رواية اللون السابع للحب الفصل السابع عشر 17 والثامن عشر 18 بقلم شذى عبد المكرم
بعد رفضت طلب عمار بأنو اتراجع عن الطلاق ما كان عندي الشجاعة اواجهو بس كمان عاوزه اعرف الحصل معاهو شنو لمن وصل للمرحلة دي اليوم التاني برضو ما كان شغال سألت منو عمتي حنان قالت لي كويس بس نايم يعني قضى اغلب وقتو نايم لمن العصر لقيتو طالع
همس: على وين . مسح وشو بأخر نفس
عمار: انتو بتعاملوني كأني شافع صغير ليه؟
همس: لا بس دايرة اعرف ماشي وين
عمار: داير امشي اصلي العصر في الجامع عندك اعتراض؟ . هزيت ليهو رأسي بمعنى لالا وزحيت من قدامو
عمار: تمام
همس: بنتظرك دايرة اسمع منك
عمار: تسمعي شنو
همس: الحصل كلو
عمار: ما عندي حاجة اقولا
همس: لالا عندك وعندك كتير كمان امشي صلي وتعال منتظراك . ما رد لي وطلع مشى مشيت ختيت كرسيين في شجرة الليمونة لانو دا مكانا الوحيد البنحكي فيهو وفيهو بنحل جميع مشاكلنا ومشيت صليت وانتظرتو جا وقعد وكان ساكت وانا ساكتة سكتنا مسافة خمسة دقايق بعدها هو اتنهدت بصوت عالي واتكلم براهو
__ بعد اتناقشنا في موضوع الطلاق وطلعت كنت زهجان شديد وما شايف قدامي وما عارف ماشي وين وانا بفكر فيكي وفي نفس الوقت زعلان من الحصل فينا وكان في اتنين دايرين يسرقو تلفوني واحد شالو وجرا ومسكت التاني غفلني بطوبة في رأسي واهو دا سبب الجرح ورجعت مسكتو وفضيت فيهو زهجي كلو لمن فكوهو مني بالجلالة وكان في حالة يعلم بيها ربنا واتصلو للشرطة ساقوني وهو طلعو بيهو المستشفى كنت ساكت بس ووصلت للمباحث وحققو معاي وكنت ساكت دخلوني يومين واهل الحرامي فتحو بلاغ وقالو ولدهم ما سرق لانو التلفون جر بيهو التاني ويااهو قعدت يومين وبعدها طلعوني لمن في شهود جو وقالو انو حرامي بالجد وضربت لسفيان جاني وانتي عارفه الباقي
_ وليه تاني جو البيت ساقوك
__ لاني لسع في زمة التحقيق لانو الولد لسه في المستشفى واحتمال تاني ارجع يستوجبوني
_ عمار انت متين كنت كدا
__ ما عارف
_ كدا بتخليني اخاف منك
__ على اساس هسي ما خايفة مني
_ ما خايفة . قام ضحك
__ ما تكذبي على روحك عليك الله
_ ما بكذب
__بطة
_نعم
__ بالجد كرهتيني وما دايراني في حياتك؟
_ مهما عملت في النهاية انت ابوي
__ اممممم عمرك ما حتعتبريني حاجة تانية
_ اعتبرك حاجة تانية شنو
__ ولا حاجه
_ امممم
__ مدام طالبة الطلاق ما بقدر اجبرك على انو تكوني في زمتي واصلا عقدت عليكي بدون رضاكي ما بجبرك تعيشي كل حياتك معاي مصيرك تختاري الانتي دايراهو وانا اصلا اخترت الكنت عاوزاها مسبقا بس للاسف . قلبي ضرب يعني ابوي عندو زولة في حياتو
_ عندك زولة في حياتك؟ . عاين لي مسافة ما جاوب
__ خلي الشهر الابوي ادانا ليهو يتم وقولي ليهو لسع مصرة في قرارك وانا بطلقك . ما ركزت مع كلامو دا كلو
_ ابوي ما جاوبتني عندك زولة في حياتك؟
