رواية بين الضياع واللقاء الفصل الثامن 8 والتاسع 9 بقلم شذى عبدالمكرم
لمن وصلنا بيت العروس استقبلونا استقبال حلو شديد ما قصرو معانا واكرمونا كنت منتظرة متين اشوف العروس بالفعل شوية مراسم الخطوبة بدت والعروس جات طالعة كانت حلوة حسيت نفسي جنبها ولا حاجه ليهو حق يختارها لي ولا يعاين لي
نعيمة: العروس حلاتها ما شاء الله
شمائل: بس ما احلى منك
نعيمة: الله يخليكي لتكسير التلج عشان كدا قولت ليكي حتمشي لربك شين . قامت تضحك لمن خلاص بدت المراسم حتى فجأة حسيت دموعي نزلت مسحتها بالراحة والعبرة خنقاني بقيت اشتغل بالتلفون بتاعي ما عاوزة اعاين ليهم مع بعض اصلا الخطوبة كانت عائلية بس لبسو الخواتم والموضوع تم وحددو العقد بعد اسبوعين من اليوم دا ورجعنا البيت
_ شمائل يلا مع السلامه
__ خليكي شوية
_ الزمن فات وانا تعبانة
__ تمام حبيبتي وما قصرتي جيتي معانا
_ العفو حبيبتي . قدمتني لحدي الباب وانا طلعت لقيت محمد جيت قاطعة كأنو ما شوفتو ناداني وقفت جا علي
__ راجعة خلاص
_ ايي
__ خليني اقدمك اصلا ماشي الدكان
_ اممممم . وبقينا ماشيين وانا ساكتة
__ زعلانة مني في حاجه؟
_ لالا ليه ونسيت قبيل ما باركت ليك بعد الخطوبة الف مبروك
__ لانو دي ما شخصيتك العادية . طبعا ما رد لي على المباركة
_ دي طبيعتي اصلا ويلا تصبح على خير . كان وصلت بيتنا طوالي دخلت وقفت جنب الباب بجوا بحاول اتحكم في دموعي بقيت انفخ في الهواء عشان دموعي ما تنزل وحاولت اتصنع الابتسامة ودخلت البيت جوا لقيت امي وابوي ومعاهم راشد اخوي اتخلعت بوجودو جريت ليهو حضنتو وقومت ابكي لقيت لي سبب ابكي وما احبس دموعي
راشد: خلاص يا هبلة انا جيت من وين اصلا كم ما مصر القريبة دي
نعيمة: جيت متين
راشد: قبل ساعتين كدا
نعيمة: طولت ياااخ
راشد: طولت والله بس راجع اجازتي عشرة يوم بس
نعيمة: كيف يعني؟ يعني ما حتقعد كتير معانا
راشد: الجامعة يا بت والله العشرة ايام دي ذاتها المفروض ما ارجع بس اشتقت ليكم وكلمت ابوي الصباح طوالي قطع لي جيت بطيارة المسا
نعيمة: ابوي والله دي احسن حاجه عملتها . دخلت غيرت وجيت مسكت الونسة معاهو راشد دا اصغر الاولاد بقرأ طب في مصر فرقنا سنتين في العمر بس في التصرفات تحسنا توأم فوق من راشد في عبدالله دا في بورتسودان شغال هناك كان هنا بس الشركة الشغال فيها نقلتو الفرع الهناك بجي كل اجازة السنة حقتو وبرجع والبكر حقنا عبدالرحمن دا برا السودان متزوج ليهو سنة بس ما عندو اولاد للان يلا جية راشد دي جاتني في الجرح حيفرق لي شديد وبالفعل دا الحاصل بمشي الجامعة وبخلص بدري بجي بقضيها ونسة وهظار مع راشد الا مرات امي بتهرشنا في مرة امي هرشتنا شديد
راشد: نعوم ورح نخلي ليهم البيت دا
نعيمة: ورح يا زول . اي واحد دخل غرفتو ولبس وطلع وامي تعاين لينا ساي
راشد: شيلتي قروش كفاية؟
