رواية اللون السابع للحب الفصل السابع والعشرون 27 والثامن والعشرون 28 بقلم شذى عبد المكرم
من جانب فردوس
ما صدقنا انو عمار ظهر والعرس تم على خير بس الزمن كان اتأخر كان الجرتق اليوم التاني فرجعت مع ناس امي بعد الحاح على سفيان انو ابيت لانو نحنا كان بينا اتفاق وانا اخترت الكوفير واليوم التاني عملنا الجرتق الصباح ورجعنا البيت الكبير فطرنا هناك وعمار وهمس طلعو للفندق وذي الضهر كدا اتصل لي سفيان
__ اها يلا اطلعي
_ انت وين
__ في العربية
_ دقيقة جاية . لبست توبي وطلعت ليهو وقفت ليهو في شباك العربية
__ وين شنطتك
_ سفيان خليني ابيت هنا الليلة اصلا اليوم انتهى خلاص
__ لالا اطلعي قدامي سريع
_ ما ظريفة اخليهم براهم
__ لالا وجودك حيفرق بشنو مثلا حتلمي معاهم ولا حتنضفي اطلعي قدامي
_ انت ليه بتتكلم كدا معاي
__ امس اتفقنا على شنو والمفروض من بالليل ترجعي بس اتحججتي بالجرتق وسكتا
_ كيف يعني اتحججت بالجرتق انت بنفسك شايف انو عملوهو بالصباح
__ هسي ما داير كلام كتير امشي جيبي شنطتك وتعالي . زعلت منو شديد لمن حسيت دموعي في طرف عيني
_ انت بتعاملني بالطريقة دي ليه
__ فردوس خلي الدراما
_ دراما؟ تمام انتظرني حأجيب شنطتي . عاين لي ومسح وشو
__ خلاص خليكي بكرة بجي بسوقك اوع تحججتي بأي حاجه وحأسوقك غصب . دمعتي نزلت
_ لالا ماف داعي انتظرني هنا حأرجع
__ قولنا بكرة خلاص يعني بكرة
_ وانا ما حأقعد لبكرة حنتنظرني ولالا؟ . ما رد ودخلت جوا بس مسحت دموعي وبقيت اجهز في ملابسي
صفا: ماشة خلاص؟
امي: قيلي امشي بعدين
فردوس: لالا حأمشي هسي
وسام: مالك يا جنة الحصل شنو
فردوس: ماف حاجه حأرجع بجيكم يوم تاني .
امي: حترجعي مع منو
فردوس: سفيان واقف لي برا
صفا: معناهو هو المستعجلك كدا . ما رديت وودعتهم وطلعت برا لقيت سفيان ماف يعني مشى خلاني هو قايل كدا بمنعني انو ارجع البيت بس غلطان رجعت جوا
امي: مالك
فردوس: امي عندك قروش؟
امي: لشنو
فردوس: دايرة أاجر ترحال
امي: ايي عندي بس احسن تنتظري ترجعي مع سفيان وهو موش كان منتظرك
فردوس: كان يا امي وانا مصرة ارجع
امي: مالكم متخاصمين؟
فردوس: ما متخاصمين بس سفيان بقيف لي على الهبشة
امي: ود عمك انتي عارفة انو صعب كدا طولي بالك عليهو
فردوس: اصلا دا القاعد يحصل لو ما كدا برجع ليكم كان بخبيزي
امي: ايي اصبري عليهو دايما وحافظي على بيتك
فردوس: ان شاءلله لا اصلا سفيان بعاملني كويس وشديد كمان بس مرات صعب بس لمن يشد انا برخي وهسي هو شد انا لازم ارخي عشان كدا راجعة
امي: دا الصح يا بتي تمام دقيقه نجيب ليكي القروش . دخلت جوا جابت لي القروش واجرت ترحال ورجعت البيت عندي نسخة من المفتاح دخلت الغرفة سفيان استغرب مني وكنت لسع زعلانة شديد منو
__ الجابك شنو وجيتي كيف
_ كيف الجابني شنو وجيت بترحال لمن انت ما احترمتني لمن قولت ليك انتظرني اجيب شنطتي
__ انا مشيت عشان اخليكي تقعدي معاهم
_ ما بتمشيني على كيفك فاهم؟ . عاين لي بصدمة من ردي انا ذاتي استغربت من ردي
__ كيف يعني بمشيكي على كيفي
_ ما هي واضحة كأنو ما بقدر اقرر بنفسي وكلامك انت بس البمشي وعشان قولت دايرة اقيل مع ناس البيت طلعتني بتاعت حجج
__ اصلا بقيتي بتاعت حجج
_ شكرا يا سفيان . وطلعت خليت ليهو الغرفة وطبعا مع هرمونات الحمل مشاعري بتكون ملخبطة واسهل حاجه البكي جدعت توبي في الصالة ودخلت المطبخ وبقيت ابكي وشغالة في المطبخ على الاقل افرغ فيهو الطاقة السلبية وبقيت اقول بصوت مسموع انا بكرهك يا سفيان بكرهك عديل كدا ومجرد ما اوضع بديك ولدك وبرجع لامي وانت جيب ليك مرا غيري تتحملك انا تعبت ما دايرك عديل ياااخ دا شنو دا ياااخ عمرو ما ختا لي اعتبار يااخ انا بشر ما حجر بطارية هو على اساس بحس كدا عامل لي رأسو المربع دا بعمل الغدا دا بس ويطلقني . وضربت ايدي في المصطبة من الزعل التفت كان واقف في باب المطبخ اتخلعت طبعا
