رواية قلبان علي حافتي الحلم التاسع عشر 19 والعشرون 20 بقلم شذى عبد المكرم
19
__ صوفي لو سافرت حيكون احسن لي وليكي ، عاينت ليه مسافة
_ مسافر عشان روزلين صح؟ عاين ليها بصدمة انها عرفت روزلين من وين ؟!!
لمن عاينت للصدمة حقته ابتسمت ليه سألها بإستغراب
__ انتي بتعرفي روزلين؟ ، هزت رأسها خفيف بإبتسامة
_ لا
__ وعرفتي الاسم وين؟
- مرة جيت غرفتك وانت كنت في الحمام وتلفونك كان متصل وكان مكتوب روزلين وجنبها قلب احمر عرفتها انها حبيبتك صح؟
__صح
_ بتحبها شديد؟ ، عاين ليها بس من دون رد
_ لو ما بتحبها ما بترجع روسيا تاني
__ بعيدا عن روزلين انا حياتي كلها في روسيا
_ اممممم مدام حياتك فيها ارجع ، ما حبت تبين ليه انها زعلانة شديد
__ ما حتزعلي؟
_ لو زعلت او ما زعلت ما بتفرق دي حياتك انت ومدام ما شايف حياتك هنا ما من حقي ازعل ، عاين ليها مسافة
__ امممم تمام عاوزة حاجة؟
_ عاوزة اشوف روزلين
__ والسبب؟
_فضول بس ، عاين ليها مسافة
__ بعدين ، وطلع وهي اتنهدت بتعب جات شاهيناز راجعة
شاهيناز: الحاصل شنو يا صوفيا؟
صوفيا: ماف حاجة
شاهيناز: يعني دايرة تقنعيني ان امس الانهيار العصبي الدخلتي فيه دا ما سببه شادي وبس بسبب قصة اعمامك؟ ، صوفيا ما قدرت ترد
شاهيناز: من متين كانت بيناتنا اسرار؟ ، صوفيا مدت ايدها لشاهيناز قربت منها ومسكت ايدها وقعدت جنبها
صوفيا: السبب ان شادي قال راجع روسيا وانا فكرت انه اتخلى عني وناس اعمامي حيآخدوني دا السبب
شاهيناز: شادي راجع؟ ، هزت رأسها
صوفيا: امممممم
شاهيناز: ما تخافي حتى لو سافر ما حيخليهم يآخدوكي
صوفيا: هسي كان قاعد يقول لي كدا وطمني
شاهيناز: خليكي مطمنة وهسي ارجعي نومي شوية ، هزت رأسها وصلحت رقدتها ورجعت نامت ..........
____________
المشكلة الحصلت دي وترت جو البيت شديد وكل مرة بحتار في علاقة صوفيا وشادي شديد لانها ما مفهومة ابدا كانوا هم من جهة وتجهيز عرسي من جهة اتصل لي عمران الوحيد البرتاح لمن اتكلم معاه
__ ناز يا ناز
_ نعم
__ لا حتى ماف عيونها ولا حياتها؟ ، هنا ضحكت
__ ايي اضحكي كدا خلي الدنيا تضحك الحاصل شنو؟
_ زعلانة بسبب الحاصل دا وامس صوفيا تعبت وجرينا بيها المستشفى
__ متين حصل الكلام دا؟
_ اخر الليل اتناقشت مع شادي عشان قال ليها راجع روسيا ودخلت في نوبة عصبية ووقعت
__ لا حولا ولا قوة الابالله هسي هي كيف ؟
_ كويسة وهسي نايمة
__ وشادي كيف حالته ؟
_ ما عارفة والله
__ امشي غرفته براحة شوفيه لو قاعد
_ تمام خليك معاي ، اتحركت براحة ومشيت غرفته فتحتها براحة كان نايم قفلت الباب براحة ورجعت غرفتي
_ نايم
__ ايواااا الحمدلله
_وانتي ما حتمشي الشغل الليلة صح؟
__ ما بقدر ونفسيتي ذاتها تعبانة والله
_ بحرق السودانأ كله كيف يعني نفسيتك تتعب؟، هنا ضحكت شديد
__ عمران والله انت احلى حاجة في حياتي
_ حبيبي انا انتي عارفة البصلح نفسيتك شنو؟
__ اها شنو؟
_ شوفتي بس ، هنا ضحكت
__ مع انها غرور منك بس صح كلامك ، ضحك
_ يبقى مدام صح حتصلح نفسيتك حأجي
__ بالجد؟ لكن انت شغال
_ قدامي شوية ملفات اخلصهم واستراحة الفطور حأجي بس ظبطي لي فطور حلو ، ضحكت ليه
__والله زي الما فطرت كدا ، وضحكنا الاتنين
_ ما مشكلة خلاص ان شاءلله زبادي برضو صعبة؟
__ انت بس تعال
_ تمام ، وقفلت منه ونفسيتي اتصلحت 360 درجة وكنت مبسوطة وبقيت اتجارى بجاي وبجاي عشان اشوف موضوع الفطور لان عمران حيجي وطبعا ناني عندها يومين ما جات عيانة امي جات لقتني في المطبخ
_ بتعملي في شنو؟
__ بشوف موضوع الفطور
_ من متين بتعملي الفطور انتي؟
__ عمران حيجي يفطر معانا وما حبيت اتعبك انتي تعبانة من الحصل
_ اصلا انا الله كاتب لي التعب
