رواية قلبان علي حافتي الحلم الفصل الثالث 3 بقلم شذى عبد المكرم
اثناء ما بتكلم مع اسراء بخصوص المورد فقدت تلفوني
شاهيناز: واااااي يا اسراء تلفوني
اسراء: كدا قولي بسم الله اخر مرة اشتغلتي بيهو متين؟
شاهيناز: ما بتذكر والله اخر مرة لمن كنت في عربية عمران وهو نزل .... سكتا يداب اتذكرت اني نسيتو في عربيتو
اسراء: بس خلاص نسيتي في عربيتو اتصلي ليهو
شاهيناز: ما عندي رقمو
اسراء: كيف يعني؟
شاهيناز: الواحد دا ما عندي رقمو وما جات الفرصة انو اشيل رقمو هسي اعمل شنو ضروري عاوزة التلفون
اسراء: منو معاهو رقم عمران انتي بتعرفي
شاهيناز: ابوي
اسراء: هاكي اتصلي . شيلت تلفونها واتصلت لابوي وكلمتو انو عاوزة تلفون عمران وهو سألني ليه ما سوقت عربيتي اتحججت ليهو واداني الرقم
شاهيناز: ياااهو الرقم
اسراء: اتصلي . هزيت رأسي واتصلت لمن رد
__ عمران
_ شاهيناز!!!!
__ ايي انا نسيت تلفوني في عربيتك
_ ما لاحظتو وين بالضبط
__ في طبلون العربية فوق الصوف
_ الا ارجع اشوفو ليكي
__ تمام والله ضروري عاوزاهو عندي بيهو مواضيع بتقدر تجيبو لي؟
_ داخل اجتماع بعد نص ساعة ضرورية
__ خلاص وصف لي مكتبك بجي انا . سكت مسافة
_ ارسل زول يوصلو ليكي؟
__ لالا خليهو اصلا يومي باظ ونسيت العربية والمفروض اطلع اقابل المورد بتاع الادوية في المستودع حقو وجرجرة عجيبة . وبقيت احكي ليهو مشاكلي وانا ما حاسة
_ انتي حاولي ركزي شوية
__ ان شاءلله هسي وريني الموقع
_ انتي المورد دا ما عندك رقمو؟
__ في التلفون . سكتااا مسافة
__ اقول حاجة القى التلفون في العربية وانا بديك كلمة السر افتحو طلع لي الرقم واديني وباقي الحاجات بتصرف ان شاءلله عشان لا اتعب اجيك ولا تتعب تفتش زول يجيبو لي
_ حل وسط وحلو . مشى لقى التلفون اديتو كلمة السر فتحو ولقى لي الرقم وملاني
__ شكراً
_ عفوا
__ نتلاقى
_ شوفي اجري ترحال قضي اغراضك ولمن تخلصي اتصلي لي احتمال اكون خلصت بجي برجعك ومنها اديكي التلفون . فرحت شديد
__ حلو . قفلنا واتصلت للمورد واتفقنا معاهو وطلعنا مع اسراء ومشينا شوفنا الادوية وبخصوص القروش اتصلت لابوي وحكيت ليهو انو تلفوني ما معاي وهو مسبقا عارف فدفع الحساب وخلصنا بس جرا زمن مبالغة واتصلت لعمران ولقيتو خلص ورسلت ليهو اللوكيشن وقال حيجي
اسراء: حنرجع الصيدلية؟
شاهيناز: والله ما باقي كتير للدوام خلينا نكنسل باقي اليوم
اسراء: والله بكون احسن لانو تعبنا واصلا ما فطرنا
شاهيناز: صح والله خلاص نمشي نفطر هسي
اسراء: انا داخلة السوق
شاهيناز: خلاص اي وحدة تفطر في بيتهم بس
اسراء: خيار مناسب . ووقفنا على كدا شوية عمران وصل اتصل في تلفون اسراء ادتني قال انو برا وطلعنا ليهو
شاهيناز: ممكن نوصل اسراء السوق
عمران: تمام . واتحركنا اداني تلفوني ووصلنا اسراء السوق
عمران: اتأخرتو شديد
شاهيناز: مبالغة والله اختيار شركات الادوية مرهق ياااخ بس خلصنا الحمدلله
عمران: فطرتي؟ . كأنو حسا بي
شاهيناز: للاسف لا
عمران: للوقت دا
شاهيناز: والله ما حسينا بالوقت وهسي حاسة حيغمى علي من الجوع وكيسي تبع الطمعية الصباح نسيتو في الصيدلية . قام ضحك
عمران: خلاص حأعزمك على مكان احتمال يعجبك
شاهيناز: نشوف . ومشى بينا على مكان رفعت رأسي لقيت مكتوب بوش بونت ابتسمت بفرحة
شاهيناز: بوش؟؟
عمران: رأيك شنو
شاهيناز: و في احلى من البوش؟ . ودخلنا المكان براهو يفتح النفس وهادئ اخدنا طاولة ركن بعيدا عن الناس وجا الويتر وكلمناهو وعمران قال ليهو يتسرع لينا لانو عارفني جوعانة شديد وبقيت اعاين في المحل وبتأمل في جمالو
__ المكان حلو شديد
_ اممممم
__ بتجي دايما؟
_ جيت مرتين
__ ايواااا . وطلبنا وصل حاجة كدا روعة
__عمران
_ نعم
__ ممكن اتخلى عن برستيجي في اللحظة دي؟ . قام ضحك
_ اخدي راحتك
__ حتشوف صحبك معاك . قام ضحك تاني
_ ومالو؟ . يااااخ بقولا بطريقة حلوة بلهجة قريبة للمصري بتخليني افكر اتهور واعترف ليهو بدينا أكل والله الطعم في حتة تانية خالص بقيت اكل على راحتي لانو اول سبب الاكل رهيب والسبب التاني كنت جوعانة شديد
