رواية اللون السابع للحب الفصل الخامس عشر 15 والسادس عشر 16 بقلم شذى عبد المكرم
15
عمار ضربني كف ووقعت ما عاين لي نهائي ولسع بتكلم مع وسام ومن قوة الضربة حسيت اني انجرحت بس بلعتها
عمار: شايفة الغرفة ديك امشي للحيوان البرا دا وبجي بلقاكم هناك والله العظيم تلاتة مرات ما القاكم فيها بدفنكم هنا . وقام مشى حتى ما عاين لي عمار لمن يعصب لا بسمع ولا بشوف وسام جات قومتني وانا ببكي بس ومشينا الغرفة وقعدنا ونحنا خايفين ونبكي جات عمتو سلوى وعمتو حنان وامي لمن سمعو صراخ عمار لقونا بنبكي بس
عمتو حنان: في شنو . ماف وحدة جاوبت
امي: همس الحاصل شنو . ما اتكلمنا برانا خايفيين من مصيرنا
عمتو سلوى: والله عملتو جريمة ياااخ مالكم يا بنات
امي: عمار مالو معصب كدا عملتو شنو اتكلمو ياااخ . انتظرنا عمار جا داخل
عمار: ما داير زول غير الاتنين ديل هنا . طلعو براحة قفل الباب براحة فجأة طلع الطبنجة حقو وختاها في الطربيزة خلاص الموت جانا جانا طبعا عمار لمن يعصب ما بتفاهم ولا حيسمع مننا
عمار: والله رصاصتين ما خسارة فيكم . فتحنا بيت البكا لانو عارفين ممكن يعملا عادي
عمار: اي وحدة تمسك حلقها عليها . سكتنا
عمار: انا مقصر منكم في شنو . سكتنا صرخ فينا
عمار: قصرت معاكم؟
الاتنين: لالا
عمار: وانتي يا ست يا محترمة متزوجه البخليكي تركبي عربات الرجال شنو
وسام: عمار ما كدا ... . سكتها ما خلاها تتكلم
عمار: قفلي يا زفت انتي ما سألتك . سكتت وانا طبعا صدمة الكف ما طلعت مني والخوف الدخل فيني حتى الكلام غلبني بقيت ابكي بس قام هرج كدا وشاكل ونبز وفي الاخر حرمونا من الطلعة وشال تلفوناتنا ومشا خلانا وطلع معصب شديد رجعنا الغرفة وسام جات قعدت جنبي
وسام: همس والله معليش . انا ساكتة بس وببكي
وسام: عليك الله اتكلمي والله معليش . ما اتكلمت وامي وعماتي جو هرجو كدا وانا ساكتة بس وببلع وبقى لي تراكم حسيت بخنقة ما قدرت اتنفس طلعت مشيت الحوش ورا بكيت الله وقدرتي ورجعت الغرفة
وسام: ما حتتكلمي معاي يا همس . سكتا
وسام: زعلانة مني؟ والله حاولت اتكلم مع عمار بس ما سمعني
همس: عارفه ما زعلانة منك وهو لو واثق فيني كدا خلاني اتكلم بس حصل خير
وسام: ما حتخاصميني بسبب الحصل
همس: لالا ما تخافي . جات حضنتني وبكت وبكيت معاها تاني
خيبتي فيك هذا المسَاء؛ تجاوزت حدود السَماء. !💔
