رواية بيت جنب المقابر
الفصل الثاني العشرون22
بقلم دانيا
المساء قاعدين على طاولة العشاء ، امي قالت لينا خالتكم فايزه جايه من قالت كدا كنا بنتونس فجأه كلنا سكتنا ووقفنا اكل ، مافي زول فينا نطق بحرف، قاطع الهدوء دا صوت ابوي وهو بقول تجي بالسلامه جايه زياره ول جايه عافيه ، امي قالت ليهو جايه لأنو قالت لي م فضل ليها زول هناك بعد نحن سافرنا وانت عارف امي وابوي الله يرحمهم وهي م عندها زول غيري انا وبتها ملك بتها الوحيدة وهي راجلها الله يرحمو .
قالت جايه وعاوزة تلقى ليها بيت وتسكن جنبنا هنا ، قال ليها مامشكله الله يجيبها طيبه وهو بقول الكلام دا بدت عليه ملامح التوتر .
بعد اتعشينا وصلينا طلعنا فوق ، امنيه قالت لي انتي م حسيتي بشيء غريب لمن قالوا خالتو فايذه جايه ابوي فجأة اتوتر وانزعج لكن م قدر يقول ليها حاجه لأنو دي اختها الوحيدة لكن ما نحن عارفين طبع خالتو فايزه وبتها هي لو وقفت على كدا م مشكله لكن مع وضع البيت دا ح تفضحنها والله يستر عليها.
بعد يومين كدا جو ناس خالتي فايذه مع بتها ملك ، هم وصلو العصر كدا قعدنا اتونسنا معاهم واتغدينا وقبل يرتاحو قالوا عاوزين يشوفو البيت ، حامو في البيت فوق وتحت قالت لأمي بيتكم دا هسي ما كبير وحلو كمان ماشاء الله والبنات براهن قاعدات فوق ، وفي غرفه وصالون فوق فاضيين ممكن نقعد فيهم نحن وكدا بنونسكم وبنوفر حق الاجار رايكم شنو ؟ امي بقت ساكته وم عارفه تقول ليها شنو وابوي مافي لسه م جاء من الشغل والبراء في الكوره امي قالت ليها كدي هسي انتوا ارتاحو لاحقين على الكلام.
ملك قاطعت حديثهم وقالت ياجماعه انتوا وين برو ، كلنا سكتنا وعلى وجوهنا علامه استفاهم عاينت ليها بحاجب مرفوع قلت ليها برو ؟ قالت لي قصدي البراء ، امي قالت ليها مشى الكوره انتوا جايين من سفر تعبانين اطلعوا فوق ارتاحوا .
طلعن قعدن في غرفة امنيه وامنيه جات قعدت معاي، قاعدين نتونس جاتنا اسراء قالت لينا تصرفات البت ملك دي ح توديها في ستين داهيه والكف الأخدتو هسى ح يكون قليل عليها ، قلت ليها هس اسكتى يابت هسي لو جات ماره وسمعت كلامك دا تقول شنو ، امنيه قالت لي والله ياآيه النصيحه اول مره اسراء تقول كلام منطقي بالجد لو دا حالها ح تتعب .
قاعدين كدا سمعنا صوت امي بتنادي لينا نزلنا تحت لقينا ناس ابوي جو ، سلمنا على ابوي وسألنا من خالتي قلنا ليهو فوق برتاحوا