رواية بيت جنب المقابر الجزء الثالث3
الفصل الثالث3
بقلم دانيا
بقيت مركز مع الشارع فجأة حسيت بحاجه مسكتني من رجلي شديد للحظه قلبي خفق بسرعه دقرت راسي عاينت لرجلي الدنيا كانت مضلمه حاولت اسحب رجلي حسيتها م بتتحرك كأنها مشلوله عن الحركه طلعت تلفوني سريع من جيبي ونورت الفلاش اتفاجأت إنو مافي اي شيء عاينت للقبر بإستغراب لقيتو زي ماهو قلت ياربي الحاصل شنو بقيت بتحسبن وانا مستغرب شديد في الموقف الحصل .. واقف كدا حسيت بيد مسكتني من كتفي اتلفت بخلعه شديدة لقيت عمك عجوز واقف وراي وشايل بطاريه في يدو وضواها لي في وشي لمن عيوني طششو وقال لي بنبره جامدة " داير شنو "؟ عاينت ليهو بتعجب ورديت عليهو بصوت متردد انا ... قبل اتم كلامي قاطعني وقال لي " دا م وقت مناسب لزيارة احبابك " .
فهمت من كلامو إنو هو قايلني لي زول من اهل القبور جيت ازورو ختيت يدي في دقني وقلت ليهو كلامك صاح الوقت اتأخر والضلام سد م صاح اكون هنا عن إذنك .. مشيت منو خطوتين وخليتو واقف في محلو اول ما مشيت منو اتلفت علي وقال " انا حارث المقابر " شايف الغرفه العلى طرف المقابر ؟ اتلفت عاينت ليهو لقيتو بأشر لي على الناحيه الشرقيه من المقابر عاينت على إتجاه يدو بتأشر وقلت ليهو ااي شايف قال لي دا بيتي عاينت للتلفون لقيت الساعه قريب سبعه قلت دا بضيع لي وقتي بالنضمي قلت ليهو تمام مع السلامه ،، مشيت منو قبل يرد .
فضل واقف وبعاين لي وبعدين قال " انا مش قلت ليك الوقت م مناسب لزيارة الأحباب "
مشيت جنب باب البيت داك لقيتو مطبل بطبله وجنزير والحوش فوق مدقوق سلك شايكي قلت مافي حل غير الباب .. عاينت يمين شمال م شايف اي زول لفيت شالي كويس في وشي ومسكت في الباب وركبت عن طريق الحدايد بتاعة الباب وصلت لنهاية الباب عاوز اتلب جوا فجأة سمعت لي صوت زول صرخ قال حرامي حرامي ياناس ،، اتلفت على الشارع لمحت لي زول جاي جاري علي بس مسافته بعيده شويه .. بقيت بعاين ليهو قلت يامحمد انزل قبل العارض دا يصلك ويلم عليك ناس الحي ،، تلبت سريع وجريت على الظلط الرئيسي .... اتلفت شايف كم نفر جاريين وراي بقيت جاري وبأشر بيدي للركشات .
في ركشه وقفت لي ركبت وقلت ليهو دور سريع طوالي دور وصلت الفندق حاسبت بتاع الركشه ونزلت طلعت غرفتي ... قعدت في السرير وانا بفكر في المواقف الحصلت لي قلت دي عوارض شنو دي ياهو يوم ضاع مني ساي تاني إلا ارجع احاول بكره ،، قلعت الشال جدعتو في السرير ودخلت استحميت وجيت صليت العشاء ورقدت في السرير وبقيت بفكر اعمل شنو حسيت بالعجز من اول محاوله فاشله بقيت بتزكر في ساجده وقدر شنو هي كانت خايفه لمن كنا في البيت داك قلت في نفسي وانا معاها كانت خايفه للدرجه دي كيف وهي حالياً براها ربنا يحفظك يا ساجده للحظه دموعي جرو .. بقيت بفكر فيها لمن نمت ،، فجأة سمعت صوت همس لي في اضاني وقال لي " قوم الوقت مناسب لزيارة الأحباب " قمت مخلوع شديد