رواية اللون السابع للحب الفصل الثالث والعشرون 23 والرابع والعشرون 24 بقلم شذى عبد المكرم
23
عمار قرر خلاص انو العرس يكون بعد شهر وبدينا تجهيز على هذا الاساس وكلمنا الجيران اني حأنزل الدخان كنت متوترة شديد وطبعا عمار منعوهو انو يشوفني من قبل اسبوع وما كان بجي بالبيت الكبير بطلع بباب بيتهم بس
__ هسي دا كلو لشنو
_ هو شنو
__ يحرموني منك والامور دي كأنو ما شايفك قبل كدا . قومت ضحكت
_ عادات وتقاليد انت ما دايرني اكون حلوة؟
__ انا متقبلك بنفس حالتك دي وبحبك ذي ما انتي ليه التغيير . فرحت بكلامو
_ عاداتنا بتقول كدا
__ خلاص انا كان احدد اسبوع بس
_ الا لو ما العروس انا
__ في زواجي التاني بديها اسبوع بس حبسة
_ في المرة التانية برضو ما حأرضى بالاسبوع
__ وانتي علاقتك شنو
_ موش انا برضو حأكون الزوجة التانية . قام ضحك
__ والتالتة والرابعة برضو
_ خلاص في المرة الرابعة برضى بالاسبوع
__ ما قصرتي . وضحكنا
جاتني فردوس كنت قاعدة مع امها وامي بنتناقش في التفاصيل الحنعملها
فردوس: امي انا حأرجع بيتي . كلنا استغربنا فيها
همس: ليه يا جنة ما عاوزة تحضري عرسي؟
فردوس: بكرة حتنزلي دخان حأحضرو بمشي
امي: في زول زعلك؟
امها: مالك خلاص يا فردوس وانتي تعبانة الحيساعدك هناك منو
فردوس : لالا بس ما شايفة سفيان تعبان كيف يومي بجي الصباح وبمشي الشغل مع انها مشوار كامل وتاني لمن يجي من الشغل ومرات بجي اخر الليل
امي: مضطر لكن
فردوس: عشان كدا دايرة اريحو ان شاءلله اسبوع وامي انتي حتمشي معاي
امها: والله كونو تفكري في راجلك دا حاجه كويسة وبالجد سفيان دا تعب وما بقدر يقول حاجه
فردوس: عشان كدا
امها: بمشي معاكي بعد ننزل همس الدخان
همس: وحترجعي بتين
فردوس: ما تخافي بنجي نقيل هنا مرات وبجي بصبها هنا زمن الفعاليات
همس: تمام . زعلت شوية انو فردوس راجعة بيتها وحيفرق معاي بس تفكيرها في سفيان دا كان حلو
اليوم التاني نزلوني الدخان وكان شكل قعدة والجيران كانو حاضرين والجو حلو وخلص على خير بس كان متعب بالنسبة لي ما اتفاهمت مع زول ونومت طوالي.....
___________
من جانب فردوس
قررت انو ارجع بيتي بعد ما شوفت تعب سفيان معاي وكلمت ناس البيت وفهمتهم الوضع ووافقوني الرأي وهمس زعلت شوية ودا من حقها لانو حأخليها في اهم فترة في حياتها بس وعدتها انو اشاركها فرحتها
اليوم التاني كان حينزلوها الدخان وكلمت سفيان ما يجي لانو البيت حيكون مليان وكدا ويوم كامل ما شوفتو حسيت بالفرق لانو من جيت بيتنا بجي الصباح والمساء
صباح اليوم التاني جاني من الصباح قبل ما يطلع الشغل
__ اصبحتي كيف
_ الحمدلله
__ ان شاءلله امس ما تعبتي روحك
_ لالا وانت عارف ناس البيت ما حيخلوني
__ الحمدلله اها شربتي اللبن؟
_ لسع بس بشربو هسي
__ تمام وانا بجي بعدين تاني
_ سفيان انا حأرجع بيتي
__ متين
_ بعدين حأرجع معاك
__ في زول زعلك ولا قال ليكي حاجه؟
_ لالا
__ مضايقة من حاجه؟
_ لالا بس انت تعبان من الجية كل يوم صباح ومسا
__ عادي ولا يهمك
_ لالا حأريحك شوية . مسك يدك
__ والله عادي لو اجي خمسمية مرة ما مشكله وانا بجي الصباح والمساء عشان اطمن عليكي واقدر اعدي يومي
_ وعشان تكون مرتاح حأكون قدام عيونك
__ بس ما حتقدري تقعدي براكي في البيت ومحتاجة رعاية وانا شغال
_ عارفه وكلمت امي حتمشي معاي
__ عملتي كدا عشاني؟
_ ايي . سلم علي في رأسي
__ فديتو البفكر فيني
_ لازم افكر فيك
__ وعرس همس؟
_ بجي زمن الفعاليات وممكن مرات اجي اقيل معاها
__ حلو وحنرجع بتين؟
_ لمن ترجع من الشغل اغشانا بجاي ونتغدا نرجع مع بعض
