رواية بين الضياع واللقاء الفصل العاشر 10 والحادي عشر 11 بقلم شذى عبدالمكرم
رجعت البيت كدا اتصلت لي شمائل وقامت تضحك
_ مالك بتضحكي
__ انتي عارفة محمد قال كلامو داك ليكي عشان شنو؟
_ ما دايرة اعرف
__ قولي والله . سكتا لانو كنت عاوزة اعرف بالجد انا عملت شنو غلط
_ قولت ليكي ما دايرة اعرف . قامت ضحكت تاني
__ انا قولت ليكي احلفي ما حلفتي معناهو دايرة تعرفي
_ قولت ليكي ما دايرة اعرف بس مدام مصرة اتكلمي . ضحكت شديد لمن ضحكت معاها
__ ايي مصرة يلا يا ستي زعلان لانو ما حضرتي العقد وعشان قال شنو كدا ما عارفة انو ماف حاجة بتجبرك انك تحضري . طق اتذكرت انو اتنرفزت فيهو لمن قولت ليهو عقدك ما دايرة احضرو في حاجه تجبرني؟ وليهو حق يزعل لانو كلامي قاسي لانو هو ما عندو ذنب وما وعدني بحاجة وخلف راجعت حساباتي والزعل القبل شوية كلو راح قطعت لي سرحتي شمائل
__ نعيمة انتي سامعاني؟
_ ايي سمعت يعني دا السبب؟
__ ايي
_ تمام
__ ما زعلانة؟
_ زعلانة بس اعزميني برا وحيزول
__ جدا وبرا من دا بعد بكرة سايقاكي معاي بيت نسابتي
_ جدا بمشي معاكي كدا اشوف نسابتك ديل
__ لو كان حضرتي العقد كان لقيتيهم
_ ما حصل حاجه كدا برضو حأشوفهم
جا اليوم الحنمشي فيهو لنسابة شمائل وكلمت ابوي وافق ومشينا انا وشمائل وجود وجمانة اجرنا عربية وقف لينا في اكبر سوبر ماركت شيلنا خضروات وفواكه وحاجات القهوة ما خلينا حاجة ممكن تتشال ووصلنا استقبلونا وما شاء الله نسابة الهنا والسرور ناس حلوين وبشوشين بدخلو في الناس سريع والله نهائي ما حسيت نفسي غريبة في وسطهم اما شمائل دي تتونس وتضحك كأنو امس كانت معاهم نسيبتها وحمواتها كلهم بريدوها ليهم حق شمائل عسل بس وراجلها اتصل ليها فيديو كول واتكلم مع ناس بيتهم كلهم والجو كان حلو شديد لمن اليوم خلص شمائل اتصلت لمحمد عشان لو راجع يغشانا لمن وصل نزل سلم عليهم وكان لابس الكاكي بتاعو وانا بعاين فيهو ساي ودعناهم وطلعنا برا
نعيمة: شمائل انا برجع بالموصولات . قولت كدا نظام شايلة في قلبي لسع وعاوزة احسسو بالذنب بس نسيت انو دا محمد ما حيحس اصلا بس عاوزة اشوف ردة فعلو
شمائل: انتي هبلة يا بت
محمد: اسمعيني انا ما ناقص حركات تمام اركبو خلونا نتحرك
نعيمة: ما راكبة معاك
محمد: نعيمة ما تخليني اوريكي وشي التاني . ربعت ايادي
نعيمة: لي الشرف اشوفو . يلا هنا عصب لمن عروقو ظهرت ووشو بقى صغير لمن خوفت قام جاي علي سريع فتح الباب وركبت شمائل ضحكت فيني وجات ركبت معاي ورا وجمانة ركبت قدام مع خالها
شمائل: م قولتي مرا
نعيمة: والله ناس ابوي ما مستغنيين عني . وبقيت اعاين ليهو بالمراية كان مكشر لمن عاقد حواجبو
ونحنا في الطريق تلفونو ضرب وكانت فيحاء
محمد: تمام بوصل ناس شمائل وجاي عليكي . وقفل اتنفخت التقول راجلي ووصلنا وشكلو مشى عليها
قضيت اجازتي ورجعت بيت عمتي وشمائل كانت زعلانة مني بس كمان وعدت عمتي وواصلت الجامعة ولسع متواصلة مع شمائل بس كنت محذراها نهائي ما تجيب لي سيرة محمد ولا بالغلط ساي ما تكلمني عنو وهي احترمت كلامي لمن خلاص امتحانات الفايل جات وعمتي حبستني حبسة التخريج بأدب لمن خلصت امتحانات وناس البيت باركو لو واخوي عبدالله وعدني انو حيحضر تخريجي كنت مبسوطة شديد بالخبر دا اتصلت لي امي وسلمت علي
