رواية قلبان علي حافتي الحلم الفصل السابع 7 بقلم شذى عبد المكرم
اخيرا رجعت المياه إلى مجاريها وعلاقتي بعمران رجعت أحسن من الاول وكان مضغوط مع عرس علا شديد وانا بتصل عليهو دايما عشان اخفف عنو لحدي قبل يوم الزفة بالليل بنتكلم مكالمة
__ شاهيناز بسألك
_ اها
__ بكرة لو اتحجبتي الله حيعاقبك؟ . عارفة انو متحسس من حتة اني ما محجبة وانا اصلا مسبقا كنت مفكرة بكرة اتحجب عشان ما تحصل بينا اي مشكلة ما صدقت انو اتصالحنا
_ ما حيعاقبني
__ اها كيف وكيف
_ انو اتحجب بكرة؟
__ ايي
_ حتديني شنو
__ حاجة حلوة حتعجبك
_ خليك قدر كلامك
__ الله
_ يلا اصلا انا كنت مقررة بكرة اتحجب وانت وعدتني انو حتجيب لي حاجة حلوة اوع ترجع في كلامك
__ خسيسة عارفة الحاجة دي . ضحكت شديد
_ تعليمك . قام ضحك
__ ليه قررتي تحجبتي؟
_ عشان اتفادى المشاكل معاك
__ يعني عارفة انو حتحصل مشكلة
_ ما عارفة بس متأكدة انا
__ متأكد الحجاب حيكون فيكي حلو
_ عارفة طبعا
__ ربنا يزيد من التواضع . قومت ضحكت
_ اللهم آمين يا رب
اليوم التاني كان العرس وكنا في الكوفير جا العريس استلم عروسته جاني عمران
__ كنت متأكد انو حتكوني احلى بالحجاب . ابتسمت ليهو بحب
_شكرا
__ جيتي بعربيتك؟
_ ايي
__ يعني للاسف ما حتمشي معاي
_ لو بتلقى لي واحد من اصحابك يسوق العربية حأمشي معاك . قريت الفرحة في عيونو
__ ما طلبتي حاجة . جدعت ليهو المفتاح مسكو وطلع وجاني راجع
__ نمشي؟
_ وباقي البنات؟
__ معاكي منو
_ صوفي وعرفات
__ شوفيهم . دخلت ما لقيتهم
_ ماف زول جوا . تلفوني اتصل لقيتها صوفيا
صوفيا: شاهيناز وينك انتي نحنا في عربيتك معانا صاحب عمران
شاهيناز: معاكي عرفات؟
صوفيا: ايي
شاهيناز: خلاص امشو انا بجي مع عمران
صوفيا: تمام . قفلت منها
شاهيناز: عمران صوفي وعرفات في عربيتي مع صحبك
عمران: حلو يعني فاضل انا وانتي بس
شاهيناز: شكلو كدا
عمران: نمشي؟
شاهيناز: تمام . مسكت فستاني لانو طويل وبقيت ماشة براحة براحة فتح لي الباب القدام ركبت
وصلنا الصالة اخر ناس والحفلة كانت رابة ودخلنا مع بعض ودخلنا الساحة طوالي واتجهت على ناس صوفيا وهي ميلت لي
صوفيا: دخولكم كان حلو شديد جايين مع بعض
شاهيناز: الله ما ضراكي حبيبي
والحفلة اشتغلت وكل حاجة تمام بس في فاصل كنت واقفة برقص ما كان جنبي زول من البنات بس فجأة حسيت بحاجة بتمشي في خصري اتخلعت إلتفت ما عرفت الحصل شنو رجعت ارقص تاني حسيت بحاجة في خصري والمرة دي ضغط علي شديد حسيت جسمي برد ما قدرت اتحرك من الخلعة وشكلو الزول الخاتي ايدهو في خصري لمن لقاني ما أبديت اي ردة فعل ما نزل ايدو عاينت بعيوني فجأة عيني وقعت على عمران وهو شاف وشي اللي اتخطف لونه وحس ّ بي وكان جاي علي وانا بصعوبة حركت ايدي نزلت اليد الفي خصري وشوفت الشخصية وكان ببتسم لي بخباثة حسيت جاني هبوط اول مرة في حياتي اتعرض لتحرش كدا عمران وصلني
عمران: مالك؟
أشرّت على الود كان عاوز يجري بس نسبةً لانه الساحة مليانة ناس فجأة عمران مسكو من ايدو وجراهو وقفو وعاين لي
عمران: عمل ليكي شنو؟ . كنت برجف وانا بتكلم
شاهيناز: كان كان خاتي ايدو في خصري . وفجأة دموعي نزلت حسيت عمران عروقو بانت ضغط على يد الود شديد لمن وشه حمرّ من الالم
