رواية قلبان علي حافتي الحلم الفصل السابع عشر 17 والثامن عشر 18 بقلم شذى عبد المكرم

قرار اني اتقدم لشاهيناز كان قرار محسوم بالنسبة لي بس متين ووين دي كانت المشكلة لمن جمعت قواي مشيت مع ابوي عشان نتقدم 

ابوي:  والله يا محمد جايين نطلب ايد بتك شاهيناز لولدي عمران  ،  هنا بالذات حسيت الزمن وقف وعما الصمت ارجاء الصالون وعمي محمد عاين لي 

محمد:  طبعا عمران ولدي وانا بعزه شديد بستشير البت لو وافقت يبقى خير  وبركة  ،  كنت حاسي روحي كأني بحلم ما اتوقعت الامور تمشي بالسهولة دي وانه عمي ما يعترض بالعكس كان ايجابي شديد  اخدنا قعدتنا وطلعنا مع ابوي وانا مبسوط شديد حتى ابوي لاحظ لي 

ابوي: للدرجة دي عاوزها؟ ،  اتنهدت بفرحة وعاينت ليه  وانا الفرحة واضحة في ملامحي 

عمران:  انا كنت عاوزها من زمان بس خايف من فرق الطبقات بس حاليا ما فارقة معاي نهائي 

ابوي:  كنت مصر رغم اختلافكم ربنا يكتبها من نصيبك 

عمران:  من خشمك للغالي  ،  ما كنت خجلان من ابوي ابدا ورجعنا البيت امي كانت منتظرانا بفارق الصبر هي وعرفات 

عرفات:  بشر  ،  مسحت وشي 

عمران:  اتقدمنا وابوها ما عنده مشكلة باقي موافقة شاهيناز بس  ،  عرفات نطت بفرحة وجاتني جارية حضنتني ضحكت على لهفتها 

عرفات:  اصلا شاهيناز مستحيل  ترفضك هو انت بتترفض؟  ،  ضحكت شديد 

عمران:  خلاص مدام دا كلامك جهزي فساتينك  ،  كانت فرحانة لي اكتر مني بس امي ما عاجبها الوضع ما علقت 

عمران:  امي ما حتقولي حاجة؟   ،  عاينت لي بكسرة

امي: اقول شنو وانت عملت الفي رأسك  ،  وقامت دخلت جوا فرحتي اختفت 

عرفات:  ما تزعل حتتقبل الموضوع لمن تشوفك مبسوط مع شاهيناز  ،  هزيت رأسي بمعنى تمام ودخلت اشوف امي لقيتها في غرفتها قعدت جنبها 

عمران:  ما عاوزة تفرحي لي؟ ،  مسكت ايدي وضغطت عليه شديد 

امي:  والله يا ولدي ما دايرة غير تكون مبسوط وسعيد في حياتك 

عمران:  انتي بس ادعي لي شاهيناز توافق وحأكون مبسوط والله 

امي:  مدام حتكون مبسوط ربنا يكتبها من نصيبك  ،  سلمت ليها في رأسها مرتين وسلمت عليها في ايدها 

عمران:  ربنا يخليكي لينا تاج فوق رأسنا  ،  شافتني مبسوط فرحت لي انا شكرت ربي ان امي رضت عني علشان اي حاجة من دون رضاها ما بتبقى وكان لازم اواجه شاهيناز قبل ما اخد اجابتها  ......... 

___________

بعد عمران طلع مع ابوه من بيت آل محمد شادي عاين لابوه السرحان 

شادي:  ابوي ماف زول حيحافظ على شاهيناز اكتر من عمران لو وافقت بيهو حتعيش مبسوطة صدقني 

محمد:  واثق انا لان عمران تربيتي وبعرفه وراجل وقدر كلمته يعني لو أخدت منه كلمة انه حيحافظ على شاهيناز حيحافظ عليها بس هل اختك حتوافق؟  دي رفضت توفيق ود علي هل حتقبل بعمران وخايف انها توافق عشان القرابة وكدا وما حابة تزعلني للمرة التانية 

