رواية من انا الفصل السابع 7 بقلم مروة الصافي
فتحت الباب لقيت البت الكانت على طول تحذرني اقيف مع حيدر اتخلعت وهي كمان اتخلعت بي توتر كدا قلت ليهم اتفضلو وانا من جواي برجف عديل خلاص امري اتكشف وحقيقتي بكرة الجامعة كلها حتعرفها وهي تشيل وتعاين لي من فوق لي تحت قالت لي انتي قلت ليها نعم قالت لي بتعملي شنو عند ناس عمي سكت ودخلت جوا وهم دخلو
سلمو على ناس عمو علي وبقو يتونسو انا مشيت جبت ليهم العصير وجيت
ابو البت اللي هو عمو محمد سأل عمو علي مني عمو علي في الاول اتوتر تاني قال ليه قريبة نسيبة من البلد جات تقرأ الجامعة هنا وقاعدة معانا انا ياداب حتى هديت من التوتر خالتو نسيبة قالت لينا انا واريج سوقو ريم (اسم الماتتسمى) وادخلو جوا احسن ليكم من قعدة العجايز
فعلا دخلنا غرفة اريج وقعدنا وانا ساكتة وهي كل ما ارفع راسي القاها تعاين لي وتلولو في خشمها مافضل ليها الا تضربني
اريج قالت لينا امشي اجيب ليكم القهوة واجي طلعت كدا دي استلمتني بي هنا يعني كرهتيني الجامعة وعايزة تكرهيني بيت ناس عمي
قلت ليها يا بت الناس انتي مالك معاي انا عملت ليك شنو انا كافية خيري شري ومحل انتي قاعدة انا بتحاشاه قالت لي انتي فاهمة وكلمتك كتير ابعدي من حيدر قلت ليها عايني هنا زي مابتقولي حيدر دا استاذي وانا طالبتو وهو زي ماشايفة بقيف مع كل الطلبة عادي هل حتحذري كل البنات الفي الجامعة
قالت لي انتي غير كل البنات وانا شايفة نظراتو ليك بس افهمي حاجة وحدة حيدر دا حقي انا ومستعدة اموت فيه قلت ليها عايني انا ماعندي حاجة معاه ولا مع غيرو ولا فاضية للامور دي عشان كدا اطلعي من دماغي
اريج جات داخلة ونحن سكتنا وريم قالت ماشة الحمام وجاية اخدت ليها زي عشرة دقايق وجات تعاين لي وتتبسم بي مكر كدا عملت منها رايحة شربت القهوة ومشيت رجعت العدة خالتو نسيبة قالت لي يلا نعمل الغداء بعد دا
اتغدينا وصراحة انا غلبني الاكل ماعارفة البت دي من جات داخلة وانا حاسة كل الامور جاطت شديد بس ربنا يستر والبت دي بالذات لو عرفت حقيقتي ماحتخلي بني ادم في الجامعة ماحتكلمو وانا صراحة ماهاميني زول الا حيدر
بس عموما البحصل يحصل الحاجة الكاتبها لي ربنا بتحصل وانا راضية بيها اكيد خير في كل الاحوال
قاطعتنا ريم في الكلام قالت لي عمو علي على فكرة انا السنة دي حولت لي الجامعة الفيها حياة وبعرفها لاقيتها كتير
عمو محمد قال ليها وانا استغربت لمن شفتكم بتعاينو لي بعض زي البتتعارفو
قلت ليهم ايوا اتعارفنا في الجامعة هي غمزت لي عينها وضحكت ضحكة استهتار كدا
المهم قعدو شوية وقالو خلاص طالعين وهي طالعة قالت لي كلمة وترتني شديد قالت لي مع السلامة ي حياة ولا اسمك الحقيقي منو قلتي لي وقعد تضحك
ودعونا وطلعو وانا بقيت في ناااااار ياربي هي قصدها شنو بالكلام دا ياربي عرفت حاجة
دخلت جوا وراسي يودي ويجيب مشيت لميت المكان ورتبتو دخلت رقدت كنت تعبانة شديد جيت لقيت حيدر مرسل لي اكتر من رسالة يطمن علي اتصلت ليه و اعتذرت ليه اننا كان معانا ضيوف وياداب طلعو