نعيمة: ايي وسرقت غويشتين من بتاعات الحجة دي حيقعدنا كم شهر كدا . امي عاينت لينا كدا وضحكت
امي: انا ربنا يصبرني بس . ضحكنا وطلعنا
راشد: نمش وين هسي
نعيمة: والله علمي علمك
راشد: ورح واقرب محل عجبنا ندخلو
نعيمة: قدام . وضربنا ايادينا ببعض فجأة شايفة محمد قدامنا وبعاين فينا وبحمر لينا او بالاخص لي انا راشد قال لي بالراحة
راشد: دا مالو بعاين فينا كدا . قولت ليهو بنفس الهمس
نعيمة: يمكن معجب
راشد: دقايق انا بوريهو الاعجاب دا كيف . مسكت راشد من ذراعو فوق
نعيمة: راشد لا . راشد طوالي نفخ صدرو
راشد: مالك في حاجه؟
نعيمة: الليلة كتمت حيبيتونا في الحراسة
راشد: كيف يعني
نعيمة: دا رائد في الجيش وجارنا بجاي . راشد قلع عيونو وعاين لي بدراما كدا
راشد: نعيمة فكي يدي . مسكت فيهو قوي
نعيمة: عشان تجري تخليني والله ما بخليك يا جرينا سوا يا موتنا سوا . عاين لي وعاينت ليهو وضحكنا واكيد محمد بقول دا شنو المجانين ديل
نعيمة: جنابو محمد دا راشد اخوي . راشد اتقدم وسلم عليهو ومحمد سلم عليهو حلو وراشد كلمو انو رجع قبل اسبوع كدا ومحمد حمد ليهو السلامة
راشد: بنستأذنك
محمد: اذنكم معاكم . واتحركنا
نعيمة: ايي كان تشاكلو هسي الزمن دا ابوي كان ببكي على اولادو
راشد: وانتي مالك ما حذرتيني
نعيمة: راشد والله بعضيك شوفو السجمان دا . وركبنا الموصولات وعملنا ذي ما قولنا اول ما عجبنا محل دخلناهو وتاني طلعنا ودخلنا كم محل لمن قروشنا خلصت والساعة بقت 12 صباحا
راشد: اها نرجع كيف يا فهيمة
نعيمة: اسألني تاني عليك الله
راشد: الا نأجر عربية ونرجع وابوي يحاسبو ونآخد علقتنا بس
نعيمة: ماف حل . وبالفعل اجرنا عربية ورجعنا وابوي ما قصر فينا وامي جات تمت الناقصة ونحنا فرحانين بالطلعة دي ودخلنا نومنا اليوم التاني دكيت المحاضرة عادي ذي الزبادي عشان خاطر راشد اي حاجة بتهون
يومين بس وراشد رجع بكيت بكي يوم رجعتو حلفت ليهو ما يرجع بس كمان جامعتو
راشد: لو لقيت اجازة تاني حأجي
نعيمة: كويس
راشد: وانتي لو خلصتي تعاليني
نعيمة: حاضر . وودعنا البيت رجع لي شين لانو فرحة البيت مشا
يومين كدا وخالتو مريم قالت عقد محمد الجمعة واليوم كان التلاتاء فكرت كدا انو ما بقدر احضر العقد مشيت لامي
نعيمة: امي انا ماشة بيت عمتي
امي: فجأة كدا خلي بعد عقد محمد بمشي معاكي
نعيمة: لالا انا تاني ما جاية
امي: كيف يعني
نعيمة: امتحاناتي قربت وهناك البيت اقرب لي من الجامعة برجلي بس اوصل الجامعة
امي: الجاكي فجأة شنو
نعيمة: والله كدا بس حكمت
امي: ماف مشي
نعيمة: امي ياااخ
امي: خلاص امشي بعد العقد
نعيمة: مستقبلي اهم . استغربت فيني واستغفرت ومشيت خليتها لمن ابوي جا كلمتو وكان موافق قومت جهزت ملابسي وهو ضرب لعمتي كلمها طوالي وافقت اصلا ولدها واحد بس وصغير شديد يداب رابع ابتدائي قومت المغرب مشيت لشمائل عشان اودعها بعد اتونسنا