شادي:  ابوي انت ما بتعرف شاهيناز ولا شنو؟  لو وافقت عشان ترضينا حيظهر من ملامحها وافعالها  ، ابوه ضحك اتذكر افعالها لمن اتقدم ليها توفيق 

محمد:  والله صح كلامك خلاص ناديهم عشان نكلمهم هي وامها ونشوف رأيهم   ،  شادي مشى نادى امه وشاهيناز وحتى صوفيا جات وقعدوا كلهم 

ثريا:  محمود وعمران ما قعدوا كتير 

محمد:  اصلا كان عندهم موضوع مهم 

ثريا:  ايواااا 

محمد:  شاهيناز  

شاهيناز:  نعم  ، عاين ليها مسافة 

محمد:  عمران طلب ايدك قبل شوية  ،  صدمة اعتلت ملامحها وجاها هبوط طوالي عاينت اتجاه صوفيا ما كانت اقل منها في الصدمة 

شاهيناز:  اتقدم لي انا؟  ،  كانت لسع مصدومة 

محمد:  ايي دايرك تفكري براحتك ومنتظر جوابك  ،  هزت رأسها براحة وقامت براحة ومدت ايدها لصوفيا قامت معاها ومسكتها وطلعوا من المجلس 

ثريا:  محمد انت موافق؟  

محمد:  عمران ماف منو اتنين 

ثريا:  بس ما بشبه شاهيناز  ،  عاين ليها بأستغراب 

محمد:  كيف يعني؟

ثريا:  شاهيناز ما بتقدر تتحمل عيشتهم دي

شادي:  امي انتي دايرة لبتك رفاهية ولا دايرة ليها راجل؟ 

ثريا:  راجل ما قولنا حاجة  بس اختك بتعرفها ما بتتحمل الجو داك داير تطلعها من طبقة توديها لطبقة اقل؟  ما بتتحمل والله 

محمد:  والله هي بتعرف الحاصل وبتعرف الوضع بعد دا هي واختيارها وانا ما بجبرها على حاجة 

شادي:  امي شاهيناز ما حتلقى احسن من عمران وثانيا انتي مدلعة بناتك ديل زيادة عن اللزوم وحدة فيهم ما حتمسك بيت بالطريقة دي والله 

ثريا:  بمسكن ليه ما بمسكن؟  

شادي:  هسي يا امي بناتك ديل غير الايس كوفي بعرفن شنو؟ 

ثريا:  انا مريحاهم واكيد عاوزة لمن يمشن بيوت رجالهم يكونو مرتاحات 

شادي:  هسي يا امي ابوي بأكل من يد غيرك؟  لا واحتمال رجال بناتك يوفروا ليهم الحياة المثالية بس عاوزين يأكلوا من اياديهم الحيحصل شنو؟  ، سكتت 

شادي:  فشنو أحسن شاهيناز تمشي مع عمران والله بتحملها بكل عيوبها قبل محاسنها صدقيني 

ثريا:  والله انا ما موافقة بس لو رأيي ما مهم دي حاجة تانية  ، وطلعت خلتهم 

شادي:  لمن تشوف شاهيناز مستقرة في حياتها حترضى 

محمد:  انا ذاتي شايف كدا  ......... 

_____________

كانت صدمة بالنسبة لي عمران اتقدم لي؟  لا يعني دايرني شريكة حياته وأم لأولاده ما كنت مصدقة ابدا لانه عمران ما لمح لي بحبه ولا حتى قال لي حاجة فجأة جا اتقدم طلعت مع صوفيا من المجلس الاتنين مصدومات ودخلنا غرفتي 

شاهيناز: صوفي عمران  اتقدم لي 

صوفيا:  واااي ما قادرة اصدق  ، عاينت ليها بحيرة 

شاهيناز:  بس ما قال لي  بحبني ليه اتقدم لي؟ 

صوفيا:  احتمال داير يكسب فيكي اجر يا هبلة في زول بتقدم لزول ما بحبه؟  ،  هنا ضحكت وبقيت انطط بفرحة 

