رواية الحب قدر لا خيار الفصل الخامس عشر 15 والسادس عشر 16 بقلم غاده عبد الرحمن
الفصل_الخامس_عشر💞💞
تبقي الذكريات صامته بداخلنا تاركة الما لايزول
جلست مع نفسها تحاسبها تارة وتؤنبها تارة اخري متي حدث كل ذلك لابنتيها دون علمها وكيف هل كانت أم سيئة أو مهملة اين مسؤليتها كأم وماذا فعلت لتستحق كل ذلك رجعت بذاكرتها لسنوات مضت
flash back
دائما ما كانوا مجموعة من الاصدقاء معا في كل الاوقات محسن , عامر , ميرفت , سوسن و غيرهم من الاصدقاء
دوما ما كانت ميرفت تحاول استمالة عامر ولكنه كان قلبا وقالبا متيم ب سوسن يحب ما تحب و يمقت ما تكرهه وكان حبهما واضح للجميع الا هي فضلت ان تتجاهل الحقيقة البينة وتنسج احلام في خيالها
حتي جاء اليوم الذي اوفي فيه عامر بالوعد وتقدم لخطبة سوسن وتم تحديد موعد لعقد القران ومن هنا بدأت المواجهة
سترتدي الابيض وتزف أجمل عروس لتضئ الدنيا بلألأها
اقتربت منها صديقتها لتهنئها بزفافها
- مبروك يا سوسن
= الله يبارك فيكي يا ميرفت عقبالك
- كان المفروض انا اللي اقولهالك عقبالي ازاي وانتي اخدتيه مني وحرقتي قلبي
= الكلام ده ملوش لازمة
- عندك حق بس خليكي فاكرة بكره هندمك اشد الندم ومش هرتاح غير لما اخد منك كل حاجة وهتشوفي
مرت الايام وتزوجت ميرفت من محسن لتكون بالقرب من عامر و لتفسد حياته الزوجية لم تكن حياتهم كالان بل كانو مجتمعين في فيلا واحدة كأخوات وكان والديهم علي قيد الحياة
حاول عامر وسوسن الانجاب لعدة سنوات ولكن الله لم يشأ و انجب محسن تميم وفرحوا به جميعا وكمحاولة اخيرة من عامر وسوسن قرروا السفر للخارج دون ان يعرف احد السبب الحقيقي أخذين العمل كستار لهم
- في ايه يا عامر الدكاترة قالو ايه
= قالو انك بتاخدى حبوب منع الحمل بشكل منتظم
- انا والله ما حصل
= عارف وده اللي قلته للدكاترة وان شاء الله لسه في امل
بعد عامين ونصف عادو الي وطنهم حاملين معهم ابنتهم الاولي لميس
فرح الاهل بها واحاطوها بالحب والحنان
- مش هتبركيلي يا ميرفت
= مبروك يا سوسن جبتيها منين البت دي
- جبتها !! دي بنتي
= بس انتي مبتخلفيش
- مين قال اهو الدليل قدامك
= انا متأكده
- متأكده فعلا شكي كان في محله يبقي انتي اللي كنتي بتحطيلي حبوب منع الحمل بس ازاي
= فاكراني هخاف لما تعرفي طب ايو انا اللي عملت كده فنجان الشاي اللي بتاخديه مع حماتي كل يوم وتسيبوني زي الكلبة لوحدي
- انتي مريضة ولازم تتعالجي
كانت سوسن ضعيفة و متعبة دائما بسبب علاجها بالخارج و الحمل والولادة فكانت لميس في الغالب تجالسها حماتها او ميرفت
مرت السنوات وميرفت علي اقتناعها بان لميس ليست ابنتهم حتي حملت سوسن في توليب وشهدت ولادتها بأم عينيها
طفل جديد رضيع يحتاج اهتمام ورعاية مختلفة عن من كبر وتعلم وكانت هذه نقطة الدخول للميس
- شايفة يا لميس ماما مهتمة ازاي ب توليب وانتي لا
- شايفة ممنوع تشليها وتمسكيها ازاي
- شايفة الهدايا والالعاب وانتي لا
- اشمعني ماما جابت توليب هنا وانتي سفرت بره
- اوعي تكوني مش بنتهم اتبنوكي ولا ايه
- اوعي تحللي خليك علي قلبهم كده
- انا بس اللي بحبك حتي شوفي بعينك
عبارات ترددت دوما علي مسامع لميس جعلت الغيرة راسخة بداخلها ناحية امها و اختها فقد استغلتها ميرفت لتقوم بما عجزت عنه
back
تجمعت الخيوط في ذهنها الان اعتقدت ان بعد وفاتها واحتوائها ل لميس قد محت ما تركته ميرفت بداخلها ولكن اتضح لها العكس ولكنها لن تقبل بأن تضيع ابنتيها من يدها وعزمت علي ايجاد حل لانقاذهما معا
يصاب الانسان في حياته بعدة ابتلائات قد لايتعظ بأي منهم
مرت الايام والوضع يتزايد من سئ الي اسوء في حالة يزيد الصحية وقد بذل كافة الطاقم الطبي اقصي طاقاتهم
- هيروح انهاردة يعني يا دكتور
= ايوه يا حمزه , هكتبله خروج انهارده و باقي العلاج في البيت لو عايز ممكن ابعت معاك ممرضة عشان التغيير علي الجرح وكده
كاد ان يجيبه حمزه بالايجاب لولا تدخل شاهي
- لا يا دكتور انا هغير علي الجرح وهتابع كل حاجة متنساش ان عادل اخويا وهيبقي متابعني
= تمام ان كان كده توكلنا علي الله ليصمت لبرهة من الوقت ثم يستطرد
- مش عايز اقولكو ان النفسية مهمة جدا , بس حالة يزيد بيه النفسية مهمة جدا هو لسه مش متوعب ان الجزء السفلي منه مشلول نتيجة سقوط السقف المعلق علي رجله غير الحروق اللي مغطية جزء كبير من جسمه
ليجيبه حمزه بتفهم لحالة والده
= مفهوم يا دكتور مفهوم
ذهب الطبيب وتركهم وحمزه في حيره من امره كيف لوالدته ان تراعي والده بعد كل ما سببه من آلام لها ليتوجه لوالدته بالحديث
-=ليه يا ماما
= هو ايه اللي ليه يا حمزه
- هتهتمي بيه وتشرفي علي علاجه بعد اللي عمله
= في الاول وفي الاخر ده ابوك يعني ابو ابني و جوزي قدام ربنا وانا متربتش اني اسيب حد محتاج مساعدتي
- ربنا يخليكي لينا
= وربنا يهديك يا بني يلا هسبقك علي البيت اجهزله اوضة في الدور الارضي عشان السلم بدل ما
لا تتوقع شئ من احد لتري الكل جميل
مرت الايام وهو وحيد بين جدران اربعة لم يشغل تفكيره بمصابه بقدر تفكيره بها وبإبنته فنظرتها في اخر لقاء بينهم لم تفارق خاطره ابدا دائما ما تخيل خروجه من هنا بصحبتها وان يصفو ما بينهم
ولكن توقعاته اصتدمت بصخرة الواقع و تحطمت فكان في انتظاره معاذ رفيق دربه الذي حالما ما رأه حتي احتضنه بشده
- وحشتني يا تيموووو مكنتش عارف اني بحبك كده
= طب مش كفاية .. عايز اخد نفسي
- نفس ايه انت ريحتك زي المساجين
= انت اهبل يا بني ما انا كنت مسجون فعلا
استقلوا سيارة معاذ متجهين للمنزل
- الحمد لله علي السلامة يا صاحبي... انت مش فرحان بشوفتي ولا ايه
= كنت فاكر هلاقي حد تاني
ليجيبه معاذ مازحا
- وانا منفعش طب والله زعلتني هههههههه
ثم اردف بجدية
= توليب مع توتي لان البنت مبهدلة الدنيا وعايزاك والمفروض تشكر توليب علي خروجك
اندهش تميم من حديث معاذ فسأله
- وهي ايه علاقتها ده شغل محامين
= محامين ايه بس يا عم تعالي اقولك .....
