رواية بين الضياع واللقاء الفصل الثاني والعشرون 22 والثالث والعشرون 23 بقلم شذى عبدالمكرم
صباح تاني يوم من الزواج كنا لسع نايمين لانو ساهرنا ونومنا بعد صلاة الصبح صحيت بضرب الباب هزيت محمد لمن
_ محمد في زول في الباب
__ منو
_ انا شن عرفني قوم شوف . مسح وشو بتعب وقام لقى انو دا خدمة الغرف جابو الفطور استلمو ودخل لمن شوفتو داخل بالفطور عرفت قال خدمة الغرف رجعت غمضت عيوني علشان انوم هو ختا عربة الفطور في نص الغرفة وجا رقد جنبي وواصلنا نوم للساعة 12 حتى قومنا وفطرنا
__ اها نقضي اليوم كيف
_ ما عارفة
__ نتغدا برا كيف
_ ممكن . وقعدنا ما عرفت اقول شنو كان عندي مرطب جيبتو وكنت بتمسح بعد خلصت كان جنبي محمد وهو شغال بتلفونو عاينت ليهو بأستغراب نظام ليه شغال بالتلفون من اول يوم زواج وهو كان مركز معاهو ولا شغال بي اخد فترة مشغول بتلفونو رفعت حاجبي وانا بعاين فيهو شكلو حسا عاين فيني
_ في شنو . عاينت ليهو بسخرية
__ ماف حاجه . وقومت من جنبو وشيلت التحية وقعدت في الجلسة وبقيت اكل واعاين ليهو قام ضحك وجا اتلصق جنبي وحاول يشيل الصحن جريتو منو
__ الجميل مالو زعلان
_ ارجع كفي تصفح في تلفونك وما تشتغل بي
__ يعني دا سبب زعلك
_ ما عارفة
__ معليش يا جميل . وميل علي ومسح وشو في خدي . قومت ضحكت
_ محمد يااخ حار . وهو لسع مستمر
__ لسع زعلانة؟ . وانا بضحك
_ لالا خلاص ما زعلانة . وجا يقرب مني كدا تلفونو رن طوالي زحا مني ومشى على تلفونو زعلت منو وهو كان بتكلم بالتلفون
محمد: تمام جاي عليك . عاينت ليهو بصدمة حيخليني ويطلع
__ نينا عندي مشوار ضروري ساعة وبرجع تمام
_ محمد انت جادي؟
__ ما بتأخر . مشا لبس سريع و جا سلم علي في خدي وطلع وانا لسع مصدومة فيهو دا من اول يوم زواج خلاني وطلع معناهو اتوقع دايما كدا بقيت منفوخة بس ودايرة انفجر من الزعل وما كان عندي موضوع وما عاوزة افتح تلفوني عشان ما يقولو عروس داخلة النت من اول يوم لفيت في الجناح كظا لمن ما لقيت موضوع رقدت وبقيت افكر وانا منتظراهو اتأخر جا بعد تلاتة ساعات غمضت عيوني من دخل
محمد: نينا . طوالي جريت الغطا غطيت وشي عشان يعرف اني زعلانة جا قعد جنبي ورفع الغطا
محمد: نينا زعلانة مني؟ . ما رديت ورجعت اتغطيت تاني رفع الغطا ورفعني قعدني
محمد: خليني احكي ليكي انا مشيت وين
نعيمة: ما دايرة اعرف وانا نعسانة دايرة انوم
محمد: ما نعسانة عارف انا وخليني احكي ليكي وبعدها نومي اوكي . كان عندي الفضول دايرة اعرف
نعيمة: اها
محمد: موش كنا حنسافر دبي؟
نعيمة: ايي
محمد: عرفت من شمائل انك حابة تزوري كينيا عشان تشوفي الحيوانات الفيها فكلمت صحبي يحاول يغير لينا الوجهة وهسي ضرب لي مشيت المطار وغيرنا الرحلة لكينيا . قومت عدلت قعدتي بفرحة واخر ابتسامة
نعيمة: محمد انت جادي؟
محمد: ايي . قومت نطيت فيهو
نعيمة: وااااي ما مصدقة . زحيت منو
نعيمة: محمد احلف انو حنسافر كينيا . قام ضحك على لهفتي
محمد: لو عارف كدا كان من البداية اخترت كينيا بس انتي ما اتكلمتي
نعيمة: لانك قولت دبي فخلاص قولت دبي
محمد: موش اتفقنا انو لازم اي قرار نآخدو الاتنين مع بعض يعنى لازم تدي رأيك