شاهيناز:  حأبقى مرت عمران  ،  صوفيا بتضحك فيني وهي مبسوطة لي شديد 

صوفيا:  سبحان الله زمان كنتي بتمني بس انه يسلم عليكي بس حاليا حتبقي زوجته 

شاهيناز:  عليك الله اقرصيني عشان اصدق  ،  جات قرصتني وضحكنا اثناء احتفالنا الباب فتح ودخل شادي عاين لي ونحنا واقفات في نص الغرفة 

شادي:  انا ما عارف عمران عقلو كان وين لمن اختارك بس ربنا يعينه  ،  بقيت اضحك بهبالة لانه كلامه صح انا ذاتي مستغربة 

صوفيا:  هو لاقي؟  ،  عاينت ليها بغيظ 

شادي:  انتو البآخدكم إلا امه داعية عليهو  

شاهيناز:  شادي نحنا اخواتك على فكرة لو ناسي يعني المفروض تنصفنا حتى لو ظالمين المقولة بتقول لي انصف اخاك ظالم او مظلوم  ،  الاتنين ضحكوا 

صوفيا:  بس شكلوا ما معترف بينا كأخوات  ،  عاين ليها وسكت

شادي:  المهم فكري كويس بس والله انتي محظوظة انو عمران اختارك انتي عمرك ما حتندمي بس في النهاية دا قرارك ونحنا معاك في الحالتين  ،  ابتسمت ليهو بحب وهزيت ليه رأسي وهو بادلني الابتسامة ورجع عاين لصوفيا 

شادي:  انتي 

صوفيا:  عندي اسم على فكرة ،  ضحكت لانهم عاملين فيها كارهين بعض 

شادي: المهم اي كان اسمك عاوز نسكافيه  ،  ضحكت تاني انا وهي عاينت ليه بغيظ

صوفيا:  لمن تناديني بأسمي حأعمله ليك 

شادي:  حتعمليه ولالا؟ 

صوفيا:  اطلبها بأحترام  ،  عاين ليها من فوق لتحت 

شادي:  لو على النسكافيه خليته تعالي عندي معاكي كلام تاني  ،   وطلع عاينت لي 

شاهيناز:  امشي ليه 

صوفيا:  تمام  ،  وطلعت عشان تشوفه انا بقيت ادور في الغرفة وما مصدقة ابدا فجأة تلفوني اتصل رفعته لقيته عمران ضربات قلبي زادت واتوترت شديد وبقيت اعاين في التلفون لمن قرب يفصل رديت 

__ ناز  ،  كنت خجلانة شوية

_ اهلين عمران 

__  اهلين عمران!!!  ،  اتعجب من جملتي وحسا كأني ما انا شاهيناز 

_ عمران ياااخ

__ معليش يا اخت لو شاهيناز جنبك اديني ليها

_ عمران ما تتريق ياااخ 

__ مدام بتتكلمي كدا وانتي خجلانة يبقى الكلام وصلك صح؟  

_ اممممم ايي 

__ تمام يلا ندخل في الجد اسمعيني 

_ سامعاك 

__ انا جيت بالباب عديل عشان اكمل بيكي نص ديني دا في حالة أخدت موافقتك بس قبل اي حاجة في حاجات لازم تعرفيها انا يمكن ما اقدر اوفر ليكي الحياة العاشاها في بيت ابوكي بس بحاول بقدر الاماكن ما احوجك لحاجة وما بقدر اشتري ليكي معظم الماركات العالمية البتستعمليها دي ولا حأخليكي تشتريها من قروشك لان بعد نتزوج انا حأكون مسؤول من كل احتياجاتك وتالت حاجة انا ما بقدر اغير ليكي عربيتك كل سنة زي ما عمو محمد بيعمل ولا بقدر اسفرك كل اجازة دولة زي ما كنتي بتعملي وعندي بيتي الخاص بس ما زي بيت ابوكي  وما حيكون عندنا ذي ناني  " الحبشية " لاني ما عاوز اي مرا في البيت غير زوجتي يعني مثلا ممكن تجي الصباح تساعد بس ما ارجع القاها لاي سبب كان يعني حتعيشي حياة مختلفة فعاوز لمن تآخدي قرارك تفكري فيه بتمعن وتشوفي الانتي عاوزاه وابدا ما تخافي انو لمن جوابك يكون الرفض اني حأتغير عليكي لا ما حأتغير حأكون انا عمران البتعتمدي عليه دايما والبسمعك دايما اوكي؟  ،  اتنهدت تنهيدة طويلة 

