رواية شلة بنات الفصل الحادي عشر 11 والثاني عشر 12 بقلم شذى عبدالمكرم
خلصنا الامتحانات بحمد الله بقينا فري بمشي لنوسة وهي بتجيني ومتواصلة مع سام وعلاقتنا بقت احلى لانو مهتم بي معتبرني طفلة بس وطبعا ماف برامج عملنا مكالمة جماعية مع الشلة
ريان: خلينا نلقى لينا موضوع
روز: الملل كاتلنا ياااخ
قمر: رأيكم شنو اعمل حفل مبيت بما انو بيتنا ما فيهو اولاد واصلا ابوي مسافر حنآخد راحتنا
نوسة: فكرة ظابطة شديد
قمر: خلاص ظابط
روز: سهرة صباحية
هديل: محتاجين حاجة ذي دي
قمر: اي وحدة تكلم امها حتقيلو معاي من الصباح وحتبيتو ظابط؟
روز: انا ما عندي مشكله
نوسة: وانا ما عندي مشكله
هديل: ولا حتى انا
نبأ: ولا انا
ريان: حتى انا
قمر: من بعد بكرة خلاص . واتفقنا على بعد بكرة ومشيت كلمت امي وواقفت لي ولمن ابوي جا كلمتو هو برضو وافق
بالليل اتصل لي سام وكنت بتكلم معاهو
_ طبعا عندي حفلة مبيت
__ وين
_في بيت قمر
__ متين
_ بعد بكرة
__كم يوم
_ يوم واحد
__ امممم ومعاكي منو
_ سام ليه الاسئله دي كلها كأنك بتستجوبني ولا ما عاجبك الوضع
__ اي ما عاجبني
_ ليه السبب شنو
__ ما عارف لو قولت ليكي ما تمشي حتمشي؟
_ للاسف حأمشي
__ ايوااا تمام
_ سام انت الحاصل عليك شنو
__ ما دايرك تبيتي برا البيت بس
_ المشكله وين ما حأبيت في الشارع انا
__ براكي ولا ماشة مع نوسة
_ حنكون الشلة كلنا هناك
__ ايوااا تمام
_ سام
__ نعم
_ انت مالك كدا قول لي سبب مقنع لرفضك وانا حأجلي المشية
__ لو قولت ليكي سبب مقنع ما حتمشي؟
_ ايي حأسمعك كلامك
__ خلاص امشي
_ من قلبك
__ ايي
_ تمام
اليوم التاني جهزت ملابسي ورتبت شنطة بتاعت الضهر لانو حأمشي بيها ومشينا مع نوسة السوق اشترينا بعض الحاجات وانا اليوم التاني قومت بدري شديد عملت سمبوكسة ونوسة عملت خلية نحل واي واحدة شالت شنطتها بتاعت الضهر واجرنا ترحال مشينا بيهو وصلنا لقينا نبأ وصلت قبلينا وطبعا قمر اخواتها تلاتة وحدة متزوجة واتنين اصغر منها وحدة في الجامعة والتانية ممتحنة الشهادة قعدنا لمن اكتمل العدد عملنا قعدة جبنة بمزاج وضحك وونسة واخدنا رراحتنا بكلو لانو البيت ماف فيهو ولا راجل وحتى نحنا عملنا الغدا وبالليل قمر جابت سلة التلفونات كانت رافعاهم
قمر: اي وحدة معاها ربع ساعة تكلم راجلها ربع ساعه بس ونرجع نجمعهم تاني
هديل: واااي اشتقت لراجلي . ضحكنا فيها
نوسة: والما عندها راجل
قمر: تجي تتونس معاي . ضحكنا و اي وحدة شالت تلفونها واخت قمر الممتحنة مشت نامت مع امها عشان بكرة شغالة مدرسة والتانية حتشاركنا الحفلة انا اتصلت لسام
_ سيمو
__ عيوني
_ شوق الشوق
__ والله بالاكتر ليه تلفونك قافل
_ دي وحدة من القوانين قفلنا التلفونات عشان ما تشغلنا هسي اي وحدة عندها ربع ساعة بس
__ ليه يااخ انا داير اتونس معاكي
_ معاك ربع ساعة
__ ما موافق . قومت ضحكت
_ دي اوامر طبعا ولازم تنفذ
__ امري لله اها الحفلة كيف
_ طبعا رهيبة شديد . وبقيت اتونس معاهو لمن تمت ربع الساعة
_________
من جانب ريان