__ اها يا نعمة بعد دا ما حترجعي البيت؟
_ والله يا امي فكرت كدا لقيتها ما ظريفة انو السنة كلها قاعدة مع عمتي عشان في النهاية اتخرج في بيتنا
__ والله يا نعمة كلامك صح عمتك ما قصرت معاكي بالجد خلاص ما مشكله
_ ايي . قفلت منها طلعت لقيت عمتي قاعدة زعلانة كدا مشيت عليها
_ الجميل مالو زعلان
__ ابوكي اتصل قال حترجعي للتخريج وكدا
_ بس انا حأتزفى من بيتك دا . عاينت لي بفرحة
__ عليك الله
_ والله ولو على ابوي انا بكلمو وحتى هسي كنت بتكلم مع امي قولت ليها انا ما حأرجع الا بعد التخريج . فرحت شديد
__ والله ما حأقصر معاكي ابدا
_ عارفة عمتو عشان كدا صاباها بجاي بس
__ صبة ابدية . وضحكنا ومشيت اتصلت لابوي واتكلمت معاهو وفرح بقراري هو اتكلم مع عمتي كدا عشان كدا خايف اني ما اقدر اتكلم معاها ومفكر اني حأرجع بس لمن عرف قراري كان مبسوط الوحيدة الزعلت شمائل بس حنستها
بعدها بديت البحث وخلصتو وكنت مشغولة بجري السوق مع عمتي وقص الفساتين وعمتو اختارت لي تياب الحنة والترادشنال من حقاتها ما قصرت معاي نهائي وفعاليات التخريج بدت وكنت بسوق عمتو وشمائل كل الفعاليات لمن قبل التخريج النهائي بيومين كان عبدالله لسع ما جا اتصلت ليهو
_ عبدو انت غشيتني
__ والله يا نينا ما غشيتك بس ظهر لي موضوع فجأة
_ايي مواضيعك دي اهم من اختك الوحيدة
__ معقولة يا قلبي بس والله حأحضر التخريج النهائي
_ هي كلها بعد يومين بس
__ عارف والله بكرة لو خلصت الفي يدي دا بجي بطيارة المسا ولو ما اتوفقت بجي بعد بكرة الصباح
_ كويس منتظراك بس لو ما جيت ما بتكلم معاك تاني
__ اي حاجة ولا زعل اخر العنقود بتاعتنا
_ اي . اتكلمت معاهو وقفلت كدا اتأكدت انو حيجي يحضر ونومت مبسوطة
اخوي عبدالله وصل قبل التخريج بيوم ما قدرت القاهو لانو هو انا في بيت عمتي بس حألقاهو في الصالة عمتي ودتني الكوفير اتميجت ميكاج خفيف بتاعت تخريج وجيت اتجهزت وراجل عمتي وصلني لانو عندي تصوير وكدا وهم حيلحقوني بعدين مشيت واتلميت مع الشلة والدفعة اتصورنا ومشينا على صالة التخريج ولسع ما لقيت ناس البيت بس اتصلت ليهم قالو وصلو فتشتهم كدا ما لقيتهم قولت ما مشكله بلقاهم بعد استلم الشهادة لمن جا دوري ركبت المنصة وشايفة ابوي وامي هناك عشان يستقبلوني فجأة جا عبدالله ومعاهو راشد وقفو جنبي اتفاجأت بوجود راشد لانو ما كانت متوقعة اصلا لمن بكيت وحضنتهم الاتنين كنت مشتاقة لعبدالله سنتين ما شوفتو يلا كدا ممكن اقول كتفي وضهري كان متين لانو معاي اخواني وسندي اي واحد كان ماسكني بجهة لمن المزيع كان بقول في تفاصيل حياتي وانا الفرحة ما كانت سايعاني اتزفيت احلى زفة واتصورت مع ناس بيتنا والتخريج انتهى طوالي اليوم التاني رجعت بيتنا بعد كنت مقررة اقعد يومين مع عمتي بس رجعت عشان اخواني وما قصرو معاي عزوني بالهدايا وحتى اخوي عبدالرحمن ومرتو رسلو لي الهدايا من برا ما قصرو معاي لاني بت وحدة بس وسط اولاد وبعد يومين منها ابوي عمل لي كرامة بمناسبة التخريج
_ شمائل بسألك
__ شنو
_ من رجعت ما شوفت محمد اخوكي
__ ما كلمتك لانو قولتي ما احكي ليكي عنو لانو احترمت قرارك
_ امممم وهو وين هسي وتم عرسو ولا لسع