__ بفرق معاكي؟ . اتلبكت شوية عشان ما ابين
_ ااااا لا يعني كنت دايما اول وحدى بعرف اي تفصيلة في حياتك
__ والاتغير شنو لسع اول وحدة دايما بتعرف
_ بس الموضوع دا ما كنت عارفة عنو . مسح وشو بتعب كدا
__ همس
_ نعم
__ علاقتنا حترجع ذي ما كانت اب وبتو هل بتقدري تسامحي ابوكي على العملو معاكي
_ زعلانة منو وشديد كمان . مسك وشي ومسح محل الجرح براحة
__ ابوكي بعتذر ليكي بتسامحي؟ . عيوني دمعو وانا شايفة النظرة ديك في عيونو هزيت ليهو رأسي بمعنى ايي سلم علي في رأسي وغمض عيونو مسافة
_ الحمدلله
__ بمناسبة الصلح دا اها نعمل شنو
_ نأكل ايسكريم اكيد . فرحت
__ حتوديني محل الايسكريم؟
_ ايي بس بعد المغرب
__ تمام . امي نادتني مشيت ليها وبعد المغرب عمار اتصل لصفا كلمتني لانو تلفوني وتلفون وسام لسع معاهو قومت عملت روج
وسام: قنعانة من روحك صح؟
همس: ممكن تقولي كدا . وطلعت قاصدة عشان اشوف غيرة عمار من جديد وعاوزة اعرف اذا المشكله دي حتقلل من اهتمامو وغيرتو علي خايفة ما يسألني عشان ما يزعلني قومت مشيت ليهو وقفت قدامو
__ نمش؟
_ ما عشان خلاص اتصلحنا يبقى ما حأزعلك مني
__ في شنو
_ امشي امسحي الزفت دا سريع عشان ما اختلف معاكي تاني
__ ابوي انت قولت ما حتزعلني تاني
_ همس اختفي من قدامي قبل ما تشوفي وشي التاني . قومت ضحكت
__معناهو دا عمار والمشكلة ما غيرت فيك . استغرب فيني
_ ما فهمت
__ عملتو قاصدة عشان اشوفك لسع ذي ما انت بتخاف علي
_ انا بعتبرك حتة مني . ابتسمت وبحب ورجعت مسحتو وطلعنا مشينا محل الايسكريم
__ عمار
_ عيونو
__ انت عملت شنو مع الولد داك
_ ولد منو
__ الشاكلتنا بسببو
_ دايرة تعرفي شنو ومالك ومالو
__ سألتك بس يعني عادي احكي لي
_ ما ضروري
__ قول والله يا عمار
_ والله يا همس . حمرت ليهو
_ اكسري عينك دي . واداني معاها نظرة كدا خوفت وكسرت عيني
__ حقار خلاص
_ قولتي شنو؟
__ ولا حاجه
_ احسن . قاعدين كدا بس اشوف فردوس و سفيان داخلين ناديتهم جو علينا
همس: دي شنو الصدفة الحلوة دي
فردوس: صدفة حلوة لكن
سفيان: شنو يا مان الليلة بجاي . عمار ضحك
عمار: المدام قالت يطلعوها وانت عارف شغلة النساويين دي . ضحكنا كلنا على كلامو
سفيان: يعني مجبور ذيي كدا
فردوس: سفيان انت مجبور؟
سفيان: بهظر بس . ضحكنا فيهو
همس: هرشة بأدب
سفيان: انتي عارفة اختك وكلامها الكتير دا
فردوس: والله تتحمل بس . وقعدو معانا وتاني طلبنا ايسكريم عدا الشباب بارد بس واتونسنا وضحكنا واتأخرنا قومنا خلاص
عمار: حتمشو معانا البيت؟
سفيان: لالا مرة تانية الزمن اتأخر لو دخلنا ما حنطلع كنا مخططين ندخل عليكم بس ياهو اتقابلنا والونسة جرت
عمار: بالفعل الونسة جرت
سفيان: خلاص بكرة اصلا الجمعة بنجي عليكم