عمران: دي يدك اللي ختيتها فيها مش؟ وكان عاوز يتشاكل معاهو فجأة اتذكرت عرس علا مسكت عمران من ايدو
شاهيناز: عمران خلاص خليهو عشان ما تحصل مشكلة . أثناء ما انا بتكلم الود نفض ايدو من عمران وانسحب
عمران: خليكي هنا . وقام لحق الود براحة طوالي مسكت فستاني وتبعتو طلعنا برا الصالة لقيت عمران ماسك الود وبضرب فيهو بشدة
عمران: بتتحرش بيها يا وسخ كيف تهبشها ، وبضرب فيهو جيت سريع مسكت عمران
شاهيناز: عمران حتقتلو . هو ما كان شايف قدامو قام نفضني ومع الهاي هيلز فقدت توازني ووقعت بس ارتكزت على ايدي حسيتها اتكسرت قومت صرخت شديد هو اتخلع فكا الولد وجا نزل لعندي والولد جرا بقيت ماسكة ايدي
عمران: انتي كويسة؟
شاهيناز: عمران ايدي اتكسرت . وبقيت ابكي بصوت هو اتخلع ومسك ايدي
عمران: كدي حركي اصابعك . هزيت رأسي بلالا
عمران: حاولي بس . حاولت حركتو شوية
عمران: ما اتكسرت بس شكلها اتفصلت تعالي . قومني براحة رجلي ذاتها كانت بتوجعني لانو وقعت بالهاي هيلز بقيت ما قادرة اقيف من الالم
عمران: كدي ثبّتي فيني . ثبتا فيهو نزل فكا لي الكعب
عمران: لابسة ليكي حاجة اطول منك . ما رديت شالو في ايدو وبقينا ماشيين وانا بعرج ومشينا ركبنا عربيتو وانا ببكي بس من الوجع بقى لي اتنين ايدي ورجلي
عمران: ما قاصد انو ارميكي لاني ما كنت شايف قدامي
شاهيناز: انت لمن تعصب بتتعمي وكدا حتأذي كل الحوليك
عمران: وهسي اذيتك . حسيت بالندم في كلامه
شاهيناز: ما تزعل نفسك انا كويسة
عمران: كويسة شنو وانتي لا ايدك سليمة ولا رجلك . سكتا لمن وصلنا اقرب مستشفى قالو لي اتفصلت بس لانو ارتكزت عليها والجسم بقى ليه تقيل الدكتور بقى يجرّها وانا بصرخ لانو الألم شديد وعمران ما عارف يتصرف فجأة جا قعد جنبي
عمران: دكتور براحة
الدكتور: كدا حتورم ولازم ترجع لطبيعتها . رجع يجرّ فيها مسكت بشدة في بنطلون عمران من الالم لانو كان قاعد جنبي لمن خلصنا حسيت روحي رجعت لي
لفوها لي بس وماف اي ادوية ما بتحتاج ومسكني رجعنا العربية رجعت رأسي لورا من التعب وغمضت عيوني
__ انتي كويسة؟
_ نهائي . ما عرف يقول لي شنو لانو هو السبب بس كمان كان بحاول يآخد لي حقي وحصل الحصل لاني اتدخلت بس كمان لو ما اتدخلت عادي يموت الولد في ايدو اتحركنا بعد فترة
_ عمران هسي ارجع الحفلة كيف والهاي هيلز ما بقدر البسو تاني
__ ما شايفة حالتك دي ترجعي كيف
_ ما ودعت علا ما بقدر والجرتق كمان حتزعل
__ حأفهمها الحاصل
_ لالا حأمشي
__ شاهيناز ما تكوني عنيدة
_ لالا حأمشي . سكت خلاني بقيت اعاين في الشباك لقيت مكان زي المول مصغر
__ عمران دقيقة وقف . وقف العربية
_ في شنو
__ والله مضطر تنزل تشتري لي شبشب زاحف من هنا امشي بيهو الحفلة
_ يعني مصرة . هزيت ليهو رأسي بأيي
__ يكون مقاس 37 . ما رد لي ونزل وانا أعاين للمرايا وشي كان في عالم تاني شيلت مناديل من العربية وصلحت ما يمكن تصليحه وبقى شبه مقبول جا بعد خمس دقايق مدّ لي الكيس كان شبشب كيوت كدا ينفع لطلعة
_ شكرا
__ عفوا . في الطريق اتصلت صوفيا لعمران قالو انا مفقودة عمران طمنها اني معاهو وجايين وقفل وصلنا الصالة
عمران: شاهيناز خليني اوديكي البيت حتتعبي كدا