نعيمة: واصلا في النهاية رأيك انت البمشي . وضحكنا وكنت مبسوطة انو حنسافر كينيا وبقينا نتونس لمنو جا زمن الغداء وطلعنا اتغدينا برا الفندق واليوم التاني سافرنا على كينيا دولة احلامي ارتحنا اليوم الاول وطلعنا اليوم التاني ولفينا فيهو وشوفت فيها بعض الحيوانات واتصورنا معاها عاوزة اعمل لي البوم كامل اخليها ذكرى
مر اسبوع ونحنا في كينيا وكان احلى اسبوع وشوفت الحيوانات كلها واتصورت معاها ولبست ملابسهم الغريبة ديك واجربت محمد يلبس طبعا بعد تعب شوفت معظم الحيوانات الموجودة عدا الزراف الكنت متحمسة انو اشوفو ومحمد قال بعد يومين حيوديني اشوفو بس بالليل اتفأجأت
_ نينا نحنا لازم نرجع بكرة او بعد بكره ضروري
__ كيف يعني محمد نحنا يداب لينا اسبوع بس
_ عارف بس الرجعة ضرورية
__ انت جادي؟
_ والله جادي
__ ظهرت ليك مأمورية صح متأكدة انا يلا انا ما راجعة معاك نهائي ارجع انت براك . والتفت منو بزعل
_ ستفي الشنط
__ محمد انا ما شوفت الزراف لسع وانت وعدتني انو حتوديني ازورهم . وعيوني دمعو جا قريب لي
_ نينا حنرجع تاني نشوفهم ان شاءلله . زحيت منو
__ ما جاية معاك تاني ومن نرجع ترجعني بيت ابوي ما بقعد معاك . ومشيت على الدولاب عشان استف الشنط جا مسكني من ايدي وجراني قعدنا في السرير
_ اسمعيني والله لو ما مهم ما كنا حنرجع
__ حتخليني من اول اسبوع زواج وحتسافر مأمورية . وهنا بكيت
_ والقال ليكي مسافر مأمورية منو . رفعت رأسي ليهو
__ وراجعين ليه خلاص
_ عندي حفلة تكريم تبع الترقيات ولازم احضرو
__ انت حتترقى؟
_ ان شاءلله . قومت حضنتو بفرحة
__ الف الف الف مبروك والله فرحت ليك ليه ما قولت كدا من الاول
_ ما زعلانة؟
__ لو كنت حتطلع مأمورية كنت حأزعل
_ معقولة اسافر واخلي القمر دا كلو عشان مأمورية هل بجي الكلام دا؟ . غطيت بوشي بخجل كدا
__ امممممم
_ لكن وعد ان شاءلله في اول اجازة لي حنجي نشوف الزرافة
__ تمام . وقومت ستفت الشنط بالليل وطيارتنا كانت الضهر
اليوم التاني محمد قومني بدري شديد
__ محمد ياااخ في شنو الطيارة الضهر
_ قومي لسع في زمن خلينا نطلع نشوف الزراف . فجاة لقيت نفسي قاعدة في نص السرير
__ شنوووو
_ الطيارة الضهر لسع في وقت استعجلي
__ احلف
_ والله . فجاة لقاني جوا الحمام استحميت سريع ولبست وطلعنا ما كنت مصدقة بالجد مشينا شوفنا الزراف واتصورنا معاهو وفطرنا برا ورجعنا
_ سريع عشان نلحق الطيارة
__ تمام تمام . وسريع طلبنا ترحال وركبنا على المطار ولحقنا وزننا وقعدنا منتظرين الطيارة
_ ابوحميد
__ نعم
_ انت عارف انو انا بحبك . عاين لي بتفاجأ ما اتوقعها مني مسك يدي
__ الحاجة العارفها انو انا بحبك . مسكت ايدو وميلت على كتفو وانتظرنا الطيارة
23
وصلنا متأخرين السودان وكنا حننزل في بيت ناس محمد الرئيسي حنسكن هناك لانو امو براها بعد ما شمائل سافرت مع راجلها وصلنا وكنا منتظرين الشنط
_ محمد الحيستقبلنا منو
__ علي هسي بكون منتظرنا في صالة الوصول
_ امممم ايوااا تمام وامي مريم عارفة انو نحنا راجعين؟
__ ايي بس سافرت البلد لاهلها
_ اممممم
__ عارف عملت كدا لانو نحنا لسع عرسان ورجعنا بدري عشان كدا والسفر دا حجة منها
_ ايواااا . وشيلنا الشنط ولقينا علي مستنينا ذي ما قال محمد
