رواية اللون السابع للحب الفصل الخامس والعشرون 25 والسادس والعشرون 26 بقلم شذى عبد المكرم
بديت اجهز لزواجي خلاص لانو كان باقي ليهو اسبوع بس وعلاقتي مع اخواني اتصلحت وكانو قاعدين عشان يحضرو العرس كنت مبسوطة بالحاجة دي ومرا الاسبوع سريع وكنت متحمسة لزواجي وعملت كل المراسم على اكمل وجه وقبل العرس بيوم ذي المغرب اخواني كانو عاوزيني مشيت ليهم في الصالون قعدت في نصهم
هشام: بكرة حنسلمك لعمار . ابتسمت ليهم
همس: امممم
هشام: متأكدة من اختيارك؟
همس: عمار ما اختيار ابدا
هجرس: يعني نطمن عليكي؟ . ختيت يدي في يدو وضغطت عليهو
همس: لو يوم جيتكم ببكي او خلي ببكي لو موتا وقالو عمار السبب اعرفو انو انا الغلطانة
هشام: هسي كدا خربتي لينا شكلة مع ابو النسب . قومت ضحكت
همس: والله الا تتشاكلو مع عمار في حاجه تانية غيري انا
هجرس: كدا انا اطمنت عليكي
همس: خليك مطمئن دايما عمار ابوي قبل ما يكون راجلي
هشام: والله اسف بالجد يا اختي المفروض كان اكون انا ابوكي بس . قاطعتو
همس: هشام ما تفتح جروح ما عندها دواء . ورقدت في كتفو
همس: هسي انتو جنبي وحتكونو دايما موجودين صح؟
هجرس: ما حنخليكي الا لو انتي ابيتينا
همس: الحمدلله عشان لو اتشاكلت مع عمار بقول ليهو بشتكيك لاخواني . وضحكنا وتاني بكينا
هشام: خلاص ما تبكي يا السمحة حبيبة اخوانك
همس: اها يا هشام ما داير تتزوج
هشام: لو عندك لي عروس انا موافق
هجرس: بكرة تعرف انو بخاف من الكلاب بتخليهو وطبعا انا بوريها لانها بت ناس وانا ما برضى فيها . ضحكنا عليهو
هشام: انا لو ضرتك ما بتعمل فيني كدا . وضحكنا وقعدت معاهم شوية وطلعت اتصلت لي عمار اخر بالليل
__ بكرة حأعقد عليكي للمرة التانية
_ جد؟
__ موش كان نفسك تعيشي لحظة العقد؟
_ ايي
__ خلاص بكرة حأسمعك عقدنا للمرة التانية . كنت مبسوطة بالكلام دا لانو لمن قولت لعمار انو نفسي اعيش لحظة العقد مرة تانية كنت مجرد احساس وافتكرت عمار نسى بس لا عمار مستحيل ينسى تفصيلة في حياتي
_ بكرة حينكتب اسمي عليك للمرة التانية
__ لو علي اكتبها كل سنة . يااخ عمار كلامو حلو لمن بخليني ادمع
_ عمار
__ لو عارفة مستني بكرة بفارق الصبر عشان اوري الناس انجازي في الحياة واني اخدت الحاجة البحلم بيها
_ انا كنت حلم بالنسبة ليك؟
__ كنتي دايما حلم واجمل حلم وبكرة حأحققو ان شاءلله
_ عمار انا ما مصدقة نهائي انو بكرة حأكون مرتك لانو في حياتي كلها ما ختيتها في بالي ولا فكرت فيها والبنات دايما بقولو لي تعاملكم كأنو راجل ومرتو كنت بسرح بعيد وبقول ليهم بس نحنا اب وبنتو
__ طول عمرك حتكوني بتي السمحة
_ وانت ابوي الغالي
__ عيون ابوكي يلا يالسمحة لازم تنومي عشان بكرة نبدأ مشوار عمرنا
_ ان شاءلله
__ تصبحي على جنة
_ وانت من اهلها يا رب . وقفلت منو وسرحت بعيد بحس كأنو الحصل دا كلو حلم وبكرة حأصحى منو بقيت افكر لو الحاصل دا حقيقة حياتنا حتكون كيف حيكون عندنا اطفال وعمار حيربيني انا واولادي مع بعض وبقيت اضحك لمن افكر انو حأتشاكل معاهم في عمار لانو ابوي قبليهم وعمار حتقيف مع منو فينا وبفكر اذا وقف مع اولادو اشيل توبي واقول ليهم خلي عمار ينفعكم وامشي لامي ابكي ليها وهي تضحك ويجي عمار واولادو يراضوني عشان ارجع معاهم بقيت اضحك على الخيالات دي لاني متأكدة حيحصل لانو عمار ملكية شخصية ما بقبل المشاركة فيهو اتنهدت بعد كوم التخيلات دي ودخلت الغرفة لاني كنت ورا البيت لاني فاضي لمن رجعت الغرفة لقيت فردوس مشتبكة في التلفون واكيد مع سفيان ضحكت فيها خلصت وجات مادة كرشتها لانها دخلت الخامس ونافخة جضومها ضحكت فيها
_ مالك مع سفيان
__ برفع الضغط ياااخ
_ معليش حبيبتي سفيان كدا اصلا
__ قال بكرة ما امشي الكوفير
_ لا بنختلف هنا اديني ليهو
__ لا خليهو اقتنعو بس ساومني . قومت ضحكت
_ اها المساومة على شنو
__ قال بعد الحفلة طوالي ارجع معاهو البيت يا اما ما امشي الكوفير عشان ما اتعب
_ امران أحلاهما مر
__ كأنو ما عندي رأي انا
_ اصلا في وجود سفيان الكل ما عندو رأي . وضحكنا
__ اين حقوق المرأة
_ اتعشو بيها قبيل . وضحكنا وبعدها نومنا لانو حيكون يومنا طوالي