_ انت واقف من بتين
__ من زمن انا بكرهك يا سفيان لحدي يطلقني
_ ايي تطلقني هسي
__ وبالنسبة للكره؟ . سكتا ما رديت
__ حتقعدي كدا بس واعلى ما في خيلك اركبيهو . هنا كرهتو اكتر وسكتا
_ تمام يا سفيان شكرا جزاك الله الف خير بس لحدي هنا وكفاية . قفلت الغاز جنبي وجيت بجنبو وطلعت من المطبخ رجعت الغرفة وهو جا وراي يشوف انا حأعمل شنو مسكت تلفوني اتصلت لابوي
فردوس: اووو ابوي كيفك
ابوي: كويس الحمدلله وانتي يا بتي
فردوس: انا كويسة الحمدلله
ابوي: سألت منك قالو رجعتي
فردوس: ايي رجعت بس تقدر تجي تسوقني هسي
ابوي: ليه يا بتي . دايرة ارد سفيان جرا مني التلفون وسلم على ابوي وشكلو ابوي سألو لانو قال
سفيان: لا هي بس قالت دايرة تمشي البيت نست حاجاتها وانا قولت ليها خلي بوديكي بكرة تشيليهم كانت مصرة وقالت بكلم ابوي يجي يسوقني . ابوي شكلو قال ليهو كلام وضحك بعدها قفل منو
__ دا شنو يعني
_دا شنو القولتو لابوي دا
__ مالك انتي
_ ما عارفة بس حأكلم ابوي يجي يسوقني وانا شوف ليك مرا تانية تتأمر فيها
__ دايرة تمشي تخليني؟ . طوالي دموعي نزلو
_ عشان انت ما مقدرني ولا بتحبني . جا حضني عليهو
__ معقولة ما بحبك يااخ لشنو كنت مصر انك ترجعي لانو ما بقدر بلاكي عادي كان اخليكي هناك ذي ما خليتك الشهور الاوائل من الحمل . طوالي رخيت ما عارفة انا هبلة ولا عشان بحبو مسحت وشي في صدرو
_ خلاص ليه ما بتعبر بطريقة حلوة كدا
__ عشان انا كدا
_ بس كدا حتزعلني شديد
__ خلاص تاني لو مشتاق ليكي بقول يا بت العم مشتاقين
_ مشتاقين دا تقولو اولاد عمك انا تقول لي مشتاق ليكي . قام ضحك وضماني اكتر واتصالحنا اخيرا...
_____________
من جانب همس
حياتي كانت مستقرة مع عمار ماف داعي اقول لانو من زمان متفاهمين وعارفين بعضنا شديد في يوم كنا في المطبخ وبجهز في الفطور وهو قاعد في كرسي عامل فيها بساعدني بالونسة
__ بطة
_ نعم
__ انتي ما سألتيني الحصل شنو يوم العرس وسبب اختفائي
_ ما سألتك لانو ما كان بهمني ذي ما بهمني انك رجعت بخير وعوضتني
__ لا دقيقة وحس الفضول الزمان داك مشى وين . التفت ليهو ورفعت ليهو السكين
_ قطعتو مع السلطة دي
__ ههههه ظريفة طبعا . قومت ضحكت
_ عارفة ما جيبت حاجة من عندك
__ غلطان انا الكنت دايرك تسأليني واحكي ليك الحاصل واستشيرك في حاجه غلطان يا عمار . وقام مشى على التلاجة فتش كدا شال حاجة التفت لقاني وراهو مباشرة لمن اتخلع
__ بسم الله مالك . ابتسمت ليهو ببلاهة كدا
_ الحصل شنو يوم العرس . قام ضحك ولزاني من جبهتي
__ هبلة ما بوريكي عديل . وقفل باب التلاجة لزيتو في باب التلاجة والسكين كان في ايدي ختيت ذراعي في صدرو ورفعت ليهو السكين ذي حركة لمن تهدد زول بالضبح ورفعت ليهو حاجبي
_ عمار الحصل شنو
__ لا بتهدديني كدا يعني؟
_ عارفة انك بلزة وحدة منك ممكن تلصقني في مصطبة المطبخ بس برضو ايي بهددك . قام ضحك عمل فيها خايف
__ لالا خلاص بتكلم بس نزلي سكينك دا انا خايف ياااخ ما تهظري بالسكين . هنا فكيت الضحكة وعمار دايما بمشيني على حسب عقلي عشان كدا بحبو رغم فارق العمر بينا بس بتصرف حسب الموقف يعني لو عاوزاهو اب بكون كبير بمقام ابوي ولو عاوزاهو صاحب برضو بكون حسب عمر الصاحب ومرات بكون صحبتي عديل
ودا المخليني متعلقة بيهو شديد بعد كملت الضحك نطيت في ضهرو ومسكت رقبتو
__ بطة لا اله الا الله؟
_ محمد رسول الله هسي ورح وديني الغرفة ونحكي هناك
__ انزلي بالاول
_ لالا بمشي كدا . استسلم وساقني وانا في ضهرو مشينا الغرفة قعدنا وحكى لي الموضوع وانا كنت كل أذن صايغة لمن خلص وحكى لي بالعرض حق المدير تبع الفرع التاني
__ هسي ما عارف هنا المدير قال حيديني ترقية وحأكون رئيس القسم الانا شغال فيهو وهناك حيديني برضو ادارة فرع وهسي محتار
_ لا موش نفس الحاجه؟
