لحظه ادارك اني ثقيله وما مهضومه في حياه ناس حتي لو كنت مبسوطه الحاجه دي بتزعلني رغم اني مبسوطه وفي قمه الانبساط مع محمد وهو كمان بس هجوم المجتمع كان قاسي علي ف نظرهم انا تقيانه وشايفه روحي وما متواضعه بس عشان م اختلطت بيهم رغم اني زاتي اتولدت واترعرت في قريه بس الفرق بين قريتي وقريه محمد نحنا فينا صفات المدينه شويه نحنا الصغار ما بنخالط الكبار ومركزين في حياتنا اكتر سواء كانت قرايه او بدايه حياه جديده مع شريك حياتك يعني انو اكون بتاعت جبنات ومرقات دي الا تكتر علي هموم الحياه وابدا افتش لمواضيع بره دا لو اصلا وصلت للمرحله دي وحتي لمن نطلع للمجتمع بنطلع بس بصوره حلوه نمشي لزول مريض عرس سمايه بكا وهناك بنختلط بالناس حتي في تفكيرهم كنت بشوف انهم مهمومين بالبيت وتفاصيلو عكس قريه ناس محمد اول شي من افطرو اقعدو في المظله من بعد الفطور للعصر جبنتهم تكون مدوره ودعمو داخل ود خالو داخل نسوان الفريق وكل زول بدخل بجي بكلام براهو حسيت انهم بتنافسو في الشمارات والواحده م بتقعد سمح طوالي تمسك الناس ديل بالدور ناس فلان بتهم قالو مطلوقه وهامله وكعبه ومرت فلان قالو عملت وعلان قالو طلق دي الونسه وكل زول بجي بتونس لا يقل شمارات عن الزول القبلو وانا كنت بكون ساكته بعاين بس ومن داخلي بستغفر خلال شهر عرفت البت الكعبه من الكويسه وعرفت المطلقه من البتشاكل راجلها وعرفت الحملت بالحرام من بتاعت الاولاد ويا عالم كلامهم دا صحيح ولا كذب انا خلال شهر سمعت اسماء م شفتهم بي عيني بس عرفتهم من خلال القطيعه فيهم الحاجه الحلوه في محمد متحضر شديد ما زيهم كنت لمن الونسه تنتهي امشي بهناك غرفتي الاصلا بكون نفسي ادخلا من بعد افطر احسن لي نومه من قهوتهم الكلها نميمه دي وما قاعده اتناقش مع محمد حتي اي ملاحظه لاحظتها لي اهلو ما قلتها ليهو احتفظت بيها لنفسي بس قلت لي متين ي نسيبه ح تعيشي في المجتمع البياكل لحم الناس ديل كنت بحلم بالاستقرار ان شاء الله راكوبه فيها انا ومحمد وفيها قصه حبنا خاليه من تلوث المجتمع وما قادره افتح خشمي لانو اكتشفت عندهم الولد ما يطلع من اهلو لاي سبب وهو كان مكلمني قال لي موافقه قلت ليهو موافقه
اتوقعت اي شي في قريتهم الا انهم يكونو بالصوره دي المهم بعد كل جلسه قهوه لازم امو تشكيني ليهو مرتك ساكته خجلتني مع النسوان والنسوان قالن لي مرت ولدك كعبه اظنها وهو ما عايز اهلو يشوفو فيني عيب مره من المرات قال لي نوسه انا م عايز منك غير تخشي مع اهلي ديل انتي ما بتعرفي تفكيرهم كيف وانا مقدر حته انك م عايزه تخوضي في الكلام والنميمه بس انا اعمل شنو دا الوسط العايشين فيهو انتي م ح تقدري تغيريهو ولا انا عشان نكون واضحين هم من قامو كده قلت ليهو عليك نور انت ليه م زيهم قال لي نوسه انا زول حياتي كلها عديتا قرايه الحله دي م بجيها الا اعياد قلت ليهو وهسي انت م بتجيها الا اجازه يعني انت برئ من اي قول في حلتكم واجي انا اقع في نصهم واعرف الطلقوها ومن الحملت بالحرام قال لي كيف الكلام دا قلت ليهو يلا دي ونسه النسوان الشكني لي امك يعني انا زوله لا شفتها لا رئيتها اقولو قليله ادب اشاركهم اقول ليهم شنو اي حرف بنطقو ذنب علي ي محمد قدر الحته دي عليك الله قال لي انا اعمل شنو اغير المجتمع قلت ليهو لا م تغيرو نغير حياتنا نحنا انا سوقني معاك ان شاء الله تعيشني في راكوبه رضيانه راكوبه