صباح اليوم التاني كانت المناسبة والعقد والزفة مع بعض والدنيا جايطة وقالو حيعقدو من الصباح كنت نايمة في امان الله جات وسام
وسام: قومي يا بغل
همس: مالك يااخ . جات صفا
صفا: ملة التآخد يا بعيدة الناس دايرين يعقدو هسي وانتي ولا على بالك . فجأة قعدت وبقيت افرك في عيوني
همس: كان ينتظروني اصحى من النوم ياااخ . قامو ضحكو كلهم وانا لمن استوعبت قومت ضحكت معاهم وسريع غسلت وشي وجيت صليت كنت في المصلاية في نص الغرفة بدعي تلفوني رن قلبي عمل شح ورجولي بردو عرفت انو عمار
همس : وسام ناوليني تلفوني . ادتني ليهو
وسام: عمار بتصل الزمن دا ما ناوي يحضر عقدو ولا شنو
همس: حيسمعني العقد
وسام: وااااي اجرو يا بنات . ضحكت على ردت فعلها كلهم التفو حولي وانا في المصلاية وفتحت الخط وفتحت الاسبيكر وقفلت المايك وبقيت سامعين المأذون وانا ماسكة في ايد وسام وضاغطة عليهو وبقينا نسمع لمن خلاص المأذون اعلن الزواج والناس بتبارك انا كنت ببكي طول العقد بعدها البنات بكو معاي تاني وباركو لي كأنو اول عقد لي كل شعرة من جسمي قامت وحسيت بالبرد بس جواي كمية سعادة ما بتتوصف والبنات بدو يغردو شديد وانا لسع في مصلايتي ما قدرت اقوم كأنو جاني هبوط امي وعماتي عرفو من الزغاريد انو العقد تم والنسوان قامو يغردو برا يعني جو مبهج بشكل لا يوصف امي جاتني وقعدت تحت جنبي وبقت تبكي معاي
امي: عمار خلاص شالك مني يعني خلاني وحيدة . هنا مسكت فيها قوي وبقيت ابكي بشدة
همس: انا قاعدة
امي: بس حتمشي بيتك بس اوع من زحمة بيتك تنسي امك . والله بكتني شديد
همس: والله انسى روحي وما بنساكي انتي امي وابوي انتي عكازي في الحياة دي ما بخليكي ما عندي غيرك
امي: ربنا يسعدك في حياتك . سلمت على ايدها كتير وسلمت على رأسها وانا قلبي محروق انو حأخليها وراي ودي كل اسرتي ما فكيتها الا جو عماتي عشان يباركو لي حتى زحيت منها وانتهى جو المباركة وجا وقت انو اطلع للكوفير اتجهزنا انا والبنات وطلعنا للكوفير........
_____________
من جانب فردوس
من رجعت بيتي ملاحظة الراحة في وجه سفيان وكان مطمن اكتر وانا جنبو طول اليوم ما عارفة ليه ما واثق فيني ليهو الحق اذا انا ذاتي ما واثقة في روحي وسفيان عامل لي انضباط شديد واصلا لو ما سفيان الجنين كان نزل زمان بس عشان هو مخوفني ملتزمة والاحلى اهتمامو زاد بي لاني في بيتي هناك صعبة مع الناس
_ طبعا يا سفيان
__اها
_ عرس همس قرب
__ ما جديد . وهو مشغول بتلفونو
_ مالك بارد كدا يااخ واديني التلفون دا . جريتو منو عاين لي بنظرة طوالي بالراحة رجعتو ليهو
__ مالك انتي
_ انا بتكلم معاك المفروض تركز معاي وتتحمس معاي دا من آداب الحديث
__اقوم ارقص ليك يعني؟ . زعلني سكتا خليتو ورقدت واديتو ضهري
__ خلاص قومي بتفاعل معاكي
_ طلع لي من نفسياتي الكلام معاك
__ جنة
_ ما دايرة معاك كلام خليك في تلفونك احسن ليك مني . وسكتا خليتو ناداني مرتين ما رديت
__ قومي ما برضيني تنومي وانتي زعلانة . حاول معاي رجعت قعدت وعاينت ليهو منتظرة يحكي بقينا نعاين في بعض وفجأة ضحكنا في نفس الزمن
_ والله انت حالة ميؤوس منها الله يصبرك يا جنة
__ ما بتتقبليني كدا؟
_ ياااخ انا عمري كلو بعيشها معاك وانت كدا بس حن علينا شوية . قام ضحك
__ عيوني ليك هسي رضيانة؟
_ لالا سفيان بسألك
__ اسألي
_ انت زر الاعتذار عندك بايظ؟ . ضحك شديد
__ معليييييش يا ست البنات . وجضمني ابتسمت ابتسامة عريضة
_ كدا حلوين
__ اها ما حكيتي لي حتعملي شنو في عرس همس . قالها بطريقة حلوة ضحكني شديد وحمسني احكي ليهو بقينا نخطط نلبس اي لون وانا بقول ليهو بلبس فستان في المناسبة الفلانية وتوب في الفلانية ومرات هو يعترض ونتشاكل لمن نوصل لحل وسط
عرس همس وعمار جا وقررنا نرحل بيتنا انا وامي بعد توصيات كمية من سفيان
_ والله يا سفيان حفظت خلاص
__ نتمنى والله
_ قاصد شنو . ما رد واداني ضهرو ومشى ياااخ شخصية باردة وصلني بيتنا انا وامي
سفيان: عمتي ما تخليها تعمل حاجه لانو عارفة بتك . وعاين لي وامي ضحكت وانا مصدومة
منو
فردوس: سفيان!!
