رواية شلة بنات الفصل الثالث والعشرون 23 والرابع والعشرون 24 بقلم شذى عبدالمكرم
نبأ: مراد قال لي سام دا تعب في نهاية الامتحان وطلعوهو برا وهسي ودوهو المستشفى . اتخلعت طبعا
روز: متين حصل الكلام دا وليه انا ما عندي خبر
نبأ: قبل الامتحان اتصل لي عشان يقدمني للامتحان وكلمني وقال ما اكلمك عشان ما تقلقي وانتي داخلة امتحان
روز: متأكدة تعب عشان ما قاعد يأكل كدا اتصلي لمراد دا
نبأ: كدا اهدي انتي بتصل ليهو هسي . اتصلت ليهو رد وسلم عليها وسألها من امتحانها وطمنتو
نبأ: مراد روز دايراك . ومدت لي التلفون
روز: مراد سام كيفو الحاصل معاهو شنو
مراد: سام دا تعب شوية واهو جيبناهو المستشفى عندو نقص في الدم والتهاب دم وتايفويد
روز: سام ما بيأكل كلمتو هسي شوف وصل لوين هسي هو وين
مراد: مركبين ليهو درب
روز: صاحي؟
مراد: ايي اديكي ليهو؟
روز: ايي . انتظرت دقيقتين اداني ليهو
سام: رزة . صوتو كان تعبان شديد
روز: ما رزة نهائي انا موش حذرتك من صحتك دي ولالا بس روز منو عشان تسمع كلامها على كلا ربنا يتم عافيتك . وقفلت فيهو الخط كنت زعلانة منو شديد رجعت لنبأ تلفونها
نبأ: اها سام كيف
روز: تعبان شديد مركبين ليهو درب حاليا
نبأ: يحليلو ربنا يتم عافيتو
روز: ان شاءلله يا رب
قعدنا شوية ورجعنا البيت وانا بالي كلو معاهو بقى كيف وفي نفس الوقت زعلانة منو وكنت عاوزة اطمن على صحتو وكيف امتحن لانو نبأ قالت تعب في الامتحان اتصلت لنبأ رسلت لي رقم مراد اتكلمت معاهو طمني انو رجعوهو البيت وكان احسن شويه بعد اخد الدربات
بالليل اتصل لي كنت زعلانه ما عاوزة ارد بس حنيت عليهو رديت صوتو كان تعبان شديد
__رزة
_ رزة زعلانة منك وشديد كمان وما عاوزة تتكلم معاك
__ انا عارف وحقك علي
_ سام انا دايما بقول ليك اهتم بصحتك كنت حاسة انو حيحصل ليك كدا
__ انا كويس هسي
_ سام كويس شنو انت وقعت عديل ورقدت المستشفى تقول لي كويس
__ خلاص ما كويس بس انتي كمان ما تزعلي عشان ما تبقى علي اتنين
_ ما قادرة ما ازعل منك والله يا سام
__ خلاص على الاقل في فترة مرضي دا وبعد ابقى كويس بعرف اراضيكي كيف
_ تمام خلاص هسي انت ارتاح
__ رضيانة؟
_ امممم اي
__ كدا ممكن ارتاح . ودعتو وقفلت واتنهدت رغم تعبو دا كان زعلي بهمو مهما حاولت ازعل منو ما قدرت
مر يومين وسام اتحسن شوية وفكو ليهو الفراشة
_ حاسي روحك كيف
__ لا انا فل الفل الحمدلله
_ الحمدلله لمن كنت تعبان ما قدرت اسألك الامتحان التعبت فيهو ان شاءلله اشتغلت بس
__ ما متذكر حاجة بس حأباصي ان شاءلله
_ ان شاءلله يا رب حتبدا البحث متين
__ من بعد بكره
_ بس انت لسع تعبان
__ بقيت كويس
_ ما تنسى انت لسع ما راضيتني . قام يضحك
__ هسي لو قولت اطلع اجيكي تعملي لي قومة
_ كونو تراضيني ما ضروري الا تجي ثم ثانيا المفروض كان تتذكر براك لانو الاهتمام مطلب لا يطلب بس يا خسارة بطلب الاهتمام براي . قام يضحك
__ رزة انا ما قاعد اهتم بيكي؟
_ ما حصل نهائي
__ معناهو اهتمامي الفترة الفاتت دي كلها لبت الجيران اسف ما لاحظت . قومت ضحكت
_ شايف كيف
__ حقك علي حأعيد حساباتي
_ لازم . وبقيت اتونس معاهو وراضاني بطريقتو الخاصة.....