ثم سرد له ما قامت به توليب من اجل انقاذه وعودته لاسرته مرة اخري
- وهي تعرف ادم ده منين وامتي وبينهم ايه
= تصدق انك قفل فعلا من كل الكلام وركزت في ادم كتر خيره الراجل انه ساعدنا والا كان زمانك لسه محبوس
- مش قصدي انا بسس...
= بس ايه ما تقول بتغير عليها صح
- اوي اوي يا معاذ حتي من ابويا وابوها
= ويا تري هي عارفة
- المفروض تعرف
= لا فعلا المفروض ,البت بتعلم الغيب ازاي معرفتش انك بتحبها و بتغير عليها و و و
- خلاص مش ناقصة رخمتك هحاول نبدأ صفحة جديدة
انهوا حديثهم حالما وصلو الي البيت وكان اول المستقبلين هي توليب الصغيرة
فركضت له عندما رأته ليهبط الي مستواها حاملا اياها ليضمها بشوق كبييير ولكن اعينه معلقة علي من هلت عليهم راكضة خلفها
والشوق يأكل كلاهما من الداخل دون افصاح لينزل ابنته ويستقبل حبيبته وعشقه الوحيد بين ذراعيه بشوق متحفظ من كلاهما
- الحمد لله علي سلامتك يا تميم
= الله يسلمك عاملين ايه
- بقينا بخير لما رجعت لنا
ليزداد سعادة بعد سماعه كلماتها لتغير مجري الحديث مردفة بإحراج
- تعالي يلا ارتاح وخد شاور قبل ما عمو يجي
قادته الي غرفتهما وقد قامت بتحضير كل ما يلزمه مما اثار دهشته
= مالك يا تميم واقف كده ليه
- هاا لا ولا حاجة
= طب يلا انا حطيت مكنة حلاقة جديدة جوه وهدومك كمان لو احتاجت حاجة اندهلي
انتهي من استحمامه فقد وجد ماكينة الحلاقة كما قالت و زجاجة من عطره المفضل و ملابس نظيفة معطرة مما دفعه اكثر لفكرة التفاهم معها والبدأ من جديد
- ها يا تميم تتغدا ولا تستني عمو
= لا هستناه بس بصراحة انا جعااان نوم
- طيب خلاص نام ولما يجي هصحيك ونتغدا كلنا سوا
وافقها بإيماءة من رأسه ثم اتجه الي الاريكة و لكن وجدها تسحبه من يده في اتجاه الفراش مردفة بهدوء
= انت اكيد تعبان وجسمك مكسر نام علي السرير اريحلك
لم يتردد في قبول العرض فهو بالفعل متعب جدا . غط في نوم عميق حالما وضع رأسه علي الوسادة كانت ملامحه في كامل الاسترخاء فلم تستطع مقاومة نفسها ان تلامس ثنيات وجهه بيدها واخذت تمسد خصلات شعره الناعمه حتي غطت في النوم بجواره دون ان تشعر فهي ايضا قد جفاها النوم في ليالي بعده
✨✨✨✨✨✨✨✨
التكبر يظهر عيوبك لعيون ناظريك و يحجبهاعنك انت فقط
وصل الي منزله محمل علي ايدي المسعفين يتبعه ابنه منكس الرأس حزين علي حال والده
- بابا احنا غيرنا اوضتك بدل ما تطلع سلالم وتنزل كده اريح لك
لم يجيبه بل اكتفي بتحريك رأسه دلاله علي الفهم
كانت شاهي في استقبالهم عند باب الحجرة وعلي وجهها ابتسامة عطف وشفقة علي ما أل اليه وضع زوجها سبحانه المعز والمذل لمن يشاء
= روح ارتاح انت بقي يا حمزه وانا هغير لبابا و اكله لقمة كده
بعد ان اتمت صنيعها معه وقفت بجواره تحاول حثه الحديث وان يتوب مما فعل
شوف يا يزيد الانسان ايه غير نفس طالع ويا عالم هيترد ولا لا ..... ربنا ابتلاك عشان عايزك ترجعله وتتوب عن افعالك اسمعني يا يزيد انا خايفة عليك ويمكن......
