رواية قلبان علي حافتي الحلم الفصل السادس 6 بقلم شذى عبد المكرم
عمران بقى يتجاهل مكالماتي ورسائلي والموضوع كان مضايقني شديد لانو كل ما زاد المدة زادت الفجوة بيناتنا قررت انا اواجهو مدام هو ما عاوز يواجه ولقيتها فرصة لمن الطلبية الطلبتها لعلا وصلت وقررنا الجمعة انا وامي وصوفيا حنمش ليهم لانو عرس علا خلاص على الأبواب والفعل يوم الجمعة اتجهزنا وامي من الصباح بدري عملت حلا وشوية معجنات بمساعدة الحبشية وفي الشارع شيلنا فواكه ومشينا واستقبلونا حلو شديد واديت علا الامانة وكانت فرحانة بيها شديد وشكرتني تاني
ولمن جا زمن الصلاة فجأة ظهر عمران وهو طالع على الصلاة قال
عمران: السلام عليكم
كلنا: وعليكم السلام
عمران: كيف بصحتك عمتو
امي: والله الحمدلله . وسلم عليها حلو وسألها من احوالها بس انا حتى في وشي ما عاين وطلع الجامع قولت ما مشكلة خير يا عمران
علا: شيذو لو ما فيها تعب ممكن تعملي لي الماسك عشان اعرف طريقتو
شاهيناز: جدا حبيبي جيبي الشور كاب حقك وتعالي . جاتني وقعدت لي وعملتو ليها ولمن خلصنا مشيت اغسل يدي في المغسلة كانت جنب الباب جا عمران داخل من الصلاة وكالعادة اتجاهلني قولت تمام رجعت جوا عاينت للبنات مسافة
شاهيناز: عرفات تعالي . جاتني
عرفات: نعم
شاهيناز: ورح نادي لي عمران من غرفتو . استغربت فيني بس ما سألتني ومشينا معاها اتجاه غرفتو كانت لورا كدا دخلت وجات طالعة
عرفات: قال جاي . ومشت خلتني وانا بتنفس براحو في محاولة تهدئة نفسي عشان اتماسك وما اجوط من البداية هو جا طالع وقف في باب غرفتو ما فتح خشمو استفزاني بحركتو دي
__ نفسي افهم مشكلتك شنو انت؟ . عاين لي برود وهو بحك في اللحية حقتو ببرود
_ ما عندي اي مشكلة
__ لا بتتجاهلني معاك تعال واجهني
_ اواجهك في شنو؟ . وكان بعمل نفس الحركة المستفزة ديك غمضت عيوني شديد
__ عمران الله كم؟
_ الله واحد
__ حصل بينا سوء تفاهم موش المفروض نحنا كناس كبار نقعد ونحلها؟
_ ماف حاجة بتتحلا انتي قولت لي ما تنسى نفسك وانا ما بحاول ما انسى نفسي اني ما من مستواكي . عاينت ليهو مسافة
__ يعني دا الفهمتو من كلامي؟
_ كلامك كان واضح . انفجرت فيهو وقولت الكلام كلو مرة وحدة
__ ما واضح يا عمران وانا كنت زعلانة منك لانك صرخت فيني قدام صحباتي وما احترمتني نهائي لو كان اتكلمت معاي بأسلوب حلو كان اتفاهمنا بس لا وحاليا بتفسر كلامي بطريقتك الانت عاوز تفهمها وشكلك عاوز تفهمو كدا ويعني خلاص من اول مشكلة حتنسحب كدا؟
_ ما كنت عاوز انسحب بس انتي خليتيني اعيد حساباتي من اول وجديد
__ والله ماف اي حسابات انت براك عاوز تنسحب ودا اسلوب حقير ما بمثلك
_ انتي هسي عاوزة شنو؟ . هنا خلاص حسيت كرامتي اتهزت بالجد
__ انت مدام خلاص عاوز تنسحب كدا كان تحظرني عشان اعرف موقعي من الأول . ما رد لي دموعي كانت في طرف عيني لانو زعلني شديد
__ والله واضح انك ما عاوزني في حياتك ولو على الحظر عاين . فتحت تلفوني وحظرتو مكالمات وواتس قدام عيونو
__ وكدا خلاص اتخلصت من حاجة اسمها شاهيناز في حياتك اتهنى . عاينت ليهو قوي في عيونو ومشيت خليتو ودخلت جوا وانا زهجانة
شاهيناز: امي انا راجعة البيت