__________
من جانب نبأ
مراد خلص امتحاناتو وبأعتبارو خلص جامعة خلاص كنت خايفة من حتة انو ينساني لانها فترة جامعة وانتهت بس في الفترة الاخيرة كان متهم بي حتى بسألني من امتحاناتي وبقدمني ليها ما قدرت افسرها هل دا من مبدأ انو صديقي ولا بكن لي مشاعر ذيي كدا بعد خلصنا بقى ما كان في تواصل بينا كنت بمسك التلفون دايما على ظن انو يتصل لي او يرسل لي رسالة بس ما حصل فكرت اتصل ليهو بس كل مرة بقول اتصل تاني بتراجع لمن تم يومين اليوم التالت ماسكة تلفوني بتصفح قام مراد اتصل لي لمن اتخلعت بقيت اعاين للتلفون لمن قرب يفصل حتى رديت
__ يا جافية . قومت ضحكت
_ كيف جافية
__ ما بتتصلي الا انا اتصل
_ ما كدا والله
__ اها كيف . قولت بالراحة
_ امممم افتكرت انك نسيتني
__ لا انا خوتي وسخانة للدرجة دي؟
_ لا يا مراد
__ اها خلاص ليه ما بتسألي مني ولا ما معتبراني صديق . قولت في سري انت ما عارف انا معتبراك شنو
_ انا اصلا ما عندي صديق غيرك
__ ولا حيكون عندك اصلا اها كيفك
_ كويسة الحمدلله وانت
__ ماشي الحال
_ سام بقى كيف
__ سام كويس هسي كنت بتكلم معاهو
_ الحمدلله وخلاص مختفي اليومين دا وين
__ يعني فقدتيني
_ بالجد فقدتك
__ حتى انا فقدتك بس سافرت مع ابوي
_ وين
__ مشيت معاهو محلية.......
_ ايواااا حلو كدا احكي لي عنها . وبقى يحكي لي عنها وعن الرحلة دي وانا كنت مبسوطة وانا بسمع ليهو
__________
من جانب ريان
كنت كل فترة بدخل الشات البيني وبين ريان بقرا الرسائل وبضحك على كلامنا كل مرة بقول اتجاوز بس الرسائل ما بتخليني لمن في يوم قررت امسحهم بالفعل اتشجعت ومسحت الشات جيت امسح الرقم ما قدرت قولت دي في لحظة تانية بس كويس اني مسحت الشات اتصلت لي هديل اتكلمت معاي واتشاورت معاي وقفلنا دخلت الواتس رفعت في استوري كتبت
" واخيرا عندنا عروس في الشلة "
وبقيت اتصفح في الميديا رسل لي رسالة في الواتس دخلت لقيتها من ريان عانيت للاسم مرتين وقلبي ضرب دخلت لقيتو رد لي على الاستوري كتب لي " الف مبروك ليها وانتي حتلحقيها "
رديت ليهو
_ الله يبارك فيك + ان شاءلله بس ما قريب
__ موش انخطبتي؟
_ لا
__ كيف لا
_ ما حصل نصيب
__ وليه ما قولتي لي
_ واقول ليك ليه هل سألتني تاني؟ لا هل جيت سألت من احوالي؟ لا يبقى بياتو حق تسألني كدا
__ ريان ما جيت سألت تاني لانو مفتكر انك انخطبتي وما حبيت اعمل ليكي مشاكل مع خطيبك
_ تمام يا ريان هسي اعتبر اني مخطوبة بس وما تعمل لي مشاكل مع خطيبي
__ ما بقدر لانو ما عارفة بعد قولتي لي الكلام داك حصل لي شنو وانا الفترة دي كلها احساسي كان شنو وانا مفكر انك مخطوبة
__ ما عاوزة اعرف الحصل ليك شنو ابدا يا ريان ومدام كنت مختفي الفترة دي كلها خليك مختفي كدا . قومت بلكتو وبقيت ابكي بحسرة لانو قلبي واجعني شديد وهسي لمن حاولت اتجاوز تاني رجع اتصل لي مكالمة رفضت
بعد ساعتين اتصلت لي روز
_ رينو
__ كيفك
_ مالك
__ ريان يا روز رجع تاني رسل لي . وبكيت
_ وعملتي شنو
__ ما عاوزة احكي معاهو لانو عارفة اتوجعت منو كيف عشان كدا بلكتو السجمان دا . جاني صوتو
ريان الشب: ريان بس خليني اشرح ليكي الحصل