لم تكمل حديثها فقد تشبث بياقة قميصها ليجذبها الي مستواه ليكيل لها اقبح الكلمات حاول ان يصفعها بيده الاخري ولكنها مصابة ويحيط بها الكثير من الضمادات
- انتي فاكراني اني عشان بقيت بالشكل ده هتبيعي وتشتري فيا لا فوقي انا يزيد المغازي وهفضل طول عمري ابن المغازيه وهتشوفي هعمل فيكي ايه انتي والكلبة اللي جبتيها لحد بيتي , هسجنها وهقف اتفرج عليها و ارميلها بنتها لكلاب السكك
لم يخلصها من يديه سوي دلوف حمزه الي الغرفة قد كان قادما للاطمئنان علي والده ولكن ما رأه قد افحمه ليخلصها من يده وتهرول مغادرة للحجرة
= انت ايه يا أخي مش بترحم حتي وانت في حالتك دي ؟ امتي هترحمني بقي كفاية حرام عليك انا حاسس اني بقيت مسخ بغيض بسببك وبسبب تربيتك ليا لا انا عارف اتأقلم مع حد ولا حتي احب حد
- متنساش اني ابوك واللي غرزته فيك عمره ما هيتغير
= اوعي تكون فاكر اني معرفتش انك انت اللي ورا حكاية تميم و السبب في حبسه مش كفاية لحد كده انا تعبت
- كفاية ايه لو اقدر كنت لبسته مخدرات و خلصت منه وبعدين تعالي هنا و هو انت الملاك الطاهر مش ده اللي اخد حبيبة القلب اللي عمرها ما بصلتك بسببه و مش ده اللي مسيطر علي كل الفلوس والسلطة
= خلاص خلاص مش عايز اسمع منك حاجة
- بقي كل ده عمله عشان امك اللي حبت كل عيال العيلة وقصرت مع ابنها ... اصبر عليا اقسم بالله لاسجنهالك هي و القرشانه اللي معاها
= وهتسجنها بإيه ان شاء الله
- انت فاكر اني مشوفتش اللي قفل الباب ؟؟ انا عارف انها ست فريال وهسجنهم
= يا شيخ روح ما هي لو اتسجنت انت كمان هتتسجن ولا ناسي انك ولعت في المحل ريح نفسك عمي محسن بمعارفه ضبط الموضوع
- ولو برده اديني حرقت قلبهم علي فلوسهم وتعبهم
= حتي دي فشلت فيها وطلعوا انصح منك ومأمنين علي المحل وشركة التأمين هتعوضهم بثمنه واكتر
- يعني ايه يعني هم هيفوزو عليا ده لا يمكن ابداااااا نهايتهم علي ايدي
= كفاية بقي دمرتني وهتدمر الكل
غادر الغرفة تاركا والده خلفه يستشيط غضبا و لكن من قابلته كانت اكثر غضبا
لا تحسبن الرجولة ضربا للقوارير فقد جائتك مرتضية دينك و خلقك فأكرمها
- عايزة ايه يا رنيم وواقفة كده ليه
= اللي سمعته ده بجد انتو اللي عملتو كده في اخويا
- اه عندك مانع
= انت ايه يا أخي معندكش احساس تعملو كل ده و قدام الناس تبقو الضحايا و انا ايه كنت لعبه مش كده
لتقترب منه وهي مازالت تحادثه بغضب
- يعني توليب طلعت مظلومة فعلا و انت اللي بتجري وراها بس اهي اخدت واحد احسن منك انا مش عايزاك طلقننننني
هجم عليها بشكل مفاجئ ليجذبها من شعرها بقوة
= بتقولي ايه سمعيني كده .ده انتي حفيتي عشان ابصلك بس ودلوقتي بتتنططي عليا ده لا انتي ولا اي واحدة من صنفك
- ابعد عني يا حيوان انا بكرهك
= وهخليكي تكرهيني اكتر
خرج عن سيطرته و اصبح يخرج ما يثقل صدره في من وصاه الرسول عليها و اخذ يكيل لها الصفعات واحدة تلو الاخري
- ابعد عنها يا حمزه كفاية كفااية بقولك
بدأ يعود الي وعيه وكأنه كان مغيب لا يشعر بما يفعل ..... نظر الي نادين بتوهان لا يدري كيف جائت ولكنه وجدها محتضنه نادين لتحميها من افعاله
= انت ايه حيوااان هي دي الرجولة كنت فاكراك ارجل من ابوك بس للاسف طلعت شارب منه الخسة والندالة .....
ليجيبها بانهيار واعتذار
- نادين انا مش ممكن ااذيكي
= اللي يأذي مراته بالشكل ده عمره ما يصون اخته .. كنت مفكره ان خلاص بقالي سند و ظهر بس للاسف طلعت غلطانه والحمد لله اني مبنتش امال اكبر عليك
شعر بمن يداعب انفه وينادي عليه بصوت خافت ليبدأ في الاستيقاظ رويدا رويدا ليجد زهرته الصغيره تلاعبه
- بتعملي ايه هنا يا شقية
= جيت اصحي بابا وتوليب
- توليب !!
لينظر الي جانبه ويراها نائمة بجواره كملاك حارس وكم شعر بالسعادة لمجرد وجودها بجواره
= طب تعالي نطلع برا ونلعب سوا شكلها تعبانة
- لا عايزة توليب ...توليب
استنتج انها علي مشارف الدخول في نوبة بكاء
= طيب خلاص تعالي نصحيها
لتومئ برأسها وتتجه لتوقظها عن طريقة تقبيل خديها
- بتعملي ايه يا توتي
= توليب بتصحيني كده
- يا بختك
= بتقول حاجة يا بابي
- لا يا توتي صحيها يلا
= خلاص انا صحيت معلش اتاخرت عليكو هروح احضر الغدا
- طيب ياريت عشان انا جعان وعايز اتكلم معاكي بعده
= حاضر عن اذنك
بعد ان تناولو الطعام جلسو معا كعائلة لم تجتمع منذ فترة حتي رن هاتف توليب وبعد ان اجابت استأذنت منصرفة للخارج ليتبعها تميم ويستوقفها
- علي فين يا توليب
= هاا ولا حاجة نادين عايزاني ضروري وهروح لها مش هتأخر
- طيب ماشي
= محتاج حاجة
- لا ابدا متتأخريش بس
= متقلقش يا تميم احنا جوه الفيلا وبالبيجاما اهو
- طيب خلاص خلاص سلام
احتلها القلق من نبرة نادين فأسرعت الخطي فقلبها ليس مطمئن حتي وصلت الي مسكن نادين و طرقت عدة طرقات علي الباب
= ادخلي يا توليب
- في ايه يا نادين حصل حاجة
لتتبع نظرات نادين التي تؤشر لشئ خلفها لتجد نادين متكومة علي ذاتها وفي يدها كيس من الثلج تضعه علي وجنتيها بالتبادل
= لتهرع لها قلقة
- رنيم مالك في ايه انتي عملتي حادثة رنيم ردي عليا
= هي كويسة يا توليب اهدي هتفضحينا
- بس يا نادين في ايه مالها
لتسمع نحيبها الخافت لتجلس بجوارها وتحدثها برفق
= قولي لي يا رينو مالك يا قلبي في ايه قلبي وجعني
لترتمي في احضانها وهي تبكي وتردد اسم حمزه
- طيب خلاص اهدي هو اللي عمل فيكي كده
لتجيبها من بين دموعها
= ايوه لولا نادين كنت مت في ايده
- ليه هو فاكر انك ملكيش حد والله لاخلي تميم يطين عيشته
= لا بلاش تميم والنبي
- انتي لسه باقيه عليه انتي مشوفتيش وشك في المرايه
ليزيد بكائها وهي تجيب
= بحبه يا توليب بحبه من وانا عيلة صغيرة مشوفتش غيره
- وعشان كده هو مستقوي عليكي خلاص انا هكلمه بس بشرط
= ايه هو
- لازم تعلميه الادب وتسمعي كلامي
= انتي اتغيرتي خالص يا توليب
لتسرح توليب بخيالها عما كانت عليه وكيف اصبحت
- اللي شفته مش قليل ... المهم اتفقنا
= اتفقنا بس بشرط
- هتشرطي كمان وانا بساعدك, قولي يا ستي
= سامحيني يا توليب انا كنت مغيبة ومضحوك عليا
- انتي هبلة انتي اختي وصحبة عمري
لتجلس نادين في المنتصف مردفة
= وهو انا بنت البطة السودا انا معاكو وعلي قلبكو
ليضحكو معا متناسين بكائهم من لحظات....
