رواية شلة بنات الفصل السابع 7 والثامن 8 بقلم شذى عبدالمكرم
اليوم التاني اتصلت لي نوسة عشان نمشي الجامعة
نوسة: اها حليتو المشكله
روز: ايي هو الراضاني
نوسة: ما جادة طبعا
روز: والله . قامت تضحك
نوسة: لا سام دا تعبان معاكي تعب
روز: لازم يتعب . ضحكنا ومشينا الجامعة وحضرنا اول محاضرتين وطلعنا الشلة كلنا على الكافتيريا عشان نفطر اعترضو لينا شلة بنات كدا اربعة
الاولى: روز . عاينت ليها بأستغراب كدا
روز: نعم!!!
الاولى: خليكي بعيدة من سام بس . قومت ضحكت
روز: سام دا منو
الاولى: ما تعملي فيها غبية حذرتك
روز: خوفت
التانية: وانتي التانية تمثيليتكم انتي وريان ما مشت علي
ريان: حي منوية حبيبتي اللصقة . قومنا ضحكنا
منى: يلصق خشمك دا انتي اللصقة
ريان: ننادي ريان ويقول لينا منو اللصقة ولا نكتفي بهذا القدر . سكتت لانو لو ريان نادت ريان حيطلعها هي اللصقة
الاولى: اي وحدة تلم عينها عليها من الحاجة الما بتخصها
روز : وما لمت البحصل شنو
الاولى: كلمتك بس
روز: والله الصراحة كدا سام دا ما بقدر ازح عيني منو لانو اتغلغل جواي . البنات فكو الضحكة اصلا قاصدين نستفزهم
ريان: اما ريان انحبس جواي عديل . وضحكنا
قمر: وانتو الاتنين الباقيات ضيوف الشرف ديل ماف وحدة عندها لي واحد اخت عيني عليهو عشان ادخل جوا الشكلة دي . قومنا ضحكنا على كلامها
الاولى: دي كلها امور شلابات بس
ريان: لو مالية عينو ما بشوف غيرك حبيبتي بنات ياااخ انا جوعت خلونا نمشي نفطر
هديل: بالجد والله خلونا نمشي . واتحركنا خليناهم مشينا فطرنا ونحنا بنضحك على الحصل
نبأ: يعني هسي نفهم انو حبيتي سام
نوسة: انتي ما سمعتي جملة اتغلغل جواي دي
نبأ: دي كانت عشان تحرق روح البت بس هل صح
روز: صح الصح
هديل: يوجد لدينا عروس قادمة . ضحكت
روز: لسع بدري
قمر: وانتي يا ريان قصة ريان دي شنو
ريان: هو صح كدا ما حكيت ليكم الحصل شنو . وقامت حكت لينا الموقف الحصل ليها مع ريان ومنى ونحنا نضحك بس
روز: عفيت عنك والله
ريان: وطبعا صاحبتو خلاص امس اتونسنا انستا
قمر: دايرة تجيبي رأسو ولا شنو
ريان: لو بتجاب بس
روز كدا حسابو نشوف صورو . فتحت تلفونها وشوفتنا صورو
هديل: ما بسألك ابدا
ريان: هو انا حأصاحب اي زول يعني
روز: المشكله انتي بطولة لسانك دا بطفشي اي زول قرب منك . قامت تضحك
ريان: حتى ريان بقول لي لسانك طويل . ضحكنا
قمر: بس المرة دي غيري السياسة
ريان: ان شاءلله
روز: انا كأنو شوفتو مع سام مرة هو خريج؟
ريان: ما عارفة والله ما سألتو ولا سألني
روز: واصحاب كيف
ريان: امس يداب بداية صحبتنا
روز: ايواااا
قمر: وانتي يا هديل ما كان ممكن تسوي خطوبتك بعد الامتحانات
هديل: والله حددو كدا واهو بعداك قرار الامتحان طلع
روز: ماف مشكله اصلا خطوبتك الجمعة الجاية وبعد اسبوع الامتحان في زمن مناسب
ريان: هوي يا فأر القراية " قمر " انتي الخطوبة كلها يوم واحد بس ما عرس هو