__ مبالغة يا عمران الاكل رهيب
_ اممممم
__ انا لو محلك اجيهو كل اسبوع احدد يوم معين اسميهو يوم البوش العالمي . ضحك على كلامي
_ الليلة يوم شنو؟
__ الاحد
_ خلاص الاحد الجاي حأجيبك برضو . عاينت ليهو ببراءة
__بالجد حتجيبني؟
_ حابة تجي؟
__ بشدة
_ خلاص الاحد حنفطر هنا
__ اتفقنا . اخدنا قعدنا وشربنا بارد عشان يهضمو وطلعنا وصلني البيت ونزلت من العربية وكنت واقفة في الشباك
__ شكرا بالجد الليلة تعبتك معاي شديد
_ ما بيناتنا
__ يلا دا شيك مفتوح حظك يا شاهيناز . قام ضحك
_ بسحب كلامي
__ والله اي شيك اتصرف لا يلغى
_ ومالو؟ . اديتو ضهري وغمضت عيوني اتنفست ورجعت فتحت عيوني والتفت ليهو
__ يلا باي
_ قولي مع السلامة
__ مع السلامة . وودعتو ودخلت اليوم مبسوطه حد الانبساط........
هل بِـ إمكانكَ البقَاء حَتى وإنْ اتعبتُكَ معي ؟❤
وقت الغدا ودا الوقت البنلقى فيهو ابوي
ابوي: رسلي لي قروش الادوية القبيل حولتهم ليكي . فتحت خشمي بصدمة
شاهيناز: بابا!!!!
ابوي: ما بابا ولا اي حاجة الشغل شغل
شاهيناز: قول والله
ابوي: يا ثريا قبيل اتصلت لي انو نست تلفونها في عربية عمران وقالت عاوزة تحول للمورد قروش الادوية وانا حولت ليها موش المفروض ترجع لي قروشي بعد تلفونها رجع ليها؟ . امي قامت تضحك شديد
امي: والله ابوكي كلامو منطقي
ابوي: دايرة تعملي رايح بقروشي سريع حوليهم
شاهيناز: ما كدا
ابوي: خلاص لو ما كدا حوليهم لي هسي
شاهيناز: بابا انت جادي؟
ابوي: جادي والله وراي مسؤوليات كتيرة واقصاد جامعة صوفيا وامك عاوزة طقم جلوس جديد . قومت ضحكت شديد
شاهيناز: وانا ما من مسؤولياتك؟
ابوي: والله من مسؤولياتي بس في حاجاتك الشخصية بس شغلك ما لي دخل يلا حولي ورسلي لي الاشعار الابيض في الواتس . هنا ضحكت شديد
شاهيناز: كويس يا باشمهندس محمد عبدالله . حولت ليهم القروش والاشعار لانو كان جادي
ابوي: ثريا ياهو قروش الطقم طلع ليكي
امي: الحمدلله . قومنا ضحكنا كلنا
_____________
عمي محمد طلب مني اوراق مهمة المفروض اوصلها ليهو الصباح وبالفعل كنت طالع بس اتصل لي المدير وانو في ايميل رسلو لي المفروض اجهزو ليهو حاليا اتصلت لعمي انو حأتأخر وكل تأخيرة لخيرا خلصت ورسلت الايميل واتحركت عليهو اديتو الاوراق وطلعت منهم وركبت عربيتي ظهرت لي شاهيناز الاول ما دخلت بيتهم وانا بتمنى المح طيفها وعقلي بقول انو بتكون طلعت الشغل بس ظهرت لي ذي القدر سلمت عليها وسألتني لو اقدر اوصلها انا ممكن اوصلها للقمر لو عاوزة سألتها من عربيتها قالت عطلانة استغربت وحسيتها بتكذب بس مشيتها وفي الطريق قالت جوعانة افتكرها انو عاوزة اكل فاخر بس صدمتني انو عاوزة طعمية بس من جوا حسيت بالفرحة انو طابع برا ما اتطبع فيها وكانت بتتصرف بعفويتها كعادتها ودا البخليني احبها اكتر وبعدها وصلتها واتصلت انو نست تلفونها ولاول مرة ارفض ليها طلب عشان كان عندي اجتماع كنت زعلان من الحتة دي بس وصلنا لحل وسط بينا وانو افتح تلفونها اول حاجة الخلفية كانت صورتها بعد مليتها الرقم بقيت اتأمل في صورتها ومن الخلفية واضح انها في المانيا كانت جميلة كعادتها والتلفون اخر موديل للحظة حسيت بالفرق بينا بس طردت الافكار عشان ما اخرب مزاجي ولمن جيت ارجعها لقيتها ما فطرت فمشينا بوش بونت كنت عاوز حجة عشان اوديها المحل دا لانو كان قالت نفسها في بوش والفرصة جات في محلي واخدتها كانت مبسوطة وباين من ابتسامتها وكانت بتتصرف على طبيعتها المحببة عندي ووعدتها انو اجيبها تاني كنت مبسوط بموافقتها عشان حنطلع تاني مع بعض وفي نفس الوقت بحس بيأس فظيع انو المفروض ابعد عشان ما اتعلق بيها بس هي من اشوفها او اسمع بأسمها بضرب بكل افكاري عرض الحائط وبشوفها وصلتها البيت واتمنيت اليوم ما يخلص لانو معاها بحس بأحساس مختلف......