علي: حمدالله على السلامة
محمد: الله يقبل حمدك
نعيمة: كيفك علي
علي: تمام الحمدلله . واتحركنا ووصلنا البيت وهو رجع طوالي دخلنا الشنط وكان البيت نضيف ومفرش وجو يفتح النفس دخلنا غرفتنا الخاصة كانت مجهزة وريحتها عرسان عرسان خالتو مريم ما قصرت نهائي ربنا يديها الصحة غيرنا
__ محمد انا جوعانة
_ شوفي المطبخ
__ اطلب لينا بيتزا
_ تمام بس اعملي لي قهوة مصدع انا
__ حاضر . ومشيت المطبخ وعملت ليهو القهوة بس اتذكرت انو معدتو فاضية خليتها في التكنة ورجعت ليهو
__ ماف قهوة
_ كيف يعني انتهت؟
__ لالا
_ اها
__ عملتها بس اتغدا بالاول
_ بتغدا بس جيبيها
__ قولنا لا
_ نينا خلي العنادة
__ محمد الله قولنا بعد الغدا يعني بعد الغدا ولو مصر اعمل ليك وحدة براك اذا بتعرف بس . رفع لي حاجبو
_ والله؟
__ عبدالله . قام ضحك وضحكت معاهو واصريت لمن البيتزا وصلت اتغدينا حتى شربتو القهوة بالليل اتصلت لامي كلمتها انو رجعنا اتفاجأت بس وريتها السبب اتفهمت الموضوع وقالت ما حتزعجنا وحتزورنا بعد اسبوع كدا
اليوم التاني كان عادي جدا قضيناها في البيت محمد كان حيطلع بس وقفت ليهو بالمرصاد
_ نينا ما بتأخر
__ محمد تخطي خطوة برا الباب دا انت طلقان . قام ضحك لمن مسك بطنو
_ لا والله؟
__ اي والله . واصل ضحك وانا كنت بحمر ليهو بس وخاتة ايدي في نصي
_ اها قعدت البحصل شنو تعالي كدا قولي لي
__ ما بتحصل حاجه بس ما حتطلع . جا قريب لي مشيت سريع سريع عشان ادخل الغرفة قبضني
_ اها احكي
__ احكي شنو
_ كنتي بتقولي شنو
__ اااااا قولت شنو انا ما قولت حاجه شكلو اذنك بايظة
_ والله؟
__ ايي
_ اوريكي قولتي شنو
__ اها
_ تعالي اوريكي . جراني وقفل باب الغرفة
اليوم التاني كان الاحتفال وحيشتغل من العصر لاخر الليل كنت متحمسة لاني حألبس توب ودي اول مرة حألبس فيهو توب من اتزوجت دا برا من توب الجرتق غيرو ما لبست جيت نزلت تيابي كلهم واخترت اتنين مشيت لمحمد كان بتكلم بالتلفون اصلا من اصبحنا الصباح تلفونو ما وقف ابدا وقفت قدامو وانا شايلة التوبين
نعيمة: محمد اي واحد؟ . التفت مني تاني وقفت قدامي
نعيمة: اختار واحد . زحاني بأيدو وقام طالع على الصالة
نعيمة: محمد بعدين ما بمشي معاك نهائي . جا راجع علي وشال واحد من التياب الكانو في ايدي وجدعو لي في وشي وطلع قومت اضحك اصلا محمد دا ما بجي الا بالعين الحمرة واختيارو للتوب ذي وشو اخترت انو البس التاني اصلا قاصدة عملت الحركة دي لانو من الصباح ما مركز معاي قومت طقمت التوب مع حاجاتو وجهزت لمحمد بدلتو الرسمية ال هي الكاكي حقو لانو الترقيات بلبسو فيها الكاكي وبقى ما عندي موضوع قولت اجهز الغدا بدري لانو حنطلع بدري ختيتو في الغاز ورجعت اشوف لي موضوع بعد خلص مكالماتو جا داخل الغرفة
_ نعيمة . لويت ليهو خشمي
__ يداب اتذكرت نعيمتك دي
_ عارفاني مشغول مالك ياااخ
__ خلي ينفعوك . وجيت اطلع من الغرفة مسكني
_ تعالي هنا ماف اهم منك والله اها خلينا نختار ليكي التوب . اشرت ليهو على السرير شاف انو جهزت اي حاجه
__ هسي المفروض اعمل شنو عشان ترضي
_ المشكله انك حتترقى ورتبتك حترتفع المفروض احترمك ما ازلك . قام ضحك ومسح وشو فيني الحركة حارة بالاخص مع لحيتو دي بس بحبها
