رواية بين الضياع واللقاء الفصل الثالث 3 بقلم شذى عبدالمكرم
بعد ما محمد قال لي
__ انا موش قولت ليكي اوع تظهري قدامي تاني . من الخوف رجولي ما شالتني وجاني هبوط وبركت في ارضية المطبخ هو بقى يعاين لي وانا دموعي نزلت ولسع برجف وبقيت اتمتم
__ انا انا انا ما ما . فجأة جات شمائل داخلة المطبخ اتخلعت في منظري عاينت لمحمد بصدمة كدا وجرت نزلت عندي
شمائل: بسم الله نعيمة مالك . وانا لسع ببكي هي عاينت لمحمد
شمائل: محمد عملت للبت شنو . رفع حاجبو بأستهتار وطلع شمائل ساعدتني وقفت على رجولي
شمائل: معليش والله ما كنت عارفة انك بتعرفي شخصية محمد وحتخافي للدرجة دي منو والله ما كنت عارفة انو محمد حيرجع بالليل والله اسفة
نعيمة: انا ماشة بيتنا
شمائل: عليك الله ما تمشي ياهو محمد طلع وهسي بشوفو لو قاعد بطردو برا البيت
نعيمة: لالا انا ماشة بيتنا . حنستني كدا بس كنت مصرة وسريع رجعت البيت امي استغربت ليه رجعت بدري اتحججت بموضوع كدا ما صدقتني بس مشتها لي دخلت غرفتي تاني بكيت زين وقولت بيت ناس شمائل لو بقى شنو تاني ما بعتبو ولا حتى بجي بشارع بيتهم ...
__________
من جانب محمد
بعد خلى نعيمة واقفة في الارض مشى غرفتو وقلع جلابيتو وقعد يفكر البت دي علاقتها شنو بناس بيتهم وانو شمائل بتصاحب بت قبيحة ولئيمة ذي دا لشنو في عز تفكيرو شمائل جات داخلة
_ محمد انت عملت لنعيمة شنو
__ انتي يا بت الناس تتوقعي عملت شنو
_ والله بتوقع منك اي حاجه
__ لمي لسانك عليك قبل ما اقبل عليكي انتي التانية كمان
_ هي طلعت من بيتنا بتبكي
__ م تطلع انتي مجنونة يا بت ما جيت جنبها ابدا . شمائل عاينت ليهو مسافة
_ هي بتخاف من الضباط . هو ضحك بأستهتار كدا هي كشرت ليهو
__ وانتي بتعرفيها من وين البت دي
_ ما دخلك . وطلعت من غرفتو قال دا شنو المجانين ديل ورقد نام
_________
من جانب نعيمة
اليوم التاني بعد الفطور شمائل جاتني ومعاها قهوتها وبتعتذر لي خاتا الذنب على نفسها لانو ما كلمتني انو محمد رجع وما ختت في رأسها انو ردت فعلي حتكون كدا لمن كتر علي اعتذارها
__ شمائل حأقول ليكي سر بس اوع تشتمتي او تضحكي
_ في شنو
__ هو انا ما بخاف من الضباط بس بخاف من محمد اخوكي بالضبط . عاينت لي بأستغراب
_ كيف يعني وانتي بتعرفي محمد اخوي من وين . غمضت عيوني هزتني
_ نعيمة انتي بتعرفي اخوي؟ . فتحت عيني وحدة بعدها اتنهدت وحكرت في السرير
__ اخوكي دا دخلني القسم . فتحت خشمها من الخلعة
_ شنووووو . قالتو بصوت عالي لمن بتها جود صحت وقامت تبكي
__ الله يخرب بيتك هووس ما تفضحينا هسي خلعتي البت . قامت طبطبتها رجعت نامت والتفت لي
_ كيف يعني دخلك القسم
__ والله كل الموضوع .... . وحكيت ليها الحصل كلو وتهديدو الفي الاخير واللسع عالق في رأسي وختمت ليها
__ عشان كدا لمن لقيتو في المطبخ قال لي انا مش قولت ليكي اوع تظهري قدامي تاني من الخوف جاني هبوط . هي من بداية القصة فاتحة خشمها من الصدمة لمن ختمت واستوعبت الموضوع فكت الضحكة لمن بكت من الضحك كل مرة تعاين لي وترجع تضحك بقيت اعاين ليها بغيط وقومت قرصتها
__ اسكتي يا فضيحة . قالت لي وهي بتضحك
_ ابدا ما اتوقعت يكون دا الحكاية بس موقف والله لعدوي ما بقبلو . ورجعت تضحك اتنهدت بتعب
__ تاني شارع بيتكم ما حأجي بيهو
_ امس لمن مشيت اشاكلو قال لي البت دي بتعرفيها من وين قولت ليهو ما دخلك اتاري داير يعرف العلاقة
__ الله يرضى عليكي ما توري اني ساكنة في الحي دا
_ كدا كدا حيلقاكي يوم
__ للزمن داك الله كريم
_ خلاص كويس . عاينت لي مسافة
_ قولتي لي دخلتي القسم بسبب طولة لسانك وكمان عشان الله يرميكي ما خاتكي الا قدام رائد
__ اتخيلي بس . وضحكنا
اليوم التاني كان الاحد اتجهزت بدري للجامعة وجيت طالعة التفت يميني كدا بس اشوف ليك محمد لابس الكاكي حقو وبتكلم بالتلفون وجاي اتجاهي من الخلعة دفرت باب بيتنا ودخلت ورو قفلتو سريع لمن امي جات بسرعة تشوف الحاصل
امي: يا بت الحاصل شنو
انا: شوفت كلب وكان جاي اتجاهي
امي: انتي هبلة ولو كلب تقفلي الباب كدا قربتي تقلعي
انا: اسفة يا حجة
امي: طيري جامعتك
نعيمة: طايرة يا امي . فتحت الباب بالراحة وكشفت في كل الاتجاهات
امي: بتعملي في شنو
نعيمة: بشوف في الكلب لو مشى . ضربت اياديها ببعض
امي: استغفر الله . ومشت خلتني لمن اتأكدت انو جنابو مشى طلعت ومشيت جامعتي وتاني ما اتصادفت معاهو
في يوم العصر كدا مشيت الدكان لمن دايرة امد لبتاع الدكان القروش في وحدة دقشتني ومدت لبتاع الدكان قروشها
البت: اسحاق اديني سكر سريع عليك الله
نعيمة: انتي يا بت مجنونة ما شايفني قدامك وكمان داقشاني بدون ما تعتذري . البت عاينت لي من فوق لتحت ذي الحاجة الما كويسة يلا حركتها دي عصبتني وهي طوالي التفت لبتاع الدكان
البت: اسحاق بسرعة عليك الله
نعيمة: والله كمان الليلة ما بتشيلي قدامي
البت: انتي هبلة؟
نعيمة: بوريكي الهبالة دي كيف . عاينت لبتاع الدكان
نعيمة: اسمعني يا اسحاق انا قدامها اديني سكر رطلين و اي ربع رطل براهو وكيلو رز و اي ربع كيلو براهو . اسحاق قام يضحك التفت عليها وعاينت ليها بتحدي وبرود قامت تجوط وانا جوطت معاها فجأة سمعنا صوت
الصوت: دا شنو الهمجية دي التفتنا بس القى ليك جنابو واقف ومعصب يلا خلاص كتمت فيني عاين لي قوي وهو لابس الكاكي
محمد: انا موش حذرتك يا بت الناس من المشاكل يا علي ارفعها لي في البوكسي ........