__ لالا اي واحد بميزتو
_ والافضل وينو؟
__ داك
_ وانت داير اي واحد؟
__ محتار للان والله انتي رأيك شنو . مسكت ايدو
_ يلا شوف حبيبي انا دا مجالك انت وبتعرف الافضل ليك شنو وانا معاك في كل قرار حتآخدو
__ ولو قررت السفر ما بقدر اجيكم كل يوم صح ما بعيد بس حيكون متعب بالنسبة لي
_ دقيقه دقيقه ما حتسوقني معاك؟
__ حتوافقي تمشي معاي؟
_ ولا انت ناوي تخليني وراك؟
__ يلا عشان كدا محتار ما بقدر اخليك وراي عشان السبب دا داير ارفض
_ وانا ليه ما بقدر امشي معاك؟
__ حتخلي امك و الاسرة وحتمشي معاي؟
_ انا من اتزوجتك انت بقيت اسرتي وعارفة انو حتكون صعبة انو افارق امي بس دي سنة الحياة والمرا مع راجلها والمسافة ما بعيدة ممكن عادي تجيبني اخر الاسبوع اقضي يومين ونرجع ممكن ولا ممكن؟
_ ممكن بشدة والله . وسلم علي في ايدي
_ كنت ناوي انو ارفض والله عشانك انتي بس ما بقدر بلاكي وهسي انتي اخترتيني
__ وانا اصلا ما كنت حأخليك تسافر براك لاني برضو ما بقدر بلاك وما تخاف دايما حأختارك ووين ما تكون انت حأكون انا . جراني عليهو وحضني شديد صح حتكون صعبة انو ابدا حياة جديدة بعيدة من كل اسرتي وحياتي الاتعودت عليها بس عمار بستاهل انو اضحي عشانو ومدام هو موجود بستحمل زحا مني لقاني سرحانة
__ بطة متأكدة من قرارك دا لانو دي حياة جديدة ما تجاملي فيها
_ اسمعني هنا انت ناوي تمشي هناك براك وبعدين تقول تعبتني الغربة واتزوجت هناك صح؟ يلا دا مستحيل اخليك تعملها . قام ضحك
__ والله عمري كلو ما فكرت في بت غيرك وعمري كلو ما حأفكر ومدام خايفة من الحاجة دي ورح معاي
_ افوتك وين انا اصلا حجل بالرجل . سلم علي في رأسي وكان مبسوط شديد مني ومن انو لقى المساندة مني
يلا عمار اتصل مع المدير في الفرع التاني وكلمو بقرارو والمدير فرح وسافر عمار عشان يتم باقي الاجراءات ووقعو العقد وحصل على الترقية ورجع في نفس اليوم وكان مبسوط وانا فرحت لفرحتو
__ خلصت يا همس
_ الف مبروك حبيبي
__ الله يبارك فيكي انتي وشك كان خير بالنسبة لي
_ انت القلبك طيب عشان كدا امورك بتتسهل
__ تسلمي يا غالية
_ الله يسلمك اها السفر متين
__ عندي اسبوع اجهز اموري ونلقى بيت مناسب هناك ونستقر بعدها ببدأ
_ اسبوع ما بسيط؟
__ ماف طريقة يا همس الشغل ما بستنى وانا مدير قسم كامل نسافر وبعداك نرتب الامور حبة حبة هي المسافه ما بعيدة حكاية ساعتين
_ تمام خلاص لازم نكلم الاسرة
__ تمام بكرة نشرب معاهم شاي المغرب
_ حلو
بالفعل اليوم التاني مشينا البيت الكبير كلهم كانو مجتمعين حتى كلمت فردوس وسفيان عشان يجو وبالفعل اجتمعنا كلنا في البيت الكبير
عمار: يا جماعة داير اكلمكم بموضوع مهم
عمو محمد: اتكلم سامعينك
عمار: في الشركة الانا شغال فيها عندهم فرع في ولاية...... وعملنا معاهم اجتماع وادوني فرصة انو اكون رئيس قسم وانا وافقت
عمو محمد: الف مبروك يا ولدي
عمار: الله يبارك فيك يا حاج
عمو محمد: يعني حتسافر
عمار: بأذن الله
عمتو حنان: ومرتك يا ولدي
عمار: سايقها معاي
عمتو حنان: احسن عشان ما تكون براك . هز رأسو بمعنى ايي
عمتو حنان: ربنا يوفقك في حياتك
عمار: امين يارب دعواتك يا حجة
عمتو حنان: دعواتي دايما معاك حبيبي انا
امي: حتخلو لينا المكان شين
عمار: حنجيكم نهاية الاسبوع اصلا الولاية ما بعيدة
امي: ربنا يسعدكم
عمار: امين يارب
عمو محمد: والسفر متين
عمار: قدامي اسبوع واصلا لازم اسافر عشان القى بيت مناسب
سفيان: انا عندي اصحاب هناك خلي موضوع البيت علي انا
عمار: ياااخ انت اخو الاخوان والله
سفيان: تستاهل ياااخ
عزيز: خلاص انا نقل الحاجات علي بظبطتها ليك
عمار: ما عارف اجازيكم كيف والله
عزيز: نحنا اخوانك ياااخ
عمار: بالجد اخوان
عمر: خلاص انا بساعدك يا عزيز في تجهيز البيت .