__ ماما ما تقولي كدا ربنا يبعد منك التعب
_ ان شاءلله يا رب خلاص تعالي نعمل الفطور
__ تمام ، وبقينا نجهز في الفطور وامي ما شاءلله في المطبخ عاينت للزمن كان خلاص مشيت استحميت تاني لان ريحتي كلها كانت مطبخ بس واتجهزت وأمي مشت صحت شادي وقالت ليه عمران اتصل وقال جاي يفطر معانا قام واتجهز وعمران وصل استقبلته انا وكنت مبسوطة بجيته
عمران: اول مرة اشوف شمس مبتسمة ، ضحكت بخجل لاني كنت لابسة جلباب استقبال اصفر وشادي جا وقعد معاه ومشينا مع امي رصينا الفطور سريع لان عمران استراحته بتاعت الفطور ما طويلة وصحيت صوفيا وطلعت وعمران كفرّ ليها وفطرنا كلنا مع بعض وعمران غير لينا جو البيت وشادي اتفاعل معاه ورجعت الفرحة للبيت
امي: عمران ما تتكلم مع اخوك دا قال راجع روسيا
عمران: اصلا يا عمتو شادي دا في روسية غسلت ليه مخه بس انا شغال في الموضوع دا ، كلنا ضحكناا
امي: يعني اعتمد عليك؟
عمران: معقولة يااخ عيب في حقي والله ، تاني ضحكنا
شادي: عشان كدا انا الايام دي حاسي روحي ما طبيعي
عمران: ما وراك حاجة نوم بس وانا بصلح كل المواضيع
امي: لو احتجت اي مساعدة يا عمران انا قاعدة ، وضحكنا وعملت الشاي شرب معانا وكان راجع الشغل
امي: تم اليوم معانا
عمران: والله يا عمتو انا طلعت من نص الدوام ولازم ارجع بس ان شاءلله بجي يوم تاني بقيل معاكم
امي: تمام يا ولدي ربنا يسترك ، وطلعنا مع شادي نقدمه وصلنا جنب الباب وقف عاين بيناتنا الاتنين شادي قلب ليه عيونه بملل
شادي: عرفنا اديها الامانة حقها ، عاينت ليهم بإستغراب عمران ضحك وطلع لي الشوكولاتة من جيبه ضحكت بخجل وشيلتها ودخلت جوا سريع خليته مع شادي لقيت امي بتلم في حاجات الشاي
امي: انتي محظوظة بعمران ، ابتسمت ليها بحب يعني امي خلاص بقت رضيانة عن زواجي بعمران
شاهيناز: امممممم عمران زول كويس
امي: شديد عايني هسي جا ساعة بس لكن غير لينا جو البيت بالكامل وخلانا ننسى همومنا كلها ونضحك كأنه ماف مشكلة حصلت يداب اتأكدت انك حتعيشي مبسوطة معاه ، كنت فرحانة بكلامها دا وطوالي مشيت اتصلت ليه كان لسه في الطريق
__ عمران بالجد شكرا ليك على الزيارة دي غيرت للبيت كلهم نفسياتهم وطلعتهم من المود الكانوا داخلين فيه
_ انتي بتشكريني كدا بتحسسيني كأني زول غريب بعيدا عن انك حتبقي مرتي ديل اهلي ومني ولا ناسية؟
__ ما ناسية
_ بس خلاص واهم حاجة عندي ما تزعلي انتي والباقي هين يلا
__ تسلم لي يا غالي
_ اللهم آمين واسمعيني بكرة حنمشي عشان نختار الاجهزة الكهربائية للبيت
__ تمام وخلي بالك من نفسك
_ حاضر ، وقفلنا واتنهدت بفرحة بالجد محظوظة بعمران انا
بالفعل اليوم التاني نزلت الشغل وبعد الدوام جاني وطلعنا اخترنا الاجهزة الكهربائية للبيت
__ يلا عاين من هسي الغسالة عليك والمكوة علي ، عاين لي بغيظ
_ لا بالله؟
__ معترض؟ لو معترض كلمني عشان نرجع الغسالة بالمرة
_ اول حاجة وحدة من الاجهزة الكهربائية دي ما تابعة لي ، عاينت ليه برفعت حاجب
__ وتابعة لمنو؟
_ لسيد المحل دا ، ضحكت
__ عمران المفروض كون اني اتنازلت اني امشي معاك بيتك من الذوق تستلم جزء من الاجهزة وكدا يعني
_ الذوق خليناه ليك يا ذوق انت يا جميل انت ، وكان بتكلم بإبتسامة هبلة كدا فكيت الضحكة بصوت عالية فجأة ختيت ايدي في خشمي بصدمة
_ ناز والله تاني تضحكي كدا في مكان عام بحت ليكي اسنانك ديل ، ضحكت بالراحة وانا ماسكة خشمي
__معليش والله
_ قدامي ، ضحكت ومشينا عشان عمران يتفق مع سيد المحل على الترحيل وكدا خلصنا ورجعنا اي واحد بعربيته
خلصنا مع عمران تجهيزات بيتنا والمفروض نتفق على العرس بعد دا
__ اها يا ناز عندك حاجة تانية؟
_ بالنسبة؟
__ لو ما عندك اي موضوع في رأسك نبدأ برنامج العرس دا
_ بتكلم مع ماما عشان نشوف