نعيمة: شيمو انا بكرة ماشة بيت عمتي
شمائل: والله كويس
نعيمة: تاني ما جاية
شمائل: كيف يعني
نعيمة: حأقعد معاها لمن اخلص جامعة
شمائل: دقيقة دقيقة كيف يعني
نعيمة: الواحد دا لانو امتحاناتي قربت وهناك اقرب لي
شمائل: وانا تخليني براي
نعيمة: لازم امشي
شمائل: حتجي العقد صح
نعيمة: لالا
شمائل: حتخليني براي في العقد
نعيمة: شمائل اتفهميني ما بقدر احضر والله . عاينت لي لقت الحزن في عيوني عرفت السبب حضنتني
شمائل: اول ما تخلصي امتحانات تجي تمام ولا إلا تاني ما بتكلم معاكي
نعيمة: خلاص اجازة السمستر عشرة ايام بجي بقضيها هنا
شمائل: منتظراكي . هزيت رأسي ليها ووعدتها ولمن جيت اودع خالتو مريم زعلت مني شديد لانو ما حأحضر العقد ولومتني وهي ما عارفة السبب جا داخل محمد
محمد: مالكم
خالتو مريم: نعوم ماشة بيت عمتها وقالت ما حتحضر العقد حقك
محمد: ليه البمنعك شنو . عاينت ليهو في عيونو وسكتا والتفت لخالتو مريم
نعيمة: خالتو ما تزعلي مني بحضر العرس لو فينا هينين ان شاء الله
خالتو مريم: ان شاء الله . ودعتها وطلعت وقفني محمد
محمد: البخليكي ما تحضري شنو . زهجت من السؤال دا هجت فيهو
نعيمة: محمد عقدك ما دايرة احضرو في حاجه بتجبرني؟ هااا كدا قول لي في حاجه بتجبرني؟ . عاين لي ودخل بيتهم عصبت شديد قربت اصرخ بس غمضت عيوني شديد وضغطت على ايادي بعد فترة رخيت جسمي وواصلت بيتنا ......
9
من جانب محمد
بعد كلام نعيمة طوالي دخل بيتهم نادتو شمائل
شمائل: اها يا محمد كلمت ناسك كلهم
محمد: ما كلهم ما لقيت زمن بس ناس الشغل بس الباقيين بعزمهم للعرس اصلا دا عقد بس
شمائل: مالك مستهتر بالعرس كدا ودا اول عرس ليك وحتى خطيبتك اشكت منك ما بتسأل منها
محمد: خلاص بدينا
شمائل: ياااخ محمد ما تكون انسان بارد كدا دي حتبقى مرتك يعني عمر كامل ودا اول عرس ليك حسسنا كأنك مبسوط كدا
محمد: شمائل انا ما فاضي تمام
شمائل: حتفضى متين لمن تتطفش منك صدقني بطريقتك دي عقدكم حيتفسخ قبل ما تتمو العرس ذاتو
محمد: احسن ذاتو . شمائل قامت تضحك
شمائل: يا الله انا اعمل شنو في المخلوق دا
محمد: شمائل زحي من وشي كدا . مشى خطوتين ورجع ليها
محمد: نعيمة مالا ما عايزة تحضر العقد . قامت ابتسمت بخباثة كدا
شمائل: يعني دا الموضوع المزعلك من قبيل . حمر ليها
شمائل: يا سيدي اسأل نفسك السؤال دا لانك السبب
محمد: انا؟ . هزت رأسها ومشت خلتو استغرب بس قال شمائل دي مجنونة ساي
__________
من جانب نعيمة
اليوم التاني شديت الرحال وابوي وداني بيت عمتي سلم ليها وطلع هي فرحت بجيتي شديد ولقيتها جهزت لي الغرفة ابوي قعد شوية ورجع البيت انا بعد استقريت جيت اتونست معاها وسألتني من القراية وكدا ومشيت قريت حبة ونومت
عدا الخميس وجا الجمعة كنت متوترة وداخلة وطالعة بقيت ضايعة شديد بس افتش في نفسي ما قادرة القاها لمن عمتي استغربت فيني