يومين انا ساكتة بتكلم للضرورة بس وما طلعنا من الغرفة نهائي لمن جاتنا فردوس زيادة طبعا الليلة اول مرة تزورنا من اتزوجت وكدا تمت تلاتة اسابيع من زواجها جهزنا القهوة بس انا كنت منفسنة كدا ما حبيت تجي في يوم انا حالتي كدا عشان ما نخرب ليها الجو ودي اول زيارة ليها بعد جات حاولنا انا و وسام نبين اننا عاديين جدا وجات وجابت الفرحة والبيت انبسط بجيتها وكانت بشوشة وباين انها مبسوطة واتفقنا انو ما نكلمها بالحصل
صفا: شنو الوش منور كدا . قامت ضحكت بخجل
همس: سفيان كيف معاكي
فردوس: سفيان كويس
همس: ما بجوط ولا بهرج؟ . قامت ضحكت
فردوس: دا سفيان يخوانا
همس: متفاهمين؟
فردوس: الحمدلله
وسام: مبسوطة؟
فردوس: مبسوطة الحمدلله
همس: ربنا يديمها ليكي
فردوس: ان شاءلله يا رب ليه يا همس حاساكي غريبة كدا . ديلاك سكتو
همس: لالا عادي بس دايرة تجيني نفسيات
فردوس: ليه الحاصل شنو
همس: حجة نفسية شدت اولادها وقالت جاية . قامت ضحكت عرفت اني قاصدة الشهرية
فردوس: يحليلك والله
وحاولت اغير من مزاجي عشانها وملاحظة البنات بحاولو يسألوها من تفاصيلها بس بتختصر ما عاوزة زول يعرف تفاصيلها خوفت يكون سفيان ما قاعد يعاملها كويس وهي بتحاول تقنعنا انها كويس
همس: جنة ورح المطبخ
فردوس: انا عروس تدخليني المطبخ؟
صفا: حرام عليكي يا همس
همس: ههههه عروس لنفسك يا سجم قومي يلا . ضحكت وقامت معاي مشينا المطبخ كبيت عصير وقعدنا في مظلة المطبخ في السراير
__ جنة بالجد سفيان كويس معاكي عشان حاسة يعني ما عارفة اقولا ليكي كيف . جات جنبي ورقدت في رجولي
_ عارفة انك خايفة علي صح
__ شديد والله
_ يلا اقول ليكي حاجة طول ما انا مع سفيان ما تشيلي لي هم
__ نهائي؟
_ نهائي والله موش سفيان كان عصبي شديد
__ مبالغة
_ عصيبتو دي لانو خايف علي بس وانا عرفت الحاجة دي خلال عيشتنا في بيت واحد
__ كنت عارفه انو سفيان حيخاف ربنا فيكي
_ اممممممم وانتي علاقتك كيف مع عمار اتفقتو خلاص عشان تعملو عرسكم
__ لسع
_ ليه ياااخ اعترفي انتي مدام هو عامل فيها تقيل . قومت ضحكت وبقيت امسح ليها في رأسها سفيان جا داخل
سفيان: جنة مالك عيانة؟ . قريت الخوف في عيونو ابتسمت وهي قامت واستعدلت في قعدتها
فردوس: انا كويسة
سفيان: مصدعة؟
فردوس: لالا بس كنا بنتونس
سفيان: ايواااا الحمدلله
فردوس: داير حاجة؟
سفيان: نص ليمونة
فردوس: داير بيها شنو
سفيان: حاسي بطمام كدا . هي قامت فوق كدا
فروس: اكلت الشمام صح؟ . سكت ما رد ليها قامت هرجتو
فردوس: سفيان ما ممكن ياااخ مالك مآكلها . سكتت ودخلت المطبخ وهي زعلانة كدا
همس: امشي ليها جوا تديك الليمونة . حك رأسو كدا ودخل وانا ضحكت فيهم ورجعت الغرفة والله كانو حلوين مع بعض فرحت ليهم شديد وعرفت انو سفيان بحبها واضح من نظراتو دعيت ربنا يسعدها.......
