رواية شلة بنات الفصل الثالث عشر 13 والرابع عشر 14 بقلم شذى عبدالمكرم
صحيت الصباح وجهزت التوأم للمدرسة وشربتهم اللبن وحشيت ليهم الفطور وقدمتهم للترحيل لمن اكون انا في اجازة انا البكون مسئولة منهم او بالاصح مسئولة من البيت كلو بريح امي بعد فترة امي صحت
امي: صباح الخير
روز: صباح النور
امي: التوأم مشو
روز: ايي قدمتهم هسي اقعدي اكب ليكي الشاي
امي: بارك الله فيكي . لمن اسمع كلمة حلوة من امي التعب الفيني كلو بروح وبحاول اعمل اكتر عشان اسمع منها كلمة حلوة
روز: امين يا رب . قعدنا نشرب ابوي جا صبح علينا وشرب الشاي وطلع للمكتب
امي: روزة انا معزومة فطور في بيت سعاد ما تتعبي نفسك شديد في الفطور انتي ورامي بس
روز: امي المشكله في رامي ذاتو التفاتيف حقي دي ما حيأكلها . قامت تضحك
امي: انا ما قولت ليكي اكلي اندومي ولا شبيسي كمان اعملي فول بس
روز: حاضر . وقعدنا لمن بعد فترة امي اتجهزت وطلعت مشت بيت ناس سعاد وطلعت الدكان جيبت فول وطعمية ورغيف وقعدت منتظرة حضرة جنابو رامي عشان يصحى واجهز الفطور قريب الساعة 12 حتى صحى
رامي: الفطور جاهز؟
روز: لا خليك نايم لسع
رامي: ما تخافي بفطر وبرجع بنوم
روز: نامت فيك حيطة . جاني قريب جريت المطبخ جهزت الفطور وناديتو وقعدنا نفطر
روز: رامي بعد نفطر دايرة امشي لنوسة دي محتاجاني جنبها . شوفتو خلى العيشة القطعها
رامي: روز يعني نوسة دايرة تتزوج بالجد
روز: دايرة تتزوج وما دايرة
رامي: كيف يعني
روز: اتقدم ليها ود عمها وهي ما عاوزاهو وابوها قال ليها لو عندك زول خلي يجي لحدي الجمعة الجاية ولو ما عندك حيزوجها لود عمها
رامي: ونوسة عندها زول؟ . عاينت ليهو مسافة قربت اقول ليهو هي بتحبك انت
روز: للاسف ما عندها
روز: رامي
رامي: نعم
روز: ما ممكن انت تتزوج نوسة دي؟ . كنت متأملة فيهو
رامي: حتقبل بي؟ . قومت فوق
روز: رامي يعني ممكن تتزوجها
رامي: كدا اقعدي تحت . رجعت قعدت وكنت فرحانة
روز: رامي انت ما عارف حاجة
رامي: كيف
روز: يعني انت ممكن تتزوج نوسة لو هي موافقة؟
رامي: ما اكذب عليكي صح انا ما فاضي من شغل المستشفى بس شايف انو نوسة مناسبة لي حتى لو ما بحبها بس حاسي بأنجذاب ليها بس هل هي حتقبل بواحد ما فاضي ابدا ومشغول دايما ذيي كدا ما شايفها شوية صعبة ؟ . قومت ضحكت من الصدمة لمن استغرب فيني
رامي: مالك
روز: دقيقه خليك اجيب تلفوني . جريت جيبتو وجيت وضربت ليها وفتحت الاسبيكر
روز: قلبي
نوسة: كيفك روز
روز: كويسة الحمدلله وانتي
نوسة: حأكون كيف بس رأسي حينفجر من الحاصل دا
روز: حنلقى حل ان شاءلله
نوسة: ان شاءلله يا رب بس ماف امل
روز: رأيك شنو العب برأس رامي شوية
نوسة: كيف يعني
روز: اخليهو يتقدم ليكي . قامت تضحك
نوسة: ما تضحكني عليك الله رامي دا في احلامو ما حيعاين لي حيظل حلم لن يتحقق . عاينت ليهو ورفعت ليهو حاجبي نظام سامع
روز: ليه لن يتحقق
نوسة: نحنا الاتنين عارفين