_ اوكي 

__ يلا اخليكي تنومي حاليا ما تفكري في اي حاجة وأخدي زمنك الكافي في التفكير وانا منتظرك ومعاكي في الحالتين ما تنسي اوكي؟  

_ اوكي  

__ يلا تصبحي على خير 

_ وانت من اهل الخير  ،  وقفل والله بالجد انا اخترت راجل لانو عمران قبل اي حاجة فكر فيني وكلمني بالنتائج الحتحصل عشان اعرف انا عاوزة شنو وكلامه في انه ما حيتغير بجوابي ريحني شديد رقدت في سريري بفكر في كل الكلام القاله لي والحيحصل لو اتزوجنا وهل حأقدر اتأقلم مع الوضع الجديد؟ وهل حأقدر اكون ست بيت ناجحة؟ بس في الجانب التاني ان عمران اختارني انا عشان يكمل معاها نصف دينه دا الكانت مفرحني وبخليني اوافق حتى من غير تفكير نومت وانا فرحانة....... 

____________

صوفيا طلعت لشادي برا كانت ماشة على غرفته هو شافها كان جوا المطبخ ناداها رجعت ومشت ليه في المطبخ وقفت قدامه هو مسك شعره بعصيبة 

شادي:  والله يا صوفيا حابي اني اتجاوز ليكي الحصل بس ما قادر والله نفسي بس اخنقك عشان قلبي يبرد بس ما قادر  ،  قربت منه خطوة قدام وهي بتعاين ليه 

صوفيا:  لو قلبك بترتاح اخنقني  ،  رجع خطوة ورا 

شادي:  لو كنت برتاح كان عملته من زمان 

صوفيا:  اعمل شنو عشان تنسى وتسامحني؟ 

شادي:  ما قادر اسامحك لان انتي ما عارفة مكانتك عندي كانت كيف والله كنت بحبك اكتر من شاهيناز قادرة تفهمي يعني شنو احبك اكتر من بت ابوي وامي؟ ،  بقت تبكي بألم 

صوفيا:  والله ندمانة شديد واربعة سنين يومي بتألم بسبب غلطة عملتها بسبب طيشي وغيرتي من انو زول يآخد مكانتي عندك 

شادي:  المفروض من تعاملي معاكي تفهمي انه انتي شنو بالنسبة لي  ،  هو ما داير يحسها انه فاهم مشاعرها اتجاهه كانت شنو 

صوفيا:  عارفة والله  ،  وكانت بتمسح دموعها 

شادي:  في النهاية انتي اختي وربيتك على ايدي  ،  هنا عاينت ليهو بألم وابتسمت ليه 

صوفيا:  ما حتسامح صوفي؟   ،  مسح وشه بألم واتنهد طويل وجا مسكها من رأسها وهزاها شديد ذي الزول المعصب 

شادي:  انا تعمل فيني كدا وحدة طولها ما تامي شبر؟  والله عيب في حقي  ،  هي كانت بتضحك ودموعها في عيونها 

صوفيا:  دي سنفورتك في النهاية  ،  فكاها وضحك 

شادي:  ليه حق شرشبيل ما يخليكم في حالكم  ،  هنا ضحكوا الاتنين 

صوفيا:  اها عاوز النسكافيه ولا خليته؟  ،  قلب ليها عيونه بملل 

شادي:  متأكد ما حتظبطي 

صوفيا:  العرفك شنو؟ 

شادي:  متذكرة ولا اذكرك زمان بتعمليه كيف؟  ،  ضحكت 

صوفيا:  فات على الكلام دا اربعة سنين جربني ما حتخسر   ،  عاين ليها مسافة كأنه بتأمل في ملامحها لمن خجلت من نظراته 