ريان البت: روز ليه عملتي كدا
روز: اسفة حبيبتي بس لازم تخليهو يشرح ليكي
ريان البت: ما محتاجة شرح ابدا وخلوني في حالي ما دايرة اتكلم مع زول انا . وطلعت من المكالمة وبقيت ابكي هسي ليه روز خلتني اسمع صوتو رسلت لي رسالة قالت ارد على المكالمة وهي براها وحلفت لي شوية اتصلت رديت ليها
__ روز ليه عملتي كدا وانا البأمنك على سري
_ اسفة انو عملت كدا بس كان داير يحكي معاكي يشرح ليكي موقفو
__ يشرح شنو بالضبط ودقيقة انتو اتلميتو كيف
_ اتصل لسام واداهو رقمي واتكلم معاي رينو ريان بحبك والله . قومت ضحكت
__ ما تضحكيني لو بحبني كان لمن قولت ليهو اتقدم لي عريس كان على الاقل يفهم مني ما يقول لي الف مبروك وينسحب كأنو ما حصل حاجة بعد تعقمنا في العلاقة دي معناهو كان بتسلى بس وقرر يبعد بس كيف ما عارف ولمن لقى اول فرصة انسحب
_ الموضوع ما كدا وانتي لازم تسمعي منو
__ روز لو ما دايرة تخسريني اقفلي لي سيرة ريان دا
_ تمام حبيبتي بس انتي ما تحكمي سريع كدا لانو البحب بخت اعذار . اتكلمت معاي شوية وحاولت تخليني احن شوية والين بس لا كنت ثابتة ........
24
بعد كم يوم سام بدأ مشروع البحث بتاعت التخريج وهو لسع عيان ما اتعافى بالمرة وكل مرة لازم ازكرو بموضوع الاكل تعبانة معاهو تعب لحدي ما اتصلت ليهو
_ قاعد تعمل في شنو
__ قاعد ارسم واهو فاتح الاسبيكر بتكلم معاكي
_ ايواااا حلو اها اكلت؟
__ ايي
_ كدا احلف
__ ما مصدقاني ولا شنو
_ نهائي
__ رزة اكلت . في صوت جا وكانت امو
امو: سام دي المرة الخامسة بقول ليك تعال اكل انت من الصباح بلحم بطنك والله حتقع اكل وارجع كلها خمسة دقايق بس
سام: تمام يا امي جاي بس اخلص ركن المستوصف دا
امي: الرسم ملحوق بس صحتك يا ولدي انت لسع ما بقيت كويس
سام: جاي خلاص . وانا ساكتة وبسمع يعني كذب علي وهو من الصباح ما اكل
__ رزة
_ تمام يا سام . قفلت الخط خلاص زهجت منو رجع اتصل لي كنسلت المكالمة لمن رجع للمرة التانية ختيتو في القائمة السوداء بعدها اتصلت لينا هديل مكالمة جماعية انها حتنزل دخان بكرة ولازم نمشو ليها اتفقنا انو حنمش ليها
بالليل اتصل لي سام من رقم سليمان اخوهو ما كنت متذكرة الرقم عشان كدا رديت
__ رزة ارفعي الحظر
_ انت منو وحظر شنو
__ رزة ارفعي الحظر وخلينا نتفاهم عليك الله
_ انا لو حظرت زول معناهو قصتو انتهت عندي والاكس ما برجعو ليهو . قام يضحك
__ بقيت اكس سريع كدا
_ عندك شك
__ لالا ولماذا لو عاد معتذرا
_ شوف لو عاد مدردق تاني ما عندي ليهو حاجة
__ تمام حبيبتي هسي ارفعي الحظر عشان نتفاهم في الموضوع دا
_ سام ما تتعب نفسك انا خلاص قفلت منك
__ يعني تاني ما حتشتاقي لي
_ نهائي
__ ولمن تزعلي حتمشي تبكي لمنو
_ نوسة موجوده
__ خلاص لمن الحالة تقوم ليكي وتكوني عاوزة تنكدي حتمشي لمنو
_ حأنكد على ناس البيت
__ ولمن تكوني عاوزة تعملي حاجة ومترددة حتستشيري منو
_ نوسة ورامي قاعدين
__ ولمن نفسياتك تقوم وتكوني غلطانة البراضيكي منو
_ نوسة برضو انت ليه بتسأل الأسئلة دي
__ عشان اكون مطمن عليكي . طوالي قلبي مال سكتا ما رديت لمن طال سكوتي
__ رزة مشيتي وين
_ معاك