روز: والله صح كلام ريان وقمر انتي يوم واحد ما بفرق
قمر: لانو مرات امي بترفض بتقول لي امتحانك بعد اسبوع خلي اللف
هديل: وهل خطوبتك دي لف
قمر: دا احلى لف
هديل: سجمانة
نزلت لي رسالة من سام " وين انتي " رديت ليهو " في الكافتيريا مع البنات " رد لي " تعالي الحديقة دقيقتين
روز: بنات ماشة اشوف سام دقيقتين وراجعة
نوسة: ما تتاخري لانو زمن المحاضرة قرب
روز: لالا ما بتأخر . ومشيت قابلت سام وسلم علي
_ طبعا اتشاكلت بسببك الليله
__ كيف
_ جاتني وحدة مع شلتها كدا اعترضت طريقنا وقالت لي خليكي بعيدة من سام
__ دي منو دي
_ بري ما بعرفها
__ وقولتي شنو
_ قولت ليها هداك ليهو سام شيلي انا ما عاوزة
__ خليكي جادة
_ اديتها حقها بس قولت شنو داك كلام بنات . قام ضحك
__ معناهو قولتي كلام كبير
_ سام ما حترميني في الكلام . قام ضحك تاني
__ لا راكزة انتي
_ شديد سام انا بمشي بعد دا
__ خليكي شويه
_ محاضرتي قربت
__ نرجع بعدين مع بعض رأيك شنو
_ لا
__ حأوصلكم مع نوسة وبس
_ سام لا
__ حتخسري شنو
_ ما عارفة
__ المهم حنرجع سوا بعدين
_ بكلم نوسة خلاص
__ تمام وهاكي . طلع لى شوكولا من جيبو شيلتها ومشيت رجعت للشلة ومشينا حضرنا المحاضرة و اي وحدة مشت بأتجاه فضلنا انا ونوسة
روز: نوسة سام قال هو حيرجعنا
نوسة: تمام . اتصلت ليهو
_ سام نحنا خلصنا
__ ممكن تنتظروني خمسة دقايق في الكافتيريا عندي حاجة ضرورية بعملا ونطلع تمام
_ مدام مشغول خليهو مرة تانية بس
__ لا عليك الله انتظرو
_ تمام خلاص . كلمت نوسة اتفهمت ومشينا الكافتيريا قعدنا نتونس صاحب الكافتيريا جاب لينا بارد
روز: بس نحنا ما طلبنا حاجة
الشاب: عارف بس دي توصية من سام
روز: ايوااا تمام شكرا
الشاب: العفو
نوسة: لا سامك دا جنتل عديل كدا . ضحكت وواصلنا ونسة وبنشرب في البارد لمن سام وصل
سام: اتأخرت صح
نوسة: لا عادي
روز: ما عادي الزول دا اتأخر . قام ضحك
سام: ايناس شايفة صحبتك دي واقفة لي على الهبشة بس
نوسة: انت نهائي ما تديها مجال
سام: ما حيحصل ابدا
روز: انتو بتتكلمو عني انا؟
سام: معقولة ياااخ بنتكلم عن ايناس طبعا . وضحكنا
سام: عاوزين حاجه قبل ما نمش
روز: سلامتك بس وشكرا على البارد
سام: العفو دقيقه امشي احاسب ونمش
روز: تمام . مشى حاسب وشال لينا شوكولا تاني
نوسة: سام ماف داعي ليها كان
سام: اختمو يومكم بحاجة حلوة
روز: شايفة يا نوسة عشان كلامو الحلو دا انا وقعت . ضحكنا التلاتة
سام: بعترفي انك وقعتي؟
روز: ما حصل . وطلعنا وصلنا لحدي قريب من البيت نزلنا ودعناهو وواصلنا مشي مع نوسة
نوسة: والله لو خسرتي سام دا تبقي غبية
روز: ما ظنيت حاخسرو لاني وقعت والله
نوسة: احلى وقعة والله
روز: عقبال انتي تقعي
نوسة: لو اخوكي دا بقع لمن اكسر رجلي . ضحكت ضحك ياااخ نوسة دي عسل وصلت بيتنا ودعتها وهي واصلت بيتهم ............
