رواية شلة بنات الفصل التاسع والعشرون 29 والثلاثون 30 بقلم شذى عبدالمكرم
بعد سام اتقدم لي ابوي ناداني وسألني اسئلة انو سام قال انا برلومتو وكدا واسئلة روتينية وكان ما مبسوط لمن سألتو قال لي بسبب القبلية و كدا وهل لو دخلت فيهم حأقدر اتواكب جاوبتو بأنو حأقدر بس اذا هو ما موافق انا ما موافقة بس لمن شاف انو انا ما عندي مشكله قال موافق بس استخير بالاول بالفعل عملت الاستخارة واديت الموافقة وابوي كلم ابو سام بالموافقة وسام اتصل لي
__ اخيرا
_ سام
__ عيون سام احكي
_ اهلك حتقبلوني؟ . سكت مسافة حسيت كأنو في مشكله
__ انتي بهمك انا اتقبلك ولا هم؟
_ الاتنين
__ روز ما اكذب عليكي حتواجهك مشكلة صغيرة مع امي
_ كيف
__ هي عاوزاني لبت عمي وانا عاوزك انتي
_ يعني ما موافقة بي؟
__ موافقة بس لازم تكسبيها لصفك
_ واهلك؟
__ رزة حبيبتي انا اصلا ما حأدخلك فيهم كتير يعني لو اتقابلتو الا الاعياد والمناسبات وغصب عنهم حيتقبلوكي لانك مرتي
_ كدا حتحصل مشاكل يا سام
__ اصلا الحياة ما بتمشي بدون مشاكل بس حنتجاوزها ما بعض وانا بكلمك بالحاجات عشان يكون عندك خلفية واكون ما كذبت عليكي
_ حيا يا سام
__ والله يا روز انا لو ما اتزوجتك انتي عمري كلو ما حأتزوج
_ اممممم
__ موافقة تكملي معاي الطريق الصعب دا؟ انا بكلمك من بدري عشان اعرف جوابك وما اكون اناني
_ سام انت بديت اول خطوة براك بس انا حأمشي معاك باقي الخطوات
__ دايما حتلقيني واقف وراكي جبل متين ان شاءلله
_ وانا واثقة من الحاجة دي ولو اهلك ما اتقبلوني ما مهم المهم عندي انو انت متقبلني وبس
__ الليلة انا ما قولت ليكي بحبك صح؟ . قومت ضحكت
_ نهائي والله
__ عيب في حقي والله . ضحكت شديد
_ عيب شديد والله . وبعدها اتكلمنا شوية وخططنا لمستقبلنا
وبعدها بكم يومين سام جاب اهلو واتقدمو رسمي وانخطبنا لاحظت لامو ما متقبلة الوضع كانت بتعاين بس وحتى لمن باركت لي كان بطرف ايديها بس اتحسست انا وحتى سام لاحظ واتحسس برضو وخجل مني عاينت ليهو وابتسمت وهزيت ليهو رأسي بمعنى ما مشكله وكويس كان عندي خلفية عن الموضوع لانو كان بالجد حأزعل ما اهتميت كتير بس عارفة انو نسيبتي كارهاني كل ما اتذكر بضحك بس وبستغفر ساي
امي: عندك نسيبة كدا بري منها وشها ذي اخر الشهر . قومت اضحك لمن دمعت
روز: عيب اتكلم فيها كدا بس بالجد يا امي كلامك صح . وضحكنا
امي: حتواجهك كمية مشاكل خليكي عارفه
روز: عارفه والله وان شاءلله ما اسكن معاهم لانو بيتهم كبير دا حسب قول سام خايفة تملى ليهو رأسو ويقتنع انو اسكن معاهم
امي: بري يختي اقنعي بطريقتك الخاصة انو يفصلك منها دي عذاب
روز: كدا خلينا نشوف البحصل شنو
____________
من جانب سام
كان مبسوط شديد انو خطب روز بعد رجعو بيتهم
سام: اها يا امي لقيتي روز كيف . لوت خشمها
امو: كلها صناعي ساي . قام ضحك
سام: والله يا امي روز دي كمان اكتر بنت طبيعية انا قابلتها في حياتي