روز: والله هو غبي وما بعاين بس
نوسة: انسي ما تزكريني بالمآسي
روز: ما قاصدة قاعده افطر اخلص وبجيكي تمام؟
نوسة: في انتظارك . قفلت منها
رامي: لا دقيقه افهم شنو يعني
روز: انا ما عارفة بقيت دكتور كيف وانت بالغباء دا
رامي: انا يعني انا حلم نوسة؟ ليه ما حسيت
روز: لانك ما فاضي ابدا
رامي: وانا الغبي مفتكر مستحيل تقبل بي
روز: هسي دا ما مهم المهم البحصل شنو
رامي: البحصل انو نمشي نتقدم ليها . فكيت الزغروتة الا رامي صرخ فيني وسكتت
روز: انت ما شوفتها امس تبكي كيف تقول مات ليها زول والله قطعت قلبي هسي لو عرفت حتموت من الفرحة والله
رامي: ما تقولي ليها انو سمعت المحادثة عشان ما تنحرج مني
روز: ياااخ انت عسل عديل كدا
رامي: عارف انتي امشي ليها خلاص وقولي ليها الجمعة حنجي نتقدم ليها وتكلم ابوها ما يتخذ خطوة اتجاه ود عمها وانا بعدين بكلم ابوي في الموضوع دا والعرس دا فيما بعد
روز: ياااخ انا بحبك . وجدعت ليهو بوسة في الهواء وجريت غسلت يدي وجيت عملت ليهو الشاي ولبست عبايتي وجريت مشيت لنوسة فتحت لي امها سلمت علي وقالت لي نوسة في غرفتها دخلت لقيتها راقدة وشغالة بتلفونها بقيت ارقص واهز في اكتافي هي استغربت فيني
روز: قومي ارقصي يا عروس . بقت تعاين لي بخلعة جيت جريتها من اياديها وبقيت الف بيها بعد تعبت قعدت
نوسة: انتي كويسة؟
روز: فرحانة بس يا مرت اخوي
نوسة: زمان كنت مرت اخوكي
روز: هسي برضو حتكوني مرت اخوي
نوسة: كيف
روز: حنجي نتقدم ليكي الجمعة
نوسة: كيف يعني
روز: خلاص دايرة تبقي لي غبية ذي رامي
نوسة: والله ما فاهمة عليكي
روز: يا هبلة يعني رامي حيتقدم ليكي
نوسة: والله كذابة
روز: والله العظيم
نوسة: انتي كلمتي انو يتقدم صح
روز: لا يا هبلة هل تفتكري انو لو قولت ليهو رامي تعال اتزوج نوسة وهو ما موافق حيرضا يااخ دا حياة ابدية ما فيها اجبار صح؟
نوسة: صح بس ما مصدقة رامي حيتقدم لي؟ . وقامت تبكي خليتها لمن خلصت
نوسة: لا انتي قولتي ليهو شنو
روز: حكيت ليهو انو انتي مجبورة وقولت ليهو من مبدأ الهظار رامي انت ما فيك تتزوج نوسة قال لي حتقبل بي؟ هنا عرفت انو مفتكر انتي الحترفضي وهو عاوزك بس كان مفكر انو ما حتقبلي بيهو بسبب طبيعة شغلو قال لي نوسة دي شايفها مناسبة لي بس شغلي وكدا
نوسة: والله يا روز لو اشوفو في الاسبوع مرة وحدة انا موافقة بيهو . عرفت انو نوسة هي المناسبة بالجد لرامي اخوي ما كانت مصدقة ابدا كلمتها انو تكلم امها عشان ابوها يعرف ورجعت البيت استقبلني رامي
رامي: قالت شنو
روز: حتقول شنو مثلا بس بتبكي بس
رامي: يعني موافقة
روز: قولت ليها رامي كان مفتكر حترفضي بسبب طبيعة شغلو انت عارف قالت لي شنو
رامي: قالت شنو
روز: قالت لي والله يا روز لو اشوفو في الاسبوع مرة وحدة انا موافقة . شوفتو انبسط بكلامي دا شديد
رامي: يعني اخترت صح
روز: صح الصح وعمرك ما حتندم . ومشيت خليتو وكان مبسوط شديد .........