عارف الضيوف ديل فيهم منو قال لي زول انا بعرفو يعني قلت ليها حق المعرفة قلت ليه رييييييم حسيتو اتوتر كدا قال لي ريم منو قلت ليه البت البتقرأ في جامعتنا لاقيتك معاها كم مرة قال لي اهاااااا وعلاقتكم بيها شنو قلت ليها بت اخت عمو علي الانا قاعدة معاهم
قال لي دقيقة دقيقة عمو علي كيف مافهمت قلت ليه الناس الانا قاعدة معاهم قال لي يعني الراجل البوصلك دا ما ابوك قلت ليه لأ دا زوج خالتي قال لي اها قلت ليه انت مابتعرف عني اي حاجة عشان كدا وقبل كدا وريتك في حاجة لو عرفتها حتقلب موازين كتيرة بس خليها للزمن
عموما البت دي عمو علي ببقى ليها عمها قال لي عايز اقول ليك كلام البت دي متعلقة لي في رقبتي وانا قدر ماحاولت افهمها انها هي زيها زي اي طالب في الجامعة دي ماعايزة تفهم
قلت ليه لو انت ما حسستها بي حاجة ما اظن تتعلق بيك قال لي والله ماحصل في يوم اديتها اي احساس او حتى امل بس هي براها ومن اول يوم جات الجامعة دي باقية لي في حلقي ولو ما انتي قاعدة انا كان استقلت من الجامعة
قلت ليه انا ؟ -انا مالي قال لي انتي وسكت مساااااااافة و قال لي انتي عارفة مالك وعارفة انتي شنو بالنسبة لي
قلت ليه طيب حتتخلص من ريم كيف وهي قافلة عليك كدا
قال لي ان شاء الله بقدر .
بس عندي طلب عايز اطلبو منك ومتردد خايفك تفهميني غلط قلت ليه طلبك شنو اتفضل قال لي ممكن بكرة اعزمك غداء برا قلت ليه طبعا لا
قال لي خير البريحك بس قلت ليه معليش ماتزعل بس انا ماحصل طلعت مع زول غريب ومابقدر اعملها قال لي خير مازعلان اهم شي تكوني مرتاحة
استأذنتو وقفلت ونمت طوالي ماصحيت الا الصباح قمت سريع اتجهزت وطلعت عشان حامشي بالمواصلات عمو علي طلع بدري شديد ركبت الحافلة وقعدت شوية كدا الحافلة وقفت اعاين كدا لقيت حيدر ركب وجاء قعد في المقعد الجنبي سلم علي وقال لي الليلة دا احلى صباح في سري قلت ليه شكلو حيكون اصعب صباح علي خصوصا لو شافتنا الاسمها ريم دي
بقيت ادعي الليلة ما القاها وماتشوفنا وان شاء الله ماتجي لاني صراحة خايفة من الفضيحة الممكن تحصل لي بي سببها
وصلنا الجامعة وبقيت اتلفت قبل انزل الحمدلله ماشايفاها حيدر نزل وانا نزلت بعدو وبقيت امشي براحة عشان هو يدخل براه ومسكت تلفوني نظام بتكلم قلت ليه ادخل انت بخلص تلفوني وبجي ودا كلو عشان اتحاشى ريم ومشاكلها
اخدت زي عشرة دقايق ودخلت الجامعة ومشيت طوالي للقاعة ولا اتلفت جاي ولا جاي عشان ماف زول يشوفني
شوية وحيدر جاء داخل القاعة سلم علينا وبدا المحاضرة صراحة كان هاديء جدا ووصل لينا المعلومة بي طريقة بسيطة
مرة مرة القاه بعاين لي وانا طوالي بركز مع الدفتر حقي بس وبنزل اي كلمة بقولها والشرح حقو خلصت المحاضرة والمرة دي سقت معاي علا عشان ما القى حيدر ويصر اقعد معاه في الكافتريا وفعلا مشينا كدا وهو جاء داخل علينا لقانا طلبنا
برضو ما بخليني في حالي برضو جاء قعد معانا ونظام بسأل فينا من موادو البدينا ليها وطريقة شرحو هل مناسبة ومفهومة ولا يطورها المهم اتونسنا شوية واكلنا .