امو: هسي لو كان اتزوجت وحدة من بنات عمك البحصل شنو
سام: كنت حأموت والله امي الله يرضى عليكي حبيها عشاني انا بس . وباس يدها شديد ورأسها
امو: كدا النشوف
سام: تمام
ابوهو ناداهو ومشى اتناقشو وقال ليهو اعمامو زعلانين منو وانو المفروض يتكلم معاهم لانو الحيعقدو ليهو اعمامو ما ابوهو وهو قال حيتكلم معاهم بالفعل اليوم التاني طلع ليهم واحد واحد واعتذر واتفاهم معاهم كلهم لمن شافوهو مبسوط وافقو الا واحد بس قال مع الزمن حيقتنع
بعد يومين
امو: سام حتسكنو معانا هنا صح لانو البيت واسع . سام سكت مسافة كدا
سام: ما عارف يا امي
امو: ولا خطيبتك ما عاجبها
سام: امي خلاص بدينا خطيبتك وكلام انا بقول كدا لانو بنيت البيت حقي حسب تصميمي وانتي عارفة ولا ناسية . سكتت بحزن كدا
امي: يعني انت برضو حتفارقني البيت كبير حيبقى لي فاضي
سام: امي انا ما طالع برا البلد يعني كل يوم حتلقيني في وشك . كانت زعلانة بس راضاها وهو اصلا مستحيل يسكن روز معاها لانو ما حيحصل خير ابدا ومستحيل يقدر يقيف مع مرتو قصاد امو وما بقدر يقيف مع امو قصاد مرتو حيكون هو في وشه المدفع احسن يفصلهم
__________
من جانب روز
انحبست خلاص لانو سام قال طولنا شديد وعاوز يتم العرس بسرعة في الفترة ديك هديل ولدت وجابت ليها بنوتة حلوة ما شاء الله وسمتها روز علي كنت مبسوطة خميت ليها ملابس السوق دا كلو وكمية العاب مستحيل ما اعز سميتي كنت مبسوطة شديد قالت لي لانو انا اكتر وحدة وقفت معاها في عرسها وعلاقتها مع حمزة كل ما تحصل مشكله انا بتدخل وبحلها بعد ما اسمع منها بحاول اهديها حتى كنت الوزيرة حقتها حتى حمزة وافقها الرأي عشان كدا سمتها علي والله انبسطت شديد بالحاجة دي ولمن كلمت سام شاركني الفرحة وجاب للبابوية كمية هاديا فرحت شديد
وبعدها احمد ود عمي مشى اتقدم لقمر واخد الموافقة واتخطبت ليهو كانت كل يومين تشتكي لي من احمد وبردود وانا اضحك فيها لانو حذرتها بس كلام القصير ما مسموع اهو احمدك المكرشة فيهو اتحمليهو بعد دا
يوم حنتي بنات عمو وخالو لسام حضرو الحنة بس كانو قاعدين كأنهم ضيوف شرف وبعاينو بس كأنو ما عاجبهم الوضع بس ما كان هاميني كتير لانو معاي رفيقات عمري وحبايبي كانو واقفين جنبي قمر نوسة ريان نبأ هديل احلى صحبات في الدنيا كانو اخوات بالنسبة لي انتهت مراسم عرسي بالطريقة المعهودة لدى جميع السودانيين ومشيت بيتي الفرشتو على كيفي وبذوقي وذوق امي وامي اطمنت علي لانو ما سكنت مع نسيبتي لانها ما رايداني ابدا كنت عارفة حأبدا مرحلة صعبة مع نسابتي بس كونو سام جنبي كنت مطمنة .........
__________
من جانب نبأ
عرس روز كان حلو شديد وانتهى بخير ودي العروس التالتة في الشلة طلعت اخيرا
__ نبأ
_ نعم
__ عرس روز وخلص بعد دا نشوف حقنا . ضحكت لانو كان ناوي يتقدم لي بس اتحججت بعرس روز
_ حاضر
__ كلمي ابوكي الجمعة نحنا حنكون عندكم
_ مراد ما سريع كدا
__ لالا انتظرت كتير
_ تمام خلاص
شكلي حأكون العروس الرابعة....