عمار: تسلمو لي ياااخ . عمار كان فخور بأخوانو شديد وبعد الجلسة انتهت انفصلنا الرجال براهم والنسوان براهم
عمتو حنان: لازم ندق ليكي ريحة جديدة
عمتو سلوى: صح
صفا: ولازم نعمل ليها قعدة صغيرة
فردوس: دي اهم حاجه
امي: انزلي دخان عشان تنضفي الايام دي
همس: امي ورح معاي
امي: ما بقدر انتي لسع عروس جديدة بس لمن تكوني حامل بجيكي بقعد معاكي لمن توضعي
همس: خلاص انا بجيكم كل نهاية اسبوع بقعد الخميس والجمعة وبرجع السبت نهاية اليوم
امي: ممكن حبيبتي . وقعدنا نخطط ونتونس
الايام جرت سريع والشباب ظبطتو الوضع ونقلو العفش هناك كان باقي السفر بس وعملو لي قعدة صغيرة وكلمنا الجيران وكانت حلوة وبعدها سافرنا كلنا بالعربات ووصلنا بيتي الجديد كان حلو وصغير على قدر حالنا اصلا نحنا اتنين بس وضبحنا وقيلنا فيهو حتى فردوس جات ما عارفة اقنعت سفيان كيف بس جات واليوم كان حلو رجعو بعرباتهم بعد المغرب كدا بعد نضفو لي البيت وغسلو لي العدة
_ اليوم كان حلو والله
__ شديد والله
_ حتنزل الشغل متين
__ المفروض بكرة
_ تمام
الصباح جهزت ليهو الشاي وطلعت ليهو ملابسو ولبس وطلع للشغل وبقيت براي قاعدة دايرة ارجع انوم بابي ضرب وكانو نسوان اتنين كدا حمدو لي السلامة وباركو لي البيت واتعرفت عليهم كانو ظريفات عملت القهوة شربوها معاي وطلعو وعمار رجع بدري كأول يوم يعني
_ كيف يومك
__ يعني بس بكرة اليوم الاصعب
_ كيف
__ بكرة تسليمي لموقعي وحأعقد الاجتماع انا واعرف باقي روؤساء الاقسام ولازم اثبت نفسي
_ عارفة انك قدرها ما خايفة عليك ابدا
__ ان شاءلله يا رب اها انتي يومك كيف . حكيت ليهو بجاراتي الجوني وشربو معاي القهوة
__ ما تدخلي فيهم شديد ما دايرك تتعاملي مع النااس شديد لانو نحنا جداد هنا وما بنعرفهم
_ تمام
__ وقاعدات الجبنات ممنوعة
_ ليه
__ ما واثق انا لو حصلت ليكي حاجه هناك لالا
_ ما تخاف علي
__ ما بقدر ما اخاف وهسي خايف انو جيبتك معاي هنا في ولاية غريبة ونحنا برانا
_ خلاص يا عمار ما حأتعامل مع زول ولا حأدخل في زول ولا حأمشي لزول كدا تمام؟
__ بطة ما تزعلي والله من خوفي عليكي
_ خلاص تمام
__ لسع زعلانة؟
_ هو انا لايقة زول يخاف علي؟ . قام ضحك وسلم علي في رأسي......