__ وان شاءلله ديما معاي . سام دا بحب يستغل الصرف بطريقه حلوة
_ خلصت؟
__ قربت قبل ما تقفلي كدا احكي لي يومك كان كيف . وانا قاعدة على هبشة لانو بحب انو يسمعني لانو مستمع جيد طوالي حكيت ليهو انو بكرة ماشة لهديل وحكيت ليهو انو عملت كيك مع التوأم و اي حاجة عملتها الليلة
__ رزة انا ما نفسي في يوم تزعلي مني
_ بس يا سام انت ما بتسمع كلامي وبغشني
__ والله ما بغشك
_ وقبيل داك شنو
__ ديك كانت اول مرة وكذبت عشان ما تزعلي مني
_ بس انا لسع زعلانة
__ وانا بعرف اراضي حبيبي كيف . وبالفعل راضاني ووعدني انو يهتم بصحتو........
اليوم التاني جاتني نوسة وطلعنا على بيت ناس هديل ونزلناها الدخان وقيلنا معاها وكان يوم ظابط رجعت مرهقة نومت طوالي وبقينا كل يومين نمش لهديل لحدي ما خلاص كان بعد بكرة المناقشة تبع سام اتصلت لي نبأ
__ روز بعد بكرة كيف وكيف
_ كيف
__ المناقشة تبع ناس مراد
_ اي صح حتمشي؟
__ لازم
_ اي لازم تقدمي مراد
__ نشيل ليهم شنو طبعا هو ما عارف اني ماشة
_ حلو تكون مفاجأة ليهو رأيك شنو نطلب قفف فرح راجلية
__ فكرة ظابطة وانا اصلا عندي كتاب مراد بفتش فيهو لقيت نسخة وحدة طلبتها ليهو حختها فيهو
_ احلى حاجة حينبسط شديد . واتفقنا على محتويات القفة وكدا وطلبناهم والاستلام بكرة
اليوم التاني وصلوهم لي البيت الاتنين عندي استيكرات المذاكرة جيبتهم وكتبت فيهم كم ورقة كدا وختيت اي واحد في القفة الخاصة بيهو واليوم التاني اتصل لي سام الصباح
__ الليلة مناقشتي
_ اي بالتوفيق فيها ان شاءلله
__ امين يارب ما حتجي؟
_ كان بودي بس حأمشي لهديل
__ ماف مشكله . اتكلمت معاهو شويه وقفلت
بعدها اتجهزت واتصلت على نبأ واتفقنا نتلاقى في السوق وشيلت القفف وقولت لامي عندي سنايري ماشة احضر المناقشة تبعهم وطلعت اتقابلنا مع نبأ وطلعنا على الجامعة لقينا ما شاءلله السناير حاجة كدا خورافية والبدل روعة و اي مجموعة لابسين لون معين حسب اختيارهم هم فتشنا كدا لقيت سام ومراد من بعيد
روز: نبأ انتي خليكي هنا انا بمشي وبوصف لمراد مكانك عشان يتفاجأ وتآخدي راحتك في انو تديهو الهدية
نبأ: فكرة حلوة يا حلوة انتي . مشيت عليهم وسلمت عليهم
سام: افتكرت انك ما حتجي
روز: حبيت اعملها ليك مفاجأة
سام: احلى مفاجأة والله
روز: مراد في زول حابي يقدمك للمناقشة
مراد: منو
روز: عاين هناك . اشرت ليهو اتجاه نبأ وهي طوالي رفعت ايدها كأنو ما صدق مشى ليها سريع وهو فرحان وانا اديت سام القفة
روز: دي هدية المناقشة
سام: انتي براكي هدية المناقشة والله . وبقيت اتونس معاهو جات البت الكان اتشاكلنا معاها
البت: سام نحنا المجموعة الرابعة
سام: تمام . حتى ما سلمت علي وطبعا سام ما قال لي انها في مجموعتو
روز: ممكن شرح . قام ضحك
سام: رزة خلي اليوم يعدي على خير
روز: حيعدي على خير حبيبي انا
سام: شنو
روز: ما قولت حاجة . واقفين جا سليمان اخوهو وسلمنا علينا
سام: رزة دا سليمان اخوي سليمان دي روز الحكيت ليك عنها
سليمان: دي انتي المجهجهة اخوي . قومت ضحكت بخجل كدا وبعدها اتعرفت عليهو ظريف وقطعة من سام حتى طريق الكلام........
