رواية عقدة نقص الفصل الاول 1 بقلم شذى عبدالمكرم
من صغار مع بعض وما بنتفرز من بعض الا بالحلق حقي وكدا بتعرف اني بت كانوا بقولوا لي محمد ولد لاني بشبه الاولاد وما عندي شعر الشفع كانوا بتنمروا فيني ويضحكوا هو كان بدافع لي وبضربهم وفي نفس الوقت في البيت لمن نكون برانا بقول لي شعرك القصار دا وهو اصلا كان ماف شعر ، طول الوقت كنا مع بعض بنتفرق زمن النوم بس دخلنا الروضة مع بعض وطبعا انا وهو عصابة كل يومين استدعاء ولي الأمر وخلصنا الروضة بالجلالة ، لمن جينا الابتدائي هو اتسجل في مدرسة وانا في مدرسة دي كانت صدمة لي بكيت وابيت امشي الا اهلنا اضطروا يسجلونا في مدرسة خاصة مختلطة عشان ما نفترق بنمشي وبنرجع سوا وحتى دروسنا مع بعض والطرحة يومي بربطها لي في رقبتي عشان ما تقع وبقول لي تفكي بفك رأسك هو وين الشعر البفتحوه بقوم ببكي كدا يراضيني بعرديب او شبيس ونعدي يومنا زمن الفطور بنفطر سوا بخلي اصحابه وبجيني يعني كنا توأم بس من ابويين مختلفين خلصنا الإبتدائي ولمن جينا الثانوي كان عقلت شوية بس لسع كنت مصرة يكون جنبي فأتسجلنا في نفس المدرسة الخاصة بس اي زول في مدرسة براه بس كانوا جنب بعض بنطلع سوا وبنرجع سوا المدرسة كلها عارفانا بجوز اللوز هو لمن يخلص بدري بنتظرني جنب الشجرة قدام مدرستنا البنات لو شافوه بجوني جاريين اخوك منتظرك بستف حاجاتي وبمشي ليه وبنرجع ولو انا طلعت بدري بنتظروا ونرجع مع بعض ، لمن يجي فترة الامتحانات انا جرسة شديد بس هو لا بنراجع مع بعض فجأة في نص المراجعة يطلع وانا بغطي ليه بس بشرط يجيب لي حاجة وهو راجع كنا ثنائي مثالي في الاجرام
__ انا طالع قريب ما بتأخر
_ عزام لا ياااخ لو امي وامك عرفوا؟
__ ما حيعرفوا لاني ما حأتاخر
_ دايما بتقول كدا
__ اوع تنسي يوجد موت ولا يوجد اعتراف ، طبعا دي جملتنا المشهورة
_ ايي عشان انا البموت ما انت ، قام ضحك وهبشني في شعري
__ ما بتموتي يلا باي ، وطلع خلاني براي بقيت اراجع وانا خايفة فجأة حصل الكنت خايفة حصل منو امي جات وسألتني منو عاينت ليها مسافة بفكر في كذبة قامت نادت امه وبقو يحاولوا يستدرجوني كذبت انو مشى الحمام اتأكدو اني بكذب وحلفت اقول لمن امي ضربتني قومت ابكي وبقوا يجوطوا فيني جا عزام داخل لقاني ببكي
امه: شرفت يا صايع
عزام: نينا بتبكي مالك
نينا: انضربت بسببك ، فجأة صرخ فيهم حتى انا اتخلعت
عزام: تضربوها ليه انا الطلعت
امه: بترفع صوتك على منو؟
عزام: معليش ما قاصد لكن ليه تضربوها؟
امي: لانها ابت تتكلم
عزام: انا قولت ليها ما تتكلم
امه: السبب؟
عزام: بدون سبب ، وجا مسك يدي وطلعنا برا بقيت امسح في دموعي مد لي شوكولاتة حمرت ليهو
نينا: ما عاوزاها
عزام: ما كنت عارف انو حيحصل كدا
نينا: ما هو ما اول مرة انضرب بسببك ما دايرة معاك كلام ، جيت امشي
عزام: والشوكولاتة دي اوديها وين؟ ، جيت راجعة شيلتها منو وماشة