امي: كويس حأنتبه عليها
فردوس: دقيقه انا شافعة؟
سفيان: الشافع ذاتو احسن
فردوس: كويس يا سفيان شوف تاني البرجع معاك منو . وحمرت ليهو وامي تضحك وقامت دخلت جوا هو قرب من اضاني
سفيان: انتي قدر الكلام دا؟ . عاينت ليهو بطرف عيني ودخلت البيت وهو كان وراي سلم وطلع قال ماشي لعمار
مرت تفاصيل عرس همس على اكمل وجه ولقيت اخوان همس كانو ظريفين شديد بالاخص هشام شخصية فرفوشة ومرحة وطبعا انا دخلت الخامس كانت المقابلة بعد اسبوع عشان اشوف الخطر زال ولالا واشوف نوع الجنين واطمن
قبل العرس بيوم اتشاكلت مع سفيان
_ كيف يعني ما امشي الكوفير بكره
__ الواحد دا الما مفهوم في كلامي شنو
_ مستحيل طبعا لازم اكون جنب همس هي ما خلتني يوم عرسي
__ بس ما كانت حامل
_ سفيان تعال شيل طفلك دا مني
__ اربعة شهور بشيلو منك
_ لالا خلاص انا تعبت منو عامل منو شماعة على اي حاجه
__ ما حيغير قرار ماف مشي للكوفير
_ سفيان الله يرضى عليك
__ خلاص نتفق
_ اها
__ انو ترجعي معاي بكرة من الحفلة
_ بتهظر صح المفروض اقعد اسبوع لحدي البيت يرجع لطبيعتو
__ والله دا العندي اختاري . سكتا مسافة وانا دايرة ابكي لانو كلمتو وحدة
_ بمشي الكوفير بس سأخبر الله بكل شي . وقفلت الخط فيهو ونفخت جضومي من الزعل ومشيت لهمس اتكلمت معاها ونومنا
ضرب لي الصباح عشان يصبح علي
__ اها كيف اصبحتي
_ الحمدلله وانت
__ ما ناسي ليكي انو امس قافلة الخط في وشي
_ سفيان
__ نعم
_ طلقني
__ كدا اتنين . عصبت شديد وصرخت
_ سفيااان
__ كدا تلاتة . نسيت انو بكره الصوت العالي عضيت اصبعي
_ سفيان والله حاسة اني دايرة اولد بسببك
__ دا ما بغفر ليك
_ بحبك . سكت طوالي شكلي فصلتو بقيت اضحك براحة
__ هبلة بس بحبك . وقفل الخط في وشي والله ضحكت ضحك
عقدو الصباح والجو كان حلو وطبعا تفاصيل عرسهم كانت تحفة اصلا متوقعة من عمار ما حيقصر من ناحية همس وعمل ليها ذكرى حلوة وبعد الفطور مشينا الكوفير وبدو ليها الرسم وبعدها انا رسمت ذي العصر كدا اتصل لي سفيان