رامي كلم ابوي بالموضوع وابوي كان موافق بأختيارو حتى امي ما كانت عندها مشكلة وجهزنا نفسنا ليوم الجمعة ومشينا عشان نتقدم ليها دخلت ليها في الغرفة
نوسة: روز بالجد رامي حيتقدم لي ولا انا بحلم
روز: ورح شوفي بنفسك
نوسة: لالا ما بقدر . قعدت معاها امها جات نادتها تقدم العصير طلعنا معاها كانت خجلانة شديد وابوها ادى الموافقة لانو في معرفة سابقة وهي موافقة
رامي: ممكن نعمل خطوبة الجمعة الجاية وحفلة عائلية صغيرة
ابوها: فكرة حلوة
رامي: خلاص تمام ايناس رأيك شنو
نوسة بخجل: تمام . وخلص التعارف على خير وكان احلى يوم مشيت قعدت جنبها
روز: حتبقي خطيبة اخوي . ابتسمت لي بخجل مسكت ايدها كانت باردة
روز: هانت . هزت لي رأسها بمعنى اي . ورجعنا بيتنا
ابوي: اختيار موفق يا رامي
رامي: شكرا بس الفضل برجع لام رأس كبير دي هي الاختارتها . رفعت الفستان بفخر
روز: هو انا بختار اي زول لوحيد بيتنا دا ؟ . قامو ضحكو
امي: هو انا ذاتي ما بدي ولدي الوحيد لاي بت
روز: بس بعدين ما تكوني حماية صعبة لانو دي صحبتي وانا ما برضى بيها . قامت تضحك وقرصتني
اتصلنا مكالمة جماعية للشلة وكلمناهم انو التعارف عدا على خير باركو ليها وهي كانت ما مصدقة ابدا وكلمناهم انو الخطوبة يوم الجمعة بعد خلصت اتصلت لسام بكلمتو بيومي والحصل فيهو وانتهى اليوم على كدا ..........
14
بعد التعارف كنت مشغولة شديد مع نوسة وموضوع الخطوبة الجمعة دي واهملت سام عديل كدا لمن حسيتو زعل مني
_سيمو
__ هو انتي فاضية لسيمو
_ ما كدا بس انت عارف انو نوسة ورامي خطوبتهم الجمعة
__ ايي مهتمة بالكل الا سام دا
_ والله ما كدا
__ اثبتي لي
_ كيف
__ دايرة اشوفك اشتقت ليكي
_ حتى انا اشتقت ليك بس ما بقدر
__ روز حألقاكي ولالا
_ سام افهمني ما بقدر
__ تمام يا زولة وصل . وقفل الخط اتنهدت بتعب هسي هو زعل مني بس الموضوع ما بيدي امي نادتني انو في حاجات في السوق لازم امشي اجيبهم لقيتها حجة عشان اشوف سام بالمرة عشان زعل مني اتصلت ليهو
_ سام
__ نعم
_ شوية كدا حأمشي السوق ممكن نتلاقى
__ طالع مع اصحابي
_ وكنت عاوز تلاقيني كيف وانت طالع مع اصحابك
__ هسي بس اتفقنا
_ ما علي المهم بس دايرة اشوفك
__ ما بقدر
_ حتقدر يا سام حتقدر لمن اكون متحركة من البيت حأعمل ليك مسكول . وقفلت منو عارفة انو زعلان وما متفق مع اصحابو ولا اي حاجة اتجهزت وعملت ليهو مسكول وطلعت مشيت السوق وصلت كدا اتصلت ليهو جاني محل واقفة ركبت العربية ما اتكلم معاي كان ساكت بس
_ سام . ما رد
_ انا ما بتكلم معاك