عمتي: نعومة مالك
نعيمة: مالني
عمتي: ما على بعضك كدا في حاجه مقلقة بيكي؟
نعيمة: لالا . ومسكت تلفوني عشان ابين طبيعية لمن بعد الضهر كدا شايفة شمائل رافعة استوري بتبارك لمحمد العقد ورافعة صورتو وهو لابس جلابية العقد يداب بكيت سمح والعبرة خنقتني بقيت اعاين للصورة وابكي قفلت تلفوني ومسحت دموعي بحاول اتماسك لمن ما قدرت حاولت انوم ما قدرت حاولت كدا بس غلبني عمتي نادتني للقهوة
نعيمة: عمتو ما دايرة
عمتي: والله ما بشربها براي تعالي ياااخ . قومت بتعب وغسلت وشي تاني وطلعت ليها اتخلعت في منظري
عمتي: مالك يا بت كنتي بتبكي؟ . مشيت ليها رقدت في رجولها وبكيت ابكي بهدوء كنت محتاجة طبطبة هي كانت خايفة علي
عمتي: نعوم مالك ما تخوفيني عليكي
نعيمة: عمتو ممكن ما تسأليني الموضوع ما كبير نفسنة بس محتاجة طبطبة بس وفوق دا امتحاناتي قربت ودي اخر سنة
عمتي: حيااا حبيبتي حاسة بيكي ومدام ما دايرة تحكي ما بضغط عليكي بس ماف حاجة بتستاهل دموعك ولو الموضوع ود حواء حريقة فيهو اي حاجة ولا نعومتي ما يستاهل ضفرك ساي اب رأس ذي البطاطسة دا . قومت ضحكت شديد وقومت من رجولها وحضنتها شديد
نعيمة: حبيبي انا . ورجعت رقدت فيها مسحت على رأسي
عمتي: بتكوني مصدعة خلينا نشرب القهوة ونقطع فيهو لمن يتشرق . والله عمتي دي مضحكة شديد الحلو انها ما كبيرة شديد بتقدر تفهمني وما حاسة بالغرابة انو ببكي قدامها حاولت اتناسى الموضوع وهي بتحكي لي مواضيع مضحكة وغيرت لي وولمن راجلها جا كلمتو اني منفسنة بسبب الامتحانات وهو طلعنا غير لينا جو وانبسطنا انا وحمودي ولدها اكتر ورجعنا وانا مودي متغير مليون درجة
الايام عدت وامتحاناتي جات وامتحنت بحمدالله بدعم من عمتي وكنت متواصلة مع شمائل ما انقطعت منها بس ما كانت بتجيب لي سيرة بمحمد ولا بالغلط وانا مرات بتمنى تغلط وتجيب سيرتو واعرف اذا مبسوط في حياتو ولالا بس تاني بقول مالني ومالو بقى راجل مرا خلاص من خلصت امتحانات طوالي شمائل اتصلت لي
__ اسمعي هنا امتحانات وخلصتي تجي راجعة خلاص . قومت ضحكت
_ قولي بسم الله اقعد يومين كدا اتونس مع عمتي
__ اسمعيني هنا عمتك دي يومي في وشها المفروض الزمن دا تكونو قنعتو من بعض . قومت ضحكت
_ ما بقنع منها
__ والله بكرة ما جيتي انا بجيكي هناك برجعك
_ بكرة صعبة والله بس خلاص بجي بعد بكرة
__ تمام خلاص . مشيت كلمت عمتي زعلت بس حكيت ليها بشمائل وقولت ليها انو اقضي الاجازة كلها عشرة ايام وبجي راجعة ليها اقتنعت وبالفعل جهزت ملابسي ووصلوني مع راجلها وقيلو معانا وكان اليوم جمعة وبعدها رجعو السبت العصريات قررت امشي لشمائل اتجهزت وكلمت امي وطلعت بس ذي ما عارفين حظي دايما حلو ذيي كدا طلعتي من الباب شايفة محمد مع مرتو راكبين عربيتهم هو عاين لي في عيوني وكأنو ما بعرفني واصل سواقة بعد شوفتهم مع بعض رجع لي كل الكان اتجاوزتو والله قربت ارجع بيتنا بس قولت عشان منو وعشان شنو عشان واحد سلام ما سلم لي واصلت استقبلتني شمائل بحفاوة
__ تاني ما حترجعي بيت عمتك نهائي . ضحكت
_ للدرجة دي انا مهمة؟