_________
من جانب ريان
بالليل دخلت الانستا ولقيت ريان اون لاين
__ راجل منى
_ انتي منى دي مالا مالك
__ ما عارفة الليلة اشتبكنا معاها
_ كيف يعني
__ ما بتعرف الاشتباك؟
_ بعرف ياااخ بس قصدي لقيتيها وين
__ دي قصة طويلة
_ لازم اعرف اجدعي لي رقمك نتكلم كول
__ كول عديل كدا موش الموضوع دا مراحل . قام ضحك
_ ريان كدا رسلي وبعد نخلص احظري الرقم
__ البضمني شنو انو ما حتدخل لي برقم تاني
_ لا من جمالك ولا شنو اقعد اطارد فيكي كدا
__ كلامك شين والله . قام ضحك
_ هسي انجزي بالله . رسلتو ليهو اتصل لي
_ رقمك ذاتو شين البتفتري بيهو دا . قومت ضحكت
__ والله مقارنة بحقك الصراحة شين . قام ضحك
_ بجيب ليكي رقم حلو ذي حقي كدا
__ ما يكون كلام جرائد ساي . قام ضحك
_ معقولة ياااخ يا توأمي
__ نشوف
_ اها احكي لي الاشتباك الحصل بينكم . وقومت حكيت ليهو وهو يضحك
_ وانحبس جواي دي جاتك من وين
__ انا ذاتي للان مستغربة . وضحكنا وبقينا نتونس كول لمن نعست
__ ريان يلا اقطع وشك بعد دا
_ تاني لمي فيني
__ بعرف بلم فيك كيف ما تخاف
_ اوكي يا توأمي رأيك شنو بكرة اعزمك قهوة في الجامعة
__ اكيد كبري عشان منى تشوفنا مع بعض
_ ما شاء الله عقلك شغال حتى وانتي نعسانة
__ اكيد عشان ما ادوش . قام يضحك
_ لالا تمام اها قولتي شنو
__ ربنا يحينا
_ ان شاءلله يا رب يا تصبحي على جنة
__وانت من اهلها ...........
8
بعد اسبوع كان خطوبة هديل والمفروض نمشو ليها عشان نمش معاها الكوفير ذي الساعه 11 جاتني نوسة
نوسة: ما نجهز بعد دا عشان نمش؟
روز: امي عزموها فطور وطلعت خلت لي البيت لازم افطرهم قربت اخلص وانتي عارفة هسي رامي حيصحا ولو لقى الفطور ما جاهز احتمال يجوط
نوسة: يجوط شنو خلي يفتح خشمو بس لو ما قعدت فيهو لمن يقول بس . ضحكت جانا صوت
رامي: تقعدي في منو . هي كأنو كبو فيها موية بادرة بقت تتمتم
نوسة: ق ق قصدي ميدو
رامي: انتي كنتي قاصداني انا
نوسة: رامي ما كنت قاصداك انت . وانا كنت بعاين ليها وهي خايفة وانا كاتمة الضحكة
رامي: روز زحي ليها تتم الفطور هي
روز: قربت اخلص
رامي: ما مشكلة تتمو هي . هي ما باقي ليها الا تبكي لانو كان بتكلم بجدية جات مسكت مني الملعقة وانا زحيت ليها رامي فتح التلاجة شرب موية
رامي: روز امسكي صحبتك دي حتقع . عاينت ليها كانت بترجف ما كنت عارفة انو بتخاف منو كدا قربت تبكي
روز: حرام عليك يا رامي عاين قربت تبكي . مع جملتي دي دمعتها نزلت ومسحتها سريع رامي قرب مننا
رامي: بالجد بتبكي؟ . هزت رأسها بمعنى لالا
رامي: انا كنت بهظر معاكي ما اتوقع بتخافي مني كدا
روز: ولا حتى انا ما اتوقعت انو بتخافي من رامي كدا . سكتت وهو طلع من المطبخ مسكت منها الملعقة
روز: نوسة انتي جادة انو خوفتي من رامي
نوسة: ما عارفة ما كنتي شايفة جادي كيف
رامي: كان بهظر معاكي بس
نوسة: اممممم
روز: البشوفك خايفة منو ما يشوفك وانتي بتنبرشي فيهو
نوسة: ما تمسكيها لي زلة يا سجمانة
روز: كدا رامي تاني ما حيتعامل معاكي
نوسة: حيااا يا روز . كانت زعلانة شديد
روز: بس انتي تاني ما تخافي منو
نوسة: هو انا اصلا ما بشوفو الجمعة بس لمن اجيكم
روز: ما انتي براكي كلنا . ضحكنا
روز: رايس وريل بشوفو الجمعة والسبت بس اما انا الا لو ساهرت بلقاهو مرات ومرات لا لانو عارفة شغل المستشفى والجرجرة بس قرب خلاص
رامي: ربنا يعينو يا رب
جهزت الفطور وعشان نوسة معانا رصيت جهتين صينية حق رامي وابوي وصينية انا والتوأم ونوسة شيلت حق الرجال وديتو الصالون ومشيت غرفة رامي