__ خلاص تمام لكن انا عاوز انه يتم قبل رأس السنة
_ بس رأس السنة باقي ليه شهرين
__ عارف
_ بس دا قريب يا عمران
__ ما قريب دي شهرين كاملات
_ عمران ما بلحق اجهز وانا الشيلة ما اخترتها لسه
__ ناز حبيبي الشيلة دي في يوم واحد بتختاريها
_ عمران
__ خلاص الزفة تكون في رأس السنة وندخل السنة الجديدة مع بعض ، سرحت في الفكرة وعجبتني
_ حلو خلاص
__ تمام
اول حاجة طلبت حاجات الحبسة من البراندات العالمية عشان توصلني سريع وبدون ما اكلم عمران عشان حيدفع وانا ما عاوزة كدا لان تجهيز البيت اخد كتير شديد ولسه العرس فطلبت حاجات حبستي براي وتاني اخدت منه قروش الحبسة بس خفيف لاني قولت ما محتاجة حاجات كتيرة والشيلة اخترتها من شي إن ومعاي صوفيا كنا بنختار كل يوم جزء من الحاجات والتياب والارياح كان على امي وعمتو وخلصنا من موضوع الشيلة و أي حاجة وانحبست ونزلت الدخان وخلاص الشهرين عدت سريع وتفاصيل العرس بدا
_ عمران ما عاوزة اعمل حفلة حنة
__ ليه؟
_ والله كدا بس ما عاوزة ألبس فستان مرتين وكدا
__ العرس مرة وحدة في العمر
_ عارفة خالتو هند قالت حتعمل لي قعدة حبشية وبس بتكفي
__ متأكدة؟
_ متأكدة
__ مدام عاوزة كدا تمام
عملت قعدة حبشية في بيت خالتي وعزمت صحباتي اصلا صحباتي ما كتار المتواصلة معاهم ورقصت حبشي والجو كان حلو وما ندمت اني ما عملت حفلة حنة دي كانت احلى وعمران عمل الحنة حقته والوزير كان شادي.............
_____________
جهزت بيتي الخاص مع شاهيناز وكنت حابي ان اي تفصيلة في البيت يكون فيها بصمتها ودا الحصل بالفعل واتفقنا ان العرس يكون في رأس السنة عشان ابدأ معاها الجديدة وتكون سنة سعيدة علينا وخلصنا التجهيزات وصرفت فيها كتير بس شاهيناز تستاهل اني اصرف اكتر وبدت مراسم زواجنا وكانت مشاركاني في اي تفصيلة صغيرة وكبيرة لو حبت تعمل حاجة تتصل لي عمران اعمل دا ولا دا عمران اختار دي ولا دي عمران ما عارفة رأسي شاطب عمران عاين بعدين حتساعدني في اي حاجة عمران ممكن اعمل كدا وحتطلع حلوة صح؟ عمران انا خليت العرس تجهيزاته متعبة وانا اضحك في هرموناتها دي وبراضيها وبنحل الموضوع لمن جا حنتها رفضت تعملها ما عارف السبب بس انا الشباب عملوا لي حنة ووزيري كان شادي مع ان شادي كان مسافر راجع روسيا بس قولت ليه لو ما حضرت عرسي ما معافي ليك وحأقطع علاقتي بيك فأضطر يمدد اجازته ويأجل السفر بعد العرس وكان واقف معاي في اي خطوة وكان اخوي انا بدل يكون اخو العروس
جا يوم العقد انا كنت متوتر من الصباح بدري اتصلت لي شاهيناز بتبكي زادت لي توتري اكتر
__ مالك يا ناز الحاصل شنو
_ انا متوترة ، هنا ضحكت شديد
__ والله انا اكتر منك وفايتك بالصبر بس حبيبي ، هنا ضحكت لي بصوتها الباكي
_ عمران انا دايرة انسحب
__ انا هسي ماسكيني مسك عشان ما اجري ، كانت بتضحك وقالت لي بدلع
_ عمران ياااخ ، اتنهدت تنهيدة طويلة
__ هانت حبيبي كلها ساعات وتكوني على ذمتي وكل الامور حتكون تمام وبجي بعدين بسوقك ان شاء الله
_ ما تنسى تجيب لي شوكولاتة معاك ، هنا انا ضحكت
__ ناز الله كم؟ ، ضحكت لي
_ الله واحد لكن يا عمران تنسى الشوكولاتة برجع مع بابا
__ بجيب ليكي مصنع شوكولاتة بس خليكي معاي
_ انا ديمة كنت معاك بس برضو ما تنسى الشوكولاتة حقي
__ اتخيلي انساها ونتشاكل ويسألونا من السبب اقول ليهم نسيت الشوكولاتة حقتها
_ وانا امسك فستاني وبقول ليهم بابا وين انا راجعة بيتنا ، بقينا نضحك يعني عقدنا بعد شوية ونحنا في عالم تاني بس ماف زول بزيل لينا التوتر غير بعضنا وناز ماف زول بفهمها غيري وما حأستغرب لو اتصلت لي لحظة العقد عشان حاجة تافهة وانا ما حأتردد ثانية اني ما حأرد ليها لانها لو ما محتاجاني جنبها ما حتتصل لي في لحظة زي دي .........