اهون لي من اني اختلط بيهم قاطعني في الكلام وقال لي لا ح تخالطيهم ي نوسه ديل اهلي ماف زول بقدر استغني عن اهلو وحته انو ارحلك دي شيليها من راسك وطلع بقيت ابكي وقدر ما عاينت ليها بكل الاتجاهات ماف طريقه انا عروس جديده الناس تقول علي شنو ولا بقدر احكي لي اهلي القصص دي اقول ليهم شنو زاتو حسيت انو نفسي مكتوم وتعبت ومن ناحيه انا ومحمد ما عندنا اي مشكله بحبني شديد وانا كمان بس الحمد لله فضلت اعافر في الحياه وحصل لي حمل كنت طايره بالفرحه ومحمد كمان وكل يوم بمر علي ملان درامات ومحمد بفوت الشغل وانا بعافر معافره عشان اخد لي نومه مرات بكونو جارين في القهوه للمغرب وكتير بنوم وانا قاعده في عز ونستن وجوطتهن دي برفع رجولي في السرير وبنتكل علي الحيطه وباخد لي نومه ولمن الاحظو لي النسوان القاعدات بقولن لي يختي انتي م دايرانا ولا شنو نحنا نتونس انتي نايمه بكون نفسي اقول ليهن هي وينا ونستكن الكلها قطيعه بس لو قلت كده الحله كلها بتشن علي هجوم جهل عايشين فيهو غريب بقعد اعتزر وافتش لي عزر وهن ما يصدقن يلقنها فرصه عشان يلفتن نظر نسيبتي لي لانهن ضامنات بالعشرة انها ح تكلم علي راجلي ويشاكلني كرهتهم كلهم بس مجبوره اني اعيش وع قدر م اقدر اعافر اني م اكون زيهن والشي المؤسف الونسه بتكون قدام اطفالهم وما كده اطفالهم بشاركوهم الكلام وعارفين اي شي مرات بسرح بقول هسي هن الضمنن شنو انو م بقطعو فيهم ولا الضمنهم شنو الشفعهم امخاخهم كلها كلام كبار اكبرو واكونو زي البقطعن فيهن ديل كنت متاكده انو اي زول بسل لسانو في الناس بجي البقطع لسانو وكذالك الدايره تدور ومواصله في رحله المعانا ومحمد تعب من اقناعي ويوم من الايام خيرني قال لي يا انا واهلي والمجتمع يا انتي ما عايزاني قدر م حاولت اقنعو بس بحسو ملان كلام اتجاهي ومرتك عامله روحها متعلمه ومرتك متفلسفه دا مجرد اني مواصله تعليمي وهم عندهم الواحده تعرس تشوف قطيعتا علي وين وتملا البيت شفع وتطلع من الصباح تجيهم المغرب الناس ديل بعملو اكل لي اولادهم متين نفسي اعرف قلت ليهو محمد انت احمد ربك انك م وقعتا في واحده اليوم كلو لافحه توبا ومباريه الونسات احمد الله انك متي ما تجي بتلقاني قاعده قال لي مافي زول بعيش براهو قلت ليهو انا م عايشه براي وبطلع بس م بالصوره الهم عاوزيني بيها حسيتو مضايق مني قلت ليهو محمد اناح اطلع للمجتمع وذنبي في رقبتك في الاول الاختلاط كان لي صعب بقيت اقول لي الجيران لمن تجو ماشين قهوه انا بمش معاكم سبحان الله حسيتهم انبسطو بس انا عمري م كنت مبسوطه عملت الحاجه دي غصبا عني وطلعت غصبا عني ومرت الايام وانا بفطر وبفكر انا وجاراتي نطلع لي منو نشيل سكرنا والبن ونمشي نتونس وخلاص انا بقيت شبه عرفت ناس القريه البقطعن فيها بكون عارفاها وكنت بشاركن وبديهن راي وانا عارفه انو انا خوضتا في الكلام من ناحيه بحسهن مبسوطات بكون مرتاحه ومن ناحيه تانيه زعلانه شديدمن نفسي ما نفسي اتغير مرت الايام وسبحان الله لمن تسلك طريق كعب بحلا ليك بقيت معاهن مدمنه قطيعه وقيل وقال وبصحا من الصباح اقول ياربي الليله الحاصل شنو والشمارات شنو مرات م بقدر انتظر مواعيد القهوه بكورك لي جارتي بالحيطه تديني الشمارات لغايه ما يوم سمعت انو فلانه البطلع معاها للقهوه وجنها قطيعه في الناس ونظريات انها زوله كعبه وم كويسه سبحان الله حسيت انو الدايره تدور ……..يتبع