روز: رامي الفطور في الصالون
رامي: صحبتك مشت
روز: لالا
رامي: هي بتخاف مني؟
روز: والله الصراحة يا رامي ما بتخاف منك بس المرة دي شافتك جادي شديد فخافت وحتى انا استغربت
رامي: لا تمام
روز: ما تقطع تعاملك معاها عشان ما تحس انو واخد موقف منها
رامي: انا تاني لو شوفتها بلفة بلف باللفة التانية . قومت ضحكت
روز: ودي انا المفكرة ازوجك ليها . حمر لي
روز: مالك ولا مرتك جاهزة
رامي: شايفة اخدتي عين زيادة
روز: انت اطلع منها
رامي: انتي الاطلعي لي من غرفتي
روز: المهم كلمتك لو عندك زولة افصلها من هسي وهسي قوم الفطور . وطلعت من الغرفة واصلا قاصدة امهد ليهو كدا لانو لو بالجد اتزوج وحدة تانية غير نوسة نحنا الاتنين حنموت مشيت فطرت ونوسة عصرتها فطرت تاني معانا وبعدها مشت بيتهم وانا بغسل في العدة اتصل لي سام
_ يا حلوة
__ يداب اتذكرتني
_ دايما في بالي
__ صدقتك
_ والله بس يداب صاحي من النوم
__ نوم العوافي خلي النوم ينفعك . قام يضحك
_ نفهم شنو من الكلام دا
__ ما ضروري تفهم حاجة
_ هسي انتي زعلانة يعني
__ ازعل ليه بس ما هو انت اخترت النوم علي وخلاص
_ الهرمونات شغالة من اول الصباح
__ سام ما تتكلم معاي
_ في زول بقدر ما يتكلم مع روحو
__ سام ما حتثبتني فاهم
_ فاهم يا حلوة انتي اها بتعملي في شنو حاليا
__ قاعدة اغسل في العدة ودايرة اتجهز عشان امشي الكوفير ذي ما عارف الليلة خطوبة هديل والموضوع جايط شديد
_ يومك حافل الليلة يعني ماف طريقة لي ابدا
__ نهائي الليلة حأنساك عديل كدا
_ قلبك بسمحك ليكي تعملي كدا؟
__ ما تخاف حاطلعو اخليهو في البيت وامشي بلاهو . قام يضحك
_ لالا تمام
جاتني ريل
ريل: روز بابا قال ليكي وين الشاي
روز: قولي ليهو جايبة
ريل: كويس . وجرت مشت
روز: سام برجع ليك لمن اخلص
سام: تمام . قفلت منو عملت الشاي ورجعت غسلت باقي العدة دايرة ارجع لسام كدا اتصلت لي نوسة قالت اتجهز بعد قفلت منها رجعت لسام
_ سام انا دايرة اتجهز عشان اطلع هسي ما بقدر اتكلم معاك
__ تمام حتمشو مع رامي ولا اجي اوصلكم
_ لالا بشوف رامي بس
__ تمام . قفلت منو مشيت حنست رامي ومع تدخل ابوي واقف مشيت اتجهزت لبست عباية بس وشيلت حاجاتي في كيس عشان حنمشي الكوفير طوالي وكدا رامي وصلنا لقينا هديل قاعدين يرسمو ليها
هديل: ما بدري
روز: بدري من عمرك حبيبتي
هديل: كان ما تجو احسن
نوسة: حسستينا كأنو جينا مع زمن الحفلة كدا
روز: اسأليها بالله
قعدنا رسمو لينا في اطراف اصابعنا وبقينا نتونس فتحت تلفوني لقيت سام مرسل لي صورتو بالجلابية البيضاء وكاتب جمعة مباركة عليكي ومعاهو قلب احمر ياااخ حاجة كدا قطعة سكر بس طوالي اتصلت عليهو
_ انت عارف حاجة يا سام
__ شنو
_ الجلابية البيضا يخلوها ليك انت بس تاني ماف زول يلبس جلابية نهائي . اول مرة اقول ليهو كلامو حلو
__ وانتي عارفة حاجة
_ شنو
__ انو انا بحبك . طوالي فصلت
_ اممم
__ والله العظيم انتي احلى حاجة حصلت لي في حياتي ودا السبب الكان خلاني اتمسك فيكي لحدي ما توافقي وحاليا ماف زول محظوظ ذيي ابدا
_ ما اكتر مني حاليا
__ شكلو بدينا نقع . قومت اضحك
_ بالجد شكلو كدا . قام ضحك
__ وصلتي الكوفير
_ ايي ورسمت اناملي منتظراهو يجف
__ بس انتبهي لانو مسم ولو جف ممكن يتطاير استعملي سماعة ما ترفعي ايدك
_ حاضر
__ خلاص اخليكي تتونسي مع البنات بتصل عليكي بعدين
_ تمام وانت طالع؟
__ ايي حأطلع مع الشباب
_ تمام . وقفلنا. ........