قال لي احراج شنو قلت ماف داعي اوريه الحاصل قلت ليه لا ابدا بس قلت يمكن ماسكين ليكم موضوع ما اقطعو ليكم قال لي عادي تجي تسلمي قلت ليه خير
قلت ليه عايزة اسألك من حاجة قال لي اتفضلي قلت ليه عندك فكرة في رمضان حنكون شغالين ولا لأ قال لي حسب الجدول الاتوضع انو حنشتغل لحد يوم ١٣ رمضان يعني شهر كدا وبنأجز بننزل بعد العيد بس في حاجة قلت ليه ابدا حبيت اعرف بس يلا استأذنك المحاضرة مواعيدها جات
مشيت القاعة والمحاضرة بدت وانتهت والبعدها كمان خلصت وبقيت منتظرة عمو علي يتصل علي مشيت الكافتريا وطلبت لي قهوة قلت اقزقز بيها لحد مايصلو وانا بشرب كان اسمع زول بقول سبحاااااااااان الله الليلة دي معجزة اتلفت لقيتو استاذ حيدر قلت ليه خير؟
قال لي اغرب حاجة تحصل انك تجي الكافتريا وكمان تشربي قهوة قعدت اضحك
قلت ليه منتظرة ناس البيت جاييني عشان طالعين مشوار قال لي اممممم يعني الليلة ماحنرجع سوا قلت ليه للاسف لا قال لي خسااااارة سكت شوية. طيب مافي اتفضل اشرب ليك قهوة قلت ليه اتفضل قعد يضحك عزومة المراكبية دي مابقبلها
قلت ليه ابدا والله اتفضل وحاطلبها ليك على حسابي كمانقال لي كان كدا موافق هههههههه بهظر طبعا قلت ليه وانا جادة مابهظر قال لي نحن ماعندنا راجل بتعزمو بت عاينت ليه 🙄 راحتك طيب
في اللحظة دي تلفوني ضرب طلع دا عمو علي رديت قال لي نحن جنب الباب قلت ليه طيب
قفلت وقلت ليه استأذنك ناس البيت جو خلاص قال لي خير يلا مع السلامة قال لي في امان الله
طلعت لقيت عمو علي ومعاه خالتو نسيبة واريج منتظرني بالعربية سلمت عليهم وركبت خالتو نسيبة قال لي اها يومك كان كيف قلت ليها كويس الحمدلله قالت لي لينا زمن ماطلعنا عشان كدا قلنا نطلع الليلة نتغدا برا قلت ليها طبعا دي أول مرة في حياتي اطلع اتفسح قالت لي وماحتكون اخر مرة تاني كل فترة نطلعكم انتي واريج تغيرو جو قلت ليها ان شاء الله
وصلنا مطعم مشويات فخم كدا و الريحة من برا تفتح النفس دخلنا ماشاء الله المكان رهيب وقعداتو مباااالغة والمكان ملاااان ناس بس هو كان حاجز لينا تربيزة العرفتو انه سيد المطعم صحبو حاجزين لينا في اجمل مكان
وشوية وجانا الويتر جاب المنيو وطلبو لينا كم حاجة انا بس منبهرة بالمكان وبتلفت ساي اول مرة اشوف مجتمع زي دا معقول في ناس عايشين حياة الرفاهية دي
عمو علي قال لي شاردة وين قلت ليه ابدا بعاين في المكان الجميل دا
المهم الاكل جا مشويات من كل الاصناف فراخ على لحمة والاكل كان سمح شديد وطاعم ياخ انا اكلت اكل ولا حسيت بي نفسي وخالتو نسيبة تشيل وتخت لي جنبي اريج قالت ليها احم احم انا كدا بغير قالت ليها تغيري شنو انتي مامقصرة عشان اخت ليك حاجة قعدنا نضحك
بعد خلصنا الاكل جابو لينا جبنة وسلطة فواكه قلت ليهم انا في ديل مامعاكم خلااااااص بطني اتملت فل وقبل ماتجوني شربت لي قهوة عمو علي قال لي ضوقي سلطة الفواكه دي بتغيري رايك اكلت زي ملعقتين ووقفت قلت ليهم والله مابقدر شبعانة شديد
شربو القهوة واتونسنا مسافة كدا عمو علي قال لينا خلاص بعد كدا يلا عندنا مشوار تاني عشان نرجع البيت قبل العشاء
طلعنا واتحركنا طوالي وصلنا السوق قال لينا انزلو يلا انا بستناكم هنا
نزلنا خالتو نسيبة قالت لي عايزين نشتري ليكم انتي واريج كم غيار كدا انا في اللحظة دي دمعت
دخلنا كم محل كدا واخترنا لبسات وعبايات وخالتو نسيبة حاسبت وطلعنا
مشينا البيت وانا كنت تعبانة شديد يوم طويل كان صليت العشاء بس ورقدت نمت جاتي صحية زي الساعة ١٢ لقيت استاذ حيدر متصل علي زي مرتين ومرسل لي