__ جنة لو همس دي جنبك زحي منها . براحة انسحبت
_ اها في شنو
__ والله ما عارف اقول شنو بس عمار دا مختفي . اتخلعت
_ كيف يعني
__ ما عارف والله من بعد العقد تاني ما ظهر وتلفونو قافل.......
26
اتصل لي سفيان وخلعني بخبر عمار دا قال لي
__ ما عارف والله من بعد العقد تاني ما ظهر وتلفونو قافل
_ ما فتشتو كويس؟
__ من بعد العقد بنفتش فيهو ما قادرين نوصل ليهو
_ هسي البحصل شنو
__ والله ما عارف يا جنة
_ حاليا همس بتجهز في روحها وراجلها مختفي
__ ما تكلميها لمن نشوف اتصرفي عادي
_ تمام وانت كلمني كل شوية
__ تمام وانتي ما تتوتري تمام؟
_ حاضر . قفلت منو واتنهدت عشان اطرد الطاقة السلبية ومشيت للبنات لقيتها بضحكو مع ست الكوفير بقيت اعاين لهمس ووشها كان منور كيف ما ينور وهي حيزفوها لحب حياتها بس ان شاءلله عمار يظهر لانو دي حتكون صدمة لهمس مشيت قعدت جنبهم
همس: عايني الرسمة بقت حلوة كيف بعد الغسيل
فردوس: كيف ما تكون حلوة وهي في جسم همس . طوالي حضنتني من نصي ختت رأسها في كتفي
همس: حبيبي انا
فردوس: يا عالم انا جوعانة . ضحكو فيني
همس: طبيعي في الحالة دي انتي
فردوس: انا حامل ما تنسو
وسام: يلا دي الحاجة المستحيل ننساها لانو بسبب حملك دا شوفنا عجايب . قومنا ضحكنا وبدو ليها اجراءات الزينة من الحمام المغربي وكل تجهيزات العروس وانا كل شوية اتصل لسفيان عسى ولعل عمار يكون ظهر بس لا ما ظهر
_ هسي يا سفيان البحصل شنو وهمس خلاص بقت شبه جاهزة
__ ما تكلميها لمن احس انو الموضوع خلاص ما فيهو امل بخليكي تكلميها
_ وانا من التوتر ما قادرة اجهز حتى
__ ما تكلمي زول اتجهزي وخليها تجهز ونشوف البحصل شنو
_ تمام . يداب خوفت اكتر بس بحاول ابين عكس كدا همس حست بي وسألتني قولت ليها تعبانة بس وبدو ليها التجهيزات ولبست الفستان الابيض وكانت اميرة فيها كانت محجبة والحجاب فيها هيبة بقينا نعلق فيها وانا قلبي واجعني
وسام: الله الله عليك يا باشا . وهي تضحك بس
صفا: هسي الجمال دا كلو لعمار براهو حرام ياااخ
همس: ما بتستاهل صح؟
صفا: والله لو كان زول تاني كان بقول ما بستاهل بس عمار بستاهل عشرة مرات والله
همس: امممممم
ست الكوفير: الا اشوف عمار دا واحكم سمعت عنو كتير الليلة . همس ضحكت
همس: كويس حتشوفيهو شوية كدا . والتفت لي
همس: جنة كدا شوفي سفيان ما قربو؟
فردوس: هسي كنت بتكلم معاهم شوية كدا ويتحركو
همس: تمام اها انتي ما علقتي . ولفت لي بالفستان قومت بكيت جاتني حضنتني
همس: جنة ما تبكي عشان حتبكيني معاكي وعمار حيبكينا الاتنين . قومت ضحكت
فردوس: خلاص خلاص بس طالعة اميرة ربنا يحميكي دقيقة احصنك . سوقتها وقعدتها وبقيت احصن فيها ودموعي بتنزل بقيت ادعي ان شاءلله عمار يظهر عشان ما يكسر فرحتها دي بعد خلصنا قومت منها ومشيت اتصلت سفيان
__ سفيان ما قادرة اشوف همس بالشكل دا وود عمك مختفي
_ لازم تعرف بعد دا
__ انا ما بقدر اقول ليها
_ خلاص انتظري بكلم هشام يجيكم وهو يكلمها
__ خلاص تمام . ورجعت بقينا منتظرين .........
___________
من جانب همس
اتجهزت وكنت منتظرة عمار عشان يجي يسوقني كنت متوترة شديد والبنات بطبلو لي والجو حلو واثناء ما نحنا منتظرين جا هشام داخل قلبي عمل شححح وقف مسافة ورا وانا وقفت فوق قرب مني وحضني وبكى وانا بكيت معاهو وبقيت ماسكة في اخوي سلم علي في رأسي
هشام: ربنا يحفظك يارب
همس: ربنا يخليك لي
هشام: تعالي يا ست البنات . ساقني من ايدي وقعدني في المقعد ولسع ماسك ايدي وجات فردوس قعدت بالجهة التانية ومسكتني برضو
هشام: دايرك تسمعيني براحة .
فردوس: ما تتوتري حاضر؟ . يداب حسيت بالخطر اول حاجه جات في بالي عمار
همس: عمار حصلت ليهو حاجه؟ . هو عاين لي مسافة وفردوس قامت بكت حسيت بخوف
هشام: ما حصلت ليهو حاجه . قلبي برد
همس: الحمدلله اها الحاصل شنو
هشام: بس عمار مختفي من الصباح . عاينت ليهو بدون تعابير
همس: كيف يعني
هشام: من بعد العقد طلع وتاني ما رجع وتلفونو قافل وللان ما رجع
همس: بتهظر صح؟
هشام: يا ريت والله
همس: لالا عمار حيجي يسوقني انا منتظراهو حيجي
فردوس: همس
همس: ما همس نهائي ما همس عمار كويس
هشام: ان شاءلله يكون كويس
همس: وانا لابسة ليهو الزفاف متأكدة حيجي . فردوس تبكي ما قدرت تقول حاجه
همس: هشام اتصل ليهو احتمال قبيل تلفونو قفل كهربة . جراني عليهو وختا رأسي في كتفو يداب حسيت بالمصيبة انفتحت في البكا والبنات بقو يبكو كيف يعني عمار مختفي لالا مستحيل عمار لو حصلت ليهو حاجه انا بموت عديل زحيت من هشام
همس: هشام عليك الله قول لي دا مقلب وعمار كويس
هشام: والله متمني اقول ليكي كدا واطمنك
همس: انا دايرة ابوي هسي دا . وسام قربت مني وقعدت على ركبها ومسكت اياديي وهي دموعها في عيونها
وسام: ابوكي حيكون كويس
همس: وسام
وسام: ما تبكي خلاص حيظهر متأكدة انا
همس: لو ما حاصلة ليهو حاجه مستحيل يختفي وهو بعرف اني منتظراهو
وسام: بكون حصلت ليهو ظرف وديل كلموكي عشان تكوني في الصوره
هشام: ايي
همس: وسام ابوي لو حصلت ليهو حاجه انا بموت . ضغطت على اياديي
وسام: ابوكي كويس . بقيت ابكي بس وهم بحاولو يطمنو فيني وجزء ببكي معاي وانا قلبي واجعني ما بهمني العرس ولا بهمني شكلي حيكون كيف بس خايفة على عمار بقينا قاعدين بس فجأة وقفت فوق ومسكت فستاني ودايرة اطلع هشام ثبتني
هشام: ماشة وين
همس: ما بقدر انتظر هنا
هشام: حتمشي وين بس وحتلقي وين ما تتصرفي ساي يا همس
همس: ما عارفة ما عارفة
هشام: خليكي قاعدة ما عندنا حل تاني ننتظر بس
همس: ولو ما جا يا هشام؟ . ما قدر يرد علي البنات رجعوني مكاني وبقيت سرحانة بس وببكي..........