في صباح يوم جديد .... اجتمعوا علي طاولة الافطار كأي عائلة عادية
- تميم هتنزل الشركة انهاردة
= اكيد يا بابا في حاجات كتير عايزة تتضبط وبالذات في غياب عمي يزيد وهاخد توليب معايا هنحتاجها الفترة الجاية
- برافو عليك انا كنت هقولك كده فعلا توليب لازم تنزل الشركة الفترة دي ونستفيد من دراستها ولا ايه يا توليب
علمت ان عمها يمهد لها الطريق فقد اعلن عن انضمامه لها في حربها القادمة بشكل ضمني
= طبعا يا عمو انا اتمني افيدكو بس توليب
- متقلقيش المربية معاها ومش هأخرك في الشركة
= تمام هطلع اجهز ثواني بس
عند وصولهم امام الشركة قدم لها ذراعه حتي تتأبطه ليعلن الي الجميع انها ملكية خاصة به... ... فرح الجميع برؤيتهم معا ماعادا من كانت تراقبهم من خاف زجاج مكتبها تحاول ان تبحث عن طريق لتفريقهم
بعد ساعتين في اجتماع عايزك تسمعي وتفهمي كل اللي هيتقال وبعد كده هتناقش انا وانتي
- حاضر اللي تشوفه
= بعد ان انتهي الاجتماع انتهزت توليب وجود حمزه لتحادثه عن نادين وما اقترفه معها
- تميم لسه في حاجة انهارده , مشغوله علي توتي
= لا خلصنا تحبي السواق يوصلك
- لا مش لازم حمزه هيوصلني معاه
لم يكن الاستغراب من نصيب تميم فقط بل ايضا حمزه
= اه طبعا اتفضلي يلا
ليتركو لميس و تميم معا بعد ان استأذن منهم معاذ ليتم باقي اعماله
مشوا معا حتي وصلو للزجاج الضخم الذي يطل علي مدخل الشركة لينظروا الي اسفل ليروا توليب وحمزه وهم يتحدثون في انتظار وصول سيارة حمزه من الجراج الخاص بالشركة لتجدها لميس فرصة جيدة يجب ان تستغلها لصالحها
- انا بجد رنيم صعبانة عليا اوي
= رنيم ليه
- انا مكنتش هقولك بس في مشكلة كبيرة بينها وبين حمزه وهي منهارة جدا انت عارف هي حساسة قد ايه وفي عز كل ده توليب بتطبطب علي حمزه وتراضيه وقال ايه بتصالح بينهم طول عمرها بتمثل الطيبة وانتو بتصدقوها علي فكرة هما لسه بيتكلمو زي الاول وكانت عارفة انه هيخطبها ولما عرفت برفض بابا ليه وافقت عليك ورضيت مش عشان توتي زي ما قالت وجت الفرح بتاعهم مخصوص عشان تغيظهم .... انا فعلا مكسوفة انها اختي
= انتي ملكيش ذنب يا لميس الخطأ مننا احنا اننا لنصدقها عن اذنك
ليتركها ويذهب وشعور الانتصار يملؤها وأملها بإنتهاء توليب قريبا يزداد
عادت الي المنزل برفقة حمزه بعد ان تحدثت معه و اثبتت له خطأه وتوجهت علي الفور الي منزل نادين لتخبرهم بما حدث
- ها عملتي ايه يا لولي
= دلوقتي بقيت لولي الله يرحم
- يوووه بقي كفاية تقطيم
= قولي بقي يا توليب , رنيم علي اعصابها من الصبح
- بصي يا ستي
flash back
= اصلها ايه نازلة معايا وهتروحي كمان
- اكيد مش عشان سواد عينيك
= عارف انجزي
- رنيم ولا فاكر انها لوحدها ومحدش هيقف لك
بدأ شعور الاسف والخزي يتخلل الي داخله
= انا فعلا مكنتش في وعي مش عارف اعمل ايه مش بحس بنفسي
- انت حبتها
= اكدب لو قلت لك اه بس انا متقبلها انا حابب حبها ليا
- بس ده مش كفاية يا حمزه حتي لو دي بنت عمك يعني المفروض تحافظ عليها من باب صلة الرحم
= يا حمزه انت اخويا ترضي حد يعمل كده في نادين
- لا طبعا ده انا اقتله
= يعني انت حابب تميم يقتلك ولا تقتله
- رنيم امانه في رقبتك وهي هتقعد في بيت ابوها لحد ما تحس بقيمتها وانا مش هرجعهالك غير لما أتاكد انك ندمت وحسيت بقيمتها بجد
= بس بيتي هو بيتها
- البيت اللي اضربت واتهانت فيه ميبقاش بيتها يا حمزه , لو فعلا عايز تتحسن شوف دكتور نفسي اتكلم معاه وشوف المشكلة فين سلام
ترجلت من السيارة ولكنها استدارت مردفة
= تميم وعمو محسن مش هيعرفوا حاجة لو عرفوا هيلموها علي اختيارها ليك و ثقتها فيك وهي عايزاك دايما كبير في نظرهم
back
- بس كده ده كل اللي حصل
لتتسأل رنيم
= وانتي فاكرة انه هيتغير
- لو باقي عليكي هيتغير بجد ومتنسيش دور نادين ان شاء الله يتغير
= وانتي بقي سيبتي تميم ولميس ومشيتي مع حمزه قدامهم
- ايوه في ايه
= يا خيبتك زمان لميس قالت وما خلت عليكي
- هو انتي كمان عارفة
= عارفة من زمان و اديني بدفع التمن
لتنظر توليب في ساعتها وتشهق عاليا
- كده كتيير يلا باي انا هطير عشان الحق قبل تميم ما يروح اجهزله عشا
= يا زيدي يا زيدي
- بس يا بنت انتي وهي رنيم متتأخريش يلا سلام
ذهبت ركضا الي منزلها و صعدت لتغير ملابسها وتنتظره فقدقررت ان تقيم عشاء بسيط لهم في الجناح لتشكره علي اتاحت الفرصة لها الانضمام الي طاقم الشركة ولكنها قابلت لميس قبل دخولها منزلها
= متجريش كده تميم خلص من بدري وراح يقابل ناس اصحابه... ايه ده انتي مكنتيش تعرفي توءتوء توء الظاهر انك لسه معرفتيش تكسبي قلبه لحد دلوقتي لو يمممكن يمكن قلبه لسه متعلق ب الاء ما هي برده عشرة وام بنته
- خليكي في حالك يا لميس انا واثقة في تميم ج و ز ي
طال الانتظار ساعات وساعات حتي غفت في مكانها علي الاريكة منتظره وصوله
"ان البوح يحيي الحب والكتمان يميته " هذا ما قاله يوسف زيدان ولكن ليس من السهل البوح بالحب فهناك قلب يقول اخبره واسترح وهنا عقل يقول ستندم ويهجرك وتستمر الحيرة وتطيل لتكثر معها الشكوك والظنون
استيقظت من غفوتها فزعة علي صوت اغلاق باب الجناح بقوة محدثا صوتا عاليا
- تميم اتاخرت كده ليه
ليضحك ضحكة ساخرة ثم يردف
= ايه قلقتي عليا ؟!