كاتب لي وين الناس رديت ليه معليش جينا من مشوارنا متأخرين نمت والله ماصحيت الا اسه فكرتو انو حيكون نايم ماتميت دقيقة لقيتو رد لي قال لي نوم العوافي قلت اشوفك بس وصلتي كيف
قلت ليه الحمدلله بخير
قال لي طيب يلا تصبحي على خير بكرة الخميس عندي معاكم المحاضرة الاولى قلت ليه وانت من اهله
اخدت مسافة اشيل واقرأ في الرسايل ماعارفة حسيت بي احساس غريب
واخدت باقي الليل كلو تفكير بقيت افكر في طريقة كلامو معاي لمن يلاقيني في الجامعة ورسايلو يعني هو بعمل مع كل الطلبة كدا ولا انا براي
واثناء مابفكر كدا جاتي رسالة نزلت الستارة اشوف منو المرسل لقيتو دا كاتب لي لحد الان ماقدرت انوم بفكر فيك ابيت افتح الرسالة رسالتو دي جهجهتني زيادة يقصد شنو ياربي بقيت محتارة شديد وراسي جاط اكتر نمت ماحسيت بي روحي الا والمنبه بضرب
صحيت سريع ومشيت صليت واتجهزت سبحان الله البيلة حاسة بي نشاط وراحة اكتر وكنت عايزة امشي الجامعة بفارغ الصبر بس متحيرة ليه
المهم عمو علي جهز وطلعنا في الطريق جاتني رسالة طبعا منو اكيد كاتب لي صباح الخير انا جيت الجامعة بدري ومنتظرك جنب باب الجامعة بالجد اتوترت شديد من كلامو دا انا ماعايزاه يقرب لي نهائي وماعارفة اعمل شنو عشان هو مايركز معاي كدا
وصلنا الجامعة وفعلا شايفاه من هناك واقف وبعاين اتجاه العربية حسيت بي احساسين مختلفين مبسوطة اني شفتو وفي نفس الوقت مامرتاحة نزلت وجيت سلمت عليه قال لي اتأخرتي
قلت ليه انت الجيت بدري وضحكت قال لي اول مرة اشوفك بتضحكي قبلت طوالي قلت ليه اذنك ماشة القاعة اجهز للمحاضرة قال لي طيب اشوفك في القاعة ومشيت جاتني لفتة لقيتو واقف في نفس مكانو وبعاين لي ومبتسم قبلت سريع سريع ومشيت القاعة
شوية كدا وجاء داخل سلم علينا وبدا المحاضرة وكل شوية ارفع عيني القاه بشرح بس مرة مرة بعاين لي بقيت ماقادرة اركز في المحاضرة يارب تنتهي سريع لاني اتوترت شديد منو
خلص وطلع رسل لي رسالة منتظرك في الكافتريا وحاطلب ليك رديت ليه لا ماتطلب لي حاجة بجي براي اطلب
قال لي مامشكلة بطلب وتعالي ادفعي لو متحسسة قلت ليه اوك شوية وبجي
في الاول اترددت كتير اني امشي ولا لأ انا في النهاية اتشجعت وقلت خلاص بمشي وانا طالعة لاقتني نفس البت قالت لي انا مش قبل كدا حذرتك ما اشوفك واففة مع حيدر قلت ليها يابت الناس احترمي نفسك واختيني انا مافاضية ليك قالت لي المهم تكوني عارفة انا حذرتك وبعد كدا ذنبك على جنبك
مشيت منها وما اشتغلت بيها
دخلت الكافتريا ولقيتو واقف في الكاشير مشيت طوالي طلبت لي نفسي ودفعت ومشيت قعدت جاء قعد وقال لي لاحظت ليك مامركزة في المحاضرة في حاجة قلت ليه ماف حاجة يمكن تعبانة من يوم امس والسهر قال لي سهر ؟ اناي بعد رديتي علي مش نمتي لاني رسلت ليك تاني ومارديتي
قلت ليه ايوا نمت بس تقريبا نمت زي وحدة كدا قال لي طيب انا رسلت ليك قبل الساعة وحدة قلت ليها انا ختيت التلفون وشوية كدا ونمت
قال لي بس انا مانمت لحظتها اتوترت شديد قال لي ماعايزة تعرفي مانمت ليه قلت ليه يمكن ماجاك نوم اووفي حاجة شاغلاك قال لي ايواااااااااا بس في حاجة شاغلاني ونفسي اعرفها شنو
قلت اغير الموضوع قلت ليه انت بتدرس في الجامعة من متين قال لي يعني لي سنتين قلت ليه ماشاء الله علاقتك مع الطلبة حلوة شديد قال لي بعتبرهم اخواني والله ما انا كنت طالب في يوم من الايام قلت ليه بس في ناس ممكت يفكرو في حاجات تانية قال لي حاجات ؟ زي شنو يعني سكت ومارديت
كملت اكلي وطلعت اصلا الليلة محاضرة وحدة حارجع البيت ...