__ بيتك اشتاق ليكي
_ انا ذاتي اشتقت ليهو واشتقت لسيد البيت . ابتسم لي بحب وهو لسع ماسك يدي
__ اها عاوزة شنو اجيبو ليكي معاي
_ سلامتك بس
__ الله يسلمك حأمشي بعد دا ونتلاقى بعدين
_ شربت الشاي؟
__ لالا بس بشربها قدام
_ لالا دقيقه . وناديت صفا وكلمتها وجابت ليهو الشاي وانا لبن وطلعت بسكويت الشاي الخفيف داك وختيتو في نصنا
_ بقى عندي غرام مع البسكويت دا . قام ضحك
__ ما عارف بتحبي خفيف ذي دا كيف لو نسيتي ثانية زيادة ببقى في خبر كان . قومت ضحكت
_ عشان خفيف بحبو
__ بجيب ليكي بعدين زيادة
_ وجبنة مضفرة
__ هسي موش قولتي سلامتك بس . ضحكت شديد
_ سلامتك والبسكويت دا والجبنة المضفرة . وضحكنا وخلص الشاي وودعني وطلع وبعد طلع حتى صفا جات داخلة وقعدت جنبي
صفا: سبحان الله عمري ما اتوقعت اشوف سفيان بالحنية دي
فردوس: ولا حتى انا والله
صفا: ياااخ انتو وهمس اكتر اتنين محظوظات في الدنيا انو عندكم ازواج بحبوكم بالطريقة دي
فردوس: سفيان زمان كان عامل لي فوبيا عديل
صفا: بس معناهو كلو من خوفو عليكي بس بعبر بالطريقة ديك . قومت ضحكت
فردوس: احكي ليكي الموقف الكان حصل لي مع سفيان لمن الاولاد شاغلونا انا وهمس ووسام متزكرة؟
صفا: ايي
فردوس: انتي عارفه الحصل شنو ورا البيت لمن سفيان اشر لي اتبعو؟ . اتحسمت للكلام
صفا: احكي لي والله كان عندي فضول اعرف . قومت ضحكت
فردوس: كنت ماشة وراهو وانا خايفة وبرجف وصلنا ورا البيت وقبل ما استوعب لقيت نفسي ملصقة في الحيطة . قامت ضحكت شديد
صفا: اصدميني انو سفيان لصقك في الحيطة
فردوس: اتخيلي بس . رجعت تضحك وانا ضحكت لمن اتذكرت للموقف
صفا: اها والحصل شنو
فردوس: من الخوف البكي ذاتو طار ونسيت الناس ببكو كيف. صفا تضحك لمن دمعت
صفا: والله بطير في اللحظة ديك
فردوس: بقيت مقلعة عيونك وضهري كان في خبر كان اول جملة قالا لي انا سفيه صح؟ الكلام ذاتو طار بقيت مبحلقة فيهو بس في اللحظة دي لو قولتي لي اسمك منو بقول ليكي سفيان . صفا تضحك
صفا: وخلاكي كيف
فردوس: خلاني؟ عجب قال لي انا لو ما قتلتك ما بترتاحي وبقى يفتش في حاجه قولت خلاص بفتش في حديدة يقتلني يداب دموعي فكرت تجي وفتحت بيت البكاء قولت انا لسع صغيرة وما اتزوجت ولا شوفت عيالي وسفيان حيقتلني
صفا: اها
فردوس: بس جا القدر على هيئة امي وعمتو سلوى انفذوني وبعدها فكيت الجرية من دون فرامل وجيتكم ببكي . وبقينا ننضحك على الذكريات دي
صفا: زمان كانت قصص رعب بس حاليا بقت ذكريات
فردوس: بالجد والله بعدين بحكي لاولادي بقول ليهم اي زول في الدنيا عندو فوبيا وانا فوبيتي كانت ابوكم دا . وضحكنا
صفا: بعد الحصل والدرامات دي حبيتي كيف
فردوس: ما حبيتو هو حببني فيهو من تصرفاتو بعد الزواج اتغير تغيير جذري كنت كل مرة بخاف يطلع تمثيل لانو الكنت مفكرة انو سفيان بكرهني بس انتي عارفة في اول يوم زواجنا صحيت مخلوعة وجارية عشان اعمل ليهو الشاي والشعر ذي بوخ الحلة لمن خلعتو . صفا ضحكت
صفا: عشان ما يجوط صح؟
فردوس: ايي بس في النهاية اداني مساحتي الخاصة واتجهزت بعدها عملت الشاي وطول فترة زواجنا دا اتجاوز لي حاجات كتيرة
صفا: ما كنت متوقعة انكم تتفقو لانو شخصياتكم مختلفة انتي عنيدة وهو عصبي
فردوس: رغم اختلافنا دا هو حباني وهسي انا اتعلقت بيهو
صفا: ربنا يخليكم لبعض
فردوس: امين يارب وانتي ربنا يقسم ليكي ود الحلال البفرح قلبك
صفا: موجود بس يا ريت لو بعاين لي . استغربت طبعا
فردوس: منو . اتنهدت
صفا: انسي
فردوس: خليني اخمن عزيز صح؟ . دا اخو عمار
صفا: اممممم واضح؟
فردوس: ذي وضوح الشمس افتكرنا انو اتجاوزتي عزيز دا