___________
من جانب عمار
بعد عقد على حب حياتو والاهل باركو ليهو جاهو اتصال من رئيسو في المكتب كان اتصال ضروري طوالي ركب عربيتو وطلع ما كلم زول عشان ما مستاهل يشوف رئيسو دايرو في شنو ويرجع وصل المكتب كدا تلفونو ضرب كان سفيان داير يرد كدا التلفون قفل قال دا الناقص والله دخل مكتبو وختاهو في الشاحن ودخل للمدير وسلم عليهو
عمار: اتفضل
المدير: الف مبروك اول حاجه
عمار: الله يبارك فيك
المدير: والله ما عارف اقول ليك شنو والموضوع حساس شديد
عمار: في شنو
المدير: متذكر اخر اجتماع سري لينا
عمار: ايي
المدير: حصلت تطورات في المشروع
عمار: ان شاءلله ايجابية؟
المدير: فوق المتوقع
عمار: الحمدلله
المدير: بس لازم الملفات توصل الفرع الفي ........
عمار: اها
المدير: ولازم توصل الليلة عشان اجتماعو الساعة 3 ولازم تحضرو
عمار: بس انا عريس الليلة وعروستي حاليا في الكوفير ومنتظراني
المدير: عارف والله بس انت واسعد الوحيدين العارفين ولازم وضروري يكون واحد منكم حاضر واسعد سافر
عمار: والله دا طلب صعب شديد ما بقدر انا
المدير: والله عارف بس لو نجحنا فيهو حيحصل ليك ترقية حتكون مدير القسم
عمار: انا ما بهمني الترقية بس انا عريس وعرسي الليلة والاجتماع انت بتقول الساعة 3 وما جوا المدينة كمان لازم اسافر ليهو
المدير: عارف والله
عمار: ما ممكن اعملو اونلاين؟
المدير: لازم الملفات الاصلية للتوقيع . عمار سكت والموضوع دا كبير ما بقدر يخاطر وهمس منتظراهو اي حاجه ولا همس وسعادتها وهنا المدير بضغط عليهو شديد
المدير: خلص وتعال راجع بتلحق المسافة ساعة ونص
عمار: والله ما عارف اقول شنو . المدير ضغط عليهو لمن وافق وطلع وشال الملفات طلع وركب عربيتو وصل نص المسافة قال يتصل لسفيان عشان يغطي ليهو عارف حيجوط فيهو بس ماف طريقة فتش تلفونو ما لقاهو اتذكر انو نساهو في الشاحن في مكتبو ضرب الدرسكون وقال والله دا بس الفضل وما حافظ رقمو وما داير يكلم زول غير سفيان واصل طريقو لانو وصل نص المسافة تاني قال يرجع صعبة لمن وصل كان بجلابيتو حقت العقد ماف طريقة وصل المكتب الفرع التاني وبدا في الملفات وظبطتهم وكلمهم انو لحالة طارئة لازم الاجتماع يكون الساعة 2 واقفو ودخل الاجتماع استغربو انو لابس جلابية كان المفروض يكون لازم رسمي اعتذر ليهم وقال لي بطريقة ظريفة انو جاي من عقدو ضحكو وباركو ليهو والمدير بتاعت الفرع التاني
المدير: ما شاءلله كونو من عقدك تجي عشان شغلك دا تقدير للشغل
عمار: شكرا . وبدا الاجتماع وشرح ليهم واتناقشو فيهو بكل التفاصيل وعجبهم شديد ووقعو العقد بنجاح والمدير صافحو
المدير: والله اتشرفنا اني اتعاملنا مع مهندس شاطر زيك
عمار: شكرا
المدير: لو قدمت ليك عرض انو تتنقل للفرع دا وتكون رئيس احد الاقسام
عمار: هسي انا ما بقدر افكر بس بفكر وبجيك قراري
المدير: موافق ويلا الحق عرسك . قام ضحك وودعهم وشال الملفات وطلع لقى الزمن اتأخر شديد والاجتماع جرا وقت شديد والمغرب خلاص داخل ساق سريع وقفو في البوابة تبع المدنية وجرجرو معاهو بس خليهو دخل اول حاجه مشى بيتو الجديد ختا الملفات تاني اتذكر انو نسى تلفونو في المكتب من قبل ما يسافر وصلى المغرب والعشا كان قرب خلاص ركب عربيتو مشى البيت الكبير دخل لقى البيت قايم عليهو لقى سفيان
عمار: سفيان . سفيان اتفاجأ فرح انو عمار بخير تاني هاج فيهو
سفيان: انت من الصباح وين يا حيوان قلبت الدنيا عليك
عمار: والله الحصل كتير
سفيان: انت ناسي انو عرسك الليلة
عمار: عارف والله