__ نعم يا روز
_ نعامة الترفسك سام ما تربط وشك دا انت المفروض تقدر وضعي . ما رد لي لكن بالجد سام دا صبر علي شديد ما حصل اشتكى وجا على نفسو كتير دايما بغلط وما بتعتذر بقعد بتفلسف ليهو لمن يمشي لي الموضوع الا المرة دي اهو بعد فاض بيهو حتى اتصرف كدا زعلت شديد
_ سيمو ما داير تتكلم معاي
__ اقول شنو بس وانتي اصلا ما عندك النية تشوفيني وهسي متأكد لو ما كنتي جاية السوق ما كنتي حتشوفيني صح ولا كلامي غلط . سكتا لانو كلامو صح
__ شايفة كلامي صح دايما انا اخر خططك
_ والله ما كدا
__ دا الانا شايفو هسي في يوم جيتي على نفسك عشاني؟ . ما عرفت اقول ليهو شنو حسيت بغصة التفت على الشباك وبقيت اعاين للشارع وهو لافي بالعربية ما عارفة ماشيين وين انا ما بحب زول يزعل مني بالاخص الناس المقربة مني حسيت دموعي نزلت مسحتهم فجأة العربية وقفت
__ داخلة السوق؟ . ما التفت ليهو هزيت رأسي بس ودموعي تاني نزلت لانو قاعد يعاملني بجفا كدا
__ انزلك وين
_ هنا بس بنزل . شكلو حسا من صوتي اني ببكي
__ روز؟
_ نعم
__ كدا عايني لي
_ ماف داعي يلا باي . جيت افتح الباب بس فجأة امن الباب
__ كدا عايني لي . التفت ليهو
_ سام افتح الباب دا . لمن عاين لي مسح وشو بآخر نفس
__ بتبكي مالك هسي . ما رديت ليهو
__ روز
_ سام انت مفكر انك ما مهم عندي بالعكس والله ما كدا بالجد كنت مشغولة عارفة جيت على نفسك كتير عشاني وانا مقدرة دا كلو والله ما تفكر ابدا انك اخر خططي لانو انت عارف لمن اكون تعبانة بجي برمي تعبي كلو فيك لانو عارفة ماف زول بتحملني غيرك ما عاوزة تزعل مني بالجد اسفة
__ انا عارف انو الفيكي مكفيكي وانا بزيدو عليكي بس عايز احس بقربك ما عاوز تكوني بعيدة مني
_ ودا من حقك طبعا وانا ما عاوزة اكون بعيدة والله عاوزة ادخلك في كل تفاصيلي بس اتحملني لمن اخلص من الخطوبة دي
__ بتحملك بكل بحب . ابتسمت ليهو بحب
_ اها هسي البحصل شنو وين نحنا
__ والله ما عارف كنا لافين بس . ضحكنا وعاينا كنا في نهاية السوق
_ نفسي اشرب عصير منقة
__ طوالي . دور العربية ومشينا كافتيريا وشربت عصير منقة واكلت باسطة
_ لو سمنت وفستاني ما دخل فيني بشتكيك . قام ضحك
__ تشتكيني لمنو
_ بشتكيك لنفسك . ابتسمت
__ حلو وانا بتحمل المسوؤلية كلها . بعدها وصلني السوق جوا ونزل معاي شيلت الحاجات المحتاجاها ووصلني البيت
_ احلى يوم معاك
__ حبيبي انا
_ يلا باي
__ في امان الله . ونزلت ودخلت وانا مبسوطة
كنت بحاول بقدر الامكان انو ما اهمل سام وبحاول اوازن بين الاتنين لحدي يوم الجمعه جا