همس: حتقيلو معانا؟
فردوس: ان شاءلله يارب . وجينا عشان يودعونا لمن جات فردوس عشان تسلم لعمار اختصرها شديد وعمل حاجه في تلفونو ورجع لجوا هي اتحسست شديد ومشو وانا انتظرت عمار طلع
__ مشو؟
_ ايي
__ورح . وبقينا ماشيين
_ عمار
__ نعم
_انت لسع زعلان من فردوس؟
__ بخصوص؟
_ الحادث بتاعي
__ كنت زعلان بس دا مر عليهو زمن طويل وهسي انتي كويسة
_ خلاص ليه لسع بتعاملها ببرود قبيل اتحسست زمن ودعونا
__ والله ما مركز معاها اصلا وقبيل انشغلت بالتلفون ولقيتهم مشو
_ ايوااا الحمدلله
__ بس لو كان حصل ليكي حاجة من الحادث داك ما كنت حأسامحها ابدا . سكتا وبقيت افكر في حنية عمار واني كنت حأضيعو بأنو كنت حأطلق منو بس كمان ما اتغير حاجة هو اختار ليهو وحدة تانية والشهر ينتهي حيطلقني طوالي التفكير دا خرب لي مزاجي بعد ما قضيت يوم حلو ذي دا رجعنا البيت
__ مالك رابطة وشك كدا
_ ماف حاجة
__ في حاجة قبيل كنتي كويسة . وقفت قدامو وعاينت ليهو جوا عيونو لمن اتخلع فيني
_ بسم الله مالك يا بت مسكونة انتي؟ . ضيقت ليهو عيوني
__ البت الاخترتها دي منو . قام فكا الضحكة
_ هسي دا الموضوع المتوترك من قبيل
__ عمار سألتك . قرصني في خدي
_ حتعرفيها يوما ما ان شاءلله . ومشى خلاني بقيت اتفف ودخلت جوا زهجانة....
____________
من جانب فردوس
اصريت على سفيان انو نطلع نأكل ايسكريم عشان نغير جو واخترت المكان الجنب بيتنا عشان بالمرة امر عليهم ونرجع فجأة لقينا عمار وهمس كانت صدفة حلوة وقعدنا وحسيت طول القعدة انو عمار بتفادى انو يتكلم معاي كأنو لسع زعلان مني بسبب حادث همس ومحملني الذنب والأكد لي لمن جينا نودعهم اختصرني وما ودعني ولمن مشينا في الطريق
__ سفيان
_ نعم
__ عمار للان زعلان مني . طوالي دموعي نزلو
_ عملتي شنو انتي
__ بسبب حادث همس . بقيت ابكي
_ ما تبكي مستحيل يكون للان زعلان منك
__ والله زعلان ما شوفتو قبيل
_ ما تبكي يا جنة انا بتكلم معاهو
__ حتتكلم معاهو؟
_ ايي ومتأكد انو انتي فاهمة غلط
__ انا ليه كل الناس بتكرهني كدا
_ منو بكرهك
__ ياهو عمار بكرهني وانت زمان بتكرهني برضو
_ ما عارفة ليهو كنتي مفكرة انو بكرهك
__ لانها واضحة وحتى لمن جيت تتزوجني ابوك الاختارني ليك . قام ضحك
_ ليه شافع صغير لمن ابوي يختاري لي؟
__ يعني انا كنت اختيارك؟
_ اكيد طبعا لانو انا البعيش معاكي ما ابوي
__ وليه اخترني انا؟
_ جنة انتي غبية ولا بتتغابي
__ ليه؟
_ حيكون اخترتك لي اكيد عشان شايفك مناسبة . المفروض اخجل بس ضحكت
__ يبقى انت ما بتشوف . قام ضحك
_ بالجد كنت عميان وطلعتي بلوة
__ بس عليك الله ما بلوة حلوة؟ . قام ضحك ووصلنا بيتنا وانا مبسوطة انو طلعت اختيار سفيان اصلا معناهو بحبني وهو بأهتمامو خلاني احبو غصبا عني بقيت ما بقدر بدونو ........