__________
من جانب نوسة
بعد عرس روز خلص كنت تعبانة وحاسة بتكسر في الجسم قولت دا من تعب العرس لاني كنت وزيرة العروس لانها توأم روحي ما كنت حأرتاح لو ما سلمتها لراجلها
في يوم كنت مرهقة شديد وراسي لافي ما قدرت انضف عملت الغدا بس ونومت صحيت لمن رامي رجع دخلت استحميت وقعدت معاهو شويه
_ مالك
__ ماف حاجة تعبانة بس شكلو تعب العرس ما طلع مني لسع
_ بالجد تعبتي بعد دا ترتاحي . هزيت رأسي وقومت ارص الغدا رأسي كان لافيني ومصدعة ومع ريحة الاكل خلاص بطني قلبت جريت الحمام رجعت غسلت وشي وطلعت قطعت السلطة ورصيتو ناديت رامي جا قعد جريت صحن السلطة قدامي وبقيت اكل فيها رامي لاحظ فيني
_ مالك ما بتأكلي غير السلطة
__ بطني قالبة من ريحة الاكل . عاين لي مسافة وقرب كرسيهو من الكرسي حقي
_ كدا احكي لي حاسة بشنو بالضبط
__ حاسة انو رأسي لافي وصداع وطمام وبطني واجعاني وقالبة من ريحة الاكل وجسمي واجعني شديد . بقى يفحص لي في عيوني وقاس لي نبضي
_ اخر مرة جاتك متين . عاينت ليهو بأستغراب
__ هي شنو
_ البريود
__ هاااا والله ما عارفة ما ركزت معاها بس طولت . عمل لي كم حاجة كدا
_ انتي حامل يا نوسة . عاينت ليهو بخلعة
__ مستحيل عرفت كيف . قام يضحك
_ انا اخصائي لو ناسية يعني . قومت ضحكت
__ والله نسيت . وتاني ضحكنا
_ بس لازم نتأكد بعد الفحص مرات بتكون حمل كاذب
__ تمام
_ اكلي عشان نمش
__ رامي ما قادرة
_ خلاص بجيب ليكي عصير . هزيت رأسي مشى التلاجة جاب لي عصير وجا
_ ان شاءلله تكوني حامل
__ ان شاءلله يارب . بعد الغدا مشينا المستشفى عملنا الفحوصات طلعت بالجد حامل كنا فرحانين شديد وبعدها مشينا لاخصائي نساء وتوليد صحبو في نفس المستشفى البشتغل فيهو رامي دخلنا طوالي مستحيل اخصائي يقيف في الصف سلمنا علينا بحرارة وفصلنا
رامي: ما حابيين نعطلك عشان شغلك دكتور فتحي
فتحي: معقولة ياااخ
رامي: طبعا المدام حامل
فتحي: الف مبروك ياااخ . وباركنا لينا
رامي: جيتك لاني واثق فيك حابي انو ايناس تتابع عندك
فتحي: جدا حأفتح ليها ملف
رامي: تمام يلا ما نشغلك اكتر . سلمنا عليهو وطلعنا شال لي شوية ادوية و رجعنا كنا مبسوطين شديد
__ نوسة تعالي اقعدي
_ نعم
__ عارف انك حتتعبي مع الحمل دا ومحتاجة زول يساعدك بس ما بقدر اجيب ليكي بت تشتغل لانو انتي محتاجة رياضة عشان الطفل يطلع بصحة تامة فشغل البيت يعتبر رياضة ليكي ما تفتكري انو بغلبني اجيب ليكي بت عشان القروش انا ممكن اديكي كل شهر القروش تبع البت او اجيب ليكي هدايا بيها وما تفكري انو داير تعبك بس دا مصلحة ليكي للبيبي فاهماني؟ . رفعت رأسي وقولت ليهو بأبتسامة عريضة
_ فاهمه حبيبي انا . مسكني من خدودي الاتنين
__ احيا انا اكلك لا كيف . قومت ضحكت
_ واااي انت آكل لحوم بشر ولا شنو
__ انتي ما عارفة انو الدكاترة ديل جزارة
_ سمعت بالكلام دا بس يداب اتأكدت . وضحكنا..........
