت وانا اصلاً كنت بعمل في شنو ؟ راسي جايط وفي الفين سؤال في راسي المشكله انا جيت الغرفه كيف ولشنو م متزكرة ..... قاطع تفكيري صوت الجرس تاني ،، نزلت من السرير عاينت للتلفون كان مختوت في التربيزة شفت الساعه لقيتها واحدة ظهر قلت معقول محمد جاء ؟
تاني اتزكرت المرا القالت لي نجيكي بعدين نسلم عليكي قلت خلاص يمكن جن لبست توبي ومشيت فتحت الباب لقيتهن خمسه حريم سلمت عليهن وفضلتهن جوا .... قالن لي م يكون نايمه ازعجناك ؟ قلت ليهن لالا العفو إزعاج شنو بالعكس تونسوني ،، مشيت جبت ليهن مويه والعصير وجبت الكانون ختيتو قعدت جنبهن نتونس وعاوزة اعمل الجبنه واحدة فيهن قالت لي قومي انا بعملها .... قلت ليها لالا خليها اخدي راحتك بعملها حلفن لي خليها تعملها .
قاعدين نتونس تلفوني رن مشيت الغرفه لقيتو دا محمد رديت عليهو قال لي وين انتي يازولة تلفونك دا قافلاهو حيرتيني معاكي والله هسي انا طلعت من مكان الشغل عاوز اتحرك اجي عليكي .... استغربت من كلامو قلت ليهو التلفون فاتح والله اقفلو لشنو ،، قال لي والله قافل انا من قبل الظهر بحاول فيهو بديني مغلق قلت ليهو اجي يامحمد قلت ليك والله م قافل ... قال لي سبحان الله يمكن من الشبكه المهم إنتي كويسة ؟ قلت ليهو ااي كويسة ، قال لي انشغل بالي عليكي لأنك بتخافي قلت ياربي الحاصل شنو .... قلت ليهو م تشغل بالك انا بخير كدي معاي ضيفات برجع ليك بعدين .
قال لي حريم الحله جنك ؟ قلت ليهو ااي قال لي كويس والله ياداب اطنتا خلاص بعد يمشو ارجعي لي قلت ليهو طيب وقفلت منو وطلعت برا .... بشوف الحريم ديل كلهن لابسات اسود في اسود وبعاينن لي وعيونهن لونها بيض بس ونظرهن حاد ،، وقفت متجمدة في محلي من الخلعه فتحت خشمي وختيت يدي في قلبي وبقيت بعاين ليهن وهن بعاينن لي نظراتهن حادة كأنو عاوزين يخلصو علي قامت واحده منهن جات ماشه علي وهي بتنادي بإسمي ساجده ساجده مالك ؟ كل ما تجي علي انا برجع ورا وهي لسه بتنادي بإسمي انا بسمع صوتها زي صوت الراجل وبسمعو بعيد كأنو صدى .
هي جايه علي وانا راجعه ورا منها لمن اصطدمت بالحيطه جات وقفت قدامي ومديت يدها علي غطيت وشي بيديني وقبلت منها قلت ليها زحي مني ..... مسكتني من يدي قالت لي ساجده مالك ؟ عاينت ليها عاوزة ازح منها واجري اتصدمت لمت لقيتها طبيعيه ،، لابسه توبها الهزاز المورد الكحلي وعيونها طبيعيات وبتعاين لي بإستغراب عاينت للباقيات لقيتهن طبيعيات ولاا كأنو ديل م نفس الحريم الكنت شايفاهن قبل دقيقه بقيت مصدومه بعاين ليهن ،، الواقفه جنبي دي قالت لي انتي كويسة ؟