__ شديد والله . سرحت بعيد
_ دا بالنسبة ليكي انتي بس والله
__ كيف يعني
_ ولا حاجه . وبقينا نتونس ما جيبت سيرة انو شوفت محمد ومرتو بعد ساعه كدا محمد جا داخل
شمائل: محمد رجعتها ؟
محمد: ايي
شمائل: تعال سلم على نعيمة رجعت بعد زمن عليك الله ما فقدتها؟ . عاين لي
محمد: ما فاضي عشان افقدها . والله حسيت قلبي اتكسر شمائل اتحرجت شديد
شمائل: محمددد!!! . هبشتها في رجلها نظام خلي وهو طلع مشى والله العبرة خنقتني بقيت ما سامعة حاجة من كلام شمائل الكانت بتعتذر دي
نعيمة: شمائل يلا انا بمشي
شمائل: نعيمة عليك الله ما تزعلي من محمد
نعيمة: لالا عادي . قدمتني لقينا محمد قدام الباب بتكلم بالتلفون اتجاوزناهو وهي قدمتني جنب بيتنا وانا دخلت بيتنا ولسه بتذكر في محمد انا خاتة ليهو مكانة كبيرة وهو ما شايفني ابدا والله ابيت ابكي نهائي ما بستاهل انزل دمعة عشانو .............
___________
من جانب محمد
شمائل بعد قدمت نعيمة رجعت لقتو لسع بتكلم بالتلفون وقفت قدامو وربعت اياديها منتظراهو يخلص مكالمتو هو رفع حاجبو نظام في شنو هي حمرتو ليهو خلص مكالمتو سريع
__ مالك واقفة كدا؟
_ دا شنو القولتو لنعيمة ليه تحرجها وتحرجني معاها ليه ما عندك مشاعر
__ شمائل ما فاضي ليكي
_ دا البخلي البنات ينفرو منك لسانك ذي السم والله بعد كلامك دا المكانة الكان خاتها ليك نعيمة حتنتهي بعد كلامك دا
__ لو كان عندي مكانة كان جات العقد قالت ماف حاجة بتجبرها تجي تحضر عقدي وانا ماف حاجة بتجبرني افقدها
_ لانك غبي وما حتفهم السبب وتاني حاجة بفرق معاك في شنو اذا حضرت ولالا كدا جاوبني . جا يتجاوزها وقفتو
_ انت عندك حاجه اتجاه نعيمة بس شكلك اتسرعت لمن قولت لامي انو تختار براها وهسي بسبب العقد دا تلاتة اطراف اتأذو وتاني حاجة والله حرام عليك هسي فيحاء دي ذنبها شنو ياااخ خلاص بقت مرتك ليه ما بتهتم بيها حتقول ما فاضي وعندي مأمورية لمن ارجع بشوف
__ ودا الحاصل . شمائل قامت ضحكت لانو محمد دا حالة ميئوس منها
_ والله يا محمد غلبتني ما عارفة انا الكبيرة ولا انت
__ احمد
_ والله احمد في التصرفات اكبر منك ياااخ انت بارد تلاجة بس وكلامي كلو بمشي في الهوا الله يعين مرتك بعدين والله يا محمد بطريقتك دا شهرين ما حتواصلو وحتقول شمائل قالت . ودخلت البيت خلتو طوالي عمل تلفون لمن خلص اتذكر كلام شمائل انو هو عندو حاجه لنعيمة وانو تلاتة اطراف اتأذو قال منو الطرف التالت هي قاصدة نعيمة؟ طوالي نفض السيرة من رأسو وقال هو متزوج ماف حاجة بتخليهو يفكر في نعيمة ........