سفيان: والله كويس انك متذكر وهسي العشا دخل وانت لسع بجلابية العقد وين تلفونك وليه قافل
عمار: قفل كهربة ونسيتو في المكتب
سفيان: المكتب؟
عمار: هسي خليني اجهز بحكي ليك في الطريق
سفيان: والمخلوقة ديك ماتت من البكي هناك
عمار: منو
سفيان: منو كيف يعني حتكون منو اكيد همس
عمار: قولتو ليها شنو
سفيان: انو انت مختفي من الصباح . ضرب وشو
عمار: ليه انتو عارفين انو همس حساسة
سفيان: كان تفكر كدا قبل ما تختفي هسي اتأخرنا ورح ونتصل ليهم في الطريق . وقامو جارين وركبو العربية عشان يمشو الصالون الحاجزين لعمار فيهو وسفيان اتصل لفردوس
سفيان: جنة اديني همس في زول داير يتكلم معاها
فردوس: تمام . وقام مدا التلفون لعمار........
____________
من جانب همس
قلبي اتقطع من البكي وكل ما يمشي الوقت بهم اكتر وهشام للان معاي جنة تلفونها اتصل مدت لي التلفون
فردوس: سفيان قال في زول داير يتكلم معاي . مسكت التلفون بأخر نفس
عمار: بتي . من سمعت صوتو بكيت زيادة
همس: عمار . كلهم اتخلعو انو عمار ظهر من قولت اسمو
عمار: ليه البكي ياااخ
همس: انت كنت وين
عمار: والله اسف انو اتأخرت عليكي
همس: انت كويس؟
عمار: انا كويس
همس: الحمدلله
عمار: ما تبكي خلاص ساعة كدا وبكون عندك
همس: متأكد انو حتجي؟
عمار: معقولة يا قلبي انا مستني اللحظة دي سنين
همس: امممممم
عمار: عارف انك خوفتي بس خليني اجي وكل حاجه حتكون تمام اوكي حبيبي؟
همس: منتظراك
عمار: ساعة وحأكون عندك . وقفلت منو يداب بكيت كويس حتى سكتا
هشام: كان وين هو
همس: ما كلمني بس الحمدلله انو كويس
هشام: الحمدلله
فردوس: الحمدلله انو ظهر والميكب بقى في خبر كان
وسام: هسي عمار دا وقت يختفي فيهو عاينو وشوشنا بقت كيف . عايننا لبعض الميكب كان حاجة كدا استغفر الله ضحكنا على مناظرنا
فردوس: يلا يا هشام مستغيين عن خدماتك
هشام: حترجعو لي انا الشين دا بس
همس: هوي يا جنة اخوي دا ما برضى فيهو
هشام: حبيبتي انا . ودعنا وطلع وست الكوفير تعبت معانا تاني صلحت لينا الميكب كلنا
ست الكوفير: عاد عمار ما بسألو
همس: خلو علي انا
وسام: انتي؟ من يجي داخل قلبك حيموت
همس: حيحصل والله . وضحكنا
صفا: الحقوني رموشي وقعت . عاينا ليها الرموش الركبتو ما ثبت كويس مع البكي وقع فكينا الضحكة فيها
ست الكوفير: ياااخ انتو عسل
همس: دا من ذوقك حبيبتي
ست الكوفير: جنة اقعدي تحت عشان ما تتعبي وسفيان يقتلنا كلنا . فكينا الضحكة كلنا لانو حتى ست الكوفير عرفت سفيان من كلامناا ليها من الصباح كيف دقيقتين
فردوس: حتى انتي
ست الكوفير: دا العرفتو انو راجلك صعب
وسام: والله لو شوفتي في الطبيعة حتخافي اكتر حاجة كدا استغفر الله بس
فردوس: انتو بتهينو في راجلي وانا ما بسمح بكدا نهائي انا بس مسموح لي اهينو . ضحكنا
ست الكوفير: والله الليلة رغم الحصل غيرتو لي جو
فردوس: انتظرينا حنجيكي في عرس وسام قرب
ست الكوفير: منتظراكم والله والمرة ديك كلموني قبل زمن عشان افضى ليكم اليوم كلو وحيكون مجاني ليكم
فردوس: تسلمي حبيبتي ان شاءلله ايدك ما توجعك وخلاص لازم تكلميني بالتكاليف عشان نجزر راجل وسام لانو مغترب ونقسم القروش بينا . ضحكنا على تفكيرها
همس: ابليس ما فكر فيها
وسام: كنت دايرة اقول ما بسمح اخون راجلي بالطريقة دي بس عجبتني الفكرة . ضحكنا
ست الكوفير: ياااخ انتو عسل
همس: صفا رموشك لحقتيهم؟
صفا: ابت ترجع
ست الكوفير: خلي بس اخلص للعروس دي بصلحو ليكي
فردوس: ثبتي قوي عشان لمن تمشي ترمشي قدام عزيز ما يقع وتخلعي الود بدل يعجب بيك يطير بالمرة . ضحكنا ضحك