______________
من جانب فردوس
بعد يومين من شكلتي مع سفيان مشينا المقابلة حقتي وكان دايرة اعرف جنس المولود وطلع بت سفيان فرح شديد حتى اكتر مني انو حتجيهو بت
_ بقينا ليك اتنين كدا
__ ماف احلى من كدا والله
_ كدا مستوى العناد حيزيد اكتر تتحمل بس
__ بتحمل عناد بتي بس انتي بكسر ليكي رأسك
_ على فكرة انا ذاتي عندي اب بتحمل عنادي وديني ليهو . قام ضحك
__ تاني انا ابوكي بس
_ وكدا ظلم بتفرق بين اولادك
__ خلاص بعدل
_ كدا تمام
بعد فترة اتصلت لي همس انو مطلوب حضورنا في بيت الاسرة ومشينا وكان بخصوص سفرها هي وعمار زعلنا من الخبر بس لازم تمشي وخططنا ليها وعملنا ليها قعدة صغيرة كدا وخلاص جا انو نوديها بيتها والكل مسافر معاهم بس كيف اقنع سفيان انو اسافر معاهم كنت عارفة نسبة النجاح 10٪ بس لازم اجرب مشيت ليهو قبل السفر بيوم كان بالليل
_ ابو السيوف . عاين لي ورفع لي حاجبو يعني دا شنو
__ لا
_ هو شنو اللا
__ دايرة تقنعيني بحاجه وانتي عارفه اني ما بقبل بيها صح؟
_ ما كدا
__ اها
_ دايرة اسافر
__ وين
_ بكرة مع ناس همس عشان نوصلوها بيتها
__ اصلا حتسافري معاهم . اتفاجأت
_ احلف
__ والله
_ يعني ما معترض
__ بعيدا عن دا لو رفضت حتمدي لي بوزك مترين وحتمليني نكد انا عارف وانا ما ناقص . قومت ضحكت
_ حيحصل والله
__ واتكلمت مع الدكتور قال عادي اصلا انتي اتجاوزتي مرحلة الخطر والسفر كلها ساعة ونص ساعتين بس نحنا حنمش على راحتنا لسلامتك
_ شوف لو نمشي بسلحفاة ما عندي مانع . قام ضحك على حماسي
__ خلاص قومي اتجهزي . قومت اخترت لي ملابس لبكرة والحاجات الممكن اشيلها معاي وجهزت لسفيان برضو وبالفعل اليوم التاني سافرنا وكنا في عربيتنا برانا وماشين براحتنا وصلنا اخر ناس بس كان الجو حلو وقضينا يوم ظريف ورجعنا اخر الليل ونومت نومة اهل الكهف ..........
28
كنت بحاول اتعود على حياتي الجديدة بالاخص انو عمار مانعني انو اتعامل مع الجيران يعني هم بجوني بس انا ما قاعدة امش لمن جاراتي الكان زاروني اول مرة لمن رحلت جوني تاني وحدة اسمها قسمة والتانية اسراء ومجرد ما يجوني بفرح لانو براي بس طول اليوم وهم بغيرو لي جو
قسمة: همس ورح معانا بيت جارتنا هنا ولدت نمش نبارك ليها وتتعرفي عليها واحتمال تلقي جارات تتعرفي عليهم . ما عرفت اقول شنو لانو عمار ما حيرضى ابدا
همس: خلوهو يوم تاني لمن راجلي يجي واستأذن منو
اسراء: التلفون دا عملو لشنو اتصلي كلمي اصلا خمسة دقايق وحنرجع . حاولت اتحجج بأي طريقة بس كانو مصرين قومت دخلت الغرفة واتصلت لعمار
_ عمار جاراتنا قالو نمش معاهم لبيت وحدة قريب هنا ما بنتأخر
__ بيت منو وبتعرفيها من وين
_ على اساس انا بعرف وحدة فيهم
__ بس خلاص ما بتعرفيهم ماف داعي تمشي
_ عمار ما بتأخر
__ لالا ما تمشي
_ عليك الله عمار والله ما بتأخر
__ لالا واوع تكسري لي كلمة عشان ما اكسر رأسك . من الزعل طق قفلت الخط في وشو وكنت زعلانة شديد منو وكمان محرجة هسي اطلع اقول لجاراتي شنو راجلي ما رضى حيحسو كأني عاملة جريمة عشان كدا راجلي مانعني من الطلعة بس اتنهدت وطلعت
همس: والله معليش يااخ ما بقدر امشي معاكم
قسمة: راجلك صعب
همس: بخاف علي بس انو لسع البلد جديدة علي
اسراء: بس نحنا معاكي ولمتين تكوني محبوسة كدا ما قاعدة تجينا حتى
همس: امممممم بجيكم ان شاءلله
قسمة: خلاص ما مشكله نحنا بنجيكي لمن راجلك يقتنع انو تطلعي من الجو دا ويكون مطمئن عليكي معانا
همس: خلاص تمام
قسمة: هو ود عمك صح؟
همس: ايي
قسمة: متذكرة كان قولتي لينا
اسراء: ما حصل شوفتو انا