فتحت تلفوني لقيت مكالمة فائتة من ريان رجعت ليهو اخر فترة صداقتنا كانت حلوة
__ شنو يا توأمي وين من الصباح
_ قولت ليك عندي حفلة مبيت
__ هااا اي صح يعني الليلة كانت
_ امس ما كنت مركز معاي ولا شنو
__ المرا دي شغلتني ما ركزت
_ عندك مرا؟
__وبتين كمان
_ والله ما شاءلله ربنا يحفظهم ليك يلا ما اعمل ليك مشاكل مع المرا . سميت زنة كدا
__ اهو بتتصل دقيقة برجع ليكي . فضلت بدون ما اقول حاجة وزعلت عارفة ما عندو مرا بس اكيد عندو حبيبة واهو اتصلت ليهو انا ما حصل سألتو من حياتو الشخصية مستحيل شاب كدا يكون ما عندو حبيبة قعدت افكر كدا وزعلانة رجع لي
__ رينو
_ نعم
__ اها حفلة المبيت ماشة كيف
_تمام يلا ما اعمل ليك مشاكل مع حبيبتك احتمال تتصل ليك تاني تلقى تلفونك مشغول للمرة التانية
__ انتي الزول ما يهظر معاكي يعني
_ تهظر كيف وهسي ما اتصلت ليك؟
__ دا صحبي تفتكري لو حبيبتي بتكلم معاها نص دقيقة؟
_ ما عارفة
__ مالك هسي انتي
_ حاسة روحي كيف كيف وانا بتكلم معاك وانت عندك حبيبة
__ والله لو عندي حتكوني انتي بس . طوالي فصلت وسكتت ما قولت حاجة كنت فرحانة شديد بكلامو دا
__ ريان انتي معاي؟
_ معاك
__ وصلتك المعلومة؟
_ وصلت . وواصلنا ونسة وكانت احلى بعد كلامو دا لمن تمت ربع الساعة
___________
من جانب نوسة
كنت بتصفح بتلفوني في الانستا ما عندي موضوع دخلت حساب روز وشوفت محل متابعينها وبقيت افتش في حساب رامي ولقيتو قربت انط من الفرحة ودخلت ونسيت انو حيجيهو هناك انو انا زرت حسابو وبقيت اشوف في صورو وبتأمل ساي وانا ببتسم بعد خمسة دقائق نزلت لي رسالة في الانستا دخلت لقيتو من رامي ذاتو قربت اجدع التلفون من الخلعة
__ الدخلك حسابي شنو؟ . قريت الرسالة مرتين وقربت ابكي من الاحراج ما عرفت ارد اقول شنو لانو ماف مبرر مهما بررت بعد دقيقتين حتى رديت ليهو
_ ما دخلت حسابك انا
__ معناهو الانستا حقي كذاب
_ يمكن
__ قولي بالواضح دخلتي تتأملي في صوري . خجلت لانو صح وفي نفس الوقت قولت مالو مغرور كدا
_ ليه من جمالك؟ . طبعا الواحد ورا الشاشات بكون عندو جراءة كدا عجيبة
__ يمكن
_ شكلي دخلتها بالغلط
__ نوسة عندي عملية داخل هسي نتم نقاشنا مرة تانية
_ تمام بالتوفيق
_ ان شاءلله تسلمي . وطلع كنت مبسوطة بالرسالتين الحصلت بينا دي ........
_________
من جانب هديل
قومت مشيت اتصل لحمزة
__ راجلي
_ انتي متذكرة راجلك
__ دا قلبي كيف ما اتذكرو
_ قافلة تلفونك ليه
__ قانون وكدا
_ انا القوانين دي ما بتنفع معاي اوع تقفلي تاني
__ والله ما اغشك بعد ربع ساعه حأقفلو تاني
_ اياكي تعمليها
__ بس قمر حتجمع التلفونات وما بقدر اقول ليها حاجة
_ انا ما بهمني المهم بس بتصل ليكي بعدين اوع القاهو قافل فاهمة . زعلت منو
__ فاهمة . لمن حسى اني زعلت
_ هديل ما دايرك تقفلي عشان اطمن عليكي والله لمن اتصلت لقيتو قافل حتى روز قافلة تلفونها قلقت قربت اجي بس اتريست قولت انتظر ما اهجم على بيت الناس ساي . فرحت انو خايف علي