صفا: قولي والله يا جنة الليلة بكلم ليكي سفيان
فردوس: بالنسبة؟
صفا: بقول ليهو ما شوفت مرتك الليلة طلعت مشت لاخر الشارع من الكوفير عشان تفتش لبقالة وجات راجعة تعبانة الا اديناها عصير
فردوس: والله سفيان بصدق لانو ما بثق فيني . ضحكنا
همس: لانو ما فيكي ثقة نهائي اتخيلي يا هالة " ست الكوفير " كنا طالعين مشوار اصرت تمشي معانا رفضنا لانها حامل وكدا بس الحت علينا وسوقناها تعبت لينا وشاكلونا بدلها وزلونا زلة العدو وانا راجلي باعني عديل . ضحكو علي
فردوس: كيف يعني باعك
صفا: لمن جا زمن العقاب عمار قال لسفيان ابدا بيها هي . ضحكو
فردوس: اول مره عمار يعملها
همس: بسببك انتي دي
فردوس: تكبري تنسي . وببعدها بقينا نتونس ونضحك وضحكنا ست الكوفير معانا وحبتنا ونحنا حبيناها وخلصت لينا كلنا كان معاها مساعدات وبقينا منتظرين عمار اصلا الزمن اتأخر شديد فجأة سمعنا صوت العربات والبوري العالي عرفنا العريس وصل
ست الكوفير: وين الزغروتة . وفكو الزغاريد وانا خجلانة والصوت بدا يقرب واصحاب العريس شغالين ابشر يا عريس وانا مادة ضهري للباب جا داخل مع الوزراء حقو وهو ببشر والبنات بزغردو جا وقف وراي هبشني في كتفي ما التفت عليهو جا وقف قدامي عاين لي مسافة
عمار: جنة وين همس طلعوها لي . ضحكو كلهم حتى انا براحة قرب مني وسلم علي في رأسي مرتين وحضني مسافة وانا خجلانة وبعدها ختا ايدو في راسي وحصني لمن خلص تاني سلم علي في رأسي ومسك ايدي وقف جنبي والتفتنا للناس
عمار: واقف قدامكم وسعادتي ماسكها بأيدي هشام وهجرس اختكم في عيني اليمين قبل الشمال هي بتي قبل تكون اختكم فأحافظ عليها دايما ذي ما كنت محافظ عليها
هجرس: متأكدين نحنا انو سلمناها لراجل
عمار: فردوس صفا وسام انا حأشيل منكم اختكم عارف انو روحكم فيها لكن انا برضو روحي فيها بس خليكم مطمنين انو هي في ايادي امينة
فردوس: واثقين فيك نحنا
وسام: بطة من ولدوها اول طفل شالها كان انت ومن لمن حكو لينا عرفنا انو همس لعمار . امي كان حكت لينا انو عمار كان مصر يشيلني وانا بيبي لمن الح شديد ركبوهو في السرير وختوني في رجولو وعجبو بقى يومي بجي يلعب معاي
صفا : لو كان زول غيرك كنا حنخاف عليها وحنوصيها بس عمار ما محتاج توصية ابدا . انا دموعي نزلت على كلامهم وعلى حب عمار لي عمري ما بكسر عينو قدام زول
عمار: سفيان عمر عزيز الليلة حأشيل بت عمكم منكم وبكل رضاكم تسمحو لي؟
سفيان: ماف اب بستأذن عشان يشيل بتو
عمر: انت حتشيل قطعة مننا حافظ عليها بس
عمار: ان شاءلله
عزيز: دي بت الغالي عمي ربنا يرحمو ودي امانتو لينا قبل ما يموت ما تنسى الحاجة دي . هنا بكيت على حب عائلتي وتقديرهم لي وكلهم بوصو عمار علي يداب حسيت بحبهم زمان ما ببينو جوني هشام وهجرس حضنوني عليهم مسكت فيهم
هشام: ذي ما وعدناكي نحنا حنسلمك لراجلك
هجرس: عمار اوع تفرط فيها . وختا ايدي في ايد عمار وعمار ضغطت عليها
ست الكوفير: ما تبكوها الليلة صلحنا الميكب تلاتة مرات . ضحكنا
ست الكوفير: كدا يا عمار بدفعك حق تلاتة مرات
عمار: والله فداها اي حاجه . ابتسمت بحب
ست الكوفير: سبحان الله ليها حق همس تفتخر بيك كدا . ابتسم ليها
عمار: وانا فخور بيها
ست الكوفير: ربنا يخليكم لبعض ووين سفيان مرعب الكل . هنا الكوفير كلو قام يضحك وهو رفع حاجبو مستغرب
سفيان: مرعب الكل؟ وين جنة . هي رجعت ورا وسام بالراحة
عمار: شكلو الليلة فتونا كلنا