___________
من جانب سفيان
بعد فردوس كلمتو بخصوص عمار وبكت طمنها بس قرر يتكلم مع عمار عشان يحل سوء التفاهم الحاصل دا اليوم التاني مشو البيت الكبير قبل الصلاة وكان في عقد جارهم حضرو العقد وباركو للعريس ووزعو ليهم حلاوة العقد عمار شال اتنين كالعادة
سفيان: ما خليت عادة انو تشيل لبتك معاك
عمار: انت قولت بتي يبقى الكلام منتهي والله انسي روحي ما بقدر انساها . سفيان كان مستغرب في حب عمار لهمس ولا حتى نص حبو لفردوس ورجعو البيت وقعد معاهو
__ عمار
_ سامع
__ داير اتكلم معاك بخصوص فردوس
_ والله انا ما شايل معاها حاجه حتى همس اتكلمت معاي
__ امس بكت بسببك
_ انا ذنبي شنو اذا مرتك باكية فيني . سفيان قام ضربو بضهر ايدو في صدرو لمن عمار قام يكح
__ حسن الفاظك يا بجم . عمار ضحك
_ كويس
__ تجي تعتذر منها
_ اعتذر ليه عملت شنو لمن اعتذر
__ بكت بسببك . قام ضحك
_ والله كلام عجيب . قام سفيان اتصل فردوس عشان تجي
__ قول ليها تنادي معاها همس
_ تعالي لينا نحنا في الصالون وخلي همس تجي معاكي . وقفل منها
_ اها امورك ماشي كيف مع همس ما قررت تتم عرسك
__ دايرة تطلق مني
_ ليه
__ موضوع طويل يا سفيان
_ حتتخلا عنها بعد حبك دا كلو
__ اعمل شنو اجبرها علي؟
_ ما بتجي بس حاول ما تستسلم
__ انت عارف همس بالنسبة لي شنو حأعافر معاها لاخر نفس معاها
_ عارف والله . وبقو يحكو لمن البنات وصلو
عمار: شنو يا فردوس سفيان قال لي كلام كدا . هي نزلت رأسها بخجل
فردوس: عمار انت لسع زعلان مني؟
عمار: لا والله ونسيت الموضوع اصلا ومعليش لو حسستك بالحاجة دي امس بس جات حاجه في تلفوني انشغلت حتى اسألي همس
همس: اي والله يا جنة
فردوس: امممم يعني قلبي صفا اتجاهي؟
عمار: والله كنت زعلان منك صح بسبب الشبر الجنبك دي
همس: ابوي انا شبر؟
عمار: خلاص بسبب الشبر ونص الجنبك دي . قامو ضحكو
همس: ربنا يسامحك يا ابوي
عمار: وانتي عارفة حالتي كانت كيف ما كنت مركز مع الحولي اصلا
فردوس: عارفة والله
عمار: بس مجرد ما رجع ليها عافيتها قلبي صفا اتجاه اي زول حتى سيد العربية سامحتو لمن انتي؟
فردوس: اممممممم
عمار: هسي لو قولت اقوم اراضيكي سفيان يقوم يقتلني ساي . تاني سفيان ضربو نفس الضربة القبيل تاني كح والبنات ضحكو
عمار: مالك يااااخ
سفيان: كفاية كلمة اعتذار بس
عمار: جنة انتي المزعلاني ولا انا المزعلك
سفيان: انت المزعلها
عمار: خلاص همس راضيها بالنيابة عني . قامو ضحكو وهمس حضنت فردوس
عمار: جنة انتي متحملة الكتلة الجنبي دا كيف؟ . فردوس ضحكت
فردوس: والله الكتلة الجنبك دا انا محظوظة بيهو . سفيان رأسو كبر
همس: ذي ما انا محظوظة بالكتلة البتتكلم دي . قامو ضحكو
عمار: كدا بردتي قلبي يا بطة . قامت ضحكت وعمار جدع ليها الحلاوة
همس: عقد منو كان
عمار: عثمان
همس: ايوااا لكن يا ابوي كنت دايرة نكهة الفراولة . ضحكو فيها
سفيان: لمن فاتحة نفسك بتنظري وبتختاري
عمار: يا زول بتي تنظر على كيفها دقيقة سفيان كدا حلاوتك اي نكهة
سفيان: ما عارف . عمار شالا منو غصب ولقاها فروالة جدعها لهمس
عمار: كدا قصرت ؟ . همس ضحكت
همس: لالا شكرا
فردوس: سفيان وين حقي انا
سفيان: ذي ما شايفة عمار قلعها مني لكن دقيقة . قام قلع حق عمار الرئيسية وجدعها ليها قامو ضحكو وهم مبسوطين
سفيان: جنة اعملي لينا قهوة
فردوس: كويس . وطلعت مع همس
عمار: كدا عندك مشكلة تانية؟
سفيان: لالا لكن لو بكت بسببك تاني بقتلك . عمار ضحك
عمار: والله انا في ناس دايريني شوف ليك شماعة تانية . سفيان ضحك وقعدو يتونسو ويضحكو لمن فردوس جابت ليهم القهوة وشربوها بمزاج........
