رواية بيت جنب المقابر
الجزء الثاني2 الفصل التاسع9
بقلم دانيا
وقفت قدام باب الحمام وبقيت بعاين جوا حسيت بيد اتختت في كتفي للحظه حسيت بالخوف اتلفت بخلعه لقيتو دا محمد بقيت بعاين ليهو زي كأني شفت شبح قدامي ..... قال لي صباح الخير ومشى قعد في السرير بعد مسافه رديت عليهو قلت ليهو صباح النور طلعت سريع من الغرفه ومشيت المطبخ وانا حاسه بخوف اتزكرت موضوع الظل واستغربت شديد من الحصل قلت لا اكيد دي توهمات ،، واقفه كدا سمعت صوت محمد بناديني ساجده وين الشاي انا اتأخرت قلت ليهو دقيقه بس جهزت الشاي وديتو ليهو شرب ورقد في السرير .
عاينت ليهو بإستغراب قلت ليهو الليله م طالع ؟ قال لي م قادر حاسي نفسي م تمام قلت ليهو خير الحاصل شنو حاسي بشنو ؟ قال لي م تخافي مجرد صداع بسيط ..... اديتو بندول وقمت مشيت وديت عدة الشاي المطبخ ،، بعد الفطور سألتو عن موضوع البيت قال لي اصبري اتكلمت مع صاحبي وقال لي برجع ليك قلت ليهو طيب تمام تلفوني رن شلتو لقيتهم ديل ناس امي بقيت بتكلم معاهم وسألوني من محمد قلت ليهم كويس بعد خلصت المكالمه فتحت تطبيق الكاميرا بالغلط صورت المكان القدامي بالضبط بس في حاجه لفتت إنتباهي يديني رجفن لمن التلفون وقع مني .
وهي إنو لمن الكاميرا صوت الكرسي القاعد فيهو محمد باين كأنو فاضي م فيهو زول ..... اتهجمت من الموضوع ورفعت التلفون كأني بتصفح في الإنترنت وجهت الكاميرا على محمد وفعلاً م كان باين في الصورة ،، خليت التلفون ورفعت راسي عاينت لمحمد واتخلعت لمن لقيتو بعاين لي بنظرة جامده ومن دون ما اتكلم معاهو ابتسم لي إبتسامه غامضه إبتسامه وكأنها وراها في مصيبه جايه قمت سريع من مكاني وقلت بسم الله ..... جسمي كله بقى يرجف رجعت ورا كم خطوه وقمت جاريه على الباب وقبل اصل لقيت محمد واقف في وشي لمن قلبي خفق ولسه نفس الإبتسامه الخبيثه مرسومه على وشو صرخت وقلت ليهو انت منو وين محمد؟ محمد وين ؟ م رد لي بس واقف زي الصنم بعاين لي .
جاء ماشي علي رجعت منو ورا مسكني من يدي وهمس لي في اذني " ساجده تعالي الى عالمي " ياداب خوفي زاد والدم جمد في عروقي " دي نفس العباره " !! نفس العباره للحظه حسيت يدو بارده شديد ..... من دون ما احس لقيت نفسي بتحسبن بعد كررتها كم مره فجأة فك يدي واختفى من قدامي ،، بقيت بتلفت زي المجنونه اختفى من قدامي زي السراب ...... التلفون كان واقع جنب السفرة جريت شلتو شغلتو قرآن بقيت شايلاهو وحمت البيت كله بفتش في محمد حمت البيت غرفه غرفه م خليت مكان مافي اي اثر لمحمد .
قعدت وبقيت ابكي قلت امبارح كان هنا وم طلع من البيت ح يكون مشى وين والكان معاي دا منو ووين عالمو ..... قاعده كدا سمعت صوت نغمه بقيت بحاول اركز على مصدر الصوت ،، مشيت على إتجاة السلم لقيت تلفون محمد واقع هناك استغربت شديد ياداب خوفي كبر شلتو عاينت ليهو كان مكتوب اخي مسلم رديت عليهو بسرعه وانا ببكي قال الو محمد قلت ليهو بصوت مرتجف انا ساجده قال لي ساجده كيفك مالو صوتك إنتي كويسة ؟ انتوا كويسين ؟ محمد وين ؟ قلت ليهو محمد اختفى يا مسلم اختفى م لقيتو وبقيت ببكي مسلم شغال لي ساجده كيف م لقيتيهو اختفى وين انتوا اتشاكلتو ؟ قلت ليهو لا مااتشاكلنا لكن م لقيتو ..... قال لي كدي روقي انا هسي بطلع بجي عليكم وانتي اتصلي لناس المصنع يمكن مشى الشغل بدري