- ايوه طبعا وبعدين بتتكلم كده ليه
= الظاهر انتي نسيتي انا اتجوزتك ليه وايه اللي خلاني افكر فيكي
- انا عارفة كويس انت اتجوزتني ليه و عارفه ان لولا بنتك وانها متعلقة بيا كان عمرك ما فكرت فيا
= قولي زي ما تقولي انا عمري ما هخليكي تدمري حياة اختي وجوزها اللي كنتي بتعمليه قبل كده خلاص خلص انا عمري ما هسمح بيه تاني
- انا ارقي من اني ارد عليك .... لان الوحش بيشوف الناس بعين افعاله انت ازاي كده وقدرت تخدع الكل كده
= انت هنا زيك زي الكرسي ده بالنسبة الي لكن قدام الناس احنا زوجين سعداء وياويلك لو بينتي عكس ده هوريكي وش عمر ما حد شافه
لتهمس بسؤال يعتمر قلبها و لطالما ارادت النطق به
- للدرجة دي كنت بتحبها
لتفاجأ به يشد يده علي معصمها بل و يلويه خلف ظهرها وهو يقول بصوت يشبه الفحيح غير عابئ بعلامات الالم المرتسمة علي وجهها
= فرق السما عن الارض بينك وبينها و اياكي تجيبي سيرتها لانك هتخسري وهتخسري كتير اوي اوعي تكوني فكراني مش عارف بعمايلك السودة
لتتركه والدموع تنساب من اعينها كالشلال لا تري الي اين تذهب ولكنها تريد ان تبتعد عنه قدر المستطاع فهي لم تعد قادرة علي تحمل حديثه الجارح اكثر من ذلك لتجد نفسها في القبو حيث اعتاد ان تختبئ وهي صغيرة .
جلست قليلا حتي هدأت ثم بدات تبحث عن مفتاح الانارة الذي وجدته بعد عناء ولكن ما رأته جعلها في حالة تعجب و استفهام
ثلاث صناديق مزينة بشرائط حريرية دليل علي انها هدية لشخص ما و عندما اقتربت وجدت اسمها يزين البطاقات الموضوعةعلي كل واحد منهم ومؤرخة بتواريخ ميلاها عندما كانت مسافرة
ولكن ما لفت انتباهها هو دفتر كبير مزين بغلاف جلدي رأت تميم مرار وتكرار يسطر فيه بعض الكلمات و احيانا يرسم دفعها الفضول لفتحه وقراة محتواه
لتجد فيه الغاز اكثر من الاجابات التي كانت تبحث عنها و لكنه بالفعل سيغير مجري حياتها واول ما رأته فيه كان كالاتي
إنها من ذلك النوع الذي لا يمكن أن تحب بعدها أبدا فهي تأتي لتكون الاخيرة..... توليب
✨✨✨✨✨✨✨✨
#الفصل_السادس_عشر💕💕
الحب_قدر_لا_َخيار😚😚
غادة_عبدالرحمن😍
🌸🌸🌸🌸🌸🌸🌸🌸
لا اريد العودة ولكني اشتاق لحديثنا كسابق عهدنا .... سهرنا... مناوشتنا... ضحكنا اشتقت كثيرا لشعوري معك كالسابق
ظلت كما هي تقلب في صفحات مذكراته وبمرور الوقت زاد اندهاشها اكثر واكثر قررت ان تعلمه كيف يكون الحب و حدثت نفسها قائلة
- بقي كده يا تميم ليه تعمل فيا وفيك كل ده انت خفت و مدافعتش عن حبك ليا واعتبرته نقطة ضعف وغلطة لكن انا مش هسكت لحد يحاول يفرق بيني وبينك ولازم ارجع ثقتك فيا تاني واكشفلك الكل علي حقيقتهم
عزمت امرها وعيونها تصدح بالعزيمة والاصرار اغلقت الكتاب وحملته بين ذراعيها وغادرت عائدة لجناحها حتي تواجهه
صعدت من القبو وقبل ان تدلف الي الداخل استمعت حديث دائر بين رنيم وتميم من بدايته
- قاعدة لوحدك ليه يا رينو
= ولا حاجة يا تميم
ليضمها اليه قائلا
- انتي عارفة انا بحبك قد ايه انتي بنتي مش اختي
= عارفة والله يا حبيبي اطمن متقلقش انا كويسة
- لا انتي مش كويسة انا السبب بأنانيتي يارتني ما اتجوزتها وكنت سبتها للي شبها
ثم تنهد بندم واكمل
طب فهميني ايه حصل بينك وبين حمزه
= مفيش حاجة صدقني ولا انا مبقاش ليا مكان هنا زي زمان
- متقوليش كده ابدا.... انا عايزك تعرفي اني كفيل احجم اي حد عايز يبوظ حياتك او حتي يفكر يقرب منها
لتنظر له بغرابة
= في ايه يا تميم انا محدش بيبوظ حياتي .... لو حد عمل كده يبقي انا
- انتي ؟!
= ايوه انا لاني خليت حمزه يفكر في حبي كأنه امر مسلم بيه مش محتاج يتعب ولا يعافر عشان يوصلي انا دلوقتي بحاول ابني حياتي صح واعمل كرامة لنفسي
- كبرتي يا رنيم وعقلتي
= مش اوي يعني بصراحة توليب هي اللي فهمتني واكتر حد ساعدني ووقفت معايا وكان هاين عليها تضرب حمزه بس اكتفت انها قالت له كلام شديد وعرفته اني مش هرجع غير لما يعرف قمتي
ليجيبها ساخرا من سذاجتها
= توليب عملت كده ولا بداري علي حمزه عشان معملش مشكله
- توليب مش وحشة يا تميم انا بس كنت فاهمة غلط بلاش تغلط غلطتي توليب انقي من كده صدقني
= انا خلاص تعبت اصدق مين ولا مين
لتضع رنيم يدها علي قلب تميم مردفة
- صدق قلبك وبس ... تصبح علي خير
لتتركه يتخبط بين افكاره يبغض نفسه كيف تحول الي شخص لا يعرفه ولكنه لا يطيقه
استمعت لحديثهم وقد تأثرت بعدم ثقته فيها ولكنها قررت ان تسدد له الضربة الاولي في عيد مولدها وان تتحمل لوقتها اظهرت نفسها وكأنه عائدة الان لتنظر له نظره تحمل كافة احاسيس اللوم والعتاب ثم تركته وذهبت الي حجرة توليب الصغيرة لتقضي ليلتها هناك وفي الصباح الباكر تجهزت و هبطت الي مائدة الافطار
- صباح الخير
= صباح النور يا قلب عمك
- وانتي لابسة كده علي فين
= طب رد الصباح حتي بس برحتك رايحة الشركة ولا نسيت
- اااه الشركة لا خلاص استغنينا
كان يتابع نقارهم في صمت ولكنه تدخل بعد جملة تميم
= هو ايه استغنينا ده شغل مش لعب عيال صغيرين
- توليب خلاص بقت في الشركة و الموضوع منتهي
= عن اذنكوا هسبق انا عشان هاخد نادين معايا في العربية
- سوقي علي مهلك يا بنتي مع السلامة
بعد ان ذهبت وجهه نظره الي ابنه مردفا
= بلاش تبقي كده الراجل بيتربط من كلمته مش عشان اختلفتو ولا اتخانقتو ترجع في كلامك انا مربتكش كده بس انت معاها بتقلب كل الموازين اهدي شوية عليها
ليجيب والده بتبرم
- حاضر يا بابا حاضر
كانت تشرف علي اعادة الاعمال في محلها متمنية من الله ان يتمم عليها هذه المرة بالنجاح والخير حينما استمعت الي رنين هاتفها فالتقطته مجيبه
- ايوه .... السلام عليكم
= مدام فريال الشناوي
- ايوه انا مين معايا
= حضرتك انا مأمور سجن ....