"دمت عزيزي وعزتي وعزي، دمت لِي كل شيء في آن واحد حبيب قللبي الأول وعيني الثانيه وملجأي بعد الله طاب بك العمر يا سيد الرجال من بعد ابي وطبت لي عمراً مابعد العمر...أحببببببك.♥️♥️
18
السبت كنت في المطبخ بعمل في الغدا وكانت معاي وسام بتساعدني بس طلعت جا داخل عمار
__ بطة
_ عيوني
__ يا الله الكلمة براها بتنسيك الكنت داير تقولو . قومت ضحكت
_ داير شنو خلاص
__ داير قهوة
_ كويس بس اخلص الفي يدي دا
__ اعمليهو وبعدين واصلي لاني مستعجل
_ وراك شنو ما شغال اصلا الليلة
__ منتظر مكالمة وطالع عندي مشوار
_ ايوااا . فكيت الفي يدي وبديت في القهوة
_ عمار
__ نعم
_ خليهو خلاص . كنت دايرة اسألو من البت بس قولت حيقول اني مهتمة شديد واحتمال ماف بت اصلا
__ مالك
_ ولا حاجه . وقعد معاي تلفونو ضرب
عمار: اهلين عفراء
عفراء:........
عمار: تمام جاي عليكي . هنا ناقوس الخطر دق في رأسي
عفراء:......
عمار: لالا خليكي في مكانك بس رسلي لي اللوكيشن ونص ساعة بكون عندك . وقفل الخط وقام طالع
_ عمار
__ نعم
_ القهوة
__ خليها بشربها برا . زعلت معناهو ماشي يشربها معاها
_ عفراء دي منو
__ ما بتعرفيها . حمرت ليهو
_ لو بعرفها بسألك منها؟ . قام ضحك
__ ما ركزت
_ دي البت ذاتها؟
__ اي بت
_ الاخترتها . ابتسم بخباثة كدا
__ بطة انا مستعجل ما ظريفة اخلي عفراء تنتظرني طويل . وطلع وانا دخلت النار وطلعت قلبي وجعني شديد بقيت ابكي وسام لقتني ببكي
وسام: بسم الله مالك
همس: ماف حاجه
وسام: زول ببكي ساي
همس: وسام هل غلطت لمن طلبت الطلاق؟
وسام: ما غلطتي انتي غلطتي شديد والله
همس: ياااخ اعمل شنو انا وعمار ما بننفع نكون زوجين وعمار عندو زولة في حياتو . قامت ضحكت
وسام: والله لو جيبتي لي زولتو قدام عيني وهو ماسك يدها بقول ليكي مستحيل
همس: ليه مستحيل
وسام: هي واضحة بس انتي عميانة
همس: هو قالها لي
وسام: يبقى بهظر بس . هي ما عارفة حاجة ومفكرة انو بتهيأ لي ساي فخليتها بس وكنت منتظرة عمار بفارق الصبر متين يرجع عشان اسألو بس اتأخر شديد وبقيت ادخل واطلع بس اشوفو لو رجع لمن اخر مرة طلعت الحوش كدا شوفتو داخل في حوش بيتهم ناديتو كان داخل وهو مبسوط وبلعب بمفتاح في يدو ما ركزت معاهو
__ خلصت مواضيعك
_ قربت باقي لي حاجة وحدة بس
__ هي شنو هي . كان مبسوط شديد
_ بتعرفي قريب ان شاءلله
__ شربت القهوة؟
_ ايي شربتها
__ مع عفراء؟ . عاين لي بأستغراب كدا
_ عرفتي كيف . شكلو نسى انو كلمني قبيل أنو ماشي يقابلها عاينت ليهو بزعل كدا
__ وانا عملتها وكنت منتظراك نشربها سوا بس ما مشكله .
_ ما كنت عارف . عاينت ليهو بزعل ومشيت خليتو وانا زعلانة يداب بقى لي حار لمن بقى عندو زولة في حياتو مستحيل اقبل انو وحدة تشاركني في عمار لانو هز حقي انا بس هسي شاركتني وحدة تانية........
