رواية شلة بنات الفصل الخامس والعشرون 25 والسادس والعشرون 26 بقلم شذى عبدالمكرم
الايام مرت وجا تخريج ناس سام وكان حلو شديد وقفت معاهو في كل تفاصيلو لمن اتخرج كان بروف الدفعة حقو كنت فخورة بيهو شديد
روز: باشمهندسي
سام: عيونو
روز: خلاص حتفارقنا
سام: حأفارق الجامعة بس انتي حيفرقنا الموت
روز: بعد عمر طويل ان شاءلله party كيف وكيف
سام: بس معاكي انتي بس
روز: بس انا كلمت الشلة كلها
سام: ما علي اتصرفي بس
روز: خلاص حأحتفل كلنا وبعدها بعمل ليك وحدة فردية
سام: لو كدا موافق
اليوم التاني عملنا الاحتفال والشلة كلها موجودة وحتى عزمت ريان ومراد وكانت حلوة
روز: party بمناسبة تخريج السناير ديل . باركنا ليهم كلنا جاني ريان
ريان: ريان ما حتجي؟
روز: كلمتها قالت في الطريق
ريان: تمام . شوية كدا ريان وصلت وباركت للخريجين وقطعنا الكيك واقفة كدا سام مسح لي كريمة حتة كدا في خدي
روز: سام مالك ياااخ
سام: ماف احتفال من دون كريمة
روز: في عينك
سام: تعالي امسحو ليكي . حمرت ليهو
روز: ما عليك بيهو
سام: هسي مالك منفخة جضومك كدا
روز: ياااخ عندي حساسية من الكريمة . اتخلع
سام: اسف ما كنت عارف دقيقه انضفو ليكي . زحيت منو
روز: هووي بهظر بس . وضحكت
سام: حرام عليكي خلعتيني
روز: في زول بتحسس من الكريمة
سام: ياااخ انتي حساسة يعني عادي اتوقع . قومت ضحكت
روز: بس لا ما عندي حساسية...
__________
من جانب ريان
جيت الاحتفال وباركت للسناير واتفاجأت انو ريان معاهم بعد الاحتفال
__ ريان ممكن دقيقه . مشيت معاهو بعيد شويه
_ اتفضل
__ ما خلاص؟
_ الخلاص شنو
__ انتي فاهمة قصدي . اتنهدت
_ ريان هي اصلا ماف حاجة من البدايه عشان تكون في خلاص لانو انا كنت متعشمة ساي وعرفت خلاص
__ بس انا ما كنت عارف مشاعرك افتكرت انها حب من طرف واحد بس عشان كدا انسحبت هسي لو كنتي مكانتي وانا قولت ليكي داير اخطب موقفك حيكون شنو كدا قولي لي . عاينت ليهو مسافة صح كلامو انا ما بينت حاجة يعني ما عندو ذنب وحتى انا لو كنت مكانتو كان انسحبت
_هسي المطلوب مني شنو
__ تديني رقم ابوكي
_ تعمل بيهو
__ اشتكيك ليهو
_ عملت شنو
__ انتي اصلا غبية ولا هسي بس عاملة فيها غبية
_ ريان عاوز برقم ابوي شنو
__ لا اتأكدت انك غبية فعلا
_ شكرا . وجيت امشي وقفني
__ يا هبلة حأعمل برقم ابوكي شنو داير اتصل ليهو اقول ليهو عندي امانة عندكم داير اشيلها . سكتا بحاول استوعب كلامو لمن فهمت قولت ليهو بالراحة