______________
من جانب فردوس
حياتي كانت مستقرة مع سفيان وكنت مبسوطة شديد وايامنا كانت حلوة ما كان بخليني اشتغل كتير لاني عروس وكنا بنطلع دايما ما حابسني ابدا لمن مرات بتعزز وبقول ما طالعة ما كان بتكلم كتير بس متفاهمين بقيت بفهمو وبهتم بيهو شديد ما مقصرة معاهو وبدلع فيهو كان بآخدني على حسب عقلي وكنت ما بتجاوز الحدود الراسمها لي نهائي لمن تمينا تلاتة اسابيع قررنا نزور الاسرة الكبيرة
__ جنة
_ نعم
__ نفطر ونطلع البيت الكبير
_ تمام سفيان حنبيت ولا نرجع
__ نرجع وفي حاجه تانيه
_ شنو
__ حأنزل الشغل الاسبوع الجاي
_ تمام . فطرنا واتجهزنا وطلعنا وفي الطريق بقيت اكشكش بدهبي ساي سفيان محتار فيني
__ مالك بتعملي كدا
_ دايرة اتعلم مغزرة النسوان . قام ضحك
__ جنة الله يهديكي . كشكشت قدام وشو
_ حلوة صح . نزل لي ايدي
__ لمن تلقي زول يقطعها ليكي
_ ما خايفة
__ ليه
_ لانك ما حتخليهو . ابتسم وازعجتو بالكشكشة
__ جنة موش قولت ليكي ما بحب الصوت العالي
_ بس دا ما اي صوت لكن . ضحك وسكت خلاني وانا قعدت ساي بعدها لمن وصلنا وكانو مبسوطين بجيتنا وسلمنا عليهم وقيلنا معاهم وحسيت همس متغيرة الفهمتو منها انو دي الشهرية ولمن انفردنا وبنتونس سفيان جانا وكان عندو طمام عرفتو اكل شمام لانو بتعملو ليهو طمام قومت هرجتو دخلت المطبخ عشان اجيب ليهو الليمونة لحقني جوا
__ انا تهرجي فيني قدام همس كدا
_ متين
__ متين؟ . وكان جاي علي وعاقد حواجبو ذي الزول المعصب
_ والله من خوفي عليك بس . كان لسع جاي علي خوفت يعمل لي حاجة هنا وتبقى فضيحة
__ سفيان عاقب في البيت بعدين . قام ضحك
_ بتعرفي الخوف وما بتعرفي الادب
__ غلطانة انا الخوفت عليك
_ خايفة علي ليه
__ لانك اكلت الشمام واحتمال تحسس منو
_ ما تخافي ما بتعمل لي حاجة غير الطمام
__ تاني ما تأكلها عليك الله
_ تمام هسي وين الليمون
__ نسيتني ليها . جيبتها من التلاجة وقطعها ليهو واديتها ليهو وطلع ابتسمت وطلعت لقيت همس مافي رجعت الغرفة وبقينا نتونس لمن اتغدينا
وسام: جنة بيتي الليلة
فردوس: سفيان ما برضى
صفا: ايي عليك الله يا جنة
همس: نتكلم مع سفيان بعدين
فردوس: كويس نشوف
لمن جا زمن الرجعة وسفيان قال نرجع خلاص
وسام: سفيان خلي جنة معانا الليلة . هو عاين لي
همس: ايي يا سفيان خليها معانا الليلة بس . عاين لي مسافة
سفيان: عاوزه تبيتي؟ . يااخ اتعودت عليهو ما بقدر افارقو
فردوس: لالا برجع لكن بجيكم يوم تاني ببيت . خليتهم فاتحين خشومهم من الصدمة وجيت لبست توبي وشيلت حاجاتي جو كبسوني جوا الغرفة
همس: قولي والله يا تا*فهة . قومت ضحكت
فردوس: معليش المرة الجاية
صفا: خلي سفيان يضوي ليكي يا بعيدة
فردوس: مضوي الحمدلله يلا حبايبي راجلي منتظريني . قامو ضحكو ونبزوني وطلعت في الطريق
__ ليه ما بيتي؟
_ دايرني ابيت؟
__ لالا بس حسيت انك مشتاقة ليهم
_ هو صح مشتاقة ليهم بس افوتك وين داير تتخلص مني بس قاعدة ليك بلوة في حياتك . قام ضحك
__ احلى بلوة والله . ورجعنا بيتنا
_____________
من جانب همس