شاهيناز: انا كويسة ما تقلق و لمن ندخل انا بتكلم انت اوع تفتح خشمك . سكت ونزل وجا نزلني مسكت فيهو كنت بعرج شوية دخلنا فجأة البنات قامو جاريين علي ودا خلى الكل ينتبه معانا
صوفيا: شاهيناز مالك والحصل شنو . قبل ما ارد لقيت الاسرة كلها متلمية فيني
ابوي: شيزو الحاصل شنو وكيف حصل معاكي كدا
شاهيناز: كدي اقعدوا وبحكي ليكم . مسكني مع عمران مع اني بقدر امشي قعدوني
شاهيناز: وين علا
صوفيا: مشت تلبس للجرتق
شاهيناز: الحمدلله يعني لحقناها
امي: الحاصل شنو يا ماما
شاهيناز: ماف حاجة طلعت برا الصالة عشان عمران كان برا كنت عاوزة اقول ليهو حاجة بخصوص العرس فجأة في حجر عتر لي ولقيت نفسي طرت ووقعت على ايدي ولحسن الحظ عمران كان برا وجاني جاري رفعني وطلع بي المستشفى وياهو قالو فصل بس عملو لي اللازم وكتر خيره اشترى لي شبشب زاحف لاني اصريت اجي الحفلة تاني وهو كان عاوز يرجعني البيت بس ابيت دا كل الحصل
ابوي: الف سلامة عليك
شاهيناز: الله يسلمك بابا . وكلهم بقوا يكفروا لي
ابوي: كان ترجعي البيت
شاهيناز: ما ودعت علا
عمتو: صحتك اهم
شاهيناز: انا كويسة حاليا يلا عشان الناس ما تقول في حاجة كبيرة حصلت اي واحد يرجع محلو . بالفعل كلهم رجعو فضل معاي امي وعرفات وصوفيا وعمران كان واقف بعاين فيني بس
شاهيناز: عمران انا كويسة امشي لاصحابك من قبيل مختفي منهم . وابتسمت ليهو بمعنى ما تقلق انا كويسة هز لي رأسو ومشى
والبنات مشوا يستقبلوا العروس لانها وصلت الصالة كنت قاعدة في مكاني
امي: ماشة احضر تقدري تمشي؟
شاهيناز: امشي بلحقك . ومشت خلتني بقيت اعاين من بعيد بس جاني عمران
__ مالك رجعت ؟
_ يااخ ما قادر اشوفك كدا وانا السبب . كان بعاين لي بكسرة ابتسمت ليهو
__ خليك من الدراما دي شي ما حصل لي
_ بتحاولي ما تحسسيني بالذنب
__ كنت حأحسسك بالذنب لو كنت قاصد بس انت عملت كدا لانك كنت بتدافع لي عن شرفي
_ برضو انا السبب وهسي حرمتك من انك تحضري الجرتق
__ القال ليك منو ارح نحضر بس كدا ثبتني لانو خلاص عجزت . قام ضحك ومديت ايدي قومني وبقينا ماشيين بس انا بعرج شوية ووصلنا المعازيم خلوني اقيف قدام علا اتخلعت في منظر ايدي حركت لي رأسها بمعنى مالك هزيت ليها رأسي بمعنى ماف حاجة ورسلت ليها بوسة في الهوا وعملت ليها بأيدي السليمة طالعة حلوة قامت ضحكت وخلاص الجرتق خلص وجا لحظة الوداع فجأة الدنيا كلها بتبكي ومشيت حضنتها وبكيت معاها قالت لي في اذني
علا: شاهيناز عمران وين ما داير يودعني؟ . استغربت وعاينت في كل الاتجاهات كان ماف
شاهيناز: ما تمشي لو ما ودعتيه دقيقة خليكي بشوفو . هزت لي رأسها بمعنى تمام . بقيت افتش فيهو وانا رجلي ما مساعداني بس شايفاهو هناك نهاية الصالة مشيت عليهو هبشتو في ظهره رفض يواجهني مشيت عليهو بقدام كان ببكي قلبي اتقطع عليهو بقيت ابكي معاهو لمن شافني ببكي ختا ايدو في وشو وكان ببكي
شاهيناز: ما عاوز تودع أختك؟
عمران: ما قادر
شاهيناز: صعبة انك تفارقها بس لازم تودعها
عمران: دي كانت امي التانية لمن ارجع متأخر بلقاها صاحية عشان تجهز لي الاكل رغم انو ما بنتكلم كتير بس كانت حافظاني ودايما بتجهز لي حاجاتي هسي ماشة تاني القاها وين . وكان ببكي وانا بكيت أكتر