_ محمد زح ياااخ . كان مثبتني ومواصل وانا بضحك
__ انتي عارفة حاجة .
_ شنو . كنت منتظرة يقول لي الكلام الحلو البجي بعد الجملة دي وابتسامتي لاخر ضرسي
__ شكلو حلتك حرقت لاني شميتها قبيل . وضحك
_ وااااي سجمي نسيتو . لزيتو مني وجريت للمطبخ لقيت بالفعل الحلة حرقت قربت ابكي بعد التعب التعبتو فيهو دا هو جا لاحقني
_ كلو بسببك
__ هسي انا عملت شنو
_ عشان زعلانة منك خليتها ونسيتها
__ استغفر الله العظيم
_ هسي البحصل شنو
__ تسأليني انا ولا تسألي نفسك
_ ماف زمن والمفروض نطلع والله تأكل بيض وزبادي بس
__ ليه عامل دايت انا؟
_ خشمك ما حتفتحو وغصب عنك تأكل انا ما اعترضت مع انو اتحرق بسببك انت دا بس . قام ضحك شديد
__ نينا الله كم
_ الله واحد وتعال ساعدني
__ كم ما بيض وزبادي خافي ربك عليك الله . قومت ضحكت وضربت البيض وختيت الزبادي وقعدنا نأكل
_ هسي لو اتزوجت لي وحدة طباخة ما كان احسن الزمن دا كنت بأكل في المحمر والمشمر
__ انت احمد ربك انو ما خليتك تمشي التكريم جوعان وتقع في المنصة ويقولو جاهو هبوط . ضحك لمن اتشرق اديتو موية
_ هبوط دا شنو يااخ نحنا اسبوع مرات ما بنأكل يا فارة انتي . عملت نفسي بتكلم مع روحي
__ يا بختك يا نعيمة يوم تأكلي ويوم تصومي . قام ضحك
_ ربنا يرجعك سريع يا امي . قومنا ضحكنا واكلنا في جو مضحك وبعدها اتجهزنا ولبست التوب بأدب مع الرسم حاجة رهيبة اصلا من اتزوجنا دا اليوم العاشر الرسمة لسع في محلها من عدم الشغل وجيت وقفت قدام محمد عاين لي من وقف لتحت بأعجاب
_ يا ارض احفظي من عليكي ما شاء الله تبارك الله . ابتسمت بخجل
__ تمشي على خير حبيبي انا . وضبطت ليهو الكاكي
_ نطلع؟
__ ما نتصور؟
_ ما يتصور الا نحنا . واتصورنا كم صورة وطلعنا لقيت عربيتو واقفة برا الدبل قبين الزمان ديك
__ هي كانت وين العربية دي
_ كانت مع علي قبيل جابها
__ ايواااا . وساعدني ركبتها لانها عالية شوية وانا لابسة توب وطول الطريق كنت متوترة كأنو انا الحترقى
__محمد
_ نعم
__ ما متوتر؟ . قام ضحك
_ من شنو
__ من الحفل
_ لالا
__ انا ما زولة غريبة عليك انا مرتك شاركني احساسك
_ والله يا نينا متوتر شوية لانو اللحظة دي منتظرها لي سنين وللان ما معروف اذا حأحصل على الترقية بس انا بذلت اقصى جهدي . مسكت ايدو وضغطت عليها
__ عارفة والله وعارفة انو ربنا ما حيخزلك
_ ان شاء الله . ووصلنا قاعة التكريم حاجة كدا خيالية كبيرة مبالغة وكلها ضباط لابسين الكاكي في البداية خوفت من المنظر عند المدخل لانو كأني داخلة على حرب جاني نفس الاحساس لمن مشيت مع شمائل محل شغلو المرة الفاتت بس المنظر دا افظع لانو كمية الضباط مبالغة فيها تلقائيا لقيت نفسي مسكت محمد من ايدو ذي مسكت العرسان ديك
محمد: خايفة؟
نعيمة: شوية