الثلاثون 30
اخيرا انا وسام توجنا حبنا بالزواج وكنا مستقرين في بيتنا ولمن مشيت زيارة لبيت عمي ابو سام استقبلونا عمي كان ظريف معاي بس عمتي لا كنت متوقعة اصلا اخدنا قعدتنا وطلعنا سام كان ساكت وانا اخدت الموضوع بسطحية عشان ما يزعل بسبب انو انا زعلت
في يوم كدا كنا قاعدين
_ سام بسألك
__ احكي
_ انت وين الحب والرومانسية الكانت قبل الزواج هسي ما شايفاها . قام يضحك
__ ديك كانت شرك عشان تقعي
_ وانا ذي الهبلة وقعت الصبر يا ود عبداللطيف
__ ما تقولي لي مرتي هبلة
_ لانها بالجد هبلة هسي اها ندمان؟
__ ولو قولت ندمان حترضي لي اتزوج تاني؟
_ اتزوج تاني دا معناهو شنو كدا اشرح لي . قام ضحك
__ معنى دبل ليها . قومت ضحكت وفنيتو بالمسند الجنبي
_ يدبل رأسك واسمعني لمن تجي تدبل كلمني انا بختارها عشان ما تختارها شينة وتبقو الاتنين شينين وتظلمو الاولاد معاكم
__ ما هو انتي برضو اختياري وشينة يعني حنظلم اولادنا بعدين؟ . مشيت ضربتو ضرب وهو السجمان يضحك
_ منو شينة هااا منو شينة وريني
__ معليش خلاص . ولسع مواصل ضحك وقفت واديتو ضهري حضني من ورا
_ ما هو انا بحبك ذي ما انتي لانو القرد في عين امو غزال يا غزالتي . جا يكحلها عاماها قومت اضحك
_يعني كدا صلحت الموضوع موش ؟ . ضحك وبعدها اتكلم بجدية
__ شبه كدا بس اتأكدي انو يمكن ما تكوني اجمل بت في الدنيا بس انا شايفك احلى واجمل بت في نظري . شديت من اياديهو
_ وانا ما دايرة اكتر من انو اكون جميلة في نظرك
في يوم كان جمعة عمتي ام سام جاتنا زيارة وقالت حتقيل معانا دي اول مرة من اتزوجنا تقيل معانا جات بعد الضهر فضلتها وقعدنا كانت بتعاين لي ساي وبتتونس مع ولدها كأني ما موجودة اتحسست شوية سام كان بعاين لي وهو متوتر من الوضع لمن جا زمن الغدا رصيت الاكل وقعدنا نأكل
ام سام: الملاح دا ملحو كتير يا بتي
روز: بالجد؟
ام سام: موش يا سام الملح كتير . عاين لي وارتبك شوية
سام: ااااا شوية كدا . وكان بعاين لي كأنو خجلان مني لانو وقف مع امو
ام سام: انتي امك ما عملتك الطبخ ولا شنو . هنا هبشت الوتر الحساس
روز: امي ربنا يديها الصحة والعافية عملتني اي حاجة المفروض انا اتعلمها الحمدلله بس الملح دا ما عارفة يمكن ما كنت منتهبة عشان كدا . هي سكتت ساي واصلت
روز: ممكن تأكلي حاجة تانية لو بقى ليكي ملحو كتير . الجو اتكهرب اكلنا في سكات وبعدها شيلت الصينية المطبخ وبديت في الشاي جاني سام جوا المطبخ كنت بغسل في العدة مسافة الموية تسخن
سام: روز ما تزعلي من كلام امي وما قدرت اقول ليها حاجة . عاين ليهو مسافة ورجعت اغسل امو نادتو طلع من المطبخ خلصت العدة وشيلت الشاي وطلعت كبيتو واديتهم
ام سام: اجي يا بتي شاي سليقة كدا من دون بهارات؟
روز: عمتي كيف من دون بهارات عاملة فيها نعناع
ام سام: هسي نعناع دا بهار؟ . سكتا ساي
