رواية بيت جنب المقابر
الفصل الرابع والعشرون24
بقلم دانيا
امي قالت ليها فعلاً يابتي كلام آيه صاح دي القطه مافي حاجه تاني ، امها قالت والله القطه حقتكم كان شفتها إلا اقتلها شوهت وش بتي واول ما قالت كدا اللمبه ضربت طبعاً كنا قاعدين في الحوش ، قالت بسم الله اها اللمبه مالها كمان امي قالت ليها يااختي اللمبه يمكن ضربت بسبب قوة الكهرباء ، ابوي قال لينا يلا يا جماعه قوموا امشو نوموا بعدا ووصلو بت خالتكم دي على غرفتها عشان ترتاح ومعافية ان شاء الله .
قمنا طلعنا فوق وصلنا خالتي وبتها على غرفتهم قلنا ليها نومي يا ملك وان شاء الله بتلقي العافيه اصلاً دي خدوش بسيطه ، خالتي قالت لي عاد يا بتي آيه حتى لو خدوش بسيطه البت وشها اتشوه ، قلت ليها يا خالتي ليه بتقولي للبت كدا وتخوفيها انتي المفروض تطبطبي عليها ، ملك قالت لي تسلمي يااختي وانتوا امشو نومو لأنو بكره عندكم مدرسه ، قلت ليهم تصبحوا على خير وطلعنا.
مشينا انا وامنيه غرفتي لأنو هي رحلت معاي وخلت الغرفه لناس خالتي ، دخلنا كدا إسراء جات ورانا قالت م قلت ليكم البت دي ح تجيب لنفسها المشاكل ، قلت ليها يابت انتي م بتعرفي تتكلمي براحه ، لكن بالجد معاكي حق والله حصل الكنا خايفين منو غايتو الله يستر ، قاطعت حديثنا امنيه قالت لينا انتوا م مستغربين من البحصل دا ، طبعاً امنيه بطبعها هاديه شديد لكن ماشاء الله لمن تتكلم كلامها حكم قلت ليها في شنو نستغرب ؟ قالت لينا ركزو في الاحداث كل ما بت تحاول تتكلم او تتقرب من البراء بحصل ليها شيء او موقف عجيب دي مش حاجه غريبه شديد ؟ ليه البراء من دون الكل؟ بقينا نفكر في كلام امنيه وكل واحد خاته اصبعها في خدها وبتفكر بالجد زرعت علامة استفهام في راسي؟ لانو كلامها منطقي.
قلت ليها والله ياامنيه كلامك فيهو وجهة نظر ، اسراء قالت لينا يا بنات نحن على وشك امتحانات وخاصة انتي يا آيه ممتحنه الشهادة الثانويه عشان كدا احسن ليك تركزي في قرايتك وباقي الامور دي نحلها بعدين يلا تصبحوا على خير.
نمت وانا لسه بفكر في البحصل دا وم قادرة انوم ولاا اوقف تفكير لمن الصباح اصبح صحيت على صوت الآذان ، بعد صليت قعدت ازاكر وبعدين جهزنا للمدرسه اول شيء مشينا صبحنا على خالتي وبتها ، لقيناها كويسة الحمد لله متحسنه ، وبعدها نزلنا تحت امي قالت لأسراء ودي الشاي لناس خالتك فايذه فوق يمكن م يقدرو ينزلوا .