عدا اسبوع من حادث الكف وعمار ما فكر حتى انو يتكلم معاي او يسألني من الحصل عشان احكي ليهو معناهو مصدق الشافو بعيونو بس وعامل فيها زعلان واكيد منتظر اني ابرر ليهو بس لا مستحيل طبعا مدام ما وثق فيني وضربني كف لزوم التفسير شنو وبقى لو شافني بتجاوزني ودي حاجة بتقتل العلاقة عدم المواجهة اخدت قراري خلاص وكان عندي حاجة في رأسي دايرة انفذو
وسام: همس ليه ما حكيتي لعمار الحصل خليني انا احكي ليهو
همس: ما بحتاج ابدا موش ما واثق فيني يبقى ما بلزمني
وسام: كيف يعني
همس: حتعرفو بعدين . عرفت انو ناوية على حاجة خطيرة
____________
من جانب عمار
كان زعلان شديد من الحصل دا وبالاخص من همس وكيف تعمل كدا وحتى ما فكر يسألها في نفس اليوم الهمس قررت تعمل حاجة وسام مشت ليهو
__ عمار دقيقه
_ وسام امشي من قدامي
__ ماشة بس لازم اقول ليك حاجه مهمة . لمن عاين ليها كانت جادة
_ في شنو
__ الموقف الحصل دا همس ما ليها دخل
_ ليها دخل
__ والله ما عندها دخل وما كانت معاي
_ بس كانت عارفة يبقى غلطانة
__ ما كانت عارفة والله
_ وسام طيري من وشي انا شايفها معاك
__ والله همس انا اتصلت ليها وهي ما فاهمة حاجة جاتني اتخلعت ذيك كدا والله وقبل ما تفهم حاجة انت جيت
_ دقيقة دقيقة انتي بتحاولي تغطي ليها غلطها صح
__ والله العظيم تلاتة مرات همس ما كانت عارفة وحتى ما فاهمة حاجة وضربتها من دون سبب
_ لو ما غلطانة ليه ما فسرت لي
__ قالت لي مدام ما واثق فيني يبقى ماف داعي احكي ليهو وانا جيت ليك عشان علاقتكم ما تدمر بسببي والله بعتذر على الحصل . وقامت جرت جوا قبل ما يستوعب عمار عشان ما يضربها تاني هي مشت عمار شد على شعرو شديد وندم شديد انو ما سمعها وضربها ومزعلها اسبوع كامل حسا روحو واجعاهو شديد رجع جوا غرفتو وهو معصب من روحو انو عمل في بتو كدا بقى يفكر يا الله يصالحها كيف ويبدا الكلام معاها كيف وهل حتسامحو بسهولة وحالتها كيف حاليا وحاسة بشنو رأسو كان جايط شديد بس جانب مبسوط انو همس ما عملت كدا وما خانت ثقتو ابدا ........
-
أنا الذي حين جرحتكِ؛ تدفّقت من عينيّ دموعكِ 🖤
___________
من جانب همس
بعد العشا مشيت لعمي محمد
همس: عمي محمد دايرة اتكلم معاك
محمد: اتفضلي بتي
همس: خلي عمار يجي في موضوع ضروري دايرين نتكلم معاك فيهو
محمد: جدا . ابوهو اتصل ليهو وجا اتفاجأ بي وقعد
محمد: احكي يا بتي الحاصل شنو
همس: موش يا عمو انت كان اديتنا انا عمار شهرين
محمد: ايي
همس: عمو وانا وعمار ما قدرنا نتفق كزوجين شايفين احسن انو علاقتنا ترجع ذي ما كانت اب وبتو . عاينت لعمار كان متفاجأ من كلامي وانا عيوني دمعو مسحتو سريع وعاينت لعمي
محمد: متأكدة من كلامك دا لسع قدامكم شهر كامل
همس: شهر ما حيغير حاجة
محمد: القرار دا اخدتو الاتنين؟ . عاينت لعمار كان ساكت ومخلوع من كلامي
همس: ايي
محمد: وانا كان وعدتك وما بخلف بوعدي ومدام ماف تفاهم يبقى الزواج استمراريتو مستحيلة عمار ارمي عليها الطلاق ........