___________
من جانب نبأ
كنت منتظرة روز تكلم مراد بالفعل كلمتو وجا علي والابتسامة في وشو
__ ما اتوقعت انك تجي
_ معقولة ما اجي هل الكلام دا بجي
__ ما بجي والله
_ اتفضل . مديت ليهو الهدية
__ تسلمي من قبيل بشوف في الشباب اي واحد حبيبتو جات تقدمو للمناقشة ولمن جات روز حسدت سام انو حبيبتو جات تقدمو وانا لا بس لمن روز اشرت عليكي حسيت بفرحة عمري ما حسيت ذيها
_ مراد انت ما براك ولا حتكون براك
__ لانك معاي
_ اي معاك
__ وكدا انا ذاتي حبيبتي جات تقدمني . نزلت رأسي بخجل ما اتوقعت انو يقول كدا لمن شايفاني ساكتة
__ صح ولا لا . قولت ليهو بالراحة بصوت اقرب للهمس
_ صح . بعدها رجعت رأسي
_ مراد عاين . طلعت الكتاب من القفة ورفعت ليهو فوق اتجاه الغلاف اتخلع مد لي القفة ومسك الكتاب بحاول يتأكد لو حقيقية
__ نبأ لقيتيهو وين
_ سر المهنة
__ والله انا بحبك يشهد الله بحبك شديد . وهنا ممكن اقول انا كسبت مراد الكنت بتمناهو لو شوفتو بس فرحتو كانت كيف بالكتاب
_ انت مبسوط؟
__ اكتر مما تتخيلي ربنا ما يحرمني منك
_ ولا منك يارب . وقفنا شوية ومشينا على ناس سام وسلمنا على اخوهو وجات اخت مراد عرفنا عليهم وبعدها سام ومراد دخلو المعاينة هم في قروب واحد قروب واحد وانا و نبأ واخت مراد اسم مرحقولنا نقعد في الكافتيريا ننتظرهم لمن يخلصو وبقينا نتونس معاها واتعرفنا علينا.......
