رديت ليهو بصوت عالي ونبره حاده قلت ليهو تهديدات الشرطه الفاشله دي م بتهز فيني شعره وانا م خايف منهم هم لو شادين حيلهم كان رجعوا لي مرتي م معقولة شهرين كاملين ولا نحن ولا الشرطه مافي زول يقدر يوصل ليها من حقهم اهلها يكرهوني وانا زاتي كاره نفسي لكن انا بعدا م ح اسمع من اي زول بكره انا بطلع ومستحيل ارجع من غير مرتي .. خت يدو على كتفي وقال لي انا فاهمك يا محمد لكن الأمور م بتتحل بالتهور ،، قلت ليهو تهور شنو يازول لو كنت مكاني كان ح تقعد كدا ؟ سكت مسافه وقال لي م تنسى الشرطه مانعاك من المنطقه ديك كلها لو قبضوك م ح تطلع منهم فكر في امك على الأقل قلت ليهو م بقبضوني وامي م ح تعرف عن إذنك .
طلعت من الكافي واتصلت لرامي قلت ليهو لاقيني في محطة الضاحيه سريع وقفت لي ركشه ومشيت على المحطه ،، المساء بعد صلاة العشاء كنت قاعد في غرفتي وناس البيت قاعدين في الهول بتونسو قمت طلعت عليهم ... قلت ليهم قعدت جنب ابوي وقلت ليهم انا عاوز اقول ليكم حاجه انا بكره مسافر الضاحيه امي عاينت لي وقالت لي لا لا ياولدي مافي سفر ،، قلت ليها ياامي انا ماشي الضاحيه لشغل م ماشي ساي ابوي قال ليها روقي وافهمي الكلام ياام محمد بعد نقاش كتير حتى اقتنعت بالفكره بعد وريتهم التزكره حقت السفر .
مشيت نمت وانا بفكر في الإمور الحصلت معاي دي كلها لمن غفيت فجأة شفت ساجده كانت قاعدة وملتصقه على الحيطه وهي بترجف من الخوف والمكان مضلم فجأة ظهرت ليها نفس الأطياف الكان خطفتني ديك كانت بتمشي عليها بخطوات بطيئه ونظرات حاده ومخالب بارزة واشكالهم غريبه ومريبه .... وهي بتصرخ وبتحاول تهرب منهم بس الحيطه وراها وهم قدامها قراب منها فجأة صرخت بأعلى صوت ،، قمت مخلوع وجسمي كله نازل عرق ونفسي كاتم وم قادر اتنفس جسمي كله برجف .
عاينت حوالي بتفحص وانا بحاول استوعب لقيت نفسي في البيت وقاعد في نص السرير عاينت على الشباك شفت ضوء الشمس طالع عاينت للساعه كانت عامله 8 ص قمت مخلوع من السرير دخلت استحميت وشلت شنطة الضهر الصغيرة حقتي ديك وشلت فيها غيار وطلعت مشيت لأمي في المطبخ عاينت لي بإستغراب قالت لي اجي ياولدي متين كدا قلت ليها اتأخرت شديد والله ودعتها وطلعت وهي كانت م راضيه بالسفرة دي .... مشيت الصالون ودعت ناس ابوي وطلعت وقفت اقرب ركشه ووصلت السوق مشيت على الموقف لقيت الباص واقف لسه م اتحرك ركبت شويه كدا واتحرك وصلنا الظهر اول ماوصلت كل الزكريات مرت على راسي مشيت اجرت لي غرفه في فندق وبقيت منتظر .
قريب للمغرب قمت طلعت وعندي شال كدا شلتو معاي اول ما طلعت برا لفيتو في راسي وغطيت وشي وركبت ركشه لجنب البيت المشؤم داك وصلت الناس كانوا طالعين من الصلاه منتشرين في الشارع قلت لو زول شافني بقول حرامي احسن شيء اتدسى ،، عاينت حوالي مافي اي مكان اتدسى فيهو عيني وقعت علي المقابر جاتني فكره قلت امشي اخش المقابر ولمن اوصل لنصها اقعد هناك لمن الدنيا تضلم حبه حتى اطلع ،، مشيت خشيت وانا بردد الفاتحه لمن وصلت نصها عاينت يمين شمال وقعدت جنب واحد من القبور عاينت ليهو وقلت انتم السابقون ونحن اللاحقون ... قاعد بترقب في الشوارع اشوف الناس خفت او لا واصلاً الدنيا شويه شويه بدت تضلم بقيت بعاين للشوارع ومركز معاها فجأة حسيت بحاجه من ناحية القبر الجنبي دا اتحركت عاينت ليهو بخلعه مافي اي شيء تاني رجعت عاينت للشارع .. حسيت بحاجه مسكتني من رجلي شديد .