"كان الفرق شاسع بين أنّ تعتذر لأنّك أغضبتني وبين أن تعتذر لأنّك خذلتني.. الغضب يكفيه الاعتذار، وأحيانًا يكفيه فقط مساحة من الوقت والصمت، لكن الخذلان لا يخفّف مرارته الاعتذار، ولا الوقت ولا الصّمت.. كلّ الآمال تسقط دفعة واحدة.. تهوي وتذوي وبشدّة."💔💔
16
بعد كلمت عمي بقرار الانفصال
محمد: انا كان وعدتك وما بخلف بوعدي ومدام ماف تفاهم يبقى الزواج استمراريتو مستحيلة عمار ارمي عليها الطلاق . دموعي نزلت وغمضت عيوني منتظرة يقول لي انتي طالق بس كان ساكت وطول ما اتكلم فتحت عيوني وعاينت ليهو كان لسع متفاجأ وما استوعب الموضوع
محمد: عمااار . اتنبه
عمار: نعم ابوي
محمد: قولت ليك ارمي عليها الطلاق
عمار: معليش يا ابوي بس انا ما حأطلقها . اتفاجأنا الاتنين
محمد: كيف يعني موش اتفقتو؟
عمار: لالا ما اتفقنا ابدا وانا ما بطلقها .
محمد: همس موش قولتي اتفقتو . سكتا لانو بقيت في موفق محرج جدا
همس: عمي انا دايرة اطلق وانت وعدتني
محمد: انتو يا عيال مالكم
عمار: حصلت مشكله صغيرة بينا بس
محمد: يا بتي المشاكل بتحصل دايما بس ما اي مشكله بحلوها بالطلاق بس لو مصرة دي حاجه تانيه
همس: مصرة يا عمو
محمد: عمار ما بتقدر تجبرها تكفي معاك
عمار: ابوي انا ما بطلق مرتي ولمن نحل المشكله الحصلت دي بالاول وبعدها لو مصرة على الطلاق دا كلام تاني بس انا ما بطلق
محمد: يا عيالي كدا استهدو بالراحة وحلو مشكلتكم هسي بخليكم براكم ويا عيال باقي ليكم شهر لو بالجد ما اتفقتو تطلقها يا عمار وغصبا عنك قولتي شنو يا بتي
همس: بس يا عمو
محمد: اسمعي كلامي لمن يتم الشهر وكنتي لسع في موقفك غصب عنو بطلقك منو اتفقنا؟ . ما كان عندي حل تاني هزيت رأسي بموافقة وقام طلع خلانا عمار قام من محلو جا قعد جنبي
_ دايرة تطلقي مني؟ . قومت بكيت مسك لي يدي سحبتها منو
__ عمار زح مني
_ زمان بتجري تبكي في حضني حتى لو زعلانة مني هسي بتنفري مني؟
__ انت السبب في دا كلو
_ والله ما كنت شايف قدامي وزعلان انو خنتي ثقتي . قومت ضحكت وصفت ليهو في خدي كان في علامة جرح كان بسبب الكف لانو لابس فيها خاتم
__ شايف العلامة دي دا بسبب الكف الاخدتو منك عمري ما بنساها ليك . اتخلع انو ضربني للدرجة دي قام بكى كنت داير احن بس قلبي كان مليان شديد