___________
من جانب فردوس
مرت علي فترة بقيت طول الوقت زهجانة ومابية الاكل وسفيان لاحظ لي
_ جنة مالك ما دايرة تأكلي
__ ما نفسي والله
_ كيف ما نفسك اكلتي حاجة من الصباح؟
__ لالا
_ تعالي اكلي ان شاءلله لقمتين
__ والله يا سفيان ما نفسي
_ خلاص نفسك في شنو
__ ولا حاجه دايرة انوم بس . ومشيت خليتو محتار فيني نومت نومة طويلة الا هو صحاني
_ قومي صلي واكلي ليكي حاجه . رأسي لفاني بس ثبتا ومشيت صليت من التعب جيت رقدت تاني
_ قوم اكلي
__ ما دايرة
_ جنة خلي الدلع
__ ما بتدلع بس ما دايرة والله حاسه لو اكلت حارجع لانو بطني طامة
_ اوديكي المستشفى
__ لالا ما بحتاج
عدا يومين تاني برضو مابية الاكل وسفيان خايف علي شديد بقيت بشرب عصاير بس وحتى لو شربت بكون ربع الكباية بس وبرجع كتير تعبت مبالغة وحالفة ما امشي الدكتور
_ جنة بس قولي لي انتي دايرة شنو وانا بجيبو ليكي
__ دايرة امي بس . وبقيت ابكي
_ لو وديتك ليها حتأكلي
__ ان شاءلله . قومني بتعب ولبست عبايتي وطلعنا امي اتخلعت في وشكلي
امي: مالك يا بتي مالا مرتك يا سفيان
سفيان: ما عارف مابية الاكل ليها اربعة يوم ما اكلت لقمة ساي
امي: مالك
فردوس: ماف حاجه
امي: مشيتو الدكتور؟
سفيان: ابت نهائي
امي: ما بتجي والله هسي من دربنا دا نمش
سفيان: اتكلمي معاها عليك الله
فردوس: ما ماشة انا
امي: ماف حاجه اسمها ما ماشة شوفي حالتك بقت كيف عليك الله دايرة تموتي لو ما هاميكي روحك همي للمسكين دا عايني خايف عليكي كيف . عاينت ليهو وقررت امشي عشانو بس
فردوس: تمام نمش . سفيان كأنو ما صدق زمان ما داير يرغمني على حاجه انا ما دايراها امي لبست ومشينا المستشفى وعملت الفحوصات بس كنت منتظرة النتيجة
سفيان: حتكوني كويسة؟
فردوس: حأكون كويسة انا ما عيانة
سفيان: جنة انتي روحك طالعة ليه دايرة تخوفيني عليكي
فردوس: ما تخاف علي
سفيان: خلاص ليه ما بتأكلي
فردوس: والله ما نفسي بس وانت شايف انو لو اكلت برجع
سفيان: ان شاءلله النتائج تطلع سليمة . كان خايف علي وانا خايفة اكتر بس بحاول اطمنو كأنو هو المريض ما انا لمن النتائج طلعت ودخلنا الدكتور وادينا النتيجة
الدكتور: حاسة شنو
سفيان: ما بتأكل نهائي وبترجع كتير
الدكتور: في النتيجة دا ظهر الحاجة العندها المريضة
سفيان: عندها شنو يا دكتور
الدكتور : عندها.........
_____________
من جانب همس
بعد نص ساعه كدا اتصل لي في تلفوني عمار
_ تعالي شجرة الليمونة وجيبي معاكي القهوة
__ انت شربت خلاص ماف داعي
_بشربها تاني المشكله وين انتي تعالي بس . وقفل الخط عشان ما اعترض سخنت القهوة ومشيت ليهو وقعدنا
_ والله ما كنت عارف انو منتظراني
__ لالا عادي
_ ما زعلتي صح؟
__ ما بقدر ازعل منك طويل
_ حبيبي انا . تلفونو اتصل كانت عفراء
عمار: خلاص تمام لمن بكرة نتلاقى في نفس المكان
عفراء:.......