_ ريان بتتكلم جد؟
__ ودا موضوع يهظرو فيهو
_ بس ما حاليا
__ ليه
_ لاني ما خلصت الجامعة وانت يداب اتخرجت
__ خلاص خلي قلبك يحن . زحيت ليهو رأسي بمعنى تمام ما اتوقعت ابدا انو ريان ممكن يقول كدا بس عرفت انو بالجد بحبني.....
___________
من جانب نبأ
وقفنا مع مراد بعيد عن الزحمة شوية
__ بديت في الكتاب طبعا
_ حلو
__ ذيك كدا . ابتسمت بخجل
_ خلاص اتخرجت
__ بعد دا حأبعد المرحلة التانية
_ المرحلة التانية شنو
__ انو اكون نفسي واكون زول مسوؤل
_ اي صح
__ عشان نتلمى مع بعض . نزلت رأسي بخجل
_ اممممم
__ نبأ انتي عارفة ما كنت متوقع انو القى البتشبهني ابدا بس لقيتك . قولت ليهو بالراحة
_ ولا حتى انا
__ احلى حاجة فيكي خجلك دا . ابتسمت بخجل
_ مراد
__ عيونو . هنا فصلت ونسيت الكلام
__ عاوزه تقولي شنو
_ انسى . قام ضحك
__ لا بالله
_ والله نسيت . وضحكنا الاتنين .........
____________
من جانب روز
خلصنا الاحتفال وبعدها عملت لسام احتفال فردي وجا عرس هديل كنا مشغولين شديد بيهو لاننا الشباين حقها وعملتني الوزيرة فضطريت اقعد معاها وكدا وجا مراسم العرس وكانت حاجة كدا خورافية حمزة ما قصر عزاها عزة الدنيا كلها بتتكلم بيهو
روز: حمزة الهنا والسرور والخطور المجبور . قامت تضحك
هديل: قال لي حأعمل ليكي العرس البتحلم بيهو
روز: وفى بوعدو والله
هديل: ربنا يخليهو لي
روز: ويخليكي ليهو
جات الزفة وهديل طلعت قمر اربعطاشر لبست اسلامي وحمزة جا يستلمها من الكوفير
____________
من جانب هديل
كنت منتظرة حمزة وانا متوترة وحاسة ببرودة في جسمي لمن سمعت صوت العربات قلبي بقى يضرب والبنات بدو يزغردو شويه سامعة ابشر يا عريس
ست الكوافير: ارفعي ايادكي في وشك . عملت ذي ما قالت لي وحمزة دا داخل وانا رافعة ايادي في وشي وقف قدامي اخد نفس وقرأ سورة الفاتحة مرتين حتى قرب مني ومسك ايادي ونزلها وعاين لي مسافة انا نزلت عيوني تحت
حمزة: ما شاء الله تبارك الله . سلم علي في ايادي وجبيني وحضني عليهو وطول وهو ماسكني لمن حسيت بكى وانا عيوني مدمعو ما عاوزة ابكي بس ما قدرت تاني سلم علي في رأسي مرتين
حمزة: بس لو تعرفي مستني اللحظة دي من متين
هديل: وانا
حمزة: ربنا يقدرني اسعدك واشيلك جوا عيوني وما احوجك لحاجة
هديل: ان شاءلله يارب وتغلبني بالمال واغلبك بالعيال
حمزة: ان شاءلله يارب انا بحبك
هديل: وانا بحبك . بعدها طلعنا وهو ماسكني والزغاريد بدت والصفافير والرصاص ومشينا اتصورنا وبعدها الصالة الدنيا كلها كانت موجوده عمل لي حفلة خيالية حتى ما كنت بحلم بيهو وحصل الجرتق في نفس الصالة وطلعنا على بيتنا حنعسل فيهو لانو بعد اسبوعين بس نازلين الجامعة ما بقدر اسافر وعدني لو اخلص جامعة حيسفرني
حمزة: اخيرا انقفل علينا باب واحد
هديل: اخيرا
حمزة: طلعتي عيني معاكي . قومت ضحكت
هديل: انا ما عملت حاجة
حمزة: ما عملتي حاجة؟ اوريكي عملتي شنو . وجا علي قومت جارية وانا بضحك
هديل: حمزة خلاص ما يبقى قلبك اسود كدا . مسكني
حمزة: انا قلبي اسود؟
هديل: دا منو قال كدا . زح لي القدلة الفي رأسي براحة
حمزة: مرتي قالت لي كدا
هديل: مرتك دي كذابة انت ماف منك اتنين
حمزة: اممممم بتحبيني؟ . قومت ضحكت ومسكتو من رقبتو
هديل: لا جاي تسألني هسي اها لو قولت ليك لالا البحصل شنو
حمزة: البحصل تحبيني غصب عنك . ضحكت
هديل: والله الصراحة المفروض في اللحظة دي اكون خجلانة ومنزلة عيني وانا شايفة راجلي بتغزل فيني بس بقول ليك يا حمزة المالكي انا بحبك وشديد كمان وانت الكنت بحلم بيهو وربنا جمعني بيك . حضني ولفاني
حمزة: ياااخ انتي ليه حلوة كدا
هديل: لاني مرتك . وضحكنا .........