شاهيناز: دي سنة الحياة
عمران: ما ممكن تقعد معاي وما تمشي بيتها؟
شاهيناز: ما ممكن وهسي سألتني عمران وين ما جا يودعني
عمران: ما قادر والله
شاهيناز: خلاص هي تجيك . مشيت جيبتها براها لقت عمران دا انتهى من البكي مسكتو والاتنين ببكو هو كان ماسكها قوي وببكي ذي الشافع هي ذاتها ما اتوقعت انو عمران يبكي كدا لفراقها خليتهم براحتهم لمن فكاها وسلم عليها في رأسها
عمران: توتة خلي بالك من نفسك تمام؟ . كانت بتهز في رأسها بس
عمران: وما تنسي اخوك دايما موجود ظهرك وسندك وعزالدين لو رفع صوتو بس عليكي كلميني . دموعها بس كانت البحكي تاني سلم عليها في رأسها وهي التفت علي
علا: اخوي دا خلي بالك منو عليك الله وأمانة في رقبتك بسألك منو . ابتسمت ليها
شاهيناز: حاضر من عيوني . رجعت حضنت اخوها وهو ساقها من ايدها لراجلها ووصاهو عليها ومشو والجو بقى كئيب وقلَب بكا بس وطوالي عمران طلع من الصالة تاني ما شوفتو قولت اخليهو براحتو لانو فقد واحد من ركائزو رجعنا البيت بعربية ابوي واصلا مفتاح عربيتي مع صاحب عمران عارفة انو عمران حيرجعها لي
اليوم التاني ما قدرت امشي الصيدلية لانو وضعي ما بسمح لي بالاخص انو بالليل ايدي ما خلتني انوم اتصل لي عمران الصباح اطمن علي وكان طالع على الشغل قيلت في البيت مع امي لانو صوفيا مشت الجامعة
مع المغرب جانا عمران في البيت عشان يطمن على صحتي مع انو طول اليوم كنا متواصلين بالتلفون مرات مكالمات ومرات واتس لمن سلم علي وخلاص مديت ليهو ايدي ورفعت ليهو حواجبي نظام سريع سريع عمل فيها غبي
عمران : دايرة شنو
شاهيناز: قول والله اطلع من بيتنا . امي اتخلعت
امي: انتي جنيتي يا بت . حمرت ليهو وسكتا قام ضحك وطلع لي شوكولاتة واداني ليهو رسمت ابتسامة عريضة
امي: كبرتي ولسع في حركاتك ديك
شاهيناز: والله يا امي انتي عارفة انو هو عودني من صغيرة
امي: قولت سافرتي برا عقلتي بس يا خسارة . عمران بضحك بس
عمران: خليها عمتو . فتحت الشوكلاته وانا عاملة رايحة بأكل قعد يتونس مع امي شوية واتكلم مع ابوي شوية واداني مفتاح عربيتي ومشى وانا مبسوطة شديد
اتصل علي بالليل
__ انتي عارفة حاجة
_ اها
__ اكتر حاجة بحبها لمن تنتظري انو اديكي الشوكولا اللي أنا جايبها ليكي
_ انت عارف حاجة
__ اها
_ اكتر حاجة بحبها اللحظة اللي أنا بنتظر فيها انك تديني الشوكولا الجايبها لي
__ شاهيناز
_ احكي . سكت مسافة عارفة انو عنده كلام داير يقوله لي بس ما قادر
__ انسي
_ ما بنسى بس متأكدة انو حيجي يوم وتقول لي الكلام الكنت عاوز تقوله وانت متردد والوقت داك حتقوله وانت واثق من نفسك وانا حأنتظر اليوم داك
__ يعني قادرة تفهميني؟
_ بحس بيك انا
__ جد؟
_ جد . وغيرنا الموضوع وحكينا في مواضيع تانية
مر اسبوع وبقيت كويسة ونزلت الشغل عادي وكل الامور مظبوطة بس ابوي رمى لى قنبلة
ابوي: شاهيناز توفيق بتعرفيهو ود علي شريكي في الشغل
شاهيناز: اي بعرفو جانا كم مرة في البيت وحتى دا جا حمد لي السلامة مع عمو علي لمن رجعت من ألمانيا
ابوي: بس الله ينور عليكي
شاهيناز: في شنو
ابوي: عمك علي قال داير بناسبني وطلبك لولده توفيق عشان الشراكة البينا تقوى ...!!
يتبع.........