لقد تجاوزت معكِ مسألة الحب،
أنا لا أستجدي منكِ شعورًا
أنا أعيشكِ حياة.🔥♥️
____________
صوفيا كانت بتحاول تتقبل ان شادي حيرجع روسيا من جديد و أن عنده بت في حياته ومنتظراه يرجع ليها فبقت تحاول تتجاهله عشان ما تتعلق بيه وتنكسر من اول وجديد كفاية الوجع القديم اللي انتهى بنهاية مأساوية ما عاوزة يتكرر نفس الاحداث فبقت تتجاهله وهو لاحظ الحاجة دي وكان مؤثر فيه
في يوم كانت طالعة وشافت شادي طالع من غرفته فحاولت تمشي سريع عشان ما يسألها ماشة وين واحتمال يقول ليها اوصلك فبقت ماشة سريع عشان تطلع من البيت هو الحركة دي عصبته قام سريع لحقها ومسكها من قميصها ورا زي الحرامي وقفت وكان معصب شديد
__ داير افهم دا شنو البتعملي فيه دا؟ ، عاينت ليه ببلاهة كدا واستنكار
_ بعمل في شنو؟
__ صوفيا ما تعملي فيها غبية تمام عشان ما اكسر رأسك هنا
_ هسي يا شادي انا عملت ليك شنو؟
__ كل ما تشوفيني بتتهربي مني عملت ليكي شنو؟
_ انت خليك مع روزلين حقتك ديك ما تشتغل بي ولا تركز معاي فاهم؟ ، عاين ليها قوي
__ معليش طيب غلطانة انا بس ما بتتكرر ، عرفته زعل وكان ماشي مسكته من ايده وقف بس ما عاين ليها في عيونها
_ شادي انا بتجاهلك عشان ما اتعود على وجودك وانت حتسافر دا السبب ، قالت ليهو بكسرة وفكت ايده عاين ليها بألم
__ لا يعني اذا سافرت ما حتتكلمي معاي ولا حتى حتتصلي لي؟
_ نهائي
__ تمام ، ومشى خلاها وهو زعلان منها اتففت بزهج وضربت رجلها في الارض بزعل كدا وواصلت محل كانت ماشة
يلا هنا الطاولة انقلبت وشادي بقى يتجاهلها زي ما بتتجاهله وبدل ما تفرح انه بقى ما شغالة بيها لا يداب زعلت اكتر لحدي مرة لقيته جوا المطبخ شافها واتجاوزها وكمل الحاجة البعمل فيها
__ بتعمل في شنو؟ ، ما رد ليها
__ بتكلم معاك بتعمل في شنو
_ ما دخلك ، المفروض تزعل بس لا جات وقفت قدامه وعاينت ليه في عيونه وطبعا هي سنفورة الا رافعة رأسها
__ ما دخلك دا لي انا؟ هااا لي انا يا شادي؟ ، نظراتها كانت قوية وطبعا شادي قدام نظراتها بضعف قام لزاها بالجنبة شوية
_ صوفيا زحي من قدامي ، قالت ليه بدلع
__ ولو ابيت ، هنا غمض عيونه شديد
_ صوفياااااا
__ عيون صوفيا ، طبعا بتحاول تستفزه مسكها من شعرها خفيف كدا
_ ياااخ على الاقل احترمي طولي لو ما محترمة عمري ، ضحكت شديد
__ حاضر من عيوني هسي بتعمل في شنو ؟ ، سرح فيها وهي بتتكلم هزته
__ شادي انا بتكلم معاك
_ معاك يا روز ، غمض عيونه شديد لانه غلط في اسمها لانه كان سرحان ولانه لمن كان مع روزلين كان اغلب وقته سرحان صوفيا عاينت ليه بزعل واتحركت طالعة من المطبخ سريع ثبتها
_ والله ما قاصد كنت سرحان ، عاينت ليه بزعل شديد شوية وبتبكي
__ لانك بتفكر فيها حتى وانت معاي
_ لا والله كنت سرحان فيكي انتي ، تاني غمض عيونه وهز رأسه
_ قصدي كنت سرحان بس
__ امممممم
_ ما تنفخي لي جضومك ديل اصلا زعلان منك شديد وتعالي اعملي لي نسكافيه ما عرفت اعمله وزعلنا في محله ، أبتسمت ليه بحب ورجعت تعمل ليه النسكافيه وهو سرحان فيها
جات حنة عمران وشادي كنت منتظر صوفيا تخلص تجهيز عشان حيمشوا مع بعض وعمران شغال يتصل عليه لانهم اتأخروا مشى غرفتها فتح الباب وهو زهجان كانت بتسرح في شعرها وشاهيناز قاعدة معاها في غرفتها
__ صوفيا ما ممكن معاك بمشي بخليكي والله
_ والله باقي لي شعري بس