امي: مالك
شاهيناز: ماف حاجة راجعة بس
عرفات: والله ما حترجعي عملت القهوة والليلة لو ما خلصتو اليوم ماف طلوع . وجرتني غرفة البنات ودخلنا كانت راصة حاجات القهوة في ارضية الغرفة بطريقة حلوة مشيت قعدت جنب الفشار وبقيت اكل بزعل شديد عاينو لي كلهم بأستغراب فجأة عرفات اتكلمت وهي بتقعد جنبي
عرفات: اتشاكلتي مع عمران؟
صوفيا: والله انتي وعمران مشاكلكم ما بتنتهي . مع كلامها دا جاتني علا فجأة قعدت جنبي بالجهة التانية
علا: متواصلة مع اخوي عمران؟
شاهيناز: اريتني ما متواصلة يااخ . ضربت ارضية الغرفة وكنت مليانة ملي وصوفيا بقت تضحك شديد
علا: احكي لينا يعني مرتبطين؟ . قلبت ليها عيوني بملل
شاهيناز: والله لو ارتبطنا بموت حسرة وغيظ بس . قامو ضحكو
عرفات: ما بتوقع اخوي دا ممكن يرتبط
علا: عمران ويرتبط شايفة خيالي خيالي كدا
شاهيناز: اصلا خيالي وشو الواحد دا . قامو ضحكو تاني
علا: شكلك زعلانة جد جد منو لكن بالجد عليك الله متواصلين؟
شاهيناز: كنا اصحاب وعلاقتنا حلوة لمن حصلت مشكلة صغيرة بينا واخوكم احمق عامل فيها زعلان وما برد علي وهسي واجهتو قاعد يتماسخ حظرتو قدام عيونو . وقعو من الضحك وعرفات لمن ميلت فيني وهي بتتضحك
عرفات: عمران وشاهيناز اتلميتو كيف عليك الله . قومت ضحكت
شاهيناز: والله انا ذاتي ما عارفة فجأة لقينا نفسنا متواصلين بس يا فرحة ما تمت هسي كدا اديني قهوة مرة من دون سكر براهو اخوكم ممسخ لي حياتي . هم يضحكو بس على حالتي
علا: كدا احكي لينا بتتعاملي مع اخوي دا كيف وهل بيعرف يتونس ذي الخلق والناس صح بتكلم معانا بس دايرة اعرف بعرف يتوصل مع بنات حواء؟ . عاينت ليها بملل وغيظ كدا
شاهيناز: اخوكي دا يا علا كتلة كدا من الاستفزاز وكنت متحملة عشان العشرة البينا بس خلاص . قامت ضحكت
علا: لا عليك الله
شاهيناز: والله الصراحة عمران رغم استفزازو دا حنين
عرفات: حنين شديد والله
شاهيناز: صح بس صعب ياااخ
علا: مبالغة ونحنا بنعمل الف حساب قبل ما نتخذ اي قرار
شاهيناز: حتى انا كنت بعمل ألف حساب وكنت مبسوطة بس خلاص كلو انتهى
علا: بترجعو تاني ان شاءلله
عرفات: اتخيلو شاهيناز تكون مرت اخوي . قلبت ليها عيوني
شاهيناز: اسبوع بس برجعني بيتنا . كلهم ضحكو
عرفات: استغفرالله بس حاسة كدا حيحصل لو اتزوجو . ضحكنا كلنا وشربنا القهوة وقيلنا معاهم ورجعنا وطول اليوم ما اتطاشقت مع عمران نهائي