ام سام: كان على الاقل تعملي فيهو قرفة او هبهان
روز: ما مشكله ممكن اعمل واحد تاني بهبهان وقرفة
ام سام: لالا خلاص ماف داعي . وهم شربو
ام سام: ما بتشربي؟
روز: بشرب بس ما عاوزة . عاينت لي كيف كيف وسكتت لمن خلاص خلص اليوم
سام: خلينا نقدمها . ما رديت ليهو لبست توبي وطلعنا كانت راكبة قدام وانا ورا واتحركنا
ام سام: انتي عارفة يا روز سام دا كان حاجزين ليهو بت عمو بس ما حصل نصيب . عاين لي بالمراية
سام: امي هسي الكلام دا لزومو شنو
ام سام: اججي مجرد كلام بس ولا زعلتي يا بتي
روز: لالا عادي عمتي اصلا دا من الماضي وذي ما قولتي ما حصل نصيب
ام سام: اي والله . وبقت تتكلم مع ولدها وبتجدع في الكلام وانا ببلعها ساي لمن وصلناها
ام سام: انزلو
سام: المرة الجاية امي تصبحي على خير
ام سام: وانت من اهل الخير . حتى ما قالت لي مع السلامة دخلت
سام: تعالي قدام
روز: خليني هنا احسن
سام: رزة تعالي قدام . نزلت وركبت قدام وكنت ساكتة يومي كلو خرب خلاص امو دي مستحيل تريدني اتحركنا سام ما رجعنا البيت مشى بي البحر
سام: انزلي . هو نزل انت قعدت جوا العربية خمسة دقايق هو مشى ركب في كبوت العربية قدام كنت بعاين لضهرو شوية نزلت ليهو حاولت اطلع زيو ما قدرت لاني قصيرة والكبوت عالي قام ضحك على منظري وانا لو ما زعلانة كنت ضحكت نزل ورفعني في الكبوت ورجع ركب جنبي بقينا نعاين في البحر والانوار الفي الجهة المقابلة من البحر
سام: رزة . ما رديت ونظري كان مثبت على البحر
سام: انا اسف بالنيابة عن الحصل من امي وكلامها الجارح واسف انو ما فتحت خشمي لانو هي في النهاية امي ما بقدر اقول ليها كلمة كعبة او انبهها وانا كلمتك من البداية انو حتواجهي مشاكل مع اهلي . التفت علي
روز: يعني اذا كلمتني المطلوب مني ما ازعل؟
سام: ما قاصد كدا والله من حقك تزعلي
روز: اها قاصد شنو . سكت شوية
سام: روز انتي مرتي وهي امي ما بقدر انجاز لطرف منكم . ضحكت بسخرية
روز: سام موش الملح كتير ردك كان شنو شوية كدا . ورجعت ضحكت بوجع
سام: كنت متوتر ما عرفت اقول شنو والله ما كنت قاصد اقيف معاها قاصدك ابدا . سكتا وكنت بعاين للبحر
سام: والله ما بتحمل انك تزعلي بالاخص مني انا انتي عارفة حاجة امي في البداية كانت مصرة انو نسكن معاهم وانو البيت كبير بس انا رفضت عشانك لانو عارف ما حترتاحي هناك وحتحصل مشاكل كتيرة بينكم لانو امي طبعها كدا بتعلق على اي حاجة
روز: بسألك بس تجاوبني بكل صراحة هل اذا كان اتزوجت بت عمك الكانو حاجزينها ليك تعامل امك حيكون بنفس تعاملها معاي كدا الصراحة كدا . سكت ما رد
روز: وصح كدا مدام امك اختارت ليك وحدة وهي بتحبها ليه ما وافقت
سام: لانو انا بحبك انتي دا الجواب . سكتا قرب يدو من ايدي
سام: لانو انا اخترتك انتي والمتمني اكفي معاها حياتي بسألك من حقي اختار شريكة حياتي ولالا . سكتا