شادي:  نشوف اعملي كبايتين ومنتظرك في الحديقة الخلفية  ،  هزت ليه رأسها بأبتسامة ومشت المطبخ وهو مشى الحديقة وجهزت النسكافيه ومشت عليه وقعدت جنبه وادته الكباية شرب منها 

شادي:  اتطورنا شديد 

صوفيا:  بعجبك انا  ،  قال براحة هي ما سمعت 

شادي:  من زمان عاجباني 

صوفيا:  احكي لي كيف روسيا وعملت شنو في الاربعة سنين دي؟ وهل في زولة في حياتك؟ واها بالجد خلاص رجعت وحستقر معانا هنا ولا حترجع؟ 

شادي:  وحدة وحدة  ،  بقت تعاين فيهو وهو بحكي الحصل معاه في الاربعة سنين 

صوفيا:  عندك زولة في حياتك؟  ، عاين ليها بخباثة

شادي:  ليه بتسألي؟ 

صوفيا: فضول بس 

شادي:  ايوااا  ،  كانت منتظرة اجابته بس ما جواب وهي ما قدرت تسأله للمرة التانية 

صوفيا:  اها حتستقر ولا راجع؟ 

شادي:  حأرجع لان كل حياتي في روسيا بس للان ما كلمت زول غير عمران اني حأرجع فأثق فيكي المرة دي ما حتكلمي زول  ،  عاينت ليه بكسرة وهزت رأسها بأوكي وبعدها سألها عن حياتها وكانو بيحكوا تفاصيل بعض والقعدة اخدت زمن طويل وساهروا لوقت متأخر بعدها اي واحد دخل غرفته وهو مبسوط ان علاقتهم رجعت حلوة.......

_____________

صحيت الصباح وانا مبسوطة ومرتاحة وطلعت اشرب الشاي مع ماما 

ماما:  شاهيناز ما حتوافقي صح؟   ،  اتخلعت وعاينت ليها بصدمة

شاهيناز:  ليه بتقولي كدا انتي ما بتحبي عمران؟ 

ماما:  ما مسألة ما بحبه بس مسألة حتعيشي معاه كيف؟ 

شاهيناز:  كيف؟  

ماما:  يا ماما دي حياتهم مختلفة من حياتنا ما حتتحملي والله انا امك وبعرفك  ،  جيت جنبها وحضنت ايدها 

شاهيناز:  ماما بتك قوية حتتحمل  ،  عاينت لي بتمعن

ماما:  بتحبي؟  ،   خجلت ورجعت رأسي ورا ضهرها ضحكت فيني وقرصني 

ماما: شوف السجمانة اتاريها عاوزاه ،  بقيت اضحك وانا رأسي ورا ضهرها 

ماما:  بتتحملي؟  

شاهيناز:   انتي قاعدة 

ماما:  هسي ابيتي توفيق عشان توافقي بعمران؟  ، طلعت رأسي وعاينت ليها 

شاهيناز:  ماما م انتي عارفة يعني يعني...  ،  قاطعتني 

ماما:  خلاص خلاص فهمنا يا مرت عمران  ،  ضحكت ليها

شاهيناز:  ماما ياااخ 

ماما:  كدا النشوف عمرانكم دا حتى ابوكي وشادي موافقين عليه بشدة 

شاهيناز:  يبقى مناسب  ،  عاينت لي بغيظ ضحكت ورجعت رأسي وراها تاني  وبعدها اتناقشنا في مواضيع كتيرة لحدي ما صوفيا طلعت بعد زمن 

ماما: كنتي مساهرة صح؟  ،  لأن صوفيا لمن تساهر بتكون ما مجمعة كانت بتمشي ذي السكرانة ضحكنا فيها وجات قعدت جنبي ولسع نعسانة ميلت رأسها في رجلي همست ليها