عرفت خلاص انو ماف امل من عمران نهائي وشكلو خلاص لقى طريقة يتخلص بيها مني وجا الحظر مني انا . علا زعلت انو تاني ما جيتها من اليوم داك بس وعدتها انو يوم حنتها بمش معاها الكوفير وبالفعل مشينا كلنا انا وعلا وصوفيا وعرفات ووزيرة العروس وصحبتها واتجهزنا ورسمنا بس ما كنت مبسوطة شديد بسبب اخوها دا بس ما حبيت ابين ولبست طرحة مع انو في البداية كنت مقررة اركب اكستنشن مع صوفيا بس طرحتي كانت في نص رأسي وعرفات محجبة كانت والعروس ووزريرها فاكيين شعرهم ذي صوفيا وجا عمران ساق العروس وصحبتها ووزريرتها بعربيتو وانا وصوفيا وعرفات بعربيتي واصلا لمن جا يسوقها انا ابيت اظهر لمن اتحركو وبعدها نحنا اتحركنا والحفلة كانت رابة عمران دخل اختو وطلع بس وين ما عارفة للان ما شافني وجيت للعروس ورقصنا في الاول ما عاوزة ارقص بس بعدها حتيناهو مع عرفات وصحبات العروس وكنت برقص كأني بفرغ الطاقة السلبية كلها ولمن جا الفاصل إسراء صحبتي تبع الصيدلية جات مشيت عليها ووقفت معاها بنتفرج فاصل كامل وبنتكلم شايفة عمران ظهر فجأة بهيئتو السودانية ولابس العمة وعاين لي اتوترت شوية بس عملت رايحة فجأة شايفاهو جا اتجاهي مباشرة وقف معانا سلم على اسراء بس ووقف جنبي وميل شوية علي وقال لي
عمران: طرحتك دي يستحسن تثبتيها لانها عاملة لي حساسية من قبيل ورقيصك القبيل الذي ضاربك كهربة دا لو شوفتك تاني بترقصيهو بكسر رجلك وهسي حترفعي الحظر من المكالمات والواتس عشان يومك يعدي على خير . ومشى خلاني كنت مصدومة رمى كلامو ومشى
اسراء: مالو؟ . يداب استوعبت وابتسمت
شاهيناز: ماف حاجة . بقيت اتذكر في كلامو يعني كدا بادر؟ اصلا ما متوقعة منو اكتر من كدا وانا مبسوطة انو قرر يآخد خطوة في اتجاه الصلح كنت ببتسم بس
اسراء: انتي وعمران في علاقة؟ . في سري قولت يا ريت بس التفت ليها وفي وشي ابتسامة
شاهيناز: لالا . ما حبيت افسر اكتر وبعدها جات جرتني عرفات للساحة بقيت افتش بعيوني على عمران لقيتو مركز معاي عرفت لو رقصت ذي قبيل ما حيحصل خير ابدا اتكفيت ببعض الحركات الخفيفة وفجأة عمران دخل الساحة مع باقي الشباب وكان بيرقص مع اختو والجو كان حلو ويداب حسيت بطقم الحفلة بعد حركة عمران قبيل وخلصنا على كدا رجعت البيت ما فكيت الحظر قاصدة كنت واليوم التاني كنت شغالة في الصيدلية عشان اتفرغ اليوم البعدو للعرس وتفاصيلو الاخرى فجأة حوالي الساعة 10.30 اشوف عمران داخل الصيدلية الصراحة اتفاجأت حركة ما اتوقعتها ابدا وقف ذي الزول العاوز يشتري ادوية من الصيدلاني
عمران: ممكن براسيتيمول؟ . أبتسمت بأستفزاز كدا
شاهيناز: ما بصرفها من غير اروشتة
عمران: خلاص ميترانيدازول
شاهيناز: يا أستاذ ماف دواء هنا من غير اروشتة . التفت على اسراء
عمران: يا دكتورة البراسيتيمول ضروري بأروشتة؟ . قامت ضحكت
اسراء: لالا بتتصرف عادي
عمران: يبقى الصيدلاينة دي حكاها معاي بس . قامت ضحكت تاني وانا كاتمة الضحكة عشان ما اخرب الزعلة
عمران: خلاص خلي البراسيتيمول داير استلفتها هي ذاتها ساعة ونص وبرجعها ممكن تسلفيني ليها؟
اسراء: والله على حسب
عمران: اها
اسراء: ولا اقول ليك شيلها بس ساعة ونص ترجعها
عمران: ساعة ونص ممكن تناوليني شنطتها؟ . اسراء عاينت لي مسافة واتحركت وانا متابعة الحدث وعاجبني الحاصل بس ساكتة اسراء جابت الشنطة وناولتو ليهو
عمران: خلينا نمش؟
شاهيناز: معاي انا؟
عمران: لالا مع الجنبك .