همس: حتشوفي ان شاءلله . قعدو شوية وطلعو والله هم ظريفات وبغيرو لي جو لمن يجوني وانا محرجة منهم انو ما زرت ولا وحدة فيهم محبوسة في البيت بس وعمار مشغول انا البقالة ما بطلع يعني قاعدة بين اربعة حيطان لو كنت في نفس الولاية الاهلي فيها كان عندي الحرية يعني عادي امشي لناس امي اقعد معاهم وعمار يجي يرجعني بس هنا ماف حاجه بعملا ولا بمشي لزول بنتظر عمار بس عشان يجي وشكلو كان عارف عشان كدا ما كان داير يجيبني معاهو ومتردد اني اجي معاهو لانو عارف نفسو انو حيعزلني من العالم كدا عشان كدا كان متردد في قبول الوظيفة بس انا وافقتو الرأي فقبلو يعني انا السبب وهسي ندمانة على قراري داك
المسا لمن رجعت خشمي ما فتحتو ولا لومتو بس كنت ساكتة وهو ما متعود علي كدا جاني في المطبخ
__ عارف انك زعلانة عشان رفضت انو تطلعي معاهم بس انا وريتك من البداية الحيحصل . ما رديت كنت مواصلة في الكنت بعمل فيهو جاني قريب
__ بطة انا من البدايه كلمتك انو تعامل معاهم ما داير لانو ما ضامن زول انا
_ هم بجوني دايما انا ما حصل دخلت رجلي في بيت وحدة منهم بقيت لمن انحرج لمن يجوني
__ عشان كدا ما دايرك تجي معاي لاني عارف انو حأقيدك وحأحبسك وحتزعلي
_ خلاص رجعني لاهلي . سكت وعاين لي
__ دايرة ترجعي؟
_ ايي بس لمن ترجعني تطلقني ما بنتظرك عشان تجي نهائي الاسبوع وترجع
__ انا استشرتك قبل ما اتخذ القرار دا صح ولالا؟
_ وانا اخترتك صح؟ يلا في داعي تذكرني بالكلام دا؟
__ همس اخر كلامك شنو انتي دايرة شنو لو حابة تقعدي معاي هنا ماف تعامل مع الجيران ولو عاوزة ترجعي لاهلك برجعك انتي اختاري وتعال وريني . قال كلامو دا وطلع من المطبخ ياااخ ما بقدر اكون محبوسة طول اليوم كدا وما بقدر ارجع اخليهو واصلا في كل اختياراتي حأختارو هو تميت الكنت بعمل فيهو وخلصت ودخلت الغرفة لقيتو قاعد شيلت لي غيار وطلعت مشيت استحميت ورجعت الغرفة قعدت في السرير وبقيت اتمسح وهو بعاين لي بس ما فتح خشمي وانا بعاين ليهو بطرف عيني مشيت رصيت الغدا واتغدينا و اي واحد ساكت ماف واحد فتح خشمو مع التاني لمن جيبت الشاي
__ تعالي اقعدي . مشيت قعدت جنبو
__ على ما افترض قرارك ما بحتاج تفكير كتير انتي دايرة ترجعي بس ماف طلاق من هسي بكلمك وغصب عنك تنتظريني نهاية الاسبوع واحتمال نهاية الاسبوع من كل شهر بس لانو القرار دا انتي ساندتيني فيهو ما بتحمل النتيجة براي
_ وانا ما بتحمل النتيجة معاك
__ اسمعيني هنا والله خلي لو جيبتي ابوي لو جيبتي اعمامك كلهم انا طلاق ما بطلقك خليكي عارفة
_ وانا ما دايرة اطلق
__ بس خلاص
_ وما برجع براي
__ وانا خاطرت بسببك ما بقدر ارجع
_ وانا ما دايراك ترجع
__ كيف يعني
_ محل انت قاعد انا بقعد
__ وحتكوني محبوسة كدا؟
_ ما عندي حل
__ عندك حل
_ انو ارجع صح؟ يلا انا ما حأرجع انت ما دايرني جنبك؟ . مسك ايدي
__ يا بت انا روحي فيكي انا بس ارجع من الشغل واشوفك قاعدة منتظراني والله بنسى كل التعب بتاع اليوم
_ اممممممم
__ السبب البخليني امنعك من الخروج انو ما بقدر اكون طول اليوم خايف عليكي هنا لو حصلت ليكي حاجة اعمل شنو ولو ما قدرتي تصلي لي بس هناك كان ممكن في الف مخرج بكون مطمئن انو ممكن تتصلي لسفيان لعمر لعزيز حيلحقوكي
_ خلاص حأتحمل القفلة دي بس بشرط
__ نسمع شرطك
_ انو ترجع بدري شويه لاني بكون براي طول اليوم ياااخ
__ والله ما عارف بس بحاول خلاص
_ اتفقنا
__ نهاية الاسبوع نرجع البيت الكبير كيف وكيف
_ جادي احلف؟
__ والله نرجع الخميس نهاية الدوام عشان نقضي الجمعة والسبت نرجع اخر اليوم . فرحت شديد
_ موافقة اشتقت لناس البيت
__ وكدا حلينا الموضوع
_ حليناهو
__ خلاص البسي هسي نمشي نلف في البلد دي شوية . قومت بفرحة
_ ونرجع اخر الليل؟ . قام ضحك
