رواية بيت جنب المقابر
الفصل الثالث والعشرون23
بقلم دانيا
بنتونس مع امي وابوي دخل يستحمى ، ناس خالتي نزلو من فوق عاوزين يسلمو على ابوي لقوهو دخل يستحمى قعدو يتونسو معانا ملك بقت تسأل من برو (البراء) قلنا ليها بكون دخل يستحمى لأنو ياداب جاء من الكوره .
امي قالت لي ياآيه ختي لناس ابوكي العشاء وفي قهوه في الصباره عملتها هسي جيبيها ، مشينا المطبخ انا وامنيه بنخت في العشاء لناس ابوي ونزلنا كبابي الجبنه عاوزين نوديها لناس امي برا نسمع ليك صوت صراخ بت الدم جمد في عروقنا من الخلعه لمن الكبابي وقعت مننا واتكسرت حتت حتت جرينا برا لقينا الصوت جاي من غرفه البراء الصوت دا صوت ملك جرينا عليها لقيناها ماسكه وشها ومغطيه وشها كلو بأيديها والبراء طلع من الحمام مخلوع من الصوت ، قلنا ليها في شنو يابت مالك ؟ امها جات مسكتها وبتسأل فيها مالك يابت هديتي حيلي في شنو مالك وهي لسه مواصله في البكي امها مسكت يدينها وزحتهم ليها من وشها ، لمن شفت وشها لمن جسمي كشى واطرافي بردت من الصدمه ، امها بقت تكورك دا شنو يابت وشك مالو ، امي قالت ليها ملك يابتي وشك مالو الجرحك كدا شنو ، ابوي جاء من هناك قال لينا مالكم الحاصل شنو ؟ لمن شاف ملك قرب عليها وقال ليها وشك مالو يابت الحاصل عليك شنو وهي من الصدمه م قادره تتكلم.
طلعناها برا والبراء جاب علبة الاسعافات قال لينا زحو منها هي في حالة صدمه خليها تهدأ شويه وبعدين تحكي ، وقعد جنبها وبقى يمسح ليها بالقطن والمعقم على وشها ، بعد هدت شويه قالت انا كنت عاوزة اشوف ود الخاله واسلم عليهو لأنو طولت م شفتو ولمن دخلت هو م كان موجود وقفت وبقيت بعاين في الغرفه وبفتش فيهو بعد شويه حسيت بالنور بدأ ينور ويطفي وبعدين شفت حاجه سوداء كبيره نطت فيني وم حسيت غير بحرقه في وشي من اثر الجروح م عرفتها دي شنو.
هنا نحن ياداب فهمنا الحاصل شنو وبقيت اتزكر في كلام اسراء والحصل ل سهى بت الجيران ، وبدت على ملامح ناس امي التوتر وعم الهدوء بينهم إلا ملك كانت بتبكي، انا قلت في نفسي حصل الكنا خايفين منو ، قاطعت الهدوء دا وقلت ل ملك ياالله منك يابت الخاله انتي م بتعرفي نحن عندنا هنا قطه سوداء وهي بتتوتر لمن تشوف زول جديد اول مره يمكن عشان كدا خربشتك في وشك ، قالت لي لكن ياآيه دا م كان حجم قطه دي كانت اكبر من الكلب ، امي طوالي قاطعت كلامها وقالت ليها ااي يابتي