الجزء الثالث3 الفصل الاول1
بقلم دانيا
قاعد مع مسلم في واحدة من الكافيهات الفي السوق جاء سامي اخو زوجتي ساجده وقف ومن غير سلام عاين لي معاينة إستحقار شديد نظراتو حسستني بالإنكسار وقدر شنو انا سيء في نظرو م بس هو عائلة ساجده كلها قاطعتني ولو واحد لاقاني في الشارع م بلقي علي السلام دا غير كلماتهم البتتردد في زهني الوقت كله ومحسساني بتأنيب الضمير " بعد رجعت من المنطقه الإتفقدت فيها ساجده كنت منهار شديد ومافي على لساني غير ياريت لو صدقت كلام ساجده من الأول ورحلنا من البيت الشؤم داك ،، وبعد حكيت الحصل معانا للكل ولحد آخر لحظه وقت مشيت اشوف الكهرباء وحسيت بحاجه خطفتني بسرعه زي الصغر لمن يخطف الفريسه ويطير م وعيت على نفسي غير في مكان ضباب كله وفي اشكال غريبه حايمه حوليني زي الأطياف وبعضها زي الخفافيش بس حجمها اكبر ..... كان شكلهن غريب ومرعب في نفس الوقت ياداب كلام ساجده وقع لي كان جزء منهم بحاول يهجم علي بخنافرو والجزء الأخر بحاول يبعدهم عني كأنو حارسني منهم ،، وفجأة غبت عن الوعي وم صحيت غير في البيت لقيت نفسي رجعت البيت كيف دي م بعرف ،، قمت مخلوع وم قادر استوعب شيء ناديت على ساجده بس م جاني منها رد فتشت كل البيت م لقيتها طلعت برا اتفاجأت إنو الدنيا ظهر وانا آخر شيء بتزكرو كنا في الليل متين جاء الصباح "
بقيت بفكر في اليوم المشؤم داك قاطع تفكيري صوت سامي وهو بقول لي ماشاء الله مرتاح وامورك ظابطه .... انت معقول قادر تتنفس ؟ قال كلامو دا بطريقه مستفزه وطلع من غير ما يسمع مني ولا حرف ،، عاينت لمسلم الكان بوزع نظراتو بيني وبين سامي الإتحرك من قدامنا ومشى .. مسلم لاحظ لإني انزعجت او بالأحرى حسيت بقصة في قلبي كل ما اشوف زول من اهل ساجده ضميري بأنبني زيادة مسلم خت يدو في كتفي و قال لي م تأخد على كلامه بتعرف وجعهم كبير عشان كدا ممكن يقولو اي كلام هم قايلننا خلينا الموضوع ونسيناهو هم م بعرفو نحن بحثنا قدر شنو وإنو وجعنا م اقل من وجعهم بس سبحان الله تقول إنشقت الأرض وبلعت البت .. عاينت ليهو وقلت ليهو ساجده مخطوفه يااخوي لكن إنو م ناوين تصدقوني وم مخطوفه من زول مخطوفه من قبل الجن .
اسمعني انا م بقدر اصبر اكتر من كدا بكره ح ارجع المنطقه ديك وم بطلع منها إلا وساجده معاي م ممكن شهرين ما تظهر وم نعرف عنها خبر ،، مسلم قال لي يامحمد م تتهور انت نسيت امك وحليفتها عليك ومكان م تنسى إنو الشرطه قفلت البيت داك ومنعتك من إنو تمشي المنطقه ديك وحذرتك كتير