__ حمزة ما حيحصل لي حاجة وخليني اقفلو عشان ما يزعلو مني
_ بس تفتحي الصباح بدري
__ حاضر من عيوني . وبقيت اتونس معاهو لمن الزمن تم ........
__________
من جانب روز
بعد ربع الساعة تمت قمر ضربت لينا السلة
قمر: يلا اي وحدة تودع راجلها . ضحكت وعملنا ذي ما قالت وجمعنا التلفونات
روز: اها هسي نعمل شنو
قمر: رأيكم شنو نلعب تحدي وصراحة
ريان: ظابط عشان نفصح بعض . ضحكنا
قمر: فكرة حلوة . وجينا دقينا دائرة ولفينا القزازة
قمر: ريان تحدي ولا صراحة
ريان: صراحة
قمر: ريان صحبك دا موقعو من الاعراب شنو صاحب بس ولا في مشاعر تاني
ريان: ما اكذب عليكم الصراحة حبيتو بس هو ما عارفة من ناحيتو شنو
قمر: حلو . ولفينا تاني
روز: نوسة صراحة اكيد
نوسة: طبعا
روز: رامي اخوي دا بتحبيهو جد ولا تكريش نظام اخو صحبتك . سكتت مسافة
روز: اها جاوبي
نوسة: في حس اعجاب
روز: نوسة هوووي الله دا كم
نوسة: الله واحد
روز: لانو لو جد كدا العب ليهو برأسو عشان تكوني مرتو . شوفتها خجلت ضحكنا فيها
قمر: معناهو واقعة
نوسة: والله ما اكذب ايي واقعة . ولفينا
ريان: نبأ انتي ليه دايما غامضة كدا ولا في زول في حياتك وما دايرة تكلمينا عنو
نبأ: ماف زول والله
ريان: ولا حتى مكرشة على زول
نبأ: ما اكذب متذكرين مراد صاحب سام اعجبت بشخصيتو لانو بحسو هادئ ذيي
روز: صح وحتى طلع بحب قراءة الكتب ذيك كدا
نبأ: بالجد؟
روز: والله عرفت المعلومة دي عن طريق سام رأيك شنو اعرفك عليهو تاني وبطريقة غير مباشرة
نبأ: بالجد حتعملي كدا
روز: وليه ما اعمل موش صحبتي طوالي
نبأ: شكرا . ابتسمت ليها وهزيت رأسي بمعنى عادي وواصلنا لعب وبعدها ونسة لحدي آذان الصبح صلينا ونومنا ما قومنا الا الضهر حتى خالتو ما صحتنا و اي وحدة فتحت تلفونها لقت كمية مكالمات طمنا ناس البيت وكدا وفطرنا اندومي وبطاطس بالشطة وقيلنا و اي وحدة رجعت بيتهم المغرب .............
12
بعد اسبوع نزلنا السوق مع نوسة لفينا كدا لمن قولنا بس رجعت معاي البيت لقيت التوأم رجعو من المدرسة
روز: رايس اجري جيبي موية . جرت
روز: ريل امي وين
ريل: امي في غرفة رامي
روز: رامي قاعد؟
ريل: ايي جا قبل شوية
روز: جا بدري مالو
ريل: عيان
روز: عيان عندو شنو . قومت جريت غرفتو لقيتو راقد و امي فوق رأسو
روز: رامي مالك سلامتك
رامي: ماف حاجة امي مكبرة الموضوع ساي جيت مصدع بس وانتي بتعرفي الحجة
امي: جسمك دا نار بس
رامي: ماف اي حمى يا امي
امي: اكذب انا؟ . انا قربت منو وهبشت جسمو كان دافئ بس ما عندو حمى بس امي مكبرة الموضوع ذي ما قال قومت غمزت ليهو بالراحة
روز: امي صح كلامها مهموم انت يا زول . قام يضحك
امي: شايف كلمتك
روز: دقيقه اعمل ليهو عصير وابلع بندول حتكون كويس
رامي: لا دقيقه انتو فاكريني استاذ ولا شنو يا جماعة انا دكتور دكتوررررر يعني عارف
روز: بالنسبة للام في المرض انت شافع حتى لو كنت اكبر اخصائي في العالم . عاين لامي وابتسم ليها
روز: امي ورح نخليهو يرتاح . وطلعنا مع امي
