قمت من النوم مخلوعة دا شنو الحلم الغريب دا واستاذ حيدر ليه ظهر لي قلت يمكن عشان اخر زول كنت بدردش معاه وعقلي اتبرمج وحلمت بيه ماف استنتاج تاني
لقيت العصر جاء مشيت صليت وقعدت مع خالتو نسيبة فجأة الباب دق
مشيت فتحت لقيت وحدة اول مرة اشوفها والحيرني بتعاين لي كدا بي طريقة غريبة قلت ليها اتفضلي دخلت وانا
مشيت جبت ليها موية وخالتو نسيبة طلبت مني اعمل شاي دخلت المطبخ سمعت المرة بتسألها مني دي منو قالت ليها بت قريبتنا جات للجامعة وقلنا لي اهلها تقعد معانا انا شلت نفسي وختيتو
سبحان الله الناس ديل كل مرة بثبتو لي قدر شنو هم كويسين وقدر شنو ربنا عوضني عن كل السنين الفاتت بأسرة حلوة زي دي
جيت شايلة الشاي المرة رحبت بي وقالت لي اسمك منو وبتقري شنو وريتها قالت لي الغريبة شكلك ماغريب علي زي البعرفك او شفتك في مكان طوالي خالتو نسيبة بسرعة اتداركت الموقف قالت ليها تكوني مشبهاها
بتنا دي ماحصل جات هنا حياتها كلها في البلد المهم اتونسنت معاهم شوية وعرفت انها ساكنة جنبنا واستأذنتهم دخلت غرفتي وبقيت افكر ليه المرة دي بتعاين لي كدا تاني قلت يمكن زي ما قالت خالتو نسيبة المرة دي تكون مشبهاني
شويتين كدا وعمو علي جاء وطلعت لقيت المرة فاتت اخدت نفسي ياداب و عملت الغداء واتغدينا وعملت ليهم شاي ظابط يشربو ويشكرو صراحة انا فرحت بس دايما مع كل فرحة بكون في خوف جواي حاسة انو دا كلو حلم وحاصحى القى نفسي في الملجأ
قطع افكاري عمو علي قال لي اها بكرة شغالة قلت ليه ايوا القاب حقي الثلاثاء بس قال لي كويس تمام بكرة محاضرتك بتبدأ كم
قلت ليه على الساعة ٩ كدا قال لي طيب حلو عايز اوديك مشوار مهم قلت ليه اوك ما حبيت اسألو وين عشان مايقول البت دي مابتثق فيني ولا شنو المهم خلصو اكل وشلت الصينية ومشيت غسلت العدة ومنها دخلت غرفتي وبقيت افكر عمو دا موديني وين
عدى الوقت بطيء وانا الشمار قات@لني نفسي اعرف حنمشي وين وانا بفكر كدا تلفوني رن لقيتو دا أستاذ حيدر انا نفسي مايتصل علي ولا يرسل ماعايزاه يتواصل معاي كتير خايفة يعرف حاجة المهم عملت التلفون صامت ونمت رفضت ارد
بعدها بي شوية جاتني رسالة ابيت افتحها عشان لو سألني الصباح اقول ليه كنت نايمة وخلاص
المهم نمت وصحيت على المنبه الصبح كدا مشيت اتجهزت للصلاة جيت صليت وجهزت غياري وجيت شربت الشاي
وجهزت واستنيت عمو علي لحد ما جاء طالع
قال لي جاهزة قلت ليه ايوا ركبت العربية واتحركنا طواااااالي وقفنا في مجمع الجمهور قال لي طبعا عندك فضول تعرفي جايين هنا ليه قلت ليه ايوا والله نفسي اعرف قال لي عايز اعمل ليك جواز لاننا في رمضان ان شاء الله ماشين عمرة وانتي حتمشي معانا ماتتخيلو احساسي في اللحظة دي كان عامل كيف انا بكيت بكاء
انا لو كان عندي اهل ما اظن كانو يعملو معاي كدا واتأكدت انو ربنا عايز يعوضني سنين الحرمان ديك كلها واتأكدت انو شايل لي خير كتير لي قدام
عمو علي قال لي بسم الله اسه بتبكي مالك قلت ليه لو كان عندي اهل ماكان حيعملو الانتو بتعملو عشاني قال لي يابتي نحن اهلك وانسي في يوم انو ماعندك اهل تاني انا ابوك ونسيبة امك تاني ما اسمع منك كلمة ماعندي اهل
