رواية بيت جنب المقابر
الجزء الثاني2 الفصل العاشر10
بقلم دانيا
قلت لمسلم تمام م تتأخر عليك الله ، بعد خلصت المكالمه بقيت بفتش في رقم صاحب محمد الشغال معاهو هنا دا في تلفون محمد بس المشكله انا بعرف إسمو منو دخلت الواتساب لقيت اول دردشه لمحمد مع واحد إسمو " عوض " قلت معناها دا هو طلعت من تطبيق الواتساب ودخلت في جهات الإتصالات بحثت عن إسم عوض ظهر لي اتصلت فيهو م خشى معاي قلت يمكن من الشبكه عاولت كم مره م خشى عاينت للشبكه لاحظت إنها مكرصه " طاشه " إستغربت شديد قلت الشبكه م من عادتها تطش عاينت في تلفوني نفس الشيء مافي شبكه عامله طوارئ .
قمت على حيلي مشيت قلت اطلع برا يمكن القط شبكه جريت الباب ابى يفتح معاي جريتو شديد يفتح الله ابى يفتح معاي .... حاولت معاهو كتير مشيت المطبخ جبت يد الفندك بقيت بضرب في الباب عشان يفتح المكبس حق اتكسر مشيت على الباب التاني نفس الشيء للحظه حسيت بالخوف ،، حمت البيت كله لا خليت باب لا شباك كلهن مقفلات اتأكدت إنو انا م براي هنا جسمي كله بقى يرجف من الخوف تاني مشيت شكلت التلفون عشان اتصل لأي زول يجي يساعدني اطلع ،، والحاجه الملخبطه افكاري اكتر شيء إختفاء محمد هو انا متأكدة من إنو م طلع برا البيت بس وينو ؟ .
شلت التلفون ولسه زي ماهو عامل طوارئ قلت مافي حل تاني غير كدا وقفت جنب باب الهول بقيت بضرب فيهو بقوه وبنادي " افتحو لي الباب " مافي زول ظهر لي واقفه جنب الباب بعد شويه سمعت صوت رجلين ماشه اتلفت بسرعه قلت يمكن دا محمد بس م كان في زول لا محمد ولا غيرو ..... قلت انادي لمحمد بقيت بنادي لمحمد بأعلى صوت مافي اي رد ،، قاعده على اعصابي للمغرب لا محمد ظهر ولا مسلم القال جاي جاء ولا ناس الشغل فقدو محمد والدنيا شويه شوية بدأت تظلم برا بس جوا اللمبات شغاله بس قلبي م مطمئن ليها يمكن تفصل في اي لحظه بقيت ابكي بحرقه قلت وينك يامحمد اريتك سمعت مني من الأول عليك الله تعال مشيت وين انت .
فجأة سمعت صوت ناس بتكلموا برا سمعت صوت زول م يخطى صوت مسلم للحظه حسيت بالأمل قمت على حيلي بحماس ومسحت دموعي وقلت هانت واخيراً جاء زول يساعدني عشان القى محمد .... سمعتهم بطقطقوا في الباب البرا حاولت افتح باب الهول عشان امشي افتح ليهم م قدرت ناديت عليهم عشان اقول ليهم نحن جوا سمعتهم بقولوا الباب مطبل اكيد بكونو طلعو مسلم قال للمعاهو ياخ قبيل ساجده اتصلت لي وكانت بتتكلم بطريقه غريبه قالت لي م لقيت محمد وكانت بتبكي م عرفت كان قصدها شنو انت آخر مره شفت فيها محمد متين ؟ قال ليهو امس بعد العصر كان معانا في المصنع م لقتو كيف يعني ح يمشي وين ؟
مسلم قال ليهو ما دا الشيء المحيرني وكمان هسي الإتنين تلفوناتهم مقفله والبيت قافل هم م بعرفو زول هنا غير موظفين المصنع عشان نقول مشو زيارة ولكدا واصلاً صوت ساجده داك م صوت زول عندو نفس لزيارات ياخ البت كان مبين عليها كأنو خايفه من حاجه .... الزول قال لمسلم والله يااخوي دا كلام غريب تخاف من شنو والأغرب من كدا هي ليه ردت على تلفون محمد ومحمد وين ؟ في وسط تسائلاتهم دي انا كنت بنادي عليهم وبقول ليهم نحن جوا نحن هنا بس الحاجه الحيرتني إنو كأنو م سامعين صوتي رغم إني بصرخ بأعلى صوت ،، الزول قال لمسم كدي ورح مركز الشرطه نفتح بلاغ لأنو الموضوع دا فيهو لغذ عديل مسلم قال ليهو لغذ شنو كدي ورح نسأل الجيران .
مشى محسن ضرب الباب اللصق معانا طوالي فتح ليهو الراجل سلم عليهو وسألو قال ليهو شفت جيرانكم ديل طلعو على مكان الليله ؟ جاركم محمد دا انا اخوهو مسلم جيت شايف بابهم قافل .... الراجل قال ليهو م عارف والله اتفضلوا جوا إلا اسأل ليكم المرا مسلم قال ليهو يزيد فضلك بس كدي اسألها لينا عشان نعرف ،، الراجل خشى جوا بعد شوية طلع قال ليهو قالت م شافتهم عاين للمعاهو وهز راسو نظام م بعرفو .. مشو دقو كم باب والكل قالوا م عارفين شيء قال ليهو اسمع كلامي دا خلينا م نضيع زمن نمشي المركز طوالي .
وانا لسه بضرب في الباب وبنادي لمن يدي وجعتني سمعت صوت عربيتهم دورت ومشت للحظه حسيت بخيبه كبيرة شديد قعدت ابكي وانا وسط حيره شديدة كيف يعني م سامعني وكيف الباب مطبل من برا دا شيء م بتصدق نحن ح نطبل على نفسنا ..... فجأة حسيت بيد مسحت لي دموعي لمن اتخلعت عاينت وراي بخلعه وعلى لفتتي الكهرباء قطعت انا في محلي دا م فضل فيني حيل جمدت في محلي عاوزة اصرخ حلقي اتربط عاوزة اجري من هنا حسيت حركة رجليني اتشلت وماعدت دقيقه النور اشتغل شفت زول واقف قدامي مسافه ومقبل مني ماديني ضهرو قال لي بصوت جامد " لو عاوزة محمد اتبعيني ".