- خير يا فندم في ايه
= البقاء لله زوجك سعيد المصري توفي انهاردة الصبح
- ايه!!! لا حول ولا قوة الا بالله ازاي
= اوفر دوز (جرعة مخدرات زائدة) حضرتك هتستلمي الجثة امتي عشان الدفن وكده
- انا جاية حالا مع السلامة
بكت قليلا فقد اسدي لها معرف منذ زمن غير ان بينهم عشرة سنوات عديدة ولكنها تنهدت براحة بعد ان تخلصت منه هي وابنتها بشكل نهائي لن تعيش مهددة بعودته وانتقامه منهم
- الو ايوه يا عادل اسفة لو ازعجتك بس انا مليش حد
= خير يا فريال في ايه
- سعيد مات و المفروض استلم وادفن وانا مش عارفة اعمل ايه
= البقاء لله متقلقيش انا هاجي معاكي واتمم كل الاجراءات وندفن علي المغرب
- هنلحق بسرعة كده
= اكرام الميت دفنه وهو دلوقتي عند رب كريم سامحيه وخلي نادين تسامحه
- مسامحاه ربنا يرحمه
عادت الي منزلها بعد يوم شاق في المقابر واتهمت واجبها الاخير كزوجة له لتستقبلها ابنتها قلقة
- كل ده كنتي فين يا ماما قلقت عليكي والتليفون علي طول مغلق وايه التراب اللي عليكي ده
= كنت في المدافن يا نادين
- مدافن ! ليه يا ماما خير
= سعيد البقية في حياتك وكنا بندفنه
- البقاء لله ربنا يجازيه علي عمايله
= متقوليش كده اطلبيله الرحمه ده بين ايدين ربنا دلوقتي
- ربنا يرحمه والحمد لله ارتاحنا منه
لتنظر لها والدتها باستنكار
= انت لسانك ده عايز اقصه متكمليش جملة حلوة للاخر
- معلش يا مامتي اللي في قلبي علي لساني
= ماشي يا لمضة هروح ارتاح بقي من تعب اليوم
جلست في مكانها تسترجع في عقلها تهديد سعيد لها بأنه سيقتل معاذ وهو يحاول ان يعتدي عليها وكم كانت خائفة ان ينفذ تهديده فظلت تؤجل في زفافها حتي يحكم في قضية سعيد ولكن عدل الله اكبر واقوي . التقطت هاتفها و تحدثت مع معاذ
- الو ايوه يا حبيبي
نظر معاذ الي هاتفه ليتأكد من هوية المتصل ثم اردف
= ااالو .. مين
- بقي كده يا ميزوو مش عارفني طب خلاص هقفل
= لا اوعي اموت فيها والله
- بعد الشر عنك يا حبيبي
= ايه بتقولي ايه نادين هو انتي ناوية تقتليني ولا هتسبيني اه هو كده صح
- ايه يا بني لا رومانسية عاجب و لا طوبة عاجب اعمل ؟
= لا خليكي النسخة ده حلوة اثبتي عليها
- طيب مش يلا بقي
= يلا ايه
- مش هنتجوز بقي
= لا احلفي وانتي اللي بتطلبي انا بحلم
لتسمع من خلال الهاتف صوت صفعة يتبعها صوت معاذ
- انا صاحي اهو وانتي نادين واحنا بنتكلم
= طيب خلاص شكلك مش عايز يلا سلام
- لااااا استني ده انا قتيلك هنا من النجمة هكون عندكو نضبط الامور
= لا
- هو ايه اللي لا انتي بتلعبي بيا
= برااااحة الكلام مش هنا عندنا
- امال فين في النادي
= لا انا عايزك تكلم مع حمزه هو ولي امري
- وده من امتي ان شاء الله
= معاذ تعالي نساعد حمزه يتغير وبصراحة دي فكرة توليب عشان يحس بالمسؤلية و يحس كمان انه مننا مش منبوذ زي ما ابوه مفهمه
- فكرة عبقرية خلاص تمام هتكلم معاه بكره
= تصبح علي خير
- تصبحي وتبقي مراتي يا نادو
🌸🌸🌸🌸🌸🌸🌸🌸
في الشركة
= يا تميم قلت لك حاول تنسي كل حاجة و متسمعش لاي حد
- واكدب عيني كمان يا معاذ
= بتتكلم عن حاجة من سنين فاتت والله اعلم حقيقتها ايه خليك في انهارده ومستقبلك وبنتك
- وانت فاكر اني مش عايز كده انا حاسس ان قلبي محبوس بين ضلوعي مش عارف يقول اللي جواه
= ادي نفسك واديها فرصة واولها انت لازم تثق فيها
ثم نهض مستئذنا
- انا رايح ل حمزه مكتبه ادعيلي
= ليه عجيبه يعني
- هعمل فكرة مراتك علي الله تنفع
= فكره ايه ان شاء الله
- هتفق معاه علي جوازي انا ونادين عشان يحس بالمسؤلية و حاجات كده اما نشوف اخرتها
= ربنا معاك يا بطل
ان اغيب عنك وانا علي يقين انك لن تخذلني حتي ولو قدموا لك الف دليل .... تلك هي الثقة في الحب
اكمل عمله بعد ان غادر معاذ يراجع العديد من تقارير العمل عندما جاءه اشعار بوصول عدة رسائل دفعة واحدة مما دفعه لرؤيتها
ليجدها عدة صور تجمع ايمن وتوليب في احدي المطاعم هنا في القاهرة
للوهلة الاولي تمني ان تكون امامه حتي يقتص منها جرح كبرياءه وشعوره بفعلتها
ولكنه هدأ نفسه ليسيطر علي غضبه ويدرس الموقف بحكمه فقد ايقن ان انعدام الثقة بينهم هي سبب وضعهم الحالي
- الو ايوه يا هبه حوليني مكتب نادين
= ايوه يا نادين توليب عندك مش كده طيب خليها تيجي مكتبي
لتغلق نادين الهاتف ناظرة ل توليب بريبة
- قومي جوزك عايزك وشكلك كده عملتي مصيبة
= ليه هو بيزعق
- لا مزعقش بس ناشف اوي في الكلام
لتمازح نادين وهي ذاهبه
= توكلنا علي الله ابقو اسالو عليا
اتجهت الي مكتب تميم وهي تعلم انه سيقابلها بالكلام الجارج كعادته ولكنها لن تمانع يكفي انها ايقنت من حبه لها
- السلام عليكم طلبتني يا تميم
= مش قاعدة هنا ليه اليوم كله عند نادين
- رغي بنات بقي انت عارف وقلنا هنصدعك
= طيب اقعدي نتكلم شوية
شعرت بالغرابة من اسلوبه السلس الهادئ علي غير عادته الاخيرة