صفا: ما اتجاوزتو والله وهو عمرو ما حيعاين لي وهو عايش على ذكراها . عزيز كان متزوج بس مرتو اتوفت في اول سنة من زواجو وكان زوجتو زميلتو في الجامعة ما لحق اتهنى بزواجو وبعدها ما فكر يتزوج تاني وعدم ظهورو انو برجع البيت متأخر ومرات ببيت في الشغل وهو شخصية غامضة كدا
فردوس: ليه قلبك ما اتعلق الا بعزيز دا
صفا: بحبو من زمن كنت صغيرة ولمن اتزوج جاتني نفسيات بس اتعودت وبعد اتوفت رجعت لي كل المشاعر وما قادرة اتجاوزها . جريتها علي حضنتها لانو بكت صفا بتحبو من زمان وبعد اتزوج نحنا افتكرنا انو نست خلاص بس شكلو كانت بتبين عكس دا
فردوس: لو قسمتك معاهو ما بتفوتك
صفا: اااخ يا جنة . طبطبت عليها لمن هدت وبعدها ستفت لي شنطتي جاهز وفطرنا
فردوس: صفصف ورح لعمتو حنان نتونس معاها شويه
صفا: ورح . لبست توبي مشينا ليها وباقي البيت لحقونا عشان عمتو عملت لينا القهوة
حنان: همس خليتوها براها
وسام: احتمال عمار يجي تحت اي لحظة
حنان: بتصل ليهو انا
فردوس: لالا كدا بتقيدي
حنان: يتقيد يوم واحد المشكله وين عندو كمية اصحاب يترمي مع اي واحد . قومنا ضحكنا وبالفعل اتصلت ليهو عطلتو ونادينا همس وشربنا القهوة بمزاج
___________
من جانب اخر
سفيان جا راجع من الشغل وجرا فتح البيت لقى البيت فاضي استغرب ودخل الغرفة فردوس كانت ماف استغرب انو طلعت بدون ما تكلمو قام اتصل وهو زهجان
فردوس: الو سفيان
سفيان: وين انتي موش محذرك من الطلعة
فردوس: سفيان انا في بيت عمو محمد بجاي مع ناس البيت كلنا
سفيان: ايواااا تمام
فردوس: دقيقه جاية عليك . قفل منها وانتظرها في الحوش جات
__ قايلك طلعتي
_ ما واثق فيني ولا شنو
__ ما عدم ثقة بس خايف عليكي
_ ما تخاف ديك غلطة ما بتتكرر تاني
__ تمام ادخلي جوا ما تقيفي في الشمس
_ وانت؟
__ عمار ما رجع؟
_ عمار طردوهو . ضحكنا
__ مسكين خلاص انا في الصالون داير انوم شوية
_ تمام . ومشى صالون الرجال وانا رجعت لبيت عمو
المسا اتغدينا وودعت ناس البيت ورجعت بيتي وكانت معاي امي لقيت البيت مرتب سبحان الله سفيان زول مرتب من يومو .........
____________
من جانب همس
فردوس رجعت بيتها ودا فرق معاي شديد لانو كنت عاوزاها جنبي بس هي اختارت انو تريح سفيان وتعذبني انا بس باقي البنات كانو جنبي جاتني امي
امي: بطة كلمتي اخوانك؟ . قصدها اولاد ابوي من مرتو الاولى
همس: لالا
امي: ليه ما صح منك
همس: هو ما عارفين اذا انا حية ولا ميتة اكلمهم ليه
امي: في النهاية اخوانك
همس: في الاسم بس وما بكلمهم . طلعت خلتني بعد ربع ساعه اتصل لي عمار
__ بطة
_ نعم
__ داير اتكلم معاكي في موضوع حساس شوية
_ في شنو
__ اخوانك
_ امي حكت ليك صح ياااخ ما بكلمهم
__ خلي العنادة
_ ما عنادة بس هل يوم سألو مني؟
__ اذا هم كعبين انتي كوني احسن منهم
_ ما دايرة
__ عشاني طيب
_ عمار ما تقول كدا وحتى لو كلمتهم ما حيجو
__ عشاني يا بطة عشان عمار ابوكي . طوالي قفلت الخط ما قدرت اتكلم وبقيت ابكي لانو لمن يقول لي عشاني بضعف وهو ما عاوز يحس بي عندي اولاد اب بس ماف واحد سأل مني اذا حية ولا ميتة بعد ابوي اتوفى امهم ساقتهم ومشت اتزوجت تاني وانا بت المرا التانية واصغرهم من اتجاه الاب بس من اتجاه امهم عندهم اخوان تانيين بس من ابوي نحنا تلاتة ولدين وبت يعني اخواني اولاد ولمن ابوي اتوفى كان عمري عشرة سنين ما فاهمة حاجة بس كنت بحبهم ومشيتهم فرقت معاي شديد ماف زول حسا بي ووقف جنبي غير عمار بقى لي اب واخ وعوضني خسارة الاتنين وهسي عاوزين مني انو ادخلهم في حياتي كأنو ما حصل حاجة ........