__ لو تم عرسو ما حتسمعي يعني؟
_ انا شن عرفني
__ محمد في مأمورية حاليا وحدثت حاجات كتيرة بحكي ليكي براحة تمام
_ تمام
11
خلاص اتخرجت وانتهت مرحلة مهمة من حياتي المفروض اتخذت خطوة جديدة بس حبيت آخد فترة نقاهة وارتب حياتي من جديد اخوي راشد رجع بس عبدالله كان لسع قاعد خالتو مريم عملت لي قعدة جبنة مسائية كدا بمناسبة تخريجي مشيت كانت صغيرة كدا من امي وانا وشمائل وهي وجيرانهم اللصق وشربنا الجبنة مزاج وجيرانهم مشو وامي مشت عشان ابوي عندو نظام معين في المغرب فأستأذنت ومشت وانا قعدت معاهم وانا كنت قاعدة جنب خالتومريم فسألتها
نعيمة: خالتو مريم فيحاء مرت محمد كيفها . عاينت لي بتفاجأ كدا
خالتو مريم: انتي ما عارفة؟
نعيمة: ما عارفة شنو
خالتو مريم: محمد وفيحاء انفصلو . قلعت عيوني من الخلعة وعاينت لشمائل هي هزت لي رأسها نظام ايي واستغربت ليه ما كلمتني
نعيمة: متين الكلام دا
خالتو مريم: عندهم شهرين كدا
نعيمة: والسبب شنو
خالتو مريم: شكلهم ما اتفقو
شمائل: امي انتي عارفة ولدك دا لا يطاق والله ماف بت بتتحملو وكونو صبرت معاهو شهور دي معجزة
نعيمة: ما تقولي كدا
شمائل: والله صح كلامي محمد طبعو صعب شديد وبارد
خالتو مريم: لكن لمتين يقعد عذابي كدا وما اشوف اولادو . شمائل ضحكت
شمائل: والله يا امي انتي بتحلمي ساي اولاد شنو لمحمد دا خلي يلقى ليهو مرا الاولاد هين فيحاء وطفشت انا ذاتي مستغربة هو وافق كيف
خالتو مريم: شمائل ما تقولي كدا
شمائل: امي والله انا بتمنى ليهو الخير ولمن عقد لفيحاء وكانت بتشتكي منو انو ما بسأل ولا بهتم والله كنت بمشي بتكلم معاهو وانتي شاهدة صح؟
خالتو مريم: شاهدة والله ما قصرتي اتكلمتي كتير
شمائل: اها بس كلامي كان بدخل بجاي وبطلع بجاي او بقول لي شمائل امشي من قدامي فخليتو واهو في النهاية انفصلو ذي كلامي ليكي
خالتو مريم: هسي يا نعيمة محمد دا اعمل ليهو شنو والله ما فصل الا امشي لشيخ عشانو . هنا انا وشمائل ضحكنا هي ذاتها ضحكت معانا
نعيمة: حيلقى بت الحلال وحيتزوج وحيستقر ان شاء الله وحتشوفي اولادو بأذن الله
خالتو مريم: ربنا يسمع منك يا رب . شمائل ضحكت
شمائل: والله يا نعيمة الا لو انتي بس امي رأيك شنو نزوج محمد لنعيمة هي الحتربي لينا . خالتو مريم ضحكت وانا التفت لشمائل حمرت ليها هي ضحكت
خالتو مريم: انا ما قنعانة من نعوم لمن ارميها لمحمد السجمان دا
شمائل: والله صح كلامك انا ذاتي ما برضى فيها . كنت خجلانة من كلامهم وقولت في سري ارموني فيهو انا رضيانة بيهو ببرودو دا يلا اخدت زمني ورجعت البيت ولسع ما مستوعبة انو محمد طلق فيحاء خلاص اتمنيت القاهو واشوفو بس للاسف كان في مأمورية مشيت لامي
_ امي ليه ما جيبتي لي سيرة انو محمد طلق مرتو
__ يعني ما كنتي عارفة؟ والله فكرت انو شمائل بتكون ورتك
_ قبل شوية بس عرفت من خالتو مريم
__ اي والله انفصلو ومريم زعلانة شديد من الموضوع بس ربنا يقسم ليهو بت الحلال
_ امين يارب . مشيت غرفتي المفروض دا خبر محزن بس كنت مبسوطة بيهو
___________
من جانب شمائل
كانت قاعدة مع امها
__ امي رأيك شنو بنعيمة
_ كيف يعني
__ نزوجها لمحمد
_بتهظري صح
__ موش دايرة تشوفي محمد مستقر وعندو بيت وعيال
_ والله دي بس امنيتي في الحياة
