خلصنا غداء وخلصت الشغل العلي كلو وجيت غرفتي فتحت دفتري وراجعت شوية الحمدلله براجع اول بي اول انا قدامي هدف لازم اوصل ليه
جات اريج شايلة كتاب الانجليزي وقالت لي لو خلصتي ممكن تراجعي لي مسكنا الكتاب وراجعنا تماااااام والحمدلله كل مرة بحسها ماشة في تحسن وبقيت اعمل ليها اختبار بسيط في الحاجة البنراجعها
خلصنا مع صلاة العشاء كدا مشينا صلينا وجيت راجعة غرفتي وجهزت ملابسي الماشة بيها الجامعة ورقدت دخلت الفيس اتصفح شوية كدا ونمت لحد ماصحاني المنبه مع صلاة الصبح قمت سريع سريع اتوضيت وصليت وكالعادة لقيت خالتو نسيبة جهزت الشاي
شربت ونضفت البيت سريع سريع وجهزت للجامعة عمو علي قال لي ي بتي الليلة انا طالع متأخر معليش بوصلك لحد محل المواصلات ويجي راجع قلت ليه مامشكلة ي عمو خلاص بطلع براي عادي قال لي لأ بقدمك وفعلا طلع معاي وصلني الظلط وركبت المواصلات وهو رجع
وصلت الجامعة نزلت من الحافلة ودخلت الجامعة ومشيت لحد قاعاتنا طوالي الليلة استاذ حيدر مالاقاني خالص واصلا ماعندو معانا محاضرة اليوم دخلت القاعة ولقيت علا سلمت عليها واتونسنا شوية كدا والدكتور دخل ادانا المحاضرة وطلع
مشيت الكافتريا دخلتي كدا اشوف ليك استاذ حيدر في الكاشير قال لي بتاع الكاشير طلباتها علي قلت ليه مستحيل رفضت نهائي قلت ليه كفاية قروش المواصلات امس واول امس اتخلع قال لي عرفتي كيف اني اول امس دفعت ليك قلت ليه بي بساطة ماف زول من الكانو في الحافلة بعرفني وماف زول من الجامعة ساكن في نفس منطقتنا الا انت
قال لي اها اوك بس اسه مافيها مشكلة انتي طالبتي وطلعنا جيران عادي مافيها حاجة لو دفعت ليك حق الفطور
قلت ليه بالنسبة لي فيها حاجات والله بعدين حتكمل مرتبك من اول اسبوع
هههههههههههههههههههههه قعد يضحك قال لي هو انتي فاكرة انا معتمد على مرتب الجامعة دا
دا مابقعدني يومين خلي اسبوع قلت ليه خير بي ماتدفع لي ودفعت قروش فطوري وعصيري ومشيت قعدت في التربيزة واكلت ومشيت القاعة
انتهت المحاضرات وانا طالعة لاقتني وحدة في الحوش حق الجامعة وقفتني وسألتني بتعرفي حيدر من وين قلت ليها حيدر منو وانتي منو اصلا قالت لي يعني عاملة مابتعرفي حيدر قلت ليها انا مامجبرة ارد عليك بس تقصدي حيدر منو عشان انا بالجد مافاهماك قالت لي حيدر الاستاذ
قلت ليها اهاااااااا بس انا البعرف انو بنقول ليه استاذ حيدر عشان كدا استغربت لمن قلتي لي حيدر حاف كدا وزي ماقلتي براك حيدر الاستاذ يعني معرفتي بيه انو هو استاذي
قالت لي كان واقف معاك في الكافتريا بتقولو في شنو
قلت ليها والله دي ماحاجة بتخصك وانا ماملزمة اوضح ليك
قالت لي شوفي هنا يا بت الناس احسن تبعدي عنو وتاني ما القاك واقفة معاه والا مابحصل ليك خير