___________
من جانب روز
واخيرا عرس هديل انتهى بكل خير بعد عملو لينا نفسيات ودعناها ورجعنا لحياتنا الطبيعي بعد اسبوعين نزلنا الجامعة وهديل نزلت بعد اسبوعين منها
روز: العروس اخيرا نزلتي
هديل: انا لو خليت الجامعة الله بحاسبني؟ . ضحكنا فيها
قمر: شكلو حمزة شغال شغل نضيف . هديل جدعتها بشنطتها ضحكنا ضحك
ريان: ما شايفين وشها منور كيف
روز: لو كدا كلنا عاوزين نعرس
نبأ: عاينو الرسم والحركات . ضحكنا فيها وشغلناها ليها لمن خجلناها وهي طبعا واضح فيها انو مبسوطة
روز: العروس القادمة منو
نوسة: انا انا
روز: حتعملو لينا العرس في المستشفى صح. . قامت تضحك
نوسة: حيتصلو للعريس يقولو ليهو وينك بقول ليهم في العملية واصلو حألحقكم . قومنا ضحكنا على كلامها
روز: كويس انك عارفة راجلك
نوسة: ودا كلامك
مرت الايام وسام نزل الخدمة وخلصها وبقى معيد في الجامعة لانو كان بروف الدفعة حقتو وكان شاطر وكان محظوظ لانو بقى معيد جامعتو وانا واصلت الجامعة وخلصتها واتخرجنا وذي كلام نوسة كانت. العروس القادمة عملو عرسهم وسكنت جنبنا ما بعيد ورامي اتخصص خلاص وارتاح وفضى ليها ولبيتو........
السادس والعشرون 26
بعد خلصنا جامعة ما صدقنا انو خلاص الواحد بقى Free مسكت البيت نيابة عن امي حبيت اريحها شوية تعبت مع تخريجي دا في يوم بنشرب في شاي المغرب
امي: رامي انت تاني وراك شنو ما داير تتم عرسك ولا شنو ياااخ خطوبتك تمت سنة وحاجة البت دي استنتك كتير
رامي: امي عندي مواضيع بخلصهم بالاول
امي: مواضيعك دي ما بتخلص ابدا لو ما دايرها فكها لو كانت اتزوجت كان هسي بجناها
ابوي: مواضيعك شنو يا رامي
رامي: ابوي ما باقي لي كتير للتخصص اخلصو وافضى للعرس
امي: تخصصك دا تلاتة سنة بنسمع فيهو للان ما خلصتو
رامي: امي دا تخصص ما هين ما باقي لي كتير
ابوي: تم عرسك وخلصو في بيتك احسن
رامي: صعبة شوية . جاهو تلفون وطلع وانا طبعا خشمي وعندي بسمع بس وطلعت مشيت غرفتي بقيت اقول نوسة دي مستحملة رامي دا كيف ببرودو دا ربنا يعينها وبالاخص شايف شغلو اهم من اي حاجة وهل قاعد يهتم لامرها او هي عاوزة شنو
اتصلت لنوسة
_نوسة بسألك
__ اسألي
_ انتي كيف قادرة تتحملي رامي دا صح اخوي و أي حاجة بس كيف مستحملاهو هل بهتم ولا كدا ما عارفة بس حاجة اعرف
__ انا ما عارفة ليه سألتيني السؤال دا هسي بالذات او الحصل شنو لحدي ما تقولي كدا بس حأجاوبك رامي ممكن تحسيهو بارد وعندو عدم لا مبالاة ودا يمكن حاصل بس انا ما شايفة الصفات دي لاني بحبو فبتقاضى عن جوانبو السلبية رغم دا كلو رامي بحاول بقدر الامكان انو يهتم بي وطريقة اهتمامو انا بفهمها وبحبها ما بقدر اقارنو بزول انو ليه اهتمامو كدا ورامي ما بهتم بي كدا والله مرات لمن اشوف سام بهتم بيكي بطريقة حلوة شديد وحتى لو حصل حاجة وداير يوصل ليكي بتصل بتلفون اخوهو