عزام: ودي؟ ، تاني التفت راجعة اشيليها بقى يتقاوى معاي وهو يضحك لمن ضحكت معاهو حتى فكاها لي واتصالحنا
كبرنا وكبرت مصائبنا بس لسع تنمروا على شعري موجود انو ما عندي شعر ودا وانا ببكي يعني للان في نفس المشكلة ودا عمل لي عقدة نفسية من شعري لانو بحسسني بالنقص
هو: انتي هسي فرقك مني شنو؟ لا لون ولا جسم ولا شعر ، بكيت ليه
انا: ما عافية ليك وان شاءلله ربنا بعدين يديك مرا لا شعر ولا قعر واشمت فيك ، فكا الضحكة
هو: مرا من غير شعر اقع بيها وين ؟
انا: تقع في النار
هو: اسمعيني بعدين البزوجك دا اوع تغشي من البداية وريهو شعرك عشان الله ما يحاسبك انك غشيتي الراجل ، بقيت اجعر بصوت عالي وهو يضحك فيني لمن امي وامه جونا جاريين
امي: الحاصل شنو؟ واقفلي حلقك دا ما تجعري فينا
انا: عزام بتنمر في شعري وانو بعدين ما اغش راجلي ، كانوا عاوزين يضحكوا بس كاتمينها هنا بكيت اكتر
انا: دي خلقة ربنا ، بقيت اجعر انا طالعة لحقني عزام
عزام: ما تجعري خلاص اقفلي حلقك دا
انا: ما دخلك بس وامشي شوف محل حبيبتك الشعرها طوال ديك هي ذاتها ولا سمحة
صهيب: بس شعرها لضهرها دا بغطي ليها باقي العيوب ، هنا جعرت اكتر لانه قاصد انا ماف حاجة بتشفع لي ضحك وطلع بس اخر اليوم لمن جا راجع جاب لي شوكولات وشبيس واتصالحنا ودا الكان بحصل دايما
خلصنا الثانوي ومشكلة التنمر على الشعر كانت لسع حاصلة وبعدها دخلنا الجامعة سوا وطبعا نفس الجامعة ونفس التخصص لاني برفض اني اتفرق منو مع ان اهلنا كانوا بحاولوا يقنعنوني بس ثابتة من جنبه ما بزح وهو كان بدافع لي وبنعمل اي حاجة سوا بس فجاة في نهاية السنة الاولى عزام جاتو منحة برا ما كلمني انو قدم فيها لاني كنت حأرفض كان خايف يكلمني انو مسافر برا عشان يواصل الجامعة جا من برا دخل بيتنا لقاني في الصالة شغالة اسرح في شعري وبغني وقف عاين لي مسافة
عزام : وين الشعر البسرحه ، كنت بسرح فيه على شكل مربعات صغيرة عاينت ليه بالمرايا كانت خلفي
انا: الفي دا بس بسرحه ، قرب مني وشال المشط وقعد جنبي
عزام : اقعدي تحت ، طوالي قعدت وواصل يبكر لي فيها طبعا من صغيرة عزام بسرح لي دايما يعني ما جديدة كان ساكت سكوت ما طبيعي
انا: مالك الحاصل شنو؟ ، طبعا بفهم كل تقلباته المزاجية وحتى ملامح وشه بعرفها وبعرف اي تغير فيها
عزام: لو قولت حتزعلي
انا: خلينا نخلص الشعر دا عشان ما يبقى لي اتنين عدم تسريح وزعل ، قام ضحك وبقينا نتكلم لمن خلص لي شيلت ادوات التسريح دخلت جوا وجيته راجعة وقعدت جنبه
انا: هسي عليك الله ما بقيت بنية؟ ، ورفعت ليه جواجبي قام ضحك
عزام: هسي فرقك مني شنو غير الكعكات دي والحلقان
انا: بركة في الكعكات دي والحلقان ، وضحكنا
عزام: جاهزة للصدمة؟
انا: والله تطلع صدمة حقيقية يا عزام بقتلك ، عاين لي مسافة وقام من جنبي وقف جنب باب الصالة وانا مصدومة منو وقال لي من بعيد
عزام: معليش والله بس جاتني منحة وحأسافر برا ، وجرا طلع .......
لقراءه باقي الفصول من هنا