رواية بيت جنب المقابر
الجزء الثالث3 الفصل السادس6
بقلم دانيا
واقف وبعاين للبيت فجأة حسيت بيد اتختت فوق كتفي اتلفتت بخلعه للورا لقيتو دا واحد من الناس الساكنين في الحي قبل انضم معاهو هو قال لي خير ياشاب في شنو مالك واقف في نص الشارع وليه مغطي وشك كأنك داير تعمل عمل إجرامي ؟ عاينت ليهو بتوتر لأنو من طريقة كلامو دي قلت لو م رديت ليهو رد مناسب ح يعمل لي فضيحه في الحي ويلم على الناس .... رديت عليهو بنبرة كلها ثقه قلت ليهو وعليكم السلام ياعم انا بفتش على بيت حاج آدم وصفو لي قالوا في الحي دا ،، شرد للحظه كأنو بخاول يتزكر الإسم وبعدها قال لي لا والله ياولدي انا لي عشرة سنه هنا م سمعت بالإسم دا قلت ليهو طيب عن إذنك !! مشيت منو بخطوات مسرعه .
ركبت ركشه ورجعت الفندق وانا منظر ساجده م داير يروح من بالي خشيت الغرفه رميت التلفون في السرير بزهج وقعدت وشبكت يديني في راسي وانا بفكر اعمل شنو واتصرف كيف وساجده حالياً بكون حصل عليها شنو ؟ قمت من السرير بسرعه قلت لا يامحمد التأخير م بفيدك بحاجه انت لازم ترجع البيت داك تخشو كان قدام عيون الناس او بالخفى المهم تنجز قدمت ماشي على باب الغرفه ... فجأة عيوني زغللو وبقيت بشوف المكان قدامي سواد في سواد وم اخدت ثواني واقف على رجليني جيت واقع الأرض .
فتحت عيوني وانا بسمع صوت رنة تلفوني لقيت نفسي نايم في السرير والتلفون مختوت في التربيزه ... اتزكرت آخر شيء حصل معاي إني بقيت بشوف طشاش وبعدها تاني م حسيت بأي شيء طيب جيت السرير كيف ؟ قاطع تفكيري صوت التلفون تاني رن قمت مشيت شلتو لقيتو دا مسلم اخوي متصل رديت عليهو قبل انتكلم سبقني ومن دون سلام قال لي وين انت يازول ؟ اختفيت مننا م بتقول عندي اهل قلبهم بنشغل علي اتصل واطمنهم ،، احيانا بنضرب ليك تلفونك بكون قافل .... قلت ليهو انا تمام يااخوي انتوا م تشغلوا بالكم طمني عنكم وامي كيف إن شاء الله طيبه ؟ قال لي طيبين كلنا بس بالغت والله اها إن شاء الله جمعتا ؟ فكرت اوريهو او لا تاني قلت لا احسن م اوريهو ... قلت ليهو لسه جاري البحث .
بعد قفلت منو عاينت للساعه لقيتها عامله تسعه مساء إستغربت شديد قلت معقولة ؟ انا النومني شنو الوقت دا كله ياالله لازم اتحرك بسرعه ..... شلت الشال حقي وطلعت من الفندق وقفت ركشه وخلال كم دقيقه وصلت الحي داك ،، اول مانزلت مشيت على البيت داك قبل اتسلق الباب لمحت العجوز العارض داك شايل كشافو وجاي علي قلت يالطيف دا جايني ليه هسي وشافني كيف دا م وقتو وم ح اضيع وقتي معاهو خليني اتسلق الباب قبل يصلني ويأخرني هسي لو شافو زول من الجيران واقف معاي بكشافو المضوي الشارع كله دا ح اتقبض بسببه .... رفعت رجلي في الباب فجأة لقيت العجوز واقف جنبي وقال لي بنبره حاده " انزل " انا لمن شفتو واقف جنبي لمت فقدت توازن وقربت اقع من على الباب عاينت ليهو بصدمه وعاينت للمسافه الكانت بيننا كيف قطعها بالسرعه دي