_ هسي لو لسع بتحبني ذي بتك وعندي اعتبار عندك طلقني . رفع رأسو مخلوع من كلامي
__ همس!!!!!
_ همس كرهتك وما دايراك تجبرها تكون معاك؟ . سكت وكان بعاين فيني بس وقام طلع خلاني بكيت قدرتي كدا ورجعت الغرفة
وسام: مشيتي وين
همس: طلبت الطلاق بس
صفا: شنووووووو
وسام: همس انتي جادة؟
همس: جادة . قامت تبكي
وسام: انا السبب
همس: ما انتي دا سبب يخليني اعرف عمار وكيف بفكر فيني احتمال يحصل موقف تاني معناهو حيصدق عيونو بس وما حيسمعني فالحمدلله عرفت بدري . رقدت في السرير وغطيت وشي وبكيت بعدها عاينت لدبلتي تاني بكيت
كنت مصرة على الطلاق بس
اليوم التاني جاتني عمتي حنان
حنان: همس انتي عمار اتصل ليكي؟ . استغربت من كلامها
همس: لالا ليه
حنان: من امس ما ظهر وتلفونو قافل . اتخلعت
همس: من امس ما رجع؟
حنان: ايي والله وقلبي مآكلني يكون حصل ليهو حاجه
همس: لالا عمار كويس
حنان: اتناقشتي معاهو؟
همس: ايي بس عادي كان
حنان: حيكون مشى وين يا الله . وقامت طلعت وقلقت بي انا ذاتي انتظرناهو اليوم كلو ما جا خوفنا خلاص عدا اليوم البعدو برضو ما جا البيت كلو قلقان وانا دي ببكي بس وقولت اكيد بسبب كلامي ابوي اختفى كدا
اليوم التالت جا داخل مع سفيان وفي لصقة في وشو وحالتو كيف كيف اتخلعنا وانا واقفة بعيد وببكي
محمد: كنت وين يا عمار وليه حالتك كدا . سكت ما رد
محمد: بتكلم معاك . كان قاعد في السرير في الحوش وماسك رأسو بس
محمد: سفيان لقيتو وين
سفيان: لقيتو في ظلط...... اتصل لي جيت سوقتو وديتو المستشفى ضمدو ليهو جرحو ما اتكلم طول الطريق . عمتي بتبكي
حنان: كنت وين يا ولدي احكي ما تقطع قلبي عليك كدا . البيت كلو واقف في رأسو وهي ماسك رأسو ومنزلو بس وما بتكلم قربت انا
همس: عمار . رفع رأسو عاين لي
همس: كنت وين . عاين لي مسافة وشايفني ببكي
عمار: كنت في السجن . كلنا شهقنا بصوت واحد
حنان: واااااي يا جناي كنت في السجن؟ . طوالي رجع نزل راسو ذي قبيل
محمد: في السجن تعمل شنو وليه دخلوك ومالك ما ضربت كلمت زول
عمار: حليت الموضوع
محمد: انت يا ولد مجنون شنو حليت الموضوع ما عندك وليان تكلمهم . قام فوق
عمار: ابوي نتكلم بعدين . ومشى على غرفتو وانا جريت غرفتنا بقيت ابكي كل ما اتذكر المنظر الرجع بيهو عمار
بعد ساعتين كدا سامعة جوطة برا لبست توبي بس وجريت حفيانة كان في حوش عمو محمد لقيتو بجوط مع عمار وهو كان طالع
محمد: تعال هنا طالع ماشي وين . عمتو حنان ماسكة فيهو وبتبكي
عمار: امي خليني
حنان: ليه داير تقطع قلبي عليك
عمار: ما بقطع قلبك خليني برجع ياااخ
محمد: يا الله صبرني . ومسك رأسو شكلو ضغطو ارتفع قومت جارية انا وتوبي نصو في الارض ونصو فيني وقفت قدامو لعمار وانا ببكي
همس: ابوي ما تطلع . ما عارفة عاين لي بأي نظرة بس
حنان: همس اتكلمي معاهو عليك الله
همس: ابوي عشاني ما تطلع
عمار: ياااخ برجع انا . هزيت ليهو رأسي بمعنى لالا
همس: لالا ولو طلعت رجلي على رجلك . غمض عيونو شديد وعاين لي وعاين لامو
عمار: ما هارب انا يا ناس . مسكتو من قميصو
همس: ابوي ما تعذبنا عليك الله . عاين لينا مسافة
عمار: حتى ما تبكو ياااخ . مسحنا دموعنا سريع
حنان: ارجع جوا . اتنهد ورجع جوا مسكت عمتو قامت بكت