____________
من جانب ريان
بعد ظهور ريان الموازيين رجعت اتلخبطت من اول جديد حتى روز ما قدرت تخليني اغير رأيي واسمع ليهو اتصل لي من رقم غريب
_ الووو
__ ريان
_ ريان انا موش حظرتك يبقى معناهو ما عاوزة تواصل معاك
__ خلاص اسمعي الكلام الداير اقول ليكي وبعدها تاني ما حأزعجك . سكتا ما رديت فهم انو موافقة اسمعو
__ انتي زعلانة مني بسبب انو ما اتواصلت معاكي من لمن قولت ليكي مبروك لانو كنت متفاجأي وكلام انك حستخيري دا دمر اخر امل جواي انو ممكن تحبيني عشان كدا قررت انسحب وما اخرب ليكي حياتك لانو كنت بديت اميل ليكي او بمعنى اصح بديت احبك بس انتي كنتي حتنخطبي ودا السبب وحصل الحصل حابي ابرر ليكي موقفي عشان ما تقولي ما مهمة عندي بالعكس كمان ومدام رافضة وجودي في حياتك تاني انا حأحترم قرارك دا بس حأنتظر انك في يوم تليني وتتصلي لي وقتها بعرف انك عاوزاني ذي ما انا عاوزاك وخلي بالك من نفسك وما تزعليها عشاني في امان الله . وقفل الخط وبعدها ماسورة وانفتحت من البكي قربت اقول ليهو حتى انا بحبك بقيت اشوف في التلفون بس ما عرفت اعمل شنو
مر يومين اتصلت لزور حكيت ليها لومتني وقالت اتصل ليهو ما قدرت وكم مرة بتقول لي ريان اتصل بسأل منك بس انا كنت محتاجة فترة ابعد عشان اعرف انا عاوزة شنو لحدي ما جا المناقشة حقتهم قررت اتصل ليهو فكيت الحظر وانتظرت خمسة دقايق بشجع في نفسي في النهاية اتصلت
_ ريان كيفك
__ والله بقيت احسن بأتصالك دا
_ حبيت اتمنى ليك التوفيق في المناقشة
__ يا ريت لو كنتي جنبي
_ بالتوفيق ان شاءلله
__ ان شاءلله كيفك انتي
_ انا تمام الحمدلله
__ قلبك ما مال لسع
_ قلبي مات
__ بس انا حاسي عشاني حيرجع
_ حاول
__ يعني اديتيني الضوء الاخضر
_ الضوء الاخضر انت بتفتشو
__ بعرف كيف القاهو
_ نشوف يلا ما اشغلك
__ بالعكس مبسوط انو بتكلم معاكي حاليا
_ اممممم . اتكلمت معاهو دقيقتين وقفلت رسل لي صورتو وهو لابس بدلة المناقشة حاجة كدا هيبة بقيت اتأمل في صورتو اكبرها واصغر فيها.........
_________
من جانب نوسة
العصر كنت ماشة الدكان اجيب حاجات امي عاوزاهم لمن وصلت جنب الدكان وقفني رجب
رجب: ايناس كيفك
نوسة: كويسة الحمدلله وانت
رجب: بخير الحمدلله
نوسة: اتفضل
رجب: لو فاضية بعدين امي عندها درب بالليل عاوزك تديها عشان صعب نمشو المستشفى
نوسة: جدا ماف مشكلة وسلامتها يا رب
رجب: تسلمي . طبعا بعرف اركب فراشات دربات في اجازة سمستر قريت اسعافات اولية فيلا ناس الحي بجوني مرات ولمن زول يكون عندو درب انا بركب ليهو لانها ساهلة وبعرفها ليها
رجب: طبعا ما عرفنا انتي دكتورة ولا باشمهندس . قومت ضحكت
نوسة: على حسب الظرف بس . وضحكنا
رجب: كشكول يعني . ضحكت
نوسة: ممكن تقول كدا . بس فجأة اشوف ليك عربية وقفت ونزل القزاز اذا بها رامي وقف يعاين لي وانا كأنو صبت فيني مطرة
رجب: يلا مع السلامه . حتى ما رديت ليهو مشى وخلاني واقفة بعاين في رامي ورامي لمن شاف انو رجب مشى دور عربيتو ومشى ما عرفت اعمل شنو مشيت الدكان شيلت الحاجات ورجعت البيت ما عرفت اتصل ابرر موقفي ولا اعمل شنو شوفت انو احسن اتصل ليهو بالفعل اتصلت
_ رامي
__ قبل ما تقولي اي حاجة او تبرري موقفك انا واثق فيكي و اي حاجة بس هل صح تقيفي معاهو في الشارع وتضحكي كدا
_ ما صح
__ اها الموقفك شنو
_ والله يا رامي كل الحكاية...... . وحكيت بالتفصيل حتى انو ضحكت بسبب انو قال لي ما عرفنا انتي دكتورو ولا باشمهندس
__ بس تاني اوع تقيفي
_ ما حيحصل ما زعلان صح؟
__ ما زعلان بس غيران . قومت ضحكت واتكلمت معاهو شوية وقفلنا واتنهدت انو طلع متفهم وواثق فيني........