__ ياااخ استعجلي
_ تمام تمام دقيقتين بس ، وطلع وشاهيناز قامت تضحك
شاهيناز: جننتي اخوي معاكي وما بقدر يقول ليكي حاجة
صوفيا: ما شاف حاجة لسه ، وطلعت سريع لقته واقف في نص الصالة وهو حينفجر من الزعل مشت عليه ووقفت قدامه وقفلت ليه اخر رزارة من الجلابية وصلحت ليه كتوف الجلابية عشان تمتص غضبه وبالفعل من لمن قربت منه رخى وما فتح خشمه
صوفيا: نطلع؟
شادي: تمام ، وطلعوا ووصلوا الحفلة وعمران شاكل شادي عشان اتأخر وشادي كان بحمر لصوفيا وهي عاملة رايحة بس.........
أنتِ العَظيمة والجَميلة والمُعقدة و"البسيطةُ" والمَسيطرة♥️.
يتبع.........
20
صباح العرس صحيت متوترة شديد وبكيت طوالي لمن وترت صوفيا معاي
_ شاهيناز ما ممكن معاكي ياااخ
__ ياااخ متوترة ما عارفة اديني تلفوني
_ تعملي شنو؟
__ عاوزة عمران ، خلاص فاض بيها جدعت لي التلفون وطلعت اتصلت لعمران وبكيت ليه وكالعادة لقيت منه الراحة و زال لي التوتر وقفلت جات صوفيا راجعة لقتني رايقة وبتبسم ساي
صوفيا: انا لو عارفة كدا كان اديتك عمران من الصباح هبلة خلاص والله عمران وقع وقعة وما سمى ، ضحكت ليها وطلعت ليها لساني نظام بغيظها وبعدها جاتنا عرفات وطلعنا الكوفير وصلنا شادي ومشى وبديت التجهيزات والعقد تم وبكيت كدا لمن الله غفر لي لمن اتصل لي عمران وخلاص بديت الميكب واللبس لمن جا ساعة البس الفستان الانا جهزته مسبقا ابى يدخل فيني هنا كانت الصدمة انا ما جربته قبل كدا بس اخترته ومن ورا عادي يعني ماف مشد حسب الوزن
شاهيناز: ما ممكن والله
صوفيا: كدا اهدي نشوف فستان تاني ، بكيت ليهم
شاهيناز: ما عاوزة ولا حأمشي العرس نهائي ، وقعدت في المقعد وبقيت ابكي وهم بحاولوا يحنسوا فيني وانا زعلانة فستان عرسي ما دخل فيني في اسوء من كدا؟
صوفيا: هسي الحل شنو؟
شاهيناز: ما حألبس زفاف بس وانتهى الموضوع
صوفيا: اتصلي لعمران كلميه
عرفات: صوفي انتي ما جادة في حياتك ولا شنو تتصل تقول ليه شنو وعمران حيعمل ليها شنو؟ ، صوفيا عملت ليها نظام اسكتي وغمزت ليها وعرفات مستغربة وصوفيا جابت لي التلفون
صوفيا: هاكي اتصلي لعمران ، عاينت ليها مسافة وشيلت التلفون واتصلت لعمران وانا ببكي
__ عمران
_ مالك بتبكي؟
__ ما حألبس زفاف
_ كيف يعني ما حتلبسي ليه الحصل شنو
__ الفستان ضيق ابى يدخل فيني
_ وانتي لمن اخترتيه ما جربته؟
__ ما جربته بس اخترته واعتمدت عليه وهسي طلع ضيق
_ غلطانة والله
__ هسي ما عارفة اعمل شنو؟ ماحأحضر العرس احضره براك
_ بتهظري والله ، قومت بكيت
__ احضر الزفة من دون فستان؟
_اكيد الكوفير الانتي فيه في خمسمية فستان صح؟
__ بس ما عاجبيني انا عاوزة داك بس
_ يلا شوفي ناز حبيبي هسي ماف حل شوفي اقرب فستان بس وانا متأكد انك لو لبستي شوال حتطلعي اميرة هي ناز مرت عمران وما تكون اميرة؟ ، طوالي فصلت مسافة
__ خلاص منتظراك
_ وانا جاي ، وقفلت منه ومشيت للبنات
شاهيناز: حأختار فستان تاني ، عرفات عاينت لصوفيا وضحكوا الاتنين
صوفيا: شايفة كلامي طلع صح
عرفات: لا عمران اخوي طلع خطير
شاهيناز: راجلي لو سمحتوا ، ضحكوا فيني ومشينا اخترنا فستان تاني ماف طريقة وصلحوا لي الميكب من اول وجديد وجهزت خلاص
كنت منتظرة عمران بفارق الصبر وانا التوتر متملك فيني ونسبة ان الفستان ما نفس الاخترته بس خلاص وعمران وصل ودخل وقف مسافة عاين لي بعدها قرب على بعد مسافة ومد ايده مسك رفع ايدي في الهواء