ست الكوفير: لا بس اكتر واحد سمعت اسمو سفيان الليلة لانو البنات كل شنو جنة اقعدي سفيان لو عرف حيقتلنا كلنا . ضحكنا وسفيان بعاين في فردوس
سفيان: ان شاءلله ما تعبت روحها؟
ست الكوفير: ما خلوها البنات
فردوس: لا دقيقة كدا انتو بتفتنوني مع راجلي ربنا يسامحكم . ضحكنا فيها
سفيان: اطلعي قدامي . وادانا ضهرو وهي لحقتو
عمار: نطلع بعد دا؟ . هزيت ليهو رأسي ومشيت حضنت هالة وهمست لي في اضاني
ست الكوفير: والله عمار دا يستاهل كل دمعة نزلتيها الليلة عشانو ربنا يخليكم لبعض
همس: امين يارب تسلمي حبيبتي . وطلعنا والزمن كان متأخر شديد
عمار: بطة ماف زمن للتصوير لانو الزمن اتأخر
همس: ما مشكله
عمار: معليش ياااخ
همس: ما مشكله المهم انو انت طلعت كويس . ابتسم لي بحب ووصلنا الصالة وحضرنا فاصلين بس لانو الزمن اتأخر شديد وطلعنا وقالو الجرتق بكرة الصباح لانو الزمن اتأخر
عمار: سفيان لقى لينا مصور
همس: اخر الليل دا؟
عمار: ما مشكله بس لازم نوثق اللحظات دي للذكرى بعدين اولادي لو سألوني وين صور عرسكم انت وماما ؟ . قومت ضحكت
همس: تمام . ومشينا عملنا جلسة تصوير في حديقة تابعة للمصور والدنيا 2 صباحا بس كانت حلوة شديد وكلها فرحة وخلصنا ودا كلو عمر تعبان معانا
عمار: الليلة تعبناك معانا
عمر: عيب يا اخوي
عمار: حبيبي انا . وطلعنا على بيتنا كان جاهز غيرنا والصبح كان دخل صلينا وجينا ننوم
عمار: معاكي ساعتين بس او ساعة ونص عشان الجرتق الصباح
همس: لالا ما دايرة جرتق روحي طالعة انت ما عارف الفستان دا كان تقيل كيف وانا لابسة نص يوم كامل
عمار: ما دايرة الجرتق متأكدة ؟
همس: ما ممكن الضهر؟
عمار: ما ممكن ما بتحمل الكم الهائل من الناس ديل يوم كامل يااخ انا عريس
همس: عمار نوم نوم . ضحك ونومنا ساعتين بس ذي ما قال والبنات جو ساقوني ولبست للجرتق وقرو لينا يس والمناسبة انتهت على اكمل وجه وطلعنا الفندق عمار كان حاجز فيهو
_ عمار
__ عيونو
_ ولا خلي بعد اصحى من النوم
__ تصحي من النوم؟
_ ايي تعبانة شديد
__ خلاص خلينا نصلي ركعتين كبداية لحياتنا الزوجية . صلينا وكان الضهر دخل صليناهو ونومت نومة وحدة لقيت نفسي في المغرب لمن خجلت عاينت عمار كان قاعد في الجهة التانية من السرير عاينت ليهو
__ لا عليك الله ارجعي نومي تاني . ابتسمت ليهو وختيت رأسي في رجلو وغمضت عيوني خمسة دقايق هزاني
__ لا جادة كمان دايرة تواصل . ابيت ارد ومواصلة هبشني في اضاني براحة قومت كأنو طقتني كهربة وقعدت
_ عمار ما ممكن ياااخ
__ عايني من النوم لو عيونك اتورمو . دعكتهم
_ دا من التعب
__ امشي شوفي وشك في المراية . قومت ودخلت الحمام عاينت للمراية كان مبالغة وشي وارم لمن خجلت انو عمار شافني كدا طلعت شيلت ملابس بالراحة ورجعت استحميت حسيت جسمي رخا حتى وشي شوية خفا من التورم وطلعت كونت جوعانة جوع
_ عمار . وسكتا وكسرت عيوني
__ عارف جوعانة . فهمني من دون ما اقول
_ شديد والله
__ منتظرك من قبيل تصحي عشان اطلب خدمة الغرف . بالفعل اتصل ليهم جابو الغدا اتغدينا وقعدنا كنت خجلانة من عمار لانو شايفة صعبة اتعامل معاهو كزوج كدا وهو حسا بي وطمني وبدينا حياتنا الزوجية قضينا عشرة يوم في الفندق ورجعنا بيتنا واستقرينا فيهو..........
"يارب أجعلني زوجته الأولى والأخيرة وحبيبته الاولى والأخيرة ، اللهم أجعلني وإياه من الفائزين في الحب ، اللهم أكتب لنا السعادة معاً يالله ، اللهم أنت الواحد الصمد رب قلبي وقلبه ، اللهم أجعله زوجاً وسنداً صالحاً ، أباهي فيه أهل السموات و الأرض يارب العالمين♥️."