محمد: ما تخافي هسي حتدخلي في الجو . هزيت رأسي واخدت نفس ودخلنا جوا في النص ارتحت شوية لمن شوفت نسوان الضباط الكبار وتعالو شوفو التياب حقاتهم والدهب والبوبار حقهم مشينا على طاولة فيهو الرئيس حقهم العقيد الكان لقيناهم ومعاهو كم عقيد وعميد واحد من النجوم الصقور عرفتهم وقعدنا معاهم ومعاهم نسوانهم شوية التكريم بدا الضباط كانو في صفوف متساوية ومرتبة بالرتب كأنهم في ترتيب عسكريّ ونحنا النسوان بجهة برانا في الكراسي وبدا الموسقى واشتغت نشيد الوطن وموسقى سلاح الجيش اشتغلت وبعدها جا رئيس الدولة والقاء الخطاب وكان طويل وملل عارفين الخطابات الذي دي وبعدها كم واحد القى خطاب ياااخ جرا ساعتين خطاباتهم دي والضباط واقفين لمن حنيت عليهم بعدها بدا التكريم طبعا بأعلى الرتب من العميد الاترقى لرتبة لواء وهكذا لمن وصلو لرتبة الرائد الحيرقى لرتبة مقدم وكان من نصيب محمد نصرالدين من الفرحة لمن بكيت ليهو وهو ركب المنصة واتكرم وركبو ليهو نجمة جنب الصقر حقو ولمن كان بصورو فيهو عاين لي لوحت ليهو ابتسم لي وانا فرحانة وفخورة بيهو لمن نزل من المنصة ورجع لمكانو وتوالت الترقيات لمن خلصو وجا علي وهو شايل الترقية بتاعتو ووقف قدامي ختيت ايدي في محل لوحة اسمو الفي الجهة اليمين من صدرو فوق الجيب وبديت احصن فيهو وهو بعاين لي لمن خلصت
نعيمة: انا فخورة بيك شديد يا حضرت المقدم محمد نصرالدين الف مبروك الترقية
محمد: الله يبارك فيكي وانا مبسوط انك معاي وشاهدة اللحظة دي معاي
نعيمة: اعيش واحضر معاك جميع ترقياتك
محمد: ان شاء الله يا رب . ورجعنا قعدنا في طاولة مع اصحابو لمن خلص الحفل ورجعنا اخر الليل
_ اليوم كان حلو بس طويل
__ تعبتي؟
_ وانت ما تعبت من الوقفة؟ . ضحك لي
__ نحنا في التدريبات بنقيف يوم كامل . فتحت خشمي بصدمة
_ بعرف انو بتقيفو كتير بس ما اتوقعت يوم كامل
__ التدريبات شاقة وحياة الجيش صعبة
_ ربنا يعينك
قعد معاي اليوم الاول بس وطوالي نزل الشغل اليوم البعدو ابدا انا ما محظوظة في حياتي بس اعمل شنو دا حظي كدا وانا اخترتو وبحبو اعمل شنو اتحمل بس يلا التلاتة ايام الاوائل كان بطلع بدري وبرجع متأخر شديد بس كنت بنتظرو عشان اخت ليهو الاكل وبنوم طوالي ماف تفاصيل بينا
اليوم الرابع جا مع المغرب كدا اتفاجأت
_ ما بدري لكن . حسا كأنو قولتها بسخرية كدا
__ خلصت بدري
_ المغرب وبدري؟ عاد يا نعيمة عندك حظ سعدية بت التوم ما عندها . ومشيت على المطبخ عشان اجيب ليهو موية جيت لقيتو طلع البدلة وقاعد بالبنطلون مديت ليهو الموية جراني من يدي وقعدني
__ نعيمة عارف انو جيت عليكي شديد وانتي صابرة بعد يوم من الخطوبة خليتك وسافرت مأمورية وقبل الزواج بأسبوع لغيت اي حاجة وخليتك في وجه المدفع وسافرت وهسي شهر عسلك قطعتو ليكي من اول اسبوع وهسي طوالي نزلت الشغل وبرجع متأخر لكن دا عشان استلم شغلي الجديد بس هسي انت ندمانة؟ . عاينت ليهو مسافة وقومت ورفعت ايادي الاتنين فوق وبقيت اعملهم شكل اكس وقولت بدراما وانا ماشة على باب الغرفة
_ ندمانة يا جنابو ندمااااانة . هو ضحك على درامتي طلعت برا الغرفة ومديت رأسي جوا
_ طلقني يا مفتري يا ظالم . ضحك شديد
__ ما عندنا طلاق
_ لن ننسى ولن نغفر و سأخبر الله بكل شي . ومشيت المطبخ جا لاحقني وحضني بورا
_ انا عملت شنو في الدنيا عشان ربنا يكافئني بيكي . وسلم علي في خدي
__ دا من رضا الوالدين . قام ضحك
_ شكلو كدا
__ هسي تعبان ولا تساعدني . زحا مني
_ كان بودي اساعدك بس تعبان . خبطو بقعر السكين الكان في يدي
__ امشي يا ظالم يا مفتري . ضحك ومشى وانا ضحكت وكملت شغلي .......... ...