عمار: تمام . وقفل منها
_ قهوتك حلوة
__ شكرا دايرة اسألك
_ اسألي
__ انت ليه بتتهرب مني
_ متين اتهربت
__ لمن اسألك دايما بتتهرب مني قبيل سألتك من عفراء اذا هل البت ولالا اتهربت
_ بفرق معاك في شنو؟
__ ما بتفرق بس دا تقليل من حقي كونو انت متزوج وبتدخل وتطلع مع بت تانية دي يعتبر خيانة
_ قبضتيني معاها في موقف؟
__ لالا بس ياهو شايفة وسامعة
_ ومن دا فسرتي على كيفك صح؟ تاني حاجة بعيدا عن دا كلو انتي معتبراني زوجك؟
_ عمار ما تحور الموضوع
__ ما بحور براكي طالبة الطلاق ونهاية الشهر خلاص حنطلق يبقى ما عندك حق في البعملو ما بتحاسبيني عليهو
_ بحاسبك عليهو موش للان مرتك تحترمني
__ هو انا ممكن اتزوج من فوق عليكي موش محلل لي اربعة بس عشان محترمك بنتظر لحدي ما نطلق . انصدمت في كلامو بقيت اعاين ليهو بصدمة
_ محترمني عشان كدا ما داير تتزوج هسي؟ . سكت ما رد لي
_ يعني انا عائق في طريقك؟
__ ما عائق بس كدا كدا حنطلق فأي زول حيشوف حياتو صح ولالا
_ما عارفة هسي دا ارمي لي الطلاق ثانية ما بقعد على زمتك
__ ما تقولي كلام انتي ما قدرو
_ ليه ما قدرو
__ انتي هسي مشكلتك كلها عفراء؟
_ بلا عفراء بلا زفت طلقني هسي
__ حسني الفاظك . قومت ضحكت
_ عشان نبزتها ليك اسفين يا باشمهندس . مسح وشو بتعب ومسك وشي بكفوف ايدو وعمل حركة الزول المعصب ديك
__ همس اقتلك ولا اعمل ليكي شنو والله ماف زول متعبني في حياتي ذيك كدا ارحميني عليك الله . فكاني بقيت اعاين ليهو فجأة بقيت ابكي
__ يا الله مالك بتبكي هسي كمان
_ ما تتكلم معاي
__ ما اتكلم كيف انتي ما بعجبك العجب ما دايرني في حياتك كزوج وما دايراني اتزوج هسي دي بتجي
_ ايي بتجي
__ ليه ما دايراني اتزوج
_ كدا ما حتهتم بي تاني وحيكون اهتمامك كلو لمرتك وحتنساني
__ في زول بنسى بتو
_ دا كلام ساي بس
__ انا بتكلم ساي؟
_ لالا بس خلاص ما تجيب لي عفراء دي
قام ضحك
__ انا كمان غير عفراء ما داير
_ خليها تنفعك وانا بقيت بكرهك وبكرة بكلمك عمو محمد يطلقنا . ومشيت خليتو وبقيت ابكي بس والبنات يحنسو فيني وانا اعزي وقلبي واجعني وحارقاني من عفراء دي وغيرانة منها شديد
اليوم التاني مشيت لعمي محمد بعد العشا وقبل ما امشي اتصلت لعمار قولت ليهو انا عند ابوهو يجي يلا بقيت اتكلم معاهو لمن عمار جا وقعد وهو زعلان كدا
همس: عمي محمد
محمد: ايي يا بتي
همس: دايرة اتكلم معاك في موضوع
محمد: طوالي . سكتا فترة كدا وقولت انفذ خطتي
همس: داير امشي لعمو صابر يومين كدا
محمد: جدا كلمتي ابوكي؟ . قاصد عمار عاينت لعمار
همس: لالا هسي كنت دايرة اكلمو
محمد: تمام
همس: عمار بسألك انت عفراء دي منو الامس مشيت ليها . عارفة روحي اتهورت شديد بحركتي دي قدام ابوهو وممكن عمار ما يسامحني عليها بس الزول في حالة الزعل والغيرة بقول اي حاجة
محمد: عفراء دي منو يا عمار . وهنا حصلت لحظة صمت .......