__ مع انو بكرة شغال بس فداكي حنرجع اخر الليل . صفقت بفرحة وقومنا لبسنا وطلعني فسحني كدا لمن رجعنا اخر الليل وكنت مبسوطة شديد
لمن جا نهاية الاسبوع جهزت لينا الشنطة عشان نسافر وبالفعل سافرنا ووصلنا العشا كدا وفاجأنا ناس البيت كانو مبسوطين شديد بجيتنا ليهم نزلنا في بيت ناس عمار في غرفتو لانو فاضية للان بس مشيت للبنات في البيت الكبير ودخلت غرفتنا الفيها كل زكرياتنا فيها وبقينا نتونس مع البنات
هسي: سوما اها انتي لسع ما اتفقتي مع راجلك انو تتمو عرسكم
وسام: والله احمد ناوي ينزل السودان عشان نتم العرس بس حصلت ليهو ظروف فأجلنا
همس: كل تأخيرة لخيرة
وسام: اي صح
همس: اتفقتو خلاص
وسام: الحمدلله هو من ناحيتو دايرني من لمن كنت صغيرة بس انا البحاول اتأقلم على الوضع بس الحمدلله اتقبلت الموضوع
همس: ربنا يسعدكم يا رب
وسام: امين يارب
همس: اها وانتي يا صحبتي
صفا: ما تسألوني انا القطر فاتني خلاص . قومنا ضحكنا
وسام: المشكله انتي قافلة على عزيز بس
صفا: والله موجع قلبي معاهو
همس: اتجاوزي وشوفي حياتك
صفا: ما قادرة لسع عند نفس النقطة ممكن اتجاوز اذا هو اتزوج تاني
همس: ودي حاجه بعيدة
صفا: يلا دي المشكله
قعدنا نتونس كدا بعدها نومنا
الصباح اصبحنا وكان الجو عائلي اشتقت للجو دا وعمو محمد ضبح لينا شكل كرامة كدا بس وعزمنا الجيران وفردوس جاتنا من الصباح وطبعا خلاص قربت على الولادة ومن الصباح لاقيت عمار كان شارد ناديتو طبعا من جينا امس ما لميت فيهو لاني نومت مع البنات
_ وين انت من امس اشتقنا ياااخ . عاين لي بس وملامحو ذي الزول الحاصلة ليهو حاجه
_ عمار في شنو مالك . ما رد مسح وشو بتعب
_ ما تخوفني عليك انت كويس؟
__ انا كويس
_ متأكد؟ . هز لي رأسو ومشى رجعت للبنات قعدت
فردوس: مالك
همس: ما عارفة حاسة عمار غريب
فردوس: بكون تعبان بس
همس: احتمال
جا زمن الفطور وموال الفطور والناس فطرت بس في جيران يداب وصلو مشيت المخزن عشان اجيب صيوان لانو محتاجين كانت صفا معاي ولمن شايلنهم سمعت نسوان اتنين بتكلمو
الاولى: هسي دي مرا يتزوجو فيها عليك الله؟ . الكلام هبشني لانو صفا ما متزوجة بس صفا كانت بتتكلم ما سمعتهم مديت لصفا الصيواني
همس: نسيت مفتاح المخزن فيهو انتي اتقدمي . هي مشت وانا رجعت وقفت هم ما شايفيني
الاولى: صحي السماحة ما بتمسك بيت
التانية: رجال الدنيا ديل عينهم زايقة خلاص هو متين اتزوج لمن يدبل
الاولى: البشوف عمار يوم عرسو بقول عمرو ما يعرس فوق مرتو
التانية: اصلا الرجال كلهم كلاب ساي الواحد من يشوف مرا سمحة خلاص
الاولى: بس مرتو مسكينة ما بتستاهل
التانية: شكلها ما وروها حتتفاجأ بعدين بس انتي الوراكي منو
الاولى: هيي يختي مواضيع ذي دي ما بتتخبى . كلامهم بقى لي طشاش طشاش عمار حيتزوج فيني مستحيل طبعا مستحيل عمار يعملا قومت ضحكت وقولت ديل بخرفو ساي وواصلت مشيت محل البنات من دخلت سكتو وكلهم بقو يعاينو لي عرفت في حاجه قلبي اكلني للحظة انو كلامو النسوان يكون صحي قولت اختبرهم
همس: سمعتو بالخبر؟
فردوس: اي خبر
همس: انو عمار داير يدبل فيني . وضحكت سكتو وبقو يعاينو لي عرفت انو الخبر وصلهم معناهو صح فردوس جات تقرب علي رفعت ليها ايدي في الهوا
همس: ماف زول يقرب مني والكلام دا ما صح . وطلعت من الغرفة بفتش في امي وطلعت هي بتفتش فيني
همس: امي عمار حيتزوج فيني صح الكلام دا؟
امي: كدا اهدي بالاول
همس: معناهو صح . فكيتها وجريت ورا البيت قعدت تحت وضهري على الحيطة يعني عمار لمن رجعني بالجد ناوي يخليني هنا ويتزوج وحدة تانيه عشان تعيش معاهو هناك تاني قولت مهما حصل عمار بحبني مستحيل انو يعمل كدا فيني او الا مجبور لانو هو ما بسمح لزول يزعلني لمن هو يزعلني مستحيل طبعا وتاني كضبت الكلام لو ما سمعتو من عمار ما بصدق ابدا دمعة ما نزلتها لاني ما مصدقة جوني البنات