"كرَّستُ حياتي لأُحافظ على قلبي آمنًا، ومع ذلك، لا أعرف من أي جهة بالضبط طالَته الندوب."💔
24
كنت مفتكرة اني اتجاوزت حتة اخواني ديل بس مستحيل طبعا ديل ما اصحاب عشان اتجاوزهم ديل اخواني من لحمي ودمي وبحمل معاهم نفس الاسم يعني مهما حاولت امسحهم من حياتي ما بقدر صح من ابوي اتوفى كانو مرات بتصلو لي في الاعياد بس ما برد ولا بتكلم لانهم لو عاوزيني كانو فتشو اختهم بس لا ليه هسي بجبروني ادخلهم في حياتي عمار من فصلت فيهو الخط ما اتصل لي تاني الا اليوم التاني بعد هديت شوية
__ بطة
_ نعم
__ هديتي شوية؟
_ ايي
__ فكرتي في كلامي؟
_ ولا دايرة افكر حتى
__ يعني ما عندي خاطر عندك؟
_ عمار انت ليه ما حاسي بي
__ حاسي بيكي والله واكتر زول بس ديل في النهاية اخوانك اذا هم كعبين انتي ما تكوني ذيهم
__ انا الاصغر ولا هم
_ انتي
__ خلاص يسألو مني وهم الاولاد يعني يفتشوني ليه انا افتشهم
_ ما تفتشيهم بس كلميهم بزواجك
__ لالا
_ بطة
__ لالا
_ يعني ما حتسمعي كلامي؟
__ كويس خلاص عشانك بس
_ حبيبي انا . قفلت منو ومشيت لامي قولت ليها تشوف لي رقم هشام دا اخوي البكر فتشتو وادتني ليهو مشيت الغرفة كانت فاضية اتنهدت بتعب واتصلت رد لي
_ الو . من سمعت صوتو قفلت الخط وبقيت ابكي شديد هو رجع لي اتنهدت ومسحت دموعي ورديت
_ الو
__ اهلين
_ منو معاي . سكتا مسافة
__ همس
_ همس!!! . كأنو بستحضر في الاسم
__ شكلي ضاربة غلط معليش
_ لالا ما ضاربة غلط بس اتفاجأت
__ هشام؟
_ ايي . طوالي بكيت في الخط وقفلتو تاني رجع لي
_ همس
__ همممم
_ كيفك
__ كويسه الحمدلله
_ كيف صحتك
__ تمام
_ وماما كيفا
__ ما تسألني لو كنت مهتم كان جيت فتشتني ما تعمل فيها مهتم هسي اتصلت عشان امي جبرتني اتصل دايرة اقول ليك عرسي يوم..... لو كنت مهتم بس وكلم هجرس معاك . وقفلت واتصلت لعمار وخليت الخط فاتح وانا ببكي لمن جات صفا اتخلعت فيني وجات حضنتني
صفا: مالك حبيبتي . انا ببكي بس والخط فاتح
صفا: خلاص خلاص ما تبكي . لمن هديت شوية
همس: ماف حاجه
صفا: كيف ماف حاجه وانتي بتبكي بالطريقة دي
همس: اتصلت لهشام
صفا: هشام منو
همس: ياااخ ولد ابوي
صفا: اخوكي؟
همس: ياااخ ما اخوي
صفا: ما مشكله ان شاءلله قلبك ارتاح بس
همس: الحمدلله . عاينت لتلفوني الخط كان فاتح لسع رفعتو واتكلمت بغضب
همس: اها اتصلت كدا مرتاح وقلبك ارتاح ؟ . ما رد وقفل الخط
صفا: دا منو
همس: دا عمار
صفا: ليه اتكلمتي معاهو كدا
همس: هو الجبرني اتصل وانا ما دايرة
صفا: لو ما داير راحتك بجبرك؟ هو حيستفيد شنو يعني؟ . ضربتها في رأسي لقيت كلامي صفا صح
همس: ما كان اتكلم معاهو كدا
صفا: ارجعي صالحي وانا بمشي بعمل ليكي عصير هزيت ليها رأسي بمعنى تمام رجعت اتصلت ليهو
__ عمورة . ما رد لي
__ عمار معليش والله
_ انا داير انك تكوني مرتاحة وما تحسي بالذنب في يوم من الايام انو ما كلمتي اخوانك بزواجك
__ عارفة والله بعتذر على كلامي
_ عادي هسي كدا مرتاحة؟
__ اي ارتحت الحمدلله
_ جد؟
__ والله العظيم واتكلمت مع هشام
_ تمام هسي ارتاحي . وقفل مني وصفا جابت لي العصير شربتو ونومت