حنان: ما عارفة ولدي دا الجاهو شنو ما كان كدا ابدا والله . قومت بكيت بس وبعدها رجعت البيت رغم دا كلو هو ابوي وسندي ومأمني وسلامي ما بقدر بدونو بقيت خايفة عليهو قعدت شوية تعالي مشيت بيتهم لقيت عمتو قاعدة
همس: عمار وين قاعد موش؟
حنان: ايي نايم جوا
همس: الحمدلله . قعدت معاها شوية ورجعت البيت
صفا: عمار مالو
همس: ما عارفة والله
صفا: بقى عصبي شديد
همس: اممممم
اليوم التاني عمو محمد منعو من الشغل بعد الفطور قاعدين جات الدورية مشيت فتحت الباب
الشرطي: دا بيت عمار محمد سليمان؟ . اتخلعت
همس: ايي
الشرطي: هو موجود؟
همس: موجود
الشرطي: خليهو يطلع لينا . قلبي كان بضرب شديد مشيت بيت عمي لقيت عمتو
همس: عمتو الشرطة برا دايرين عمار . ضربت صدرها بخلعة
حنان: واااي يا ولدي . جرت جوا وانا كنت وراها دخلنا الغرفة فجأة لمن خلعنا عمار
عمار: مالكم
حنان: الشرطة برا انت عملت شنو . قام وقف
عمار: برا؟ . هزيت ليهو رأسي بمعنى ايي
عمار: ماف وحدة فيكم تطلع . قام طالع انا مسكتو
همس: ابوي انت عملت شنو .
عمار: ما عملت حاجه
همس: ليه الشرطة هنا خلاص
عمار: لمن ارجع . وطلع ونحنا وراهو ركب معاهم ومشو ونحنا بنبكي وعمتو مشت تتصل لعمو محمد وانا جريت لصفا
همس: صفا عندك رقم سفيان؟
صفا: ايي . اضربي ليهو اديني ليهو وانا ببكي وهي مخلوعة فيني
صفا: في شنو . صرخت فيها
همس: انتي اديني بس . اتصلت ادتني ليهو
همس: سفيان الحق عمار
سفيان: مالو عمار
همس: هسي الشرطة جات ساقتو
سفيان: تمام تمام ما تخافي
همس: الحقو عليك الله
سفيان: تمام . وقفلت منو والبنات بحاولو بهدو فيني وانا قلبي مقطوع خوفت انو يدخلو كم يوم ويعذبو ونحنا ما عارفين الحاصل شنو اصلا مشيت لعمتو بقينا قاعدين بس تلاتة ساعات جو راجعين مع ابوهو وسفيان
حنان: الحصل شنو
محمد: ماف حاجة استجواب بسيط بس
حنان: كيف بسيط وهو جو ساقوهو من البيت
محمد: خلاص يا حنان خلي يرتاح . سكتت وعمار دخل غرفتو
محمد: تعالي يا حنان وانتي يا همس ادخلي شوفيهو . هزيت رأسي بمعنى تمام . وسفيان استذأن وطلع وعمتو مشت مع عمو وانا دخلت لعمار براحة فتحت الباب كان راقد وكنت خايفة اقرب بقيت اخاف منو لانو عمار اتغير شديد بقيت اقرب براحة براحة لمن حسا بزول جوا الغرفة قام فجأة لمن اتخلعت صرخت خفيف ورجعت ورا سريع هو استغرب من خوفي منو
عمار: خايفة مني؟ . بقيت اعاين ليهو بخوف مسح وشو بأخر نفس
عمار: اطلعي برا . كنت لسع واقفة صرخ فيني
عمار: اطلعي برا . من الخلعة لمن نطيت وبقى خاتي اياديهو في وشو مسافة وانا واقفة بعاين ليهو وخايفة اقرب قام جا اتجاهي كنت خايفة بس ثبتا مهما حصل دا عمار يعني آماني برغم كمية الخوف دي كلها وقف قدامي
عمار: همس امشي من هنا . طوالي حضنتو شديد حسيت انو محتاج كدا طوالي شدد من حضنو لي وقام يبكي وانا بكيت معاهو واقفين خمسة دقايق كدا بعدها زح مني
همس: ابوي ارتاح نتكلم بعدين
عمار: حتتكلمي معاي؟
همس: هو انا بقدر بدون ما اتكلم معاك . هز رأسو بمعنى
لالا
همس: بس خلاص
عمار: لسع خايفة مني
همس: انت مصدر خوفي ومصدر آماني في نفس الوقت
عمار: هل انا بقيت مصدر خوفك؟
همس: ابوي انت ما كنت كدا
عمار: ما عارف يا همس وما فاهم حاجه
همس: ارجع ابوي الزمان الحنين
عمار: لو رجعت حترجعي من طلب الطلاق . هزيت رأسي بمعنى لالا وجريت من قدامو رجعت بيتنا دايرة انسى الحاصل بس ما قادرة اتجاوز ........