المهم بوصل ليكي بقول ليه رامي ما كدا بس رامي انفرض عليهو بسبب شغلو وما عندو زمن كافي حتى انو يرتاح بس ما بنساني حتى لو برسالة وانا من البداية عارفة ومتقبلة الحاجة دي وبعرف انو بحبني وليهو طريقتو الخاصة في التعبير وانا بفهمها . نوسة دي انسانة نضيفة من برا ومن جوا ورامي اكتر واحد محظوظ لانو بقت من نصيبو بس ان شاءلله يقدر النعمة الفي يدو
_ والله رامي محظوظ بيكي شديد
__ وانا محظوظة بيهو
_ ما ناويين تتمو عرسكم دا
__ انتي عارفه رامي باقي ليه شوية ويخلص التخصص بعدها نفضى للعرس
_ يعني فاهمة الوضع
__ لو ما فهمت انا تاني منو حيفهم
_ بالجد والله
__ وانتي سام ما لمح ليكي بحاجة
_ نهائي والله
__ يمكن عندو حاجة في رأسو
_ يداب بقى معيد في الجامعة ما لازم يتكاسل من الاول
__ اي صح كلامك . اتكلمنا شوية وقالت تلفونها حيقفل بالفعل المكالمة قطعت طلعت المطبخ اشرب موية اتقابلت مع رامي
رامي: روز انتي الليلة اتكلمتي مع نوسة؟
روز: هسي كنت بتكلم معاها
رامي: بس تلفونها قافل
روز: اي صح قالت لي تلفونها حيقفل وقفل ونحنا بنتكلم
رامي: ايوااا تمام
روز: ما لقيتها من الصباح؟
رامي: كنت مشغول ما فضيت اتصل
روز: ماف انشغال لدرجة يخليك ما تتصل عليها من الصباح يمكن تكون عيانة
رامي: عيانة؟
روز: انت البعرفك شنو مشغول وما فاضي . وقومت ماشة ناداني
رامي: روز ايناس عيانة؟
روز: لالا كويسة الحمدلله بقول ليك كمثال بس حاول انو تهتم اكتر لانو لو قررت تشوف ليك الجوانب السلبية فيك حتخسرها
__________
من جانب نوسة
اتصلت لي روز وسألني سؤال غريب عارفة في حاجة خلتها تسأل بس جاوبتها وكدا تلفوني قفل وانا بتكلم معاها ختيتو في الشاحن بعد ساعة فتحتو لقيت محاولة من رامي رجعت ليهو
_ رامي الجافي . ومعاهو ضحكة خفيفة كدا سكت مسافة استغربت ما برر لي ذي كل مرة لمن اقول ليهو كدا
_ رامي؟
__ نعم
_ مالك ساكت
__ نوسة قولي لي الجوانب السلبية الفيني وانا بحاول اصلحها كلها
_ منو قال ليك انو انت عندك جوانب سلبية
__ انا عارف الحاجة دي بس ماف زول واجهني بيها عشان اغيرها بس انتي قولي لي عشان اغيرها اي حاجة ولا انو اخسرك والله . انبسطت شديد بكلامو دا
_ امممم حابي تعرف الجوانب السلبية؟
__ ايي
_ اول حاجة انت كلامك حلو انا ما بعرف ارد لاني بخجل تاني حاجه ما بتهتم بروحك ابدا مع المستشفى دي ودا بخليني قلقانة عليك طول الوقت وتالت حاجة انو بتعتقد انو عندك جوانب سلبية بس انا ما شايفاها وبس خلاص
__ نوسة انتي ليه كدا ياااخ
_ دي المرة الالف تسألني رامي انا كدا بس
__ رأيك شنو نتم عرسنا خلاص . اتفاجأ شديد
_ بس يا رامي انت لسع ما خلصت التخصص خلص وانا بنتظرك
__ لالا بعد دا خلاص كفاية بعد دا بخلصها ونحنا مع بعض لاني واثق انو حألقى كل الدعم منك
_ خليك دايما واثق