- صحيح يا توليب ايمن سافر ولا ايه
= ها ايمن اه سافر
- ملحقش يعني
= مامته تعبانه بقالها فترة و لازم يبقي جنبها
- ده انتي كل الاخبار عندك
= طبعا ده خال توليب و بيكلموها علي طول
- ايوه فعلا عندك حق
ثم امسك بهاتفه وناولها اياه مردفا
= طب شوفي الصور دي كده
فرغت فاهها عندما رات صورها مع ايمن ثم اجابته بسخرية
- انت بتراقبني وصلت للدرجة دي ... والمرة دي هتتهمني بإيه
انتفض غاضبا وانتشل هاتفه من يدها وقذفه باتجاه الحائط ليتهشم الي قطع
= اولا انا مرقبتكيش الصور دي لسه مبعوتة ليا وثانيا والاهم انا متهمتكيش بحاجة انا قلت نتكلم وافهم
- نتكلم وتفهم وده من امتي انا دايما في نظرك الغلطانة العيلة المستهترة
لتكمل حديثها وهي تؤشر علي الهاتف المهشم علي الارض
- اهو شوف اديك اتعصبت اهو وكل اللي احنا فيه بسبب عصبيتك
= انتي ايه مش بتحسي انا راجل عارفة يعني ايه راجل يعني بغييييير
- بتغير وهتغير عليا ليه مش انا جوازك مني تكفير ذنوب وعشان خاطر توتي
= وبحاول اغير فكرتي هتساعديني في ده ولا تسبيني لاستنتجاتي
- انا هقولك بس مش عشان ابرر انا معملتش حاجة
= الله اما طولك ياروح انطقي علي طول
- كل ما في الامر ان ايمن عنده مشكلة مالية ويمكن كانت وصلت للسجن فأنا وعمي محسن قررنا اننا نساعده يسد اللي عليه والصور دي لما قابلته وبلغته هو في الاول رفض بس انا اصريت وقلت له يعتبرهم دين يردوا لما يقدر
= طب وانا ليه معرفش بده كله
- انت اخد منه موقف وخفت ترفض
= ولما بابا عارف ليه مقبلوش هو
- عمو اه وافق يساعده بس برده اخد موقف ومش عايز يبقي في الصورة
= ولما تجيلي صور زي كده وافرضي كنت صدقت
- وافرض ليه انت صدقت عني كل حاجة مش هتبقي حاجة جديدة لو كنت صدقت
دار حول المكتب وجلس قبالتها ممسكا بيدها
= توليب انا بحاول نبدأ من الاول ممكن اكون اتسرعت ساعديني نكمل مش عايز اخسرك
- ولا انا عايزة بس انت جرحتني اوي ووجعت قلبي
= طيب خلاص ننسي كل الماضي واللي حصل
- هنقدر
= طبعا طول ما احنا مع بعض هنقدر
ليحتضنها مقبلا رأسها في حب واشتياق
🌸🌸🌸🌸🌸🌸🌸🌸
هنا تزهر زهور الحب وهنا تدق طبول الحرب
- حمزه فاضي نتكلم
= اتفضل يا معاذ خير
- اولا ازاي والدك عامل ايه
= الحمد لله علي وضعه
- طيب الحمد لله
= انت جاي مخصوص تسأل عليه
-ها لا انا جاي عشان عشان
= ما تقول يا معاذ
- انا جاي اكلمك علي جوازي انا ونادين
= وجاي تكلمني انا ليه
- انا قلت كده برده
= ننننعم
- اقصد اني سالتها ليه اتكلم معاك قالت لي هو اخويا وولي امري ولو عملت لي حاجة هو اللي هيقف لك
شعر حمزه بالزهو و الفخر
= نادين قالت لك كده
- ايوه وانا واحد مطيع بنفذ علي طول
= طيب يا مطيع الكلام ده مينفعش
- لا استني انا خاطبها و مش هسيبها بلاش شغل ابو العروسة ده احمد ربنا اني اصلا جيت اتكلم معاك وانت السبب في ان صاحب عمري مش عارف يتهني في جوازه بسببك
= انت متسرع كده علي طول مينفعش نتكلم هنا دي امور عائلية .. بكره الساعة 9 في فيلا نادين ونبقي نشوف موضوع صاحب عمرك ده نصلحه ازاي
سأدعو كثيرا و سأبكي قليلا في انتظار عدالة السماء
قابعا في سريره لا يقوي علي الحركة الا بمساعدة بعد ما كان مثال للتكبر والتجبر اصبح لا حول له ولا قوة
- عامل ايه انهاردة يا يزيد
= زي ما انتي شايفة
- انا جيت بس اعرفك اخر الاخبار
= وايه هي اخبارك اللي هتهمني
- تعرف ان سعيد مات يلا الله يرحمه بس ده معناه ايه بقي
🌸🌸🌸🌸🌸🌸🌸🌸
ظلت تتلذذ بإغاظته وتدور في الغرفة في زهو
- معناه ان حق اخويا عادل رجعله وعلي حياة عينك وهياخد اللي حبها عمره كله
= يا أخي ربنا ده كبييير اوي ميرضاش بالظلم
- انتي جاية تحرقي دمي
= انا!! اعوذ بالله انا جاية شمتانه بس
نظر لها بحقد وهي تقف بعيدا عن متناول يده لم يجد امامه سوي مزهرية بجوار سريره قفأمسكها وقذفها في اتجاه شاهي ولكنها تفادتها بمنتهي السهولة
- تؤتؤ اعصابك يا يزيد هبعت حد ينضف
لتتركه يتأكله الحقد و التحسر
ومن كأخي وان ملت لا يميل وقال فيه رب العالمين "سنشد عضك بأخيك"
- السلام عليكم ازيك يا طنط
= ازيك يا حبيبي عامل ايه وابوك اخباره ايه
- الحمد لله علي كل حال احمممم في حاجة معينة حابة اتكلم فيها مع معاذ
= لا يا بني انت اخوها وادري بمصلحتها هوانا صحيح كنت خايفة من امه بس خلاص اهي هاجرت بلاد برا ربنا يوفقها
لتظهر نادين وهي تقول بقوة
- بس انا عندي
لتأتي من خلفها رنيم تهدئها
= بس يا نادو هو انتي داخلة خناقة
تعلقت اعين حمزه برنيم فقد اشتاق لها بالفعل ولكنه اعاد شعوره الي التعود وليس الحب
- خير يا نادين
= تعالي وانا اقولك
اخذت شقيقها من يده وذهبوا لغرفتها
- خير يا نادين عايزة ايه
= انا عندي شرط لمعاذ
- عايزة قايمة ولا مؤخر
= اخص عليك انا مادية كده برده
- امال ايه
= ماما
- مالها
= ماما تعيش معانا
- وهو هيوافق