قلت ليها اجي 😳 يابت انتي موهومة ولا شنو ومشيت خليتها وبقيت اتكلم مع نفسي دي شنو البت الهبلة دي وشغلتها شنو اقيف معاه ولا لأ وصلت الشارع ووقفت الحافلة ركبت كدا كان اشوف استاذ حيدر جا ركب والمرة دي لقى المقعد الجنبي فاضي سلم وقعد وانا قبلت على الشباك وعملت رايحة ماعايزة اي كلام
قال لي سرحانة وين قلت ليه بعاين في الشارع بس سكت شوية وسألني انتو بالضبط ساكنين وين قلت ليه قريبين من الجامع الكبير قال لي غريبة جنب وين بالضبط انا عندي عمي ساكن هناك قلت ليه مابعرف اوصف اكتر من كدا وسكت لاني خفت يعرف عني حاجة
اداني تلفونو قال لي ممكن تسجلي لي رقمك في اللحظة دي اتوترت شديد قال لي لو ماعايزة عادي مامشكلة
المهم سجلت ليه رقمي وهو محطتو جات ونزل وبعدو بي شوية نزلت انا
وصلت البيت وياهو نفس البرنامج حق كل يوم وانا بنضف سمعت التلفون بضرب لقيت رقم غريب متصل رديت عرفتو دا استاذ حيدر قال لي معليش بس قلت اشوفك وصلتي
قلت ليه ايوا وصلت قال لي طيب وقفل
بعد خلصت برامجي جيت اراجع شوية واصلا بكرة عندنا قاب ماف محاضرات قلت اخلي الغسيل لي يوم بكرة وراجعت مع اريج شوية كدا وجيت انوم لقيت رسالة في الواتس من استاذ حيدر
قال لي اسف للازعاج بس والله ما عايز منك حاجة انا من شفتك حسيت انو في حاجة قوية بتربطني بيك هي شنو ماعارف بس حاسيك قريبة مني شديد والله العظيم مابشاغل او في نيتي حاجة كعبة تجاهك
حسيت من كلامو انو هو صادق في الحاجة دي قلت ليه خير مامشكلة وانا حاتعامل معاك بكل ثقة
بقيت الليل كلو افكر في كلامو ياربي الزول دا عايز مني شنو انا ماعايزة اي زول يقرب مني او يعرف عني حاجة انا عن نفسي ماعارفة انا منو ولا هل عندي اهل ولا ماعندي وخايفة جدا انو في يوم يعرفني ساكنة وين وزي ماقال بيت عمو جنبنا هنا
صبح الصباح قمت على نضافتي خلصتها وعندي غسيل حقي وحق ناس البيت غسلت وجهزت الفطور فطرنا انا وخالتو نسيبة برانا عمو علي واريج طلعو من الصباح بعد اكلنا لملمت الحاجات ولميت الغسيل وكويتو وجيت غرفتي قعدت اقرأ شوية
ودخلت الفيس كنت متابعة فيه رواية قريت كم بارت كدا أثناء مابقرأ جاتني رسالة من استاذ حيدر
حياة كيفك قلت ليه الحمدلله وانت قال لي بخير والله قال لي الليلة معطلين بختكم والله بس الغريبة الجامعة مسيخة والله
قلت ليه هي الطبيعي حقها مسيخ ياهو من القاعة للفطور للقاعة لي باب الجامعة للبيت مافيها موضوع
قال لي والله انتي براك القافلة نفسك لو بتقعدي بعد المحاضرات الشباب ديل بعملو برامج نهاية اليوم والناس بقعدو بفرقو شوية
قلت ليه انا من طبعي مابحب الجوطة واللمات عشان كدا من البيت للجامعة والعكس قال لي طيب معناها الجامعة مامسيخة بس انتي براك الحاصرة نفسك
اثناء مابدردش جاتني نعسة صغيرونة كدا ونمت حلمت بي روحي زي الواقعة في بير او حفرة وجا استاذ حيدر مد يدو طلعني منها وقال لي كلمة وحدة (اخيرا )...