__سام ما اغشك الليلة ما حأكون فاضية ابدا
_ ما مشكله بمشي بشوف لي وحدة تهتم بي بس في فترة غيابك
__ والله تمشي تشوف بقد ليك عيونك الاتنين الفرحان بيهم دا المهم تنتظرني بس
_ حاضر اوامر تانية يا ناشفة . قومت ضحكت
__ والله الناشفة دي حبيبتك غصب عنك بس . قام ضحك
_ امري لله
__ انا حاقفل بعد دا لانو وراي شغل كتيرر
_ عارف بس ما تتعبي نفسك شديد اوكي حبيبي؟
__ اوكي . ودعتو وقفلت وكدا ارتحت ومشيت اشوف شغلي الراجيني.......
___________
من جانب ريان
طبعا شخصية ريان شوية غامضة ما بتعرفي هو بفكر في شنو
__ طبعا يا ريان الليلة خطوبة نوسة
_ عليك الله الف مبروك ليها
__ الله يبارك فيك عقبالك
_ امين يارب جمعا
__ امين يارب طبعا الشلة قاعدين يتساقطو وحدة وحدة
_ الا انتي قاعده حرس . قومت ضحكت
__ انا لازم اضمن انو كلهم اتخارجو بعداك
_ لالا كويس
__ حارسة المغتربين ينزلو السودان
_ لا يعني عاوزاهو مغترب
__ ممكن تقول كدا
_ الترابة في خمشك مصيرك سوداني اصيل بحب بلدو . قومت ضحكت
__ وماذا ان اتى مغترب وأخذني الي احضان بلاد اخرى
_ وماذا ان اتى ابن بلادك واخذك الا مدينة اخرى لترين جمال بلادك
__ ان كان محبا لي اقبل به سوى مغترب او ابن بلادي.....
__________
من جانب نوسة
ما كنت مصدقة ابدا اني حأنخطب لرامي حب حياتي صح ما عرفت مشاعرو اتجاهي شنو بس كونو اختارني دا بكفيني ولو على طريقة شغلو دي انا قبلانة بصدر رحب وطول الاسبوع ما لقيتو لحدي يوم الخطوبة طبعا البنات ما قصرو معاي ابدا قامو بأي حاجة ولمن جهزوني وطلعوني برا لقيت رامي قاعد اعجبت بيهو من اول وجديد كنت خجلانة شديد مشيت قعدت جنبو في الكرسي المخصوص لي
رامي: كيفك
نوسة: كويسة الحمدلله وانت
رامي: انا بخير اها جاهزة للخطوة دي؟ . هزيت ليهو رأسي بمعنى ايي
رامي: مع طبيعة شغلي دا يمكن ما اقدم ليكي كل البتمني وممكن ما اكون متوفر دايما بس لمن تحتاجيني حتلقيني جنبك
نوسة: وانا ما عاوزة اكتر من كدا
رامي: حأحاول بقدر الامكان انو اسعدك . ابتسمت ليهو بحب بعدها جا وقت تلبيس الخواتم ولبسناها كنت حاسة كأنو البحصل دا حلم كنت بعاين للخاتم في ايدي يعني هسي بقيت خطيبة رامي الكنت مفكراهو حلم لن يتحقق بس اتحقق وبطريقة ما اتوقعتها ابدا عاينت اتجاهو كان شغال بتلفونو ضحكت بالراحة يعني حتى في الخطوبة مشغول شكلو حس بي بعاين ليهو التفت علي
__ عارف بتقولي في يوم خطوبتو مشغول . ابتسمت ليهو
_ عادي جدا . قام قفل تلفونو ودخلو في جيبو
__ اها كيفك تمام . قومت ضحكت
_ انا تمام التمام انت تمام؟ . قام ضحك
__ مدام انتي تمام انا تمام . وضحكنا وبقينا نتونس لمن روز جاتنا.......
__________
من جانب روز
اليوم كان ضاغط شديد بس الشلة ساعدوني كتير ونظمنا اي حاجة وهي خطوبة عائلية بس ولبسو الخواتم وكان الجو حلو شديد واتصورنا مشيت لرامي ونوسة كانو جنب بعض
روز: اسمعني هنا يا رامي انت اخوي و اي حاجة بس نوسة مكانتها عندي اعلى منك اياك تزعلها في يوم فاهم
رامي: نوسة عندك محامي دفاع ليه ما كلمتيني
نوسة: انت لو مهتم كان عرفت . ضحكنا التلاتة اتكلمت معاهم شوية وخليتهم
وخلص الخطوبة على كدا مع احلى اتنين..........