بعد اربعة ايام بالضبط من الحصل دا كنت قاعدة في الغرفة ومعاي البنات جات امي داخلة وقعدت جنبي ومسكت يدي استغربت وهي كانت بتبكي
همس: امي في شنو
امي: ماف حاجه
همس: كيف ماف حاجه وانتي بتبكي
امي: دايراكي تكوني هادئة تمام؟ . يداب خلتني اتوتر اكتر
همس: امي في شنو
امي: خلي عمار يتكلم معاكي
همس: ليه عمار في زول حصلت ليهو حاجة؟
امي: لالا
همس: احلفي يا امي
امي: والله ماف زول حصلت ليهو حاجه . مسكت تلفونها واتصلت لعمار
امي: عمار انت اتكلم معاها ما قدرت اقول ليها . ومدت لي التلفون
__ عمار في شنو
_ ماف حاجه بس ما دايرك تنفعلي ما بقدر اجيكي بس داير تحسي انو انا معاكي تمام
__ تمام احكي سامعة
_ في ناس حاليا في الصالون جو عشان يشوفوكي
__ ناس منو
_ اخوانك . قومت ضحكت
__ اخواني منو
_ بطة
__ والله ولا تحلم اني اطلع ليهم
_ بطة
__ عمار لا والف لا المرة الفاتت خليتني اتكلم معاهم قولت ما مشكله بس انو اشوفهم لا
_ كدا خليني احكي
__ اها
_ انتي هسي حتطلعي وتشوفيهم
__ولو ابيت
_ ماف حاجه اسمها لو ابيت هسي ذي الشاطرة تلبسي توبك وتطلعي ليهم كان نفسي اكون معاكي في اللحظة دي بس ما بقدر بس اتخيليني معاكي ولمن تتكلمي معاهم اسمعي منهم الحياة قصيرة في النهاية اخوانك وطوالي تعالي لي كالعادة تمام وانا منتظرك اوكي . اتنهدت الوحيد البقدر لي عمار
__ تمام
_ يلا حبيبي قومي . وقفل الخط اتنهدت تاني وعاينت لامي بكسرة كدا
امي: اها
همس: حأشوفهم
امي: الحمدلله هم في الصالون
همس: وتاني معاهم منو
امي: براهم الاتنين هشام وهجرس
همس: تمام بس انا ما مسؤولة من اي حاجه حتحصل
امي: تمام . لبست شرباتي وجونتاتي وحمدت ربي اني وقفت دخان عندي اسبوع وشغالة مرطبات لبست توبي وطلعت وكنت متوترة شديد قربت ارجع تاني ثبتا وقفت في باب الصالون مسافة طويلة بتنفس بعمق عشان ما ابكي ضربت الباب ودخلت طوالي قامو فوق وقفو انا وقفت ورا خايفة اتقدم
همس: سلام عليكم
الاتنين: وعليكم السلام . وسكتنا انا ما عارفة اقول شنو ولا هم عارفين يقولو شنو بعد زمن
هشام: ما حتسلمي علينا . جيب قريب من هشام مديت ايدي ليهو جراني عليهو وحضني بقيت ابكي بصوت وهو بقى يبكي وهجرس جا من ورا حضنا يعني انا في النص بينهم وبنبكي التلاتة حاسة بحاجة غريبة اني ببكي في حضنهم عمري ما عيشت انو عندي اخوان كنت وحيدة دايما عدينا فترة ونحنا بنبكي بعدها زحيت منهم وقعدت في السرير لانو حسيت رجولي ماتو
هشام: همس
همس: ما همس انا يداب اتذكرتو انو انتو عندكم اخت
هجرس: ما كدا يا اختي
همس: انا ما اختكم نهائي انا اخواني ماتو مع ابوي سوا
هشام: ما تقولي كدا
همس: بقول والله لانو صح من ابوي اتوفى طوالي مشيتو ولا سألتو مني انا بوفاة ابوي ضهري اتكسر لانو عكازي في الحياة راح وانا كنت صغيرة وفقدان ابوي كان حار شديد قولت عندي اخوان حيسندوني ويعالجو ضهري الاتكسر دا بس طلع ما عندي اخوان نهائي الوحيد الوقف جنبي عمار كان اب واخ بالنسبة لي عوضني بمكانتكم هسي انا ما محتاجاكم جنبي
هشام: بس نحنا محتاجينك . قومت ضحكت وانا ببكي
همس: هسي بذمتك يا هشام لو ما اتصلت ليك كنت حتتذكرني ما تكذب على روحك ساي