شاهيناز: اتصالحتوا مع شادي؟ 

صوفيا:  اممممم  ،  فرحت ليها و مسحت ليها شعرها وهي مغمضة جا شادي بعد زمن وصبح علينا وعاين لصوفيا راقدة فيني 

شادي:  عيانة؟  

شاهيناز:  لالا بس نعسانة 

شادي:  ايواااا  

ماما:  اقعد اشرب 

شادي:  عندي موضوع ما بقدر  ،  صوفيا فتحت عيونها وهي لسع وراقدة في رجلي وعاينت ليه 

صوفيا:  ما حتتأخر كلها خمسة دقايق اقعد يلا ،  ورجعت غمضت عيونها عاين ليه مسافة وقعد انا وامي فكينا الضحكة انو شادي سمع كلامها زي زمان ما برفض ليها طلب وامي كبت ليه الشاي وقعد يشرب وبعدها طلع تاني ضحكنا انا وامي 

شاهيناز:  عملتيها كيف يا صوفيا؟ 

صوفيا:  اممممم عادي 

ماما:  اتصالحتوا؟ 

صوفيا:  امممممم  ،  بعدها قامت وشربت الشاي

بالليل بعد تفكير عميق اتصلت لعمران 

__ عمران 

_ نعم 

__ انا ما بعرف اطبخ 

_ عارف وحنتعلمها مع بعض 

__ ما بعرف اعمل اي حاجة من شغل البيت 

_ عارف 

__ يمكن ما اصحى بدري عشان اجهز ليك شاي الصباح وانت طالع الشغل 

_ حتصحي عشاني متأكد انا 

__ حتتحمل هرموناتي كلها من دون تقول تعبت؟ 

_ حأتحمل عشان خاطر عيونك بس 

__ انا بصحى بالليل فجأة بأكل فما تستغرب لو صحيتك معاي اخر الليل  

_ ممكن ما اكل معاكي بس بنتظرك   

__ لمن نتزوج حنمش بوش بونت؟ 

_ نخصص يوم في الاسبوع ثابت عشانك بس وحسب اختيارك 

__ يبقى يلا اتحمل البلوة الجاياك  ،  ضحك 

_ انا اخترتها وواثق في اختياري بتحمل النتائج 

__ خلاص بابا حيديك الرد 

_ وانا منتظر 

__ تصبح على خير 

_ وانتي من اهلي  ،  بقيت اتكشم وبعدها قفلنا واتنهدت بفرحة ونومت والصباح اتجهزت للشغل عشان خلاص نزلت الدوام مشيت لابوي في غرفته كان براجع في شوية اوراق 

شاهيناز:  بابا صباح الخير 

بابا:  صباح النور كيف اصبحتي؟

شاهيناز:  الحمدلله وانت 

بابا:  الحمدلله نزلتي الدوام خلاص؟ 

شاهيناز:  ان شاءلله 

بابا:  بالتوفيق ان شاءلله 

شاهيناز:  تسلم ياغالي بابا عاوزة اقول ليك موافقة على عمران  ،  ابتسم لي 

بابا:  من دون اي ضغط؟ 

شاهيناز:  ان شاءلله 

بابا:  ربنا يتم ليكم على خير 

شاهيناز:  آمين يا رب يلا بستأذنك 

بابا:  آذنك معاكي  ،  طلعت منه وانا ضربات قلبي عالية كانت متوترة اتنهدت براحة وطلعت الشغل......... 

‏‎"يارب أجعلني زوجته الأولى والأخيرة وحبيبته الاولى والأخيرة ، اللهم أجعلني وإياه من الفائزين في الحب ، اللهم أكتب لنا نصيباً معاً يالله ، اللهم أنت الواحد الصمد رب قلبي وقلبه ، اللهم أجعله زوجاً وسنداً صالحاً ، أباهي فيه أهل السموات و الأرض يارب العالمين♥️."