__ يبقى حأتكلم مع ابوكي بكرة . قولت ليهو بخجل
_ تمام . واتكلمنا وحددنا انو بعد شهر من اليوم مع انو اعترضت بس عرف كيف يراضيني بالحاجة دي واقتنعت لاني ما دايرة اكتر من انو اكون معاهو بس
__________
من جانب روز
اليوم التاني رامي فاجأنا بأنو داير يتم عرسو خلاص كلنا استغربنا امس كان قال ما فاضي الليلة غيرو رأيو شكلو كلامي جاب معاهو فائدة اتصلت لنوسة واتكلمنا بالخصوص دا وانها لازم تنحبس لانو ماف زمن نهائي ورامي كلم اهلها ما كان عندهم مشكله بس زادوها نص شهر تاني عشان تجهز بطريقة احسن ونزلنا السوق اخترنا الشيلة وحاجات الحبسة و اي حاجة شغلنا مع رامي كان بنكك بس ورحلت مع نوسة عديل عشان اساعدها ما عندها غيري وتاني حاجة البيت قريب مننا كلمت سام عسى ولعلو يحس شوية بس لا بارك لي بالنيابة بس عارفة انو بكون نفسو لسع ما دايرة اضغط عليهو لمن قرب العرس جا وهديل كانت حامل وقربت للولادة كانت تقيلة حمزة بجيبها لينا تلاتة مرات في الاسبوع بتقيل معانا ولمن يرجع من الشغال بغشاها برجعو مع بعض
روز: رامي وموضوع البيت دا
رامي: العرس جا فجأة حأجر وحدة من الشقق الفي عمارة الجديدة الفي الزلط دي وحأبدأ في البيت
روز: ظابط شديد حتكونو قريبين مننا احلى حاجة
رامي: اي لو نوسة ملت من البيت تجيكم
روز: اي وانا بمشي ليها بقيل معاها . كنت فرحانة للفكرة دي لانو نوسة رفيقة دربي صعب ابعد منها
___________
من جانب نوسة
امي: نوسة انتو حتسكنو وين . ما قدرت اجاوبها لاني انا ذاتي ما عارفة ما قدرت اسأل رامي لانو ما جاب لي سيرة ابدا
نوسة: ما عارفة والله
امي: كيف ما عارفة ما اتناقشتو في الموضوع دا
نوسة: لالا
امي: انتي هبلة يا بت معناهو حيسكنك مع امو
نوسة: خالتو عفاف حبابة وروز موجوده حيكون حلو
امي: اي حبابة و اي حاجة بس السكن مع اهل الراجل صعبة شوية حتحصل مشاكل لقدام وما حتخدي راحتك ذي في بيتك
نوسة: امي ما عارفة ياااخ
امي: طول عمرك هبلة ساي كان تسألي من بيتك الخاص
نوسة: ما بقدر اسأل وهو ما جاب لي السيرة وتاني حاجة حتى لو سكنت مع اهلو متأكدة حأكون مبسوطة لانو بحبوني . وقومت دخلت غرفتي امي دي ما عارفة مالا
بعد يومين رامي براهو جا قال لي
__ نوسة بخصوص البيت . ياااخ ارتحت كأنو حمل وانزاح لانو فتح لي الموضوع
_ اها
__ عارف انو موضوع العرس جا فجأة وكدا الليلة كنت مع سيد العمارة واتفقت معاهو انو حأجر شقة مفروشة سنة لحدي ما بيتنا يخلص عندك مشكلة
_ لالا حلوة الفكرة العمارة الفي الزلط دي؟
__ ايي
_ بس الشقق ما غالية؟
__ ماف حاجة بتغلي عليكي المهم تكوني مرتاحة . شايفين كلامو دا بخليني اتغاضى على اي صفة كعبة فيهو
_ تسلم لي . قفلت منو مشيت كلمت امي فرحت بالكلام دا
امي: اي دا الكلام يعني حيبني ليكي بيتك
__ اي دا كلامو
_ ما قصر معاكي تب رامي دا . انبسطت انو امي رضت اخيرا.......