عمران: ايه الحلاوة دي؟ ، ضحكت بخجل وحبيته شديد عارفة عمل كدا عشان الفستان البكيت عشانه مسك ايدي وخلاني الف
عمران: ملكة في كل حالاتك ، وحضني وبارك لي وانا مبسوطة وبعدها طلعنا على الاوت دور خلصنا ومشينا الحفلة كانت رابة جا فاصل كدا والحفلة ولعت شديد ميلت على عمران وهمست ليه
__ عمران لو قومت رقصت البحصل شنو؟
_البحصل ان من هنا حنمشي المستشفى طوالي
__ انت قولت العرس مرة في العمر
_ حتى الموت مرة في العمر ، قومت ضحكت وطبعا الشافنا بقول عمران قاعد يتغزّل فيني
__ عمران انا جوعانة ، عاين لي بإستغراب
_ ما أكلتي من متين؟ ، عاينت ليه بطفولة كدا
__ أكلت في الكوفير بس الفستان تقيل جوعني ، حاول انه ما يضحك
_ عمران ما تضحك ، مسح وشه عشان ما يضحك
__ شاهيناز قربنا خلاص
_ قول ناز ، هنا ضحك
__ اتخيلي الناس في شنو ونحنا في شنو ؟، وضحكنا خفيف احلى حاجة لمن راجلك يكون صاحبك يعني بتقدري تقولي كل الفي بالك وفي اي وقت من دون خجل
لمن الحفلة قربت تخلص طلعنا عشان نغير للجرتق
عمران: عرفات شوفي عليك الله اي حاجة خفيفة كدا بتتأكل ان شاءلله حلاوة اديها لناز لانها جوعانة
عرفات: تمام ، هز رأسه وطلع عشان يمشي يلبس وانا عرفات جابت لي كيك وعصير من ناس التنظيم بالجد معدتي كانت فاضية شديد اكلت ولبست للجرتق وعمران جا عشان نطلع مع بعض كنت متغطية بالقرمصيص جا رفعو لي وكان ماسكه لفوق
عمران: اكلتي ليكي حاجة؟
شاهيناز: ايي
عمران: نمشي؟ ، هزيت ليه رأسي بمعنى ايي نزل لي القرمصيص ومسكني فجأة وقف وعاين لعرفات
عمران: حصنتوها؟
عرفات: نسيت والله
عمران: ماف مشكلة ، وقف وخت ايده في رأسي وحصني وانا مبسوطة وفي نفس الوقت كنت بحصن فيه ولمن خلصنا طلعنا على الصالة وقعدنا في السرير المخصص للجرتق ميل علي
__ ترشيني باللبن يومك ما حيعدي على خير ، اتكلمت من تحت القرمصيص
_ عمران ما تتكلم معاي براي متوترة والله ، وبالفعل كنت متوترة شديد نزل رأسه تحت وهو بتكلم عشان ماف زول يحس اننا بنتكلم مع بعض
__ امسكك عشان ما تقومي جارية؟ ، هنا ضحكت والحمدلله انا وشي مغطى
_ عمران الله يجازي محنك
__ ما هو لو قومتي جارية انا حأجري وراكي لاني انا ذاتي متوتر ، بقيت اضحك وعارفة انه ما متوتر بس عاوز يخفف عني وبالفعل التوتر خف وبدت مراسم الجرتق ولحظة اللبن شربني عشان رفض انه يرشني بيها وانا ما رشيته عشان ما اوسخه وانتهت المراسم على اكمل وجه والكل كان مبسوط وجات لحظة الوداع بكيت مع امي وصوفيا كتير بعدها طلعنا وكان السواق شادي وصلنا بيتنا ووصى عمران علي ومشى
__ مرحب بيكي في بيتك الخاص ، ابتسمت ليه بحب وبعدها صلينا ركعتين لبداية حياة جديدة وكنت في المصلاية وهو بسبح بأصابعي بعد خلص
__ سنة سعيدة عليكي
_ وعليك يا رب
__ حبيت ان عيد زواجنا يكون مع رأس السنة عشان نحتفل بيه كل سنة وما حننساه ابدا حتى لو عدّا على زواجنا مية سنة يعني حتى مع اطفالنا لمن يحتفلوا براس السنة نحنا حنحتفل معاهم بتاريخ ميلادنا الجديد ، سبحان الله عمران بفكر بطريقة بعيدة خالص بس حلوة شديد ما فكرت فيها يمكن هو ما حابي اننا ننسى تاريخ زواجنا ابدا
_ كل مرة بتثبت لي اني اخترت صح ، سلم علي في رأسي وبعدها قومنا من المصالي وبدينا حياتنا الزوجية.....