هجرس: همس اسمعينا
همس: ما دايرة اسمع زول منكم . جيت اقوم اطلع هجرس ثبتني ورجعني محلي وقعدني وقعد تحت وانا وفوق ومسك الايادي حقي طوالي لفيت وشي للجهة التانية عشان ما اعاين ليهو
هجرس: همسة اخوانك غلطانين ما بتغفري ليهم؟
همس: الله بغفر بس انا ما بغفر ليكم نهائي انتو جدعوني ومشيتو كأني حاجة كعبة كدا انا المفروض كان امانة ابوي ليكم . هشام رجع يبكي بسبب كلامي دا قام جا قعد جنبي وختا رأسي في صدرو رجعت ابكي تاني
هشام: والله انتي امانة ابوي لينا واخر ذكرى منو
همس: بس انتو ما حافظتو عليها لا انا ولا ابوي مسامحينكم . هجرس ختا رأسو في رجولي وبقى يبكي رجعنا نبكي تاني من اول وجديد
هشام: همس عارفين انو اهملناكي وحقك علينا ماف سبب يخلينا نبرر بيهو وليكي العتبة حتى ترضي علينا
هجرس: ما حتسامحي اخوانك؟
همس: نهائي انا اخواني ماتو زمان قولت ليك وما مسامحاكم نهائي . زحيت منهم وطلعت من الصالون ودخلت الغرفة رقدت في السرير وضميت روحي علي وبقيت ابكي لمن حسيت رأسي دا انفجر وماف زول قرب مني الا جات وسام مدت لي التلفون وختتو جنب رأسي
وسام: عمار في الخط . ما رديت ليها فتحت الاسبيكر
وسام: عمار فتحت الاسبيكر . ومشت
عمار: بطة . ما رديت دموعي بس كانت نازلة
عمار: انا اسف على الحصل حقك علي ما كان اخليكي تواجهيهم براكي بس بتي قوية عارف انا حتى لو انا ماف بتقدر تواجه كيف
همس: ما عافية ليك . دوست قفلت الخط ورجعت ضميت جسمي علي اكتر وبقيت ابكي لمن حسيت انو خلاص الفيني انتهى غمضت عيوني وحاسة رأسي حينفجر بقيت صامتة بس لمن قومت صليت وبقيت ابكي في المصلاية و رجعت رقدت ابيت اكل حاجه ولا حتى فتحت خشمي مع زول نهائي لحدي اليوم التاني وسام جابت لي التلفون ومدتو لي عرفت انو عمار حمرت ليها ختت لي التلفون في رجلي بالراحة ومرقت
_ في حاجه تانيه؟
__ اجي؟
_ تجي وين
__ اجيكي في محلك
_ ما حيخلوك
__ ما بهمني زول وتاني حاجه انتي مرتي ولمن تكوني محتاجاني ماف حاجة حتوفقني بس انتي قولي لي تعال . بكيت تاني لانو دا بس سندي في الدنيا بعد ربنا
_ عمار تعال
__ مسافة السكة بس حبيبي . انتبهت اني محبوسة
_ لالا ما تجي
__ متأكدة؟
_ ايي ما صح انك تجي
__ خلاص حنكون اقوياء صح؟
_ ان شاءلله
__ اها عملتي شنو مع اخوانك
_ ما سامحتكم وهم رجعو بخيبة امل
__ بس هم ما رجعو . اتخلعت
_ كيف يعني
__ قاعدين وحيحضرو عرسك
_ احلف
__ والله وهم حيسلموكي لي
_ لالا ما بقبل بحاجة ذي دي خليهم يرجعو انا البسلمني اعمامي
__ متأكدة ما دايرة اخوانك؟ عشان اتصرف واطردهم . سكتا مهما عملت ديل اخواني ما بقدر امحي الحاجة دي
طلعت برا الغرفة بس في الحوش اتقابلت مع هجرس عاين لي وعاينت ليهو وطوالي اديتو ضهري ورجعت الغرفة ما طلعت منها نهائي
همس: للان قاعدين؟
امي: منو
همس: اولاد ابوي
امي: طلعو قبل شوية
همس: وين
امي: عمار داير يتكلم معاهم
همس: خلي يتكلم معاهم ويطردهم
امي: ما دايراهم؟
همس: نهائي
امي: كلامك دا ورا قلبك بس . سكتا لانو بالجد ورا قلبي وجاني الفضول اعرف عمار حيقول ليهم شنو ........