فليَضحك وجهُك الجّميل، فهو كل ما أُحِب
رجعت البيت كنت مبسوط باليوم دا لقيت امي استبقلتني
امي: ان شاءلله يا ولدي ديمة مبسوط كدا
عمران: ان شاءلله يا رب كتري لي من الدعوات
امي: ربنا يفتحها ليك وين ما تقبل . سلمت عليها في رأسها
عمران: امين يا رب . سكتت مسافة عرفت انو في حاجة في رأسها
عمران: احكي لي يا امي في شنو
امي: عرس اختك علا قرب
عمران: ايي عارف
امي: ابوك ما عندو حاجة يقدمها ليها . كانت زعلانة شديد وهي بتتكلم
عمران: امي من الناحية دي ما تشيلي هم قروش عرسها انا مجهزو ليها
امي: بس كدا كتيرة عليك وانت يداب بتكون نفسك
عمران: بيتي وخلص الحمدلله واصلا من طلبوها انا بديت اجهز ليها اختي بسلمها لراجلها معززة مكرمة ان شاءلله
امي: ربنا يخليك سند لاخواتك دايما
عمران: اللهم آمين يا رب اها...... بتكفيكم؟
امي: دي كتيرة شديدة
عمران: ما كتيرة جهزو ليها اي حاجة نهائي ما تحوجوها لحاجة وانتي قولي ليها نص حقي ونص حق ابوي واكيد انتي محتاجة تياب وعرفات محتاجة فستانين اشترو اي حاجة ولو قصرت قولي لي وكلمت الدهان حنغير لون البيت حسب ذوقها هي او نجدد اللون بس . امي قامت تبكي شديد حضنتها
عمران: هسي يا امي البكي لزومو شنو
امي: كنت شايلة هم لعرسها والله
عمران: من انا عايش ما تشيلو هم ان شاءلله
امي: ربنا يحفظك لينا اخت ليك حاجة تأكلها؟
عمران: اكلت برا ما تتعبي ووين البنات
امي: علا في غرفتها وعرفات ما جات من الجامعة
عمران: تمام . مشيت غرفة البنات ضربت الباب
علا: اتفضل
عمران: العروس كيف قيلتي؟ . قامت ضحكت بخجل
علا: تمام الحمدلله وانت
عمران: الحمدلله . ومشيت غرفتي ربع ساعة بس جاتني علا بتبكي وحضنتني
علا: شكرا عمران . عرفت انو امي كلمتها
عمران: يا هبلة في وحدة بتشكر اخوها؟
علا: ما قصرت معاي
عمران: اي حاجة احتجتي ليها بدون تردد كلميني اصلا انا شغال ليكم
علا: كويس يا غالي . وطلعت مشت وهي مبسوطة وانا انبسطت لفرحتها دي اول عروس من اخواتي ولازم تطلع بطريقة حلوة . غيرت ملابسي ونومت
المغرب ابوي جا وامي كلمتو انو انا قولت تقول لعلا المبلغ نصو مني ونصو من ابوي لانو علا شكرتو كتير وكانت مبسوطة من ابوها ومن اخوها انو ما قصرو معاها
ابوي: رفعت رأسي قدام اختك يا ولدي
عمران: انت اصلا رأسك دايما مرفوع وما بنقدر نكفيك حقك ودا اقل حاجة ممكن نقدمها ليك
ابوي: والله انا ربيت راجل بحق وحقيقة . كلامو دا خلاني مبسوط شديد وفخور ......
يتبع........