روز: امي ما تخافي رامي كويس هسي بعمل ليهو عصير حيقوم ذي الحصان انتي امشي ارتاحي . هزت لي رأسها ومشت وانا مشيت لنوسة
نوسة: سلامتو
روز: تسلمي
نوسة: عندو شنو
روز: مصدع بس . وضحكت عملت العصاير اديت نوسة والتوأم وشيلت حق رامي ماشة اودي ليهو
نوسة: امشي معاكي اكفر ليهو لو ممكن . ضحكت لانهم مكبرين الموضوع
روز: ورح . مشينا ودخلنا ليهو طوالي قعد اديتو العصير
نوسة: سلامتك
رامي: تسلمي
روز: لا بالجد يا رامي انت حاسي نفسك عيان ولا ما داير امي تخاف لانك مستحيل ترجع بدري كدا
رامي: روز والله انا كويس واصلا الاسبوع دا المناوبة حيكون على صحبي وانا رجعت لانو ما عندي شغل الاسبوع دا كلو حاكون في البيت امشي للضرورة بس واهو شوية صداع بس ما اكتر من الارهاق
روز: ايواااا الحمدلله واحلى حاجة الاسبوع حتقضيهو معانا بس اوع تقول حتقضيهو في غرفتك كالعادة ونوم بس ذي الكوالا
رامي: روز معانا ضيفة ماف داعي للفضائح .
روز: كأنو نوسة ما بتعرفك كدا
نوسة: لا خليهو حأعمل روحي ما عارفة . ضحكنا
روز: هسي بسألك يا رامي انت حتعمل ليك بيت كيف وانت ما بتظهر الا الجمعة واخر الليل
رامي: ما حأفضل عمري كلو كدا مشغول للدرجة دي وتاني حاجة هل حأكون اول دكتور يعرس
روز: والله صح
رامي: وتالت حاجة البحبك بتحمل جميع ظروف شغلك ولا ما كدا يا نوسة . هي سكتت
روز: بس انا روز . حدر لي سكتت
نوسة: على كلا سلامتك
رامي: الله يسلمك . وطلعنا من غرفتو
نوسة: انا بعد دا بمشي
روز: تمام حبيبتي . قدمتها للباب ورجعت انجدعت في سريري ومسكت تلفوني واتصلت على سام ما رد غيرت ونومت من التعب صحيت بتلفوني كان هو وكنت نعسانة ختيت التلفون في اذني وانا مغمضة
__ رزتي
_ هممممم
__ كيفك
_ تمام
__ نايمة ولا شنو
_هممممم
__ انا في باب بيتكم
_ هممم لالا حلو . قام يضحك
__ طلبتك من ابوكي موافقة؟
_ هممم اي . وهو لسع بضحك
__ يعني ماف اعتراض
_ اي
__ انتي اسمك منو
_ اي . صرخ في التلفون
__ روووز . قومت مخلوعة وهزيت رأسي ومسكت التلفون وكنت معصبة
_ سام يا زفت مالك ياااخ
__ انا بتكلم معاكي وانتي نايمة
_ مدام عارفني نايمة بتتكلم معاي ليه . قفلت فيهو الخط ورجعت نومت ما كنت واعية للعملتو دا صحيت المغرب قوموني اتغديت ومسكت تلفوني اتصل لسام لقيت مكالمة انا رديت عليها فتحت تفاصيلها لقيت مدتها خمسة دقايق استغربت بعداك جمعت للانا عملتو ضربت وشي رجعت ليهو
_ سمسم
__ بقيت سمسم هسي؟
_ ياااخ انا كنت نايمه ما بكون مجمعة ابدا وانت خلعتني
__ لالا يااخ
_ والله وانا لمن اصحى بكون ما مجمعة
__ هسي بتبرري عشان ما تعتذري صح
_ ما ببرر ولو عاوز اعتذر بعتذر عادي بس عشان عاوزة افهمك الحصل شنو
__ انتو بنات حواء جنكم فلسفة الوحدة عشان تقول كلمة اسفة تلف وتلف وتمشي تشرب موية وترجع تلف وتلف وتمشي تأكل وترجع تلف وتلف وفي النهاية برضو ما بتقولا . قومت اضحك لانو كلامو صح
_ هسي زعلان مني؟
__ ايي زعلان وبشدة كمان . قولت ليهو بحنية ودلع كدا
_ زعلان من رزتك سيمو ؟