بعد تلاتة يوم من زواجنا صحيت الصباح وخليت عمران نايم جهزت الشاي وقولت انتظره قعدت في الصالة في الجلسة وانا منتظراه يصحى براحته مسكت التلفون واتصلت لصوفيا
_ العروس
__ يا بايرة كيفك ، قامت ضحكت شديد
_ كويس يا معفنة
__ والله اشتقت ليكي
_ انا اكتر والله البيت بقى لي فاضي تاني ابكي لمنو وارقد في رجله ويمسح على شعري تاني اقول يا منو بس؟ ، كلامها بكاني وهي بقت تبكي
__ ما تبكي حبيبي وقت ما تحتاجيني تعالي لي طوالي بيتي ما بعيد
_ تمام حبيبتي اها عمران كيف معاكي ان شاءلله مبسوطة؟
__ والله يا صوفي مبسوطة شديد مع عمران فوق ما تتخيلي عمران حنين شديد وبقيت احبه اكتر من اول وشادي صح كلامه اني اكتر بت محظوظة في الدنيا
_ ربنا يسعدكم يا رب
__ امين يا رب وعقبال تلقي البسعدك حبيبتي
_ ان شاءلله يا رب
__ طالعة الجامعة؟
_ ايي هسي
__ تمام اخليكي تجهزي نتلاقى
_باي
_ مع السلامة ، قفلت منها فجاة جاني عمران من ورا سلم علي في خدي وختا راسه في كتفي اتخلعت في البداية بعدها ابتسمت ومديت ايدي مسحت على شعره وهو كان مغمض
__ صباح الخير
_ صباح النور
__ صحيت متين؟
_ اممم هسي بس
__ تعال بقدام ، رفع راسه من كتفي وجا بقدام قعد معاي في الجلسة
_ صليت؟
__ ايي
_ ما شوفتك لمن طلعت الحمام
__ تقريبا كنتي في المطبخ
_ ايواااا ، وكبيت الشاي وشربنا بمزاج
__ ناز
_ عيوني احكي
__ شادي مسافر خلاص ، حسيت بنبرة الزعل في صوته صعبة عليه شادي رفيق عمره اتخلعت انا شادي اخوي ما صدقت انه رجع
_ مسافر متين؟
__ بعد بكرة
_ ما كلمني ، وبكيت جراني عليه
__ حيكلمك ما تبكي
_ لو قعد معانا البحصل شنو مشكلته مع صوفيا واتحلت ليه عاوز يرجع تاني كدا حيعذبها اكتر وحيعذبنا
__ هو راجع عشانها هي بس ، استغربت وزحيت منه
_ كيف يعني عشانها؟ ، ما رد لي وسرح بعيد عرفته ما عاوز يجاوب هزيته
_ عمران احكي الحاصل شنو؟ ، اتنهد طويل ومسح وشه
__ شادي بحب صوفيا ، عاينت ليه بعدم فهم
_ م كلنا عارفين انه بحبها وين الجديد؟ ، ما رد لي وكان بعاين لي بس بقيت افكر لان نظرة عمران ما كانت عادية فجاة استوعبت هو قاصد شنو
_ لالا مستحيل يكون بحبها عديل كدا مستحيل شادي يفكر فيها كدا
__ ما بنقدر نتحكم بقلوبنا ، مسكت راسي وانا مصدومة شديد
_ عمران قول انك بتهظر
__ حأهظر بموضوع زي دا؟
_ يمكن انت فاهم غلط لمن بتشوف اهتمامه بيها
__ ناز شادي رفيق عمري لو ناسية ، كنت مصدومة في الكلام دا وبقيت افكر صوفيا لو عرفت موقفها حيكون صعب شديد؟
_ ما كلم صوفيا صح؟
__ولا حيكلمها وحيسافر روسيا
_ يعني للمرة التانية حيسافر بسببها
__ افضل ليهم الاتنين
_ ربنا يجبر بخاطره ، وقام مني دخل الغرفة بقيت افكر في الموضوع كيف شادي بحب صوفيا صح كانوا متعلقين ببعض بس ما اتوقعت من مشاعر اخوية تتقلب حب حقيقي
المغرب قاعدة في البيت جا شادي ومعاه صوفيا زيارة لي فرحت بجيتهم
شادي: المفروض انكم عرسان وكدا ما كان اجي بس اضطريت
شاهيناز: البيت بيتك حبيبي