أتمنىٰ لو أننِي انسَى
لكَن إنكسَاري فِي تِلك
اللحَظة لا يُنسَى
وفِيضانات الدَموع
لا تُنسى
لا يَنسَى الإنسان
مَن نزع مِنهُ الأمان
لا يَنسَى
رجفة يدهَ وبكاءهُ
في جَوف اللَيل .
__________
من جانب فردوس
حياتي كانت ماشة تمام ماف مشاكل بيني وبين سفيان لمن حسيت عندو يومين كدا ما على بعضو واخر مرة جا مهموم كدا
__سفيان
_ نعم
__ مالك ما على بعضك اليومين دا
_ ماف حاجة
__ لا في حاجه الحاصل شنو
_ فردوس خلي الكلام الكتير براي مصدع ياااخ . زعلت منو وانا هامة عشانو بس قومت خليتو ودخلت جوا قعد شوية وجاني
_ جنة
__هممم
_ ما قاصد اتزهج فيكي بس ياااخ زهجان
__ حبيت اشاركك همومك بس مدام ما عاوز ما بتدخل فيك تاني
_ جاي من محل الشرطة . قلعت عيوني وجيت وقفت قدامو ومسكت ايدو
__ مالك حاصلة ليك حاجة؟ . مسح وشو بأيدو جريت جيبت ليهو موية وجريتو وقعدتو في السرير واديتو شرب موية
__ في شنو يا سفيان الحاصل معاك شنو ما تخوفني
_ ما تخافي ما مشيت عشاني . قلبي ارتاح
__ اها
_عشان عمار . فتحت عيوني بصدمة
__ عمار؟؟؟
_ ايي حاصلة معاهو مشكله وكان بايت يومين في الحراصة وتاني الليلة ودوهو عشان الاستجواب واتصلت لي همس وجاي من هناك . كنت مصدومة
__ الحاصلة معاهو شنو
_ ما تسألي من الحاصل بس قلقان عليهو ما عارف الحاصل عليهو شنو ودا المزهجني . مسكت من ايدو ورقدت في كتفو
__ ما تقلق كل حاجه حتكون تمام
_ بتمنى والله
__ احتمال متناقش مع همس بس متأكدة حيتخطى المرحلة دي
_ ان شاءلله يارب اها امسيتي كيف
__ كالعادة ماف موضوع قاعدة بس
_ هممم
__ قوم اخد ليك حمام وبخت ليك حاجه تأكلها
_ ما عندي نفس
__ بأكل معاك اها كدا كيف . وغمزت ليهو قام ضحك
_ تمام خلاص
حاولت افرق ليهو شوية لانو كان زعلان على الحاصل مع عمار وهو اكتر زول مقرب ليهو ومن قامو سوا كل طفولتهم ومراهقتهم مع بعض وقولت بعدها اشوف همس واتكلم معاها لانو اكيد حالتها اسوء من سفيان وسفيان بحاول يبين انو قوي عشان ما ازعل بس عارفة انو متأثر
" أعان الله قلباً تظاهر بالقوة وهو أشد المكسورين "🤍