قلت ليه والله نعم الاهل انتو ربنا يجزيكم كل خير
قال لي اها نخلص الدراما دي وندخل عشان مانلقى زحمة جوا ومحاضرتك تفوت عليك المهم دخلنا والحمدلله مالقينا زحمة وطلع في ضابط هو بعرفو استعجل لينا الاجراءات ماتميت نص ساعة الا وانا انتهيت من اجراءات الجواز والاستلام بعد اسبوع
بعدها طلعنا وصلني الجامعة وكعادتو اداني مصاريف وقال لي بعدين بتخلصي كم قلت ليه الساعة ٣ قال لي خلاص بنجيك بي هنا ماشين مشوار تاني قلت ليه خير
نزلت ودخلت الجامعة
لقيت أستاذ حيدر واقف مع البت اللاقتني امس وحذرتني قلت ليهم السلام عليكم وواصلت مشيت القاعة لقيت علا قاعدة سلمت عليها وقعدت
قالت لي اول يوم تتأخري قلت ليها كان عندي ظرف كدا اخرني قلت ليها بالمناسبة عندك فكرة في رمضان الجامعة بتكون شغالة؟
قالت لي تقريبا سامعة انو بنشتغل لي نص رمضان كدا بس ما متأكدة بس ليه قلت ليها احتمال نمشي عمرة عشان كدا عايزة اتأكد عندك فكرة ممكن اتأكد من منو قالت لي ماعارفة بس ممكن تشوفي استاذ حيدر اكتر زول بتفاهم معانا في الجامعة دي وبجيب ليك الاكيدة بي خلعة كدا قلت ليها لا
قالت لي بسم الله ردمالك يعني حكيت ليها بي كلام البت الكان معاي وتحذيرها قالت لي يعني خفتي منها قلت ليها ابدا بس مابحب المشاكل والخلاني اقول كدا اسه لقيتو واقف معاها معناها في حاجة بينهم وانا مابكون سبب مشاكل
قالت لي شكلها موهومة ساي استاذ حيدر دا بقيف مع كل الناس وبعتبر الطلبة ديل كلهم اخوانو قلت ليها بس هي اتكلمت معاي انا بالذات ليه قالو لي امكن حسن انو عينك منو قعدت اضحك (ههههههههههه) يابت عيني شنو انا مافاضية لي زول ولا لي كلام فاضي زي دا
قالت لي دي انتي بس هي تفكيرها غيرك بنتكلم كدا الاستاذ جاء داخل وبدا يتعرف علينا وكان استاذ ظريف كدا نص المحاضرة كانت ضحك وحتى المادة كانت حلوة وسلسة كدا خلصت بي سرعة من غير نحس بالزمن اول ماطلع جريت الكافتريا كنت جيعانة شديد
جيت داخلة برضو اشوف ليك هدااااك استاذ حيدر قاعد يفطر ناداني اتحرجت طبعا ماحبيت اوضح حاجة لي زول والحتة ملانة ناس مشيت براحة سلمت عليه قال لي اتفضلي اكلي الليلة ماعندك حجة
انا جيت قبلك وطلبت ليك وفعلا لقيت في ساندوتش زايد قلت ليه يمكن دا ماطلبي قال لي عارفك بتحبي الشاورمة وطلبتها ليك بقت ماعندي حجة فعلا
شكرتو وقعدت افطر قال لي امس اتصلت ليك مارديتي ورسلت ليك رسالة ما قريتيها قلت ليه سوري كنت نايمة والصباح طلعنا مشوار كدا ونسيت ماعاينت للتلفون
قال لي خير مامشكلة انتي كويسة قلت ليه الحمدلله قال لي ماعارف بس حاسيك منكمشة كدا وماعايزة تعامل معاي
قلت ليه ابدا بس انا بالجد كنت نايمة قال لي لا ما قصدي التلفون قصدي عموما كدا
يعني قبيل جيتي ماشة لقيتيني واقف قلت السلام عليكن من بعيد ومشيتي وانا ناديتك حتى ما اتلفتي لي قلت ليه اسفة والله ماسمعتك وبعدين انت ماكنت واقف براك عشان كدا ماحبيت اسبب ليك احراج
قال لي احراج شنووووووو ....