شادي: طبعا يا شيذو بعد بكرة ان شاءلله حاسافر ، عاينت اتجاه صوفي كانت حزينة شديد
شاهيناز: شادي ليه مسافر خليك قاعد عليك الله
شادي: والله مضطر ارجع حياتي هناك
شاهيناز: بس اهلك هنا
شادي: بجي في الاجازات ان شاءلله
عمران: يا زول ما تجي ما دايرين نشوفك تاني ، شادي ضحك وعمران كان زعلان شديد
شادي: انت المفروض ما تزعل حضرت عرسك
عمران: غصبا عنك تحضر ، شادي ضحك وانا كنت زعلانة شديد من قراره دا اما صوفيا كانت حالتها كعبة شديد
شاهيناز: صوفيا تعالي ساعديني ، ومشينا المطبخ اصلا المطبخ ورا البيت بعيد شديد منهم وصلنا
شاهيناز: شادي خلاص راجع ، هنا بكت ما قدرت تمسك نفسها جيت حضنتها وبكيت معاها بقت تبكي لمن تتنهد
صوفيا: حيمشي يخليني تاني ، بقيت احاول اهديها وما عاوزة اقول ليها شادي مسافر بسببك
شاهيناز: حيجي تاني
صوفيا: ما حيجي وهو اصلا ماشي عشان حبيبته ، زحيتها مني بصدمة
شاهيناز: حبيبته!!!!
صوفيا: ايي عنده حبيبة اسمها روزلين روسية منتظرة رجعته حيرجع ليها
شاهيناز: جيبتي الكلام دا من وين؟
صوفيا: كلمني بنفسه ، في نفسي قولت بس عمران قال شادي بحب صوفيا ليه صوفيا بتقول شادي عنده حبيبة ولا عاوز يكرهها فيه
شاهيناز: ايواااا ما تزعلي حبيبي ، هديتها وشيلنا الضيافة وطلعنا وشادي عاين ليها وسألني
شادي: بكت تاني صح؟
شاهيناز: اممممم ، رجع عاين ليها كانت ماسكة دموعها
شادي: صوفيا ، طوالي طلعت من الصالة
شادي: اعمل ليها شنو البت دي؟
عمران: ما تسافر بس ، شادي عاين لي بوجه خالي تعابير
شاهيناز: ايي خليك قاعد يا شادي عشانها
شادي: ما تصعبوها علي ، وطلع لحقها جيت قريب لعمران
شاهيناز: صوفيا قالت لي راجع عشان حبيبته روسية كدا نسيت اسمها صح الكلام دا؟
عمران: ممكن تقولي كدا ، مسكت راسي بزهج
شاهيناز: وانت بتقول لي شادي بحب صوفيا ياااخ دا شنو اللخبطه دي؟ رفع لي اكتافه بعدم معرفة حمرت ليه
شاهيناز: عمران ما تلخبت لي راسي معاك ما ممكن
عمران: ما تفكري كتير وخليها تجي زي ما تجي لو في قسمة بيناتهم حيتجمعوا
شاهيناز: انت شايف علاقتهم دي بتجي؟
عمران: اذا بحبوا بعض بتجي ان شاءلله ، عاينت ليه وسكتا
عمران: سمعتي بحاجة اسمها قلبان على حافتي الحلم؟
شاهيناز: والله الاتنين ديل قلبان على حافتي الحلم جد جد
عمران: حتى نحنا كنا كدا لو ناسية
شاهيناز: كنا كيف؟
عمران: تفسير الجملة دي ان لمن يكون اتنين علاقتهم شبه مستحيلة مثلا انا وانتي كنا من طبقتين مختلفتين وخلاص عاداتنا وطريق عيشتنا مختلفة يعني مثلا في الحلم ما كنا حنتلاقى وانا متاكد انك ما فكرتي في يوم من الايام تكوني مرتي بس القدر كان ليه رأي آخر ، صح كلامه انا كنت بس متنمية منه سلام ما ختيت في بالي اني حاتزوجه بس اتزوجته وكنا قلبان على حافتي الحلم وهسي علاقة شادي وصوفيا اتربوا على اساس انهم اخوان فمثلا لو اتزوجوا ودي حاجة بعيدة جدا بس على قول عمران خليها تجي زي ما تجي بعد شوية جا شادي راجع ومعاه صوفيا وقعدوا بعد نص ساعة طلعوا رجعوا البيت
"يجب على المرء أن يجد أشياء لا يمكن أن يفقدها."