رواية بيت جنب المقابر
الفصل الثامن عشر18
بقلم دانيا
نزلنا تحت ماشين على اتجاه الباب ونحن متوترين شديد قلنا اكيد دا ود الجيران، امي كانت في المطبخ قالت لينا تعالوا ماشات وين وانتوا هسي ابوكم كان بتكلم بالتلفون ومشى على الباب شكلهم الضيوف وصلوا ، قلت ليها ضيوف؟ قالت لي ااي الراجل العاوز يشتري البيت .
بقينا نتهامس وقلنا الحمد لله كان كدا محلوله ، اسراء قالت واخيراً ح نطلعوا من هنا قبل ما تتم كلامها الكبايه طارت من المطبخ جلت راسها بي حبه لمن اتهجمنا قلت ليها انتي كويسة قالت كويسة م صابتني اصلاً وقعت في الارض واتكسرك واتشتت في كل المكان.
البراء جاء داخل قال لينا مالكم عاملين ازعاج انتوا م عارفين ابوي معاهو ضيوف ، شال مويه وطلع مشى علهم في الصالون ، تاني جانا راجع في المطبخ قال لينا الناس ديل قالوا مستعجلين م بقدرو يستنوا الفطور عاوزين يلقوا نظره على كل البيت وطالعين ، امي قالت ليهو خليهم يتفضلوا بقوا يتجولوا في البيت فوق وتحت ، قالوا لأبوي دا بيت انت جادي عاوز تبيع الكوخ دا لينا دا م بيت دي خرابه ابوي قال ليهو دا كلام شنو يازول انت م نصيح هسي البيت دا عيبو شنو قال ليهو انت شايفو دا بيت المهم طلع فات وصاحب ابوي طلع وراهو.
بعد نص ساعه اتصل صاحب ابوي واعتذر منو وقال ليهو والله شكلو في حاجه غريبه في البيت دا لأنو الزول دا حلف واقسم قال لي شايف البيت دا زي زريبة الغنم نهائي م شايفو بيت م بعرف الحاصل شنو ، ابوي قعد محتار في الحصل دا وليه حصل .
طلعنا قرفتنا وبقينا نفكر في الحصل قلت ليهم يابنات اكيد الزول دا عملو ليهو حاجه وإلا ليه يقول كدا لكن طالما م عاوزننا نمشو ونحن م بنسألهم وهم م سآلننا خلينا قاعدين هسي البيت دا عيبو شنو حلو وواسع واي شيء ، امنيه قالت لي صاح كلامك والله انا عن نفسي حبيت البيت دا رغم كل شيء وكمان هسي بسبب موضوع البيت دا انا حاسه انو ابوي بقى شايل هم وهو لو عليهو بقعد م عندو مشكله لكن هو عاوز راحتنا نحن عشان كدا الزمن كله شايل هم البيت، رايكم شنو نقولوا لأبوي نحن عاوزين نقعد والبيت عاجبنا ، اسراء قاطعتها بزهج قالت ليها مستحيل نعملوا كدا انتي اصلك بتقولي كدا عشان لحد الان م حصل معاكي مشكله فيهو وم انأذيتي .
قلت ليها دقيقه هم بأذوكي انتي لانك م قاعده تسكتي ليهم لكن مش عاوزاهم م يأذوكي تاني انا عندي فكره خلينا نتكلم معاهم ، بقت تضحك قالت لي مجنونه انتي هم ح يسمعوكي