صفا: همس قومي من الشمس تعالي جوا
همس: خلوني
وسام: ما بنقدر . قوموني
همس: جيبو لي كرسي تحت الحيطة ديك ما داخلة جوا دايرة عمار بس . لمن لقوني مصرة جابو الكراسي كلهم وقعدو معاي بقيت اهز في رجلي وانا متوترة وجواي النار قايمة وطبعا الوقت قرب لصلاة الضهر لازم اشوفو قبل الصلاة عشان حيبقى العقد الما مصدقة دا شوفتو جا داخل قومت ماشة سريع ليهو وتوبي نصو فيني ونصو في الارض وحفيانة طبعا هو لمن شافني وقف جيت وقفت قدامو في نص الحوش
همس: عمار انت حتعقد؟ . سكت دا الوجعني اكتر
همس: عمار ما توجعني قلبي معاك اتكلم . برضو ما رد
همس: عشان قولت ما قادرة اتحمل العيشة المقفولة نويت تتزوج علي؟ برد قلبي وقول انو السمعتو دا غلط . سكت مسافة
عمار: حأعقد بس ما لنفس السبب القولتي دا
همس: بس حتعقد
همس: الف مبروك مقدما . سكت قومت جارية وتوبي في الارض والبنات تبعوني دخلت الغرفة وفتحت بيت البكا ليهم وهم بحاولو يهدوني
فردوس: همس والله متأكدة انو عمار عندو سبب لانو انتي عارفة انو روحو فيكي
وسام: جنة صح كلامها
همس: وانا اعمل بالكلام دا شنو هسي
فردوس: المفروض تقيفي جنبو تفهمي منو صح؟
همس: انتو فاهمين عمار حيتزوج علي ما حتحسو بي ابدا خلوني في حالي . ما قدرو لي ولا حيقدرو الكلام ساهل بس ما اي زول بحس بوجع الزول ما لم يعيش نفس الموقف امي جات داخلة قعدت جنبي حضنتها شديد وبكيت في حضنها
همس: امي شايفة عمار حيعمل فيني شنو
امي: والله يا بتي عمار الحب البكنو ليكي اكتر مما تتخيلي وانا عرفت الحاجة دي اكتر لمن عملتي الحادث دا وقف واتحدى ابوهو واعمامك كلهم بس عشان ما يخليكي صح ولالا
همس: صح
امي: وكم مرة اتحدى الناس عشانك صح ولالا
همس: صح
امي: وهسي انا متأكدة انو حاصلة حاجة تخليهو يآخد الخطوة دي
همس: هسي اعمل شنو انا
امي: لازم تقيفي جنبو متأكدة انو انجبر يعمل كدا غير كدا عمار مستحيل يعاين لوحدة غيرك واكيد محتاج دعمك
همس: اااامي . وبكيت اكتر امي وضحت لي حاجات كتيرة بس كيف ادعمو في انو يتزوج فيني . امي قعدت معاي شوية وطلعت وخلت البنات يطلعو عشان ما يزودوها علي بالكلام بقيت راقدة وصفا في رأسي بتمسح ليهو فيهو وانا ضميت روحي علي ودموعي نازلة
بعد مرور زمن سامعين اصوات برا ديل الرجال رجعو من الجامع والجوطة كانت كتيرة وانا بس الجوا الغرفة مع صفا فجأة سمعت الزغاريد غطيت اضاني يعني فرحانين على ألمي بقيت خاتة ايادي في اضاني بس وصفا جنبي فجأة في زول دخل الغرفة سمعت صوتو دا كان عمار عاين لصفا هي براحة انسحبت جا قعد جنب رجولي وهبشهم
__ بطة . لسع كنت في نفس الوضع حقي
__ بتي . طوالي قومت وغيرت اتجاهي ختيت رأسي في رجولو ودموعي نازلة
_كيف قلبك سمح ليك تعمل في بتك كدا
__ والله قلبي ما بسمح لي وذي ما انتي متوجعة حاليا انا متوجع اضعاف
_ عمار انا بدخل النار وبطلع لمن تتعامل مع بت غيري لمن تشاركني بت تانية فيك وفي تفاصيلك؟
__ انا قبل كدا قولت ليكي ماف بت حتشاركك فيني
_ بس هسي حصل . وبقيت ابكي زيادة
__ ما حصل ولا حيحصل خلاص خلاص محنة و عدت ما تبكي . بقى يمسح لي في رأسي
__ ما تخافي ما بقى عندك ضرة ولو بقى حتكون ضرتك روحك بس وانا بعتذر انو دخلت في الحالة دي . هنا بقيت بكيت اكتر يعني عمار ما عقد
__ بطة خلاص ما تبكي
_ ما عقدت؟
__ لالا ما عقدت
_ والزغاريد دي
__ عزيز العقد . فجأة قومت من رجلو ونسيت الموضوع كلو وقولت كلام المفروض ما اقولو بس في لحظة انفعال
_ عمار كدا صفا حتموت........