= موافقش خلاص كل واحد يشوف نصيبه مع حد تاني
- حاضر يلا انا سمعت الباب هروح افتحله
= اهلا اهلا يا معاذ اتفضل
- طيب يا حمزه انا عايز احد ميعاد للفرح
= هتعيشوا فين الاول و كمان نادين عندها شرط
- انا اشتريت فيلا صغيرة وراكو بشارع عشان نادين تبقي قريبة من البنات وبعدين شرط ايه اللي عند نادين
= نادين شارطة ان طنط فريال تقعد معاكو بعد الجواز
- وهو ده شرط ... ده امر مسلم بيه وانا مش هقبل بغير كده اصلا
= خلاص الفرح باذن الله اول شهر في الصيف نكون جهزنا
- كتييير يا حمزه
= كلمة كمان وهخليهم سنة
- لا يا عم وعلي ايه
لينادي علي شقيقته وهو يبتسم
= نادين تعالي اقعدي مع خطيبك
وجدها تقف بمفردها في الشرفة
- مش هترجعي بيتك
= بتحبني
- مقدرش اكدب
= وانا مش هقبل بأقل من كده عن اذنك
اراد ان يتمسك بها وان لا يتركها تذهب ولكن
جاء اليوم الذي انتظرته كثيرا يوم عيد مولدها وعيد مولد صغيرته اليوم ستعلن عن أول اشارة عن علمها بما يخفيه
جاء محملا بالهدايا لاميراته ولكل منهم صندوق يحوي فستان راقي لا يقل روعة عن سابقيه واقام حفل ضخم لكليهما فلأول مرة سيحتفل بهما دون خجل او خوف وايضا معا قضي الفترة الماضية في تفاهم وود مع توليب دون شك او خلافات واراد ان يتقدم في علاقتهم خطوة الي الامام
وتذكر ماحدث اول امس
flash back
- الو ايوه يا ايمن
= ايوه يا تميم .... ماما اتوفت
البقاء لله ربنا يرحمها
- يارب انا هنفذ وصيتها اللي طلبتها مني قبل ما تموت هي ظلمت توليب
تحشرج صوت ايمن قليلا ثم أكمل
توليب ملهاش ذنب في موت الاء هي أكدت ده وإن هي اللي بعتت توتي تعرف توليب أن انت ابوها سامحها يا تميم وقول لتوليب تسامحها
انت معاك جوهرة بتحبك بجد حافظ عليها و خلي بالك من اقرب اقرب الناس ليكو
Back
انتظر هبوط اميراته بلهفة وشوق مع باقي الضيوف والاهل حتي هلت عليه بصحبة ابنته ولكنها لم ترتدي الفستان الذي احضره فشعر انها علامة رفض منها دون سبب وعندما دقق النظر اليها وجده احد الفساتين الذي سبق واحضره في عيد مولدها وهي بالخارج هل علمت بسره وبمقدار حبه لها وهل بادلته الود حتي لا تجرحه
عندما وصلت اليه في نهاية درجات السلم مالت عليه لتهمس في اذنه وهي تضحك
- مفيش داعي ل فساتين جديدة استني لما البس الثلاثة الباقين بقي
ثم تأبطت ذراعه و هو ممسك باينته في اليد الاخري ليتقبلو التهاني والامنيات السعيدة من الحضور
- توليب
= ايوه يا ماما
- مش عايزاكي تبدأي سنة جديدة في عمرك وانتي زعلانة مني او من بابا
= ازاي يا ماما تقولي كده ... انا بحبكوا اكتر من روحي وعمري ما ازعل منكو
- ربنا يرضي عليكي يا حبيبتي ويفرحك
قالت جملتها الاخيرة وهي تري تميم مقبلا عليهم لتستأذن منصرفة لتتركهم يتحدثوا سويا
- الحفلة حلوة
= ايوة جدا وتوليب مبسوطة بالالعاب اللي في الجنينة اوي
- وانتي
= انا كمان فرحانه ايه رايك في الفستان عليا
- اممم بمناسبة الفستان طل الفساتين وهتلبسيها طب والدفتر بتاعي هتلبسيه هو كمان
= ههههههه مش للدرجة دي طبعا روحت دورت ملقتهوش علي العموم دور يمكن تلاقيه
كانوا علي قدر من الانسجام حتي انهم لم يلاحظو من كان علي مقربة منهم و يتأكله الحقد و الكره لكليهما
هدأت الاضاءة و تقدم تميم من توليب داعيا اياها للرقص كما فعل معاذ مع نادين و حمزه و رنيم
كل ثنائي يدور في ملكوت خاص به
مرت دقائق حتي بدأت توليب تسعل بقوة وتبعها العديد من الحضور
هرع معاذ لفتح مفتاح الاضاءة وصدموا من هول ما رأوه دخان كثيف متصاعد من القبو قد ملئ المكان فطلبوا من الحضور التوجه الي الحديقة حتي يكتشفوا السبب
حاولت توليب ان تهرول ناحية الحريق ولكن تميم امسكها بإحكام
- تميم حريق حريق الفساتين العلب
= في داهية فداكي كل ده
وجدها تبكي بحرقة
- هجبلك احسن منهم ولا تزعلي
= بس دول حاجة تانية
لم يعلم بما يخبرها في لحظات جاءت قوات الاطفاء وقامت بعملها علي اكمل وجه لم يكن بالحريق الكبير ولم يمتد الي الاعلي اكتفي بالتهام القبو بكل محتواياته
في مكان اخر
تسير وهي جاذبة خلفها يد ابنتها غير عابئة بمناداتها او توسلها حتي وصلو الي المنزل
- انتي ايه عايزة ايه
= بتتكلمي علي ايه يا ماما
- مش عارفة بتكلم عن ايه ..... وصل بيكي الحقد والكره لاختك للدرجة دي بتولعي في بيتها .. طب افرضي الحريق كان كبر و جرالنا كلنا حاجة ايه معندكيش عقل مش بتفكري
= بس متقوليش اختك هي اخدت حقي وبعدين ما يمكن زي ما انطي ميرفت كانت بتقول دايما يمكن مش اختي عشان كده مش بحبها وبكرها وبكرهكو كلكو انتو كمان
بدأت سوسن تكيل لها الصفعات دون اي رد فعل من لميس سوي الابتسامة حتي انهك التعب سوسن لتتوقف مرهقة
-=ارتاحتي كده ولا لسه برده مش هبطل لحد ما اخلص منها وارتااااح
ليسمعوا صوت سقوط شئ من خلفهم ليلتفتوا ويجدوا عامر مستلقيا علي الارض واضعا يده علي قلبه