شاهيناز: ها ها ها ظريف
عمران: عارف خلينا نستغل الوقت يا دكتورة . اتنهدت بملل وانا من جوا طايرة من الفرحة وطلعت معاهو وركبت العربية
شاهيناز: على وين
عمران: على بوش بونت مع اني مشغول شديد بس عشان عيونك الشينات ديل . هنا ضحكت
شاهيناز: انت لاقي؟
عمران: لاقي لاقي . واتحركنا
شاهيناز: هسي وديني بوش بونت ليه
عمران: ناس المكان أشتاقو ليكي قولت اوديكي تسلمي عليهم . وعاين لي بغيظ
شاهيناز: مستفز الصراحة انت
عمران: اسئلتك غبية الصراحة انتي . عاينت ليهو بغيظ
شاهيناز: لو قال عشان تصالحني ارتاح راحة انا قطعت حبل الوصال معاك خلاص
عمران: صحن بوش بترضي . وغمز لي هنا ضحكت شديد وضربتو في كتفو لاني ما اتوقعت ابدا
شاهيناز: غبي واهبل
عمران: شايفك ارتحتي لي شديد لمن بتنبزي على راحتك . رفعت كتفي بأفتراء
شاهيناز: بحقي . قام ضحك
عمران: اصلا حقك
شاهيناز: شنو؟؟
عمران: ولا اي حاجة . وصلنا المكان وكالعادة في طاولتنا المعتادة ما حصل غيرناها جا الويتر
الويتر: نوروتونا ليكم زمن
عمران: مشغوليات الدنيا بس حنثبت يوم في الأسبوع حنزوركم دايما فيها ان شاءلله
الويتر: ان شاءلله حنكون سعيدكم بيكم
عمران: نحنا اسعد
الويتر: نفس طلب كل مرة صح؟
عمران: ايي بس ممكن لمن تجهز تناديني
الويتر: جدا . ومشى كنت متفاجئة بكلامو
شاهيناز: حنثبت يوم في الأسبوع؟
عمران: عندك مشكلة؟
شاهيناز: عمران انت ما بتقدر تتكلم عديل؟ . قام ضحك
عمران: يا دكتورة رأيك شنو نثبت يوم في الأسبوع نجي فيهو هنا عشان نطرد الطاقات السلبية . غطيت وشي بأيادي
شاهيناز: ممكن . هنا ضحك
عمران: تمام . فتحت وشي
شاهيناز: لو ملاحظ انك لسع ما اعتذرت لي
عمران: ولو ملاحظة انك لسع ما فكيتي الحظر
شاهيناز: انسى
عمران: نسينا يا ستي . الويتر ناداهو ومشى ودخلو المطبخ خمسة دقايق وجا شايل الطلب هو بنفسو وختاهو في الطاولة كان مكتوب فيهو sorry بالكاتشب دي كانت أحلى حاجة حصلت لي رغم بساطتها بحب التفاصيل دي جدا حسيت نفسي حأبكي ما اتوقعتها منو ابدا عاينت لي بأبتسامة مليانة حب
عمران: بعتذر على اني زعلتك مني بس ما بعتذر على انو شاكلتك على لبسك لانو لو لقيتك مرة تانية لابساهو ما حأسكت ابدا وحأعاقبك عديل وما بهمني صحباتك موجودات ولالا لانو بهمني منظرك انتي بس قدام الناس
شاهيناز: وانا رضيانة بالعقاب وبعتذر على الكلام القولتو ليك صافية لبن؟
عمران: قشطة . واتصالحنا
شاهيناز: دقيقة اصورها لاني مستحيل افوت تفصيلة ذي دي . ضحك وطلعت تلفوني وصورتو وبعدها اكلنا ورجعني الصيدلية وكان اجمل يوم في حياتي طوالي دخلت الواتس رفعت الحظر عنو ورفعت الصورة في الاستوري وكتبت عليها
هناك دائمًا تفاصيل جميلة تطوّقنا❤️
يتبع..........