__ بس خلاص ماف افضل من نعيمة لمحمد
_ والله نعيمة كويسة بس كيف حيحصل وما حابة الحصل في فيحاء يحصل في نعيمة
__ ما حيحصل لانو نعيمة ما ذي فيحاء وحتقدر لمحمد بس كيف اجمعهم مع بعض
_ شمائل انتي متأكدة؟
__ والله متأكدة ذي ما متأكدة من اسمي دا لو ما اتزوج نعيمة دي عمرو ما حيتزوج ولا حيمسك بيت وانا متأكدة نعيمة الوحيدة الحتغيرو وحتفهمو لانو نعيمة صحبتي وانا بعرفها بس كيف نقنعهم الاتنين
_ والله انا شايفة انو مستحيل
__ هو صح صعب بس نخليها للوقت وانا وانتي نحاول مع الاتنين انتي اشتغلي في محمد نظام لو عاوز رضاي وكدا لمن يقتنع انو يتزوج تاني وانا بلمح لنعيمة بفوق وان شاء الله ننجح . امها اتحمست وهي بتثق في كلام شمائل ومدام شمائل واثقة من انو نعيمة حتغير محمد معناهو حتغيرو
انتظرو محمد لمن رجع من المأمورية وامو مشت ليهو
خالتو مريم: محمد انت لمن متين حتقعد كدا . طوالي فهم على امو
محمد: تاني يا امي تاني؟
خالتو مريم: تاني وتالت ورابع كمان
محمد: امي عليك الله سيرة الزواج دي اقفليها
خالتو مريم: والله نهائي لو ما شوفت اولادك ما برتاح
محمد: هسي عليك الله يا امي اولاد شمائل ديل ما كفايه واهو احمد مرتو حامل
خالتو مريم: لالا
محمد: امي انتي بعينك شوفتي انو الزواج ما نجح معاي تاني ما عايز . وقام مشى خلى امو ما تمت كلامها امو قالت نهائي ما حتخلي .
____________
من جانب نعيمة
في يوم قررنا مع شمائل نطلع بوتيك فتح جديد مشينا بالقوقل ماب لمن وصلنا واشترينا حاجاتنا الكلام دا بعد المغرب لمن وصلنا المحل العشا اذن شيلنا حاجاتنا
شمائل: تعالي نتمشى شوية كدا
نعيمة: تمام . وبقينا ماشيين
شمائل: رأيك شنو في اخوي محمد
نعيمة: من ياتو ناحية
شمائل: لو طلبناكي ليهو بتقبلي؟
نعيمة: امممممم
شمائل: مجرد سؤال بس لانو عارفة محمد قفل سيرة الزواج بس بفترض لو فتحتو وطلبناكي بتوافقي؟
نعيمة: اممممم ما عارفة ذي ما عارفة اخوكي صعب التعامل معاهو وممكن اخاف من تجربة فيحاء معاهو صعب انو ادخل في الجو دا بالاخص انو الشينة جات منو هو يعني ماف زول بدوهو قلم بكتب نفسو شقي اسفة انو بقول الكلام دا
شمائل: لا اصلا معاكي حق انا لو محلك ذاتي برفض والله بس شايفة انو محمد تعاملو غير معاكي انتي بالذات وحتى كونو يزعل من اي حاجة عملتيها او قولتيها دي شايفة انو انتي بتفرقي معاهو وعندو حاجة ليكي . كلام شمائل دا فرح قلبي وهي واصلت كلامها
شمائل: والله انا شايفة انو انتي الوحيدة الممكن محمد يتغير على ايدك لانك قوية
نعيمة: امممممم . وقفلنا السيرة على كدا وبقينا ماشيين شوفنا جنبة ظريفة كدا فيهو اولاد وبنات
شمائل: رأيك شنو نقعد في الجنبة دي ونشرب لينا حاجة او نجر لينا حجر . قومت ضحكت
نعيمة: والله الا يرجعونا من القسم . فجأة حصلت جوطة في نفس الجنبة دي وشكلو ديل المباحث قبضو مروجين ونحنا من فلاحتنا والشمار حرقنا مشينا وقفنا نشوف ومن الغباء نسينا انو ممكن يرفعو الناس ديل كلهم عادي طبعا واقفين في آمان الله بنعاين بمزاج لمن بنعلق شوفو دي لابسة كيف ودي اهلها حيقولو شنو فجأة ظهر لينا محمد في وشنا وكان معصب شديد
محمد: واقفين بتعملو شنو هنا والجابكم هنا بالليل شنو . اي وحدة بقت تعاين للتانية وبقينا نرجف ..........