سام: جاوبي
روز بالراحة: من حقك
سام: رزتي والله اسف على الحصل اليوم . فكرت فيها سام ما عندو ذنب وهو كلمني وبحاول بقدر الاماكن ما دايرني اطاقش مع اهلو عموما لانو ماف قبول من اتجاههم بس عارفة مع الزمن حيتعودو علي لانو سام راجلي ما بفرقني منو الا الموت
روز: سام الحصل اليوم حيحصل دايما المفروض اتعود
سام: لا ما المفروض تتعودي ابدا لانك بشر وبتحسي ومن حقك تزعلي وانا بزعل قبل ما انتي تزعلي والله . نزلت من العربية ومسكت يدو
روز: الليلة عدا على خير والمفروض يكون عندي طاقة للمواجهات القادمة قوم ارح اعزمني على اقاشي قبيل ما اكلت كويس يا ابو ملح شوية كدا . قام يضحك شديد جريتو نزل ضماني شديد
سام: والله بحبك
روز: تحبك الشوكلاته نحنا في الشارع استحي . قام ضحك وبعدها ركبنا عربيتنا ومشينا شيلنا اقاشي وبيبسي ورجعنا بيتنا المليان حب ودفء........
بعدها جا عرس ريان والحدث العالمي ريان وريان ذي ما كان خطوبتهم ترند حتى عرسهم كان ترند وكانت حلوة وبعدها وقفنا في عرس نبأ وقفة قوية وسندناها وسلمناها لراجلها.....
__________
من جانب نبأ
انحبست للعرس و اي حاجة ماشة تمام وكنت مبسوطة انو حأتزوج مراد حب حياتي رفيقات عمري كانو جنبي صح روز عروس جديدة وريان برضو عروس جديدة ونوسة حامل بس كانو واقفين جنبي اما قمر كانت مخطوبة وهديل ببتها ما قصرو معاي مع انو انا اقل منهم طبقة اجتماعية وظروفي ما ذي ظروفهم بس وقفو معاي وقفة رجال اي وحدة مستحيل تجي ايدها فاضية ابدا كانو اخوات قبل ما يكونو صحبات ابوي دايما كان بشكرهم لي لمن جات حنتي كنت عاوزة اعملها حنة حبشية على حسب ظروفنا بس لا رفضو وهم عملو لي الحفلة وما كانت اقل من حفلة وحدة فيهم انا لمن بكيت من الفرحة عندي صحبات بالدنيا والله ولمن جات المناسبة برضو ما قصرو فوق للحاجات جابو لي حاجات تانية والمناسبة بقت كبيرة واحلى وانبسطت لانو اي زول كان بتكلم بيها في الحي وحتى مراد ما قصر ابدا وعملنا الزفة مراد عمل لي حفلة كبيرة اتزوجت بالطريقة الكنت بحلمها بيها وامي كانت فخورة بصحباتي وانو كانو رجال في ضهري وانا كنت كل دقيقه بدعي ليهم بالسعادة في حياتهم ذي ما اسعدوني وسكنت مع اهل مراد في بيتهم بيتهم كبير و اي واحد قاسمين ليهو بيت والابواب في الداخل كنت شوية خايفة من حتة انو اسكن مع اهل الراجل لانو ذي ما روز بتحكي انو ام راجلها بتعاملها بطريقة كعبة رغم انهم بعاد وهسي انا جنبها البحصل شنو بس طلع العكس امو حبتني حتى قالت انا عروس تلاتة اشهر ما ادخل المطبخ وكانت مريحاني من كل النواحي مطبخي نضيف الا لو بعمل الشاي حق الصباح لمراد غير كدا الفطور معاهم والغدا معاهم واخواتو ظريفات اتنين وزوجات اخوانو برضو حلوات كانو متفاهمين شديد وانا حبيت العيشة وسطهم.....