__ ااااخ انتي بس القاطعة قلبي بدلعك دا بحاول اركز بس ما قادر . قومت اضحك
_ لازم يكون عندي طريقتي الخاصة في انو ازحزح ثباتك دا
__ انتي من دون حاجة مزحزحاني . ضحكت بخجل كدا بتكلم معاهو دخلت لي نوسة بمكالمة
_ سيمو دقيقه نوسة ضاربة لي
__ تمام . هو فصل ورديت ليها
__ روز سريع تعاليني . وكانت بتبكي
_ في شنو كدا قولي بسم الله
__ جاني عريس الحقيني حأجن انا
_ دقيقه كيف يعني
__ والله دا انتي تعاليني سريع وانا بفهمك
_ تمام جاية بس ما تبكي انتي
لبست توبي سريع ولقيت رامي في الحوش
روز: رامي انا ماشة لنوسة ضروري كلم ابوي
رامي: موش قبيل كانت معاكي
روز: ايي بس هسي عاوزاني جاها عريس وانا دايرة افهم منها
رامي: كيف يعني جاها عريس
روز: الواحد دا جاها عريس اشرحها ليك كيف
رامي: وهي موافقة؟
روز: ما عارفة يداب حأمشي تحكي لي
رامي: تمام بس ما تتأخري
روز: تمام وانت كلم ابوي لو سأل مني . وطلعت سريع مشيت ليها العشا كان لسع ما اذن دخلت ولقيتها في غرفتها وبتبكي مشيت حضنتها وسكتها
_ نوسة كدا احكي لي بالراحة
__ لمن رجعت ابوي ناداني وقال لي ود عمي دايرني وانو هو موافق بس امي قالت ل ابوي يمكن عندها زول ابوي عاين لي وقال لي لو عندي خلي يجي لحدي الجمعة الجاية ولو ما عندي هو حيوافق وانا ما دايرة اتزوج . وقامت تبكي
روز: ليه ابوكي يعمل كدا
نوسة: ما عارفة والله هسي اعمل شنو ما عندي زول وود عمي دا واحد متخلف ساي ومعقد ما عاوزة انا
روز: بس كمان انتي بتحبي رامي اخوي
نوسة: رامي دي حاجة بعيدة اصلا مستحيل يفكر فيني انا وما خاتة في بالي ابدا
روز: ليه حاجة بعيدة
نوسة: دايرة تقنعيني انو رامي ممكن يحبني . وقامت تضحك ورجعت تبكي ما عرفت اقول شنو لانو ما بعرف تفكير رامي اخوي اتجاهها وشايفة انو هو مشغول بالمستشفى شديد ما فاضي حتى يحب هديتها شوية
روز: هسي اهدي حنلقى حل
نوسة: معاي للجمعة بس
روز: ما ممكن تقولي ليهو دايرة اقرأ واتخرج
نوسة: انتي مفتكرة انو ما قولت قال لي عادي اقرأ وانا في بيتي ولو ود عمي بسمح لي اخلص حتى نتزوج دي حاجة نقررها نحنا الاتنين
روز: والله كلام عجيب . قعدت معاها شوية لمن العشا اذن وطلعت منها ورجعت البيت فتح لي رامي البيت ما اتكلمت معاهو وطوالي مشيت غرفتو وبقيت ابكي لانو حنني حالتها شديد صليت العشا واتصلت لسام
__ رزتي
_ نعم
__ مالك صوتي ما عجبني . رجعت بكيت لمن اتذكرت حالة نوسة وهي البيست حقي
__ كدا قولي بسم الله الحاصل شنو
_ نوسة يا سام
__ مالا يا عيون سام . حكيت ليهو الحصل معاها ورجعت بكيت
_ وهي ليه رافضة ممكن يكون فيهو خير
__ هي بتحب واحد تاني
_ حلو تكلمو لو راجل حيجي يتقدم ليها
__ بس هي بتحبو من طرف واحد يعني هو ما بعرف
_ اوووو دي مشكله والله مسكينة
__ قلبي واجعني عليها
_ سلامة قلبك حبيبي انا
__ الفيها خير حيحصل ما تبكي انتي خليكي جنبها
_ ان شاءلله . اتكلم معاي شوية وقفلنا ونومت من التعب......