رواية بيت جنب المقابر
الجزء الثاني2 الفصل الخامس5
بقلم دانيا
بقيت واقفه وبعاين للمرا القدامي دي بطريقه كأني م واعيه طقطقت لي اصابعها قالت لي ساجده انتي كويسة؟ قلت ليها هاااا دايرة شنو ؟ قالت لي بسألك من الزنجبيل وين ؟ قلت ليها دقيقه اجيبو ليكي مشيت منها والحريم كلهن بعاينن لي حسيت نفسي خجلانه شديد منهن .... مشيت المطبخ وقفت وختيت يدي في راسي والتانيه في صفي قلت ياربي الحاصل شنو انا مالي م ممكن تكون دي كلها توهمات مني اكيد البيت دا فيهو شيء م طبيعي ،، مشيت على الأدراج بقيت بفتش في الزنجبيل ويديني برجفن قلت الزنجبيل انا ح اعرفو كيف وين اذا البيت جديد واصحاب محمد ديل جابو الحاجات دي حشروها حشر وفاتو .... بعد الحريم ديل يمشن ح ارتب المطبخ .
قلت ياالله نسيت الفطور زاتو الليله بعدا خلاص إلا اعمل الغداء مره واحده واخيراً لقيت علبة الزنجبيل شلتها عاوزة اطلع .... فحأة في قزاز دولاب المطبخ لمحت لي وجه زول واقف وراي ملامحو م واضحه للحظه قلبي عمل شح وجسمي كله بقى يرجف لمن العلبه وقعت مني ،، الحريم سمعت صوت الكركبه جوني في المطبخ قالن لي ساجدة انتي كويسة ؟ قلت ليهن كويسة دنقرت شلت العلبه قلت ليهن بس العلبه وقعت مني واحدة شالتها مني وطلعنا برا وانا ماشه وراهن للحظه حسيت نفسي في موقف صعب معاهن .
عملن الجبنه وبقيت اتونس معاهن عشان م يحسن بشيء بقن يسألني عن اهلي وجايه من وين وكدا لمن خلصنا والعصر قرب طلعن فاتن .... فضلت انا براي قلت لا ياساجده ماممكن تقعدي تتوهمي كدا شلت التلفون اتصلت لناس امي بقيت بتونس معاهم وبلم في عدة الجبنه وبوي المطبخ بعد خلصت بقيت بغسل فيها ،، خلصت المكالمه واتصلت لهناء سلمت عليها وادتني عمتي اتكلمت معاها ،، بعد انهيت المكالمه وخلصت غسيل عدة قلت احسن شيء اشغل التلفون قرآن .
عاوزة اشغلو شحنو خلص مشيت الغرفه عشان اجيب الشاحن بقيت بفتش فيهو قريب ربع ساعه م لقيتو .... زهجت وقلت زمني فات لازم احضر الغداء قبل محمد يجي مشيت المطبخ ،، بقطع في البصل فجأة سمعت صوت همهمات بصوت منخفض جنب اضاني بقول " تعالي الى عالمي " للحظه الدم جمد في عروقي مسكت السكين قوي وانا برجف اتشجعت وبسرعه اتلفت ورفعت السكين م لقيت اي شيء ما كان في شيء رميت السكين وجريت برا طلعت الحوش وانا حاسه رجليني م شايلني كأني بجرهم جر .
عاوزة افتح الباب واجري برا سمعت صوت البوري حق عربية محمد فتحت الباب وانا برجف نزل من العربيه لمن شاف حالتي وجاني قال لي ساجده ساجده اهدئي وحاولي تأخدي نفس عميق مالك يابت ..... ومن غير مقدمات وقعت هو اتخلع ودنقر فيني شغال يضرب على خدي براحه وبقول لي ساجده ياساجده انتي كويسة ساجده شالني وداني جوا ختاني في السرير وجاب مويه رشاني بيها صحيت قال لي مالك يابت قطعتي قلبي عليكي في شنو ؟ بقيت ببكي قلت ليهو م عاوزة اقعد في البيت دا تاني يامحمد ما عاوزة .
قام على حيلو ورجع لورا قال لي قبيل لمن اتصلت ليكي مش كنتي كويسة؟ الله يرضى عليكي م تعملي كدا عارفك دي حركات منك عشان ترجعي لكن حاولي تفهميني .