_____________
من جانب عمار
اتصل لهشام وقال ليهو انو داير يقابلو هو واخوهو وحيجي يسوقهم من البيت بالفعل وصل واتصل وطلعو ليهو يعني ما دخل البيت لانو ممنوع منو وهو حاليا مع عمو مصطفى في البيت بعد ساقهم مشى بيهم بيت عمو وسلمو على ناس البيت ودخلو الصالون
عمار: عارف انو همس ما اتقبلت وجودكم
هشام: لسع زعلانة
عمار: ليها الحق انتو ما حصل سألتو منها دايرين تستقبلكم بالاحضان؟ . سكتو
عمار: خلي همس انا ما متقبل وجودكم لانو وجودكم بسبب الالم لهمس ودا انا حاجة ما برضاها نهائي
هجرس: والله ما قاصدين نسبب ليها الالم
عمار: همس دي من ابوها اتوفى انا كنت مسؤول منها حتى بتقول لي ابوي كان المفروض انت يا هشام تأخد المكانة دي لانها وحيدة ابوك . هشام بكى
عمار: دي اخر ذكرى واخر ريحة من ابوكم بس ما حافظتو عليها وين كنتو لمن كانت محتاجاكم جنبها خليتوها ومشيتو مع امكم ما قولنا حاجة بس كان تسألو منها همس لمدة سنتين كانت كل يوم بتسألني وين هشام وين هجرس مشو خلوني ما حيجو تاني؟ابوي برضو مشى خلاني وهم مشو برضو كنت صغير انا ذاتي بس كنت بخت ليها اعذار انو مشيتو عشان تدرسو وحترجعو لحدي فقدت الامل وبطلت تسأل عنكم وعشان كدا ما بترد عليكم في الاعياد
الاتنين قامو يبكو
عمار: وهسي جايين ببساطة كأنو ما حصل حاجه وما عندكم مبرر وين كنتو في طفولتها وين كنتو في مراهقتها خلو دا كلو انتو عارفين انو همس قبل شهور بس مشت الموت وجات راجعة . اتخلعو
هشام: كيف يعني
عمار: عملت حادث ودخلت في غيبوبة خمسة شهور وماتت سريريا الا سفرناها سوسيرا واتشلت شهور وين انتو من دا كلو . كانو مخلوعين و كانو ببكو بس
عمار: يعني عادي كان تسألو دا اذا اتذكرتوها بس حنقول ليكم اختكم دي ماتت ليها شهور
هشام: بعيد الشر
عمار: همس دي بالنسبة لي خط احمر امها ما بخليها تسألها وكنت اب واخ وصاحب بالنسبة ليها وحاليا زوج وحأكون دايما بس دا ما بمحي وجودكم نهائي مهما حاولنا
هشام: ما حتسامحنا
عمار: انتو لو محلها حتسامحوها؟
هجرس: مستحيل طبعا
عمار: خلاص ما تتوقعو منها انها تسامحكم بس دي بتي وبعرفها قلبها طيب شديد حتسامحكم
هجرس: عليك الله حتسامحنا؟
عمار: حسسوها بوجودكم اضغطو عليها بس لو انقطعتو منها تاني انا بنفسي بقطع عمركم من الدنيا
هشام: تاني ما بتحصل والله
عمار: حأساعدكم بس عشانها هي ما عشانكم
هشام: ما قصرت والله
عمار: تمام . قعدو شوية وطلعو وعمار رجعهم للبيت ورجع
_____________
من جانب همس
قضيت اليوم عادي جدا في الغرفه بس عشان ما اطاقش مع هشام او هجرس ما حابة اشوفهم لحدي اليوم التاني الصباح اتصل لي عمار
__ بتي الليلة اصبحت كيف
_ الحمدلله ابوي وانت
__ الحمدلله . سكت مسافة
_ عندك كلام عاوز تقولو صح؟
__ امممم ممكن تقولي كدا
_ والكلام عن هشام وهجرس صح؟
__ امممممم ممكن برضو تقولي كدا . قومت ضحكت
_ وانت عارف الفي قلبي صح
__ الفي قلبك انا بس . قومت ضحكت شديد
_ ايي انت بس
__ يلا هسي بتي حتقوم ذي الفالحة تشيل صبارة الشاي وحتمشي حتشربها مع اخوانها موش صح؟
_ لالا ما حيحصل
__ بت ابوها
_ لالا
__ سكرة . كنت كاتمة الضحكة
_ لالا
__ السمحة ست البنات
_ لالا
__ عسولتي . قربت اضحك
_ لالا
__ بسبس . هنا ضحكت
_ ابوي ياااخ
__ تمبوشة . ضحكت شديد
_ عمار خلاص
__ اها قولتي شنو
_ انا ما دايرة ياااخ
__ خمسة دقايق بس ان شاءلله كبي ليهم الشاي وخليهم ليهم
_ ماام
__ هسي بعد الدلع دا كلو تخزليني؟
_ لالا
__ يلا امشي وتعالي وريني كبيتي ليهم سكر ولا ملح . قومت ضحكت
_ كويس
__ في انتظارك
_ عمار
__ عيون عمار
_ انا بحبك والله . وقفلت الخط يااااخ عمار دا روحي ونفسي ما عارفة بدونو كان حيحصل لي شنو كان العوض بالنسبة لي واحلى حاجة حصلت في حياتي والحلو فيهو انو بعاملني كطفلة بس عمري ما كبرت في نظرو وما نفسي اكبر
قومت شيلت الشاي ومشيت ليهم في الصالون اتفاجأو بي بس صبحت عليهم عادي وقعدت عشان اكب الشاي ليهم
همس: سكرك كيف
هشام: منو فينا . سكتا وعاينت ليهم الاتنين
همس: هشام . طوالي قام جا قعد يميني
هشام: عادي
همس: وانت يا هجرس . طوالي جا قعد شمالي
هجرس: طاعم . طبعا وتروني لمن بقيت قاعدة في نصهم كدا كنت بحاول اكون ثابتة عشان عمار وبحاول اتجاوز ليهم عشان عمار لو ما عمار عمري ما بلين ليهم بس عمار بستاهل اتنازل عن حركات كتيرة عشانو وهسي متأمل مني اتصالح مع اخواني
كبيت لنفسي الشاي معاهم وبقينا نشرب وهم بدو يسألوني شوية اسئلة شوية اجاوب وشوية اسكت
هجرس: همس عارفة انو هشام بخاف من الكلاب وحبيبتو الاولى خلتو عشان الحاجة دي . عاينت لهشام وفكيت الضحكة وبقينا انا وهجرس نضحك فيهو
هشام: هسي في داعي للحركة الوسخة دي . ضحكني ردو شديد بقيت اضحك
هجرس: تكبر تنسى . قومت طبطبت على ايدو
همس: ما تخجل حتى انا بخاف من الكلاب اااه بس نسيت انا بت وعادي . التفت على هجرس وضربنا ايادينا وبقينا نضحك تاني
هشام: براك جيبتو لنفسك يا هجرس اتحمل . وفجأة فتح تلفونو وهجرس بقى يقالع فيهو وانا في النص بينهم
همس: في شنو الحاصل شنو
هجرس: ولا حاجه
هشام: ما دايرني افضحك قدامها . قومت ضحكت
همس: عادي يا هجرس انا ذي اختك . جراني سلم علي في رأسي
هجرس: انتي اختي وتاج رأسي . اتأثرت وابتسمت
همس: خلاص اشوف الفضيحة
هجرس: ما من هسي كدا يا هشام بتخرب سمعتي قدامها من اول يوم
هشام: القبل شوية عملتو دا ضيع شرفي قدامها . هنا فكينا الضحكة مع هجرس ياااخ هم ظريفين شديد بقينا نتونس ونضحك ونهظر كأنو ما لي سنين منهم وحلفو ما اطلع من الصالون قاعدين بس لمن زمن الفطور جا
همس: اطردوني بعد دا
هشام: لو علينا نقعد نعاين فيكي كدا للصباح
همس: ايي طبل يا سيدي طبل . قام ضحك
هشام: ما تطبيل والله خلاص بعد الفطور عندي ليكي حاجه حلوة جيبتها بس كنت عاوز انك ترضي بالاول عشان تحسي بحلاوتها . قومت ضحكت
همس: خلاص لنا لقاء بعد الفطور وانت يا هجرس ما جيبت لي حاجه معاك؟
هجرس: هسي انا براي ما حاجة؟
همس: عند حبيبتك الكلام دا
هشام: الجبهة طارت . وضربت ايدي مع هشام وضحكنا وطلعت رجعت الغرفة مبسوطة شديد يداب حسيت انو عندي اخوان بالجد
امي: شايفاكي اتصالحتي مع اخوانك
همس: امممممم
امي: الحياة قصيرة يا بتي احتمال بكرة واحد فيكم يموت والتاني زعلان يلا مدام جو واعتذرو سامحيهم وعيشي مبسوطة بين اخوانك
همس: ان شاءلله . شيلت تلفوني واتصلت لعمار
__ لالا انتي نسيتيني عديل كدا
_ انسى روحي وما بنساك
__ مع انها تطبيلة بس عجبتني . قومت ضحكت
_ والله ما تطبيلة
__ خلاص كويس اها الحصل شنو
_ وديت الشاي وشربت معاهم وشبه اتصالحنا
__ يعني اتكلمتي معاهم
_ ايي وهظرنا شوية
__ لا من هظرتو معناهو الموضوع ماشي تمام بس ليه انا غيران هسي
_ لانو ما اتعودت انو يكون في زول جنبي غيرك
__ خلي عرسنا يجي سريع عشان اشيلك منهم لو قعدتي تهظري معاهم كدا انا حأجن ياااخ . قومت ضحكت
_ لالا يااخ
__ والله ياااخ هسي انا الخلاني اصالحكم شنو
_ البتعملو بأيدك بغلب اجاويدك
__ اتكلمي بس ما تهظري
_ ديل اخواني
__ خوخة . قومت ضحكت جد جد عمار كان غيران شديد وجادي كمان بقيت اضحك بس وانا بجاكرو وبحكي ليهو بالمواقف الحصلت وهو كل شوية همس خلاص همس خلاص وانا ازيد زيادة دايرة اشوف غيرتو واتمنيت اكون قدامو عشان اشوف تعابير وشو.......
شكرًا لأنك معي، تحول إكتئابي إلى ضحكات و أتجاوز بحبك تعب الأيام لتفلت جميع الأيدي إلا يديك❤