رواية شلة بنات الفصل الواحد والثلاثون 31 والثاني والثلاثون 32 بقلم شذى عبدالمكرم
الايام بتمر وانا استقريت في حياتي الزوجية ونزلت الخدمة والامور ماشة طيبة وخلصت الخدمة بواسطة بس عملت ستة اشهر جا رمضان ودا اول رمضان لي في بيتي اتجهزت ليهو وامي ما قصرت جهزت معاي اي حاجة حتى الابري عملتو لي ربنا يديها الصحة والعافية في يوم من ايام رمضان سام من الصباح
سام: روز الليلة ناس امي عازميننا فطور عائلي في بيتنا
روز: وليه ما كلمو من بدري
سام: ما عارف . انا قولت في سري انا عارفه انو عملتو قاصدة تكلمني الليلة
روز: ماف مشكله
سام: الليلة عندي محاضرات في الجامعة وبعدها حامشي المكتب وراي شغل كتير انتي ممكن تمشي وانا حأجي هناك بس
روز: تمام بس حاول ما تتأخر
سام: تمام . ودعني ومشى وقعدت محتارة اعمل شنو الليلة نزلت السوبر ماركت اشتريت بعض الحاجات وجيت راجعة وقولت اعمل بسبوسة ودجاج عشان ما بيشو بحالي غيتو اجهدت فيهو وعملت معاهم كم حاجة كدا ولمن خلاص العصر جا اتجهزت قولت امشي بدري شويه عشان اجهز معاهم لانو لمن اوصل بكون المغرب قرب لبست واتصلت لسام
روز: انا طالعة خلاص
سام: انا ذاتي ما باقي لي كتير شوية وحاطلع
روز: تمام نتلاقى هناك
سام: تمام . طلعت مشيت على بيت نسابتي وصلت ودخلت لقيتهم ما شاء الله تبارك الله اسرة كبيرة استقبلتني عمتي رجاء ام سام
ام سام: مالك اتاخرتي كدا افتكرنا حتجي تقيلي معانا . قولت في سري استغفر الله
روز: ما كنت جاهزة لانو سام كلمني الصباح بس
ام سام: ماف مشكله اتفضلي . مشيت سلمت على الباقيين وحدين بردو ووحدين لا ما اشتغلت بيهم كتير قعدت معاهم بس لمن زمن الفطور قرب قومت اجهز معاهم لمن زمن الاذان قرب اتصلت لسام اشوفو تلفونو كان مغلق استغربت قعدت شوية تاني اتصلت برضو مغلق مشيت لمرا سليمان اخوهو اسمها هبة
روز: هبة ممكن تتصلي لي على سيلمان
هبة: في شنو
روز: سام دا تلفونو مغلق ما عرفت اذا وصل ولالا
هبة: بكون وصل دقيقة اتصل على سيلمان . اتصلت ليهو قال سام ما وصل لسع قلقت عليهو الاذان باقي خمسة دقايق
روز: هبة اديني رقم سيلمان . ادتني ليهو اتصلت لي سلمت عليهو وسألتو من سام قال ما وصل لسع الاذان اذن
ام سام: اكسري صيامك يا روز مالك ماسكة ايدك كدا . طبعا ما قولت ليها خايفة على سام
روز: لالا ماف حاجة . هبة كانت جنبي همست لي
هبة: اكسري صيامك سام حيجي هسي . هزيت ليها رأسي وشيلت بلح وكسرت صيامي وشربت بقة موية وحلف كم ينزل وقومت
ام سام: اجي مالك قومتي
روز: الحمدلله
ام سام: ما دخلتي يدك حتى ولا ما عاجبك اكلنا
روز: لالا ما كدا بس انا بأكل بعد الصلاة
ام سام: غريبة . شيلت كباية عصير عشان ما يقولو حاجة ما شربتها اصلا اتصلت لسليمان
روز: معليش سليمان عارفة انو بزعجك بس سام ما وصل؟
سليمان: لالا عادي عارف انك قلقانة عليهو بس اكيد حيجي
روز: الاذآن اذن وهو من العصر قال لي قرب يخلص وهسي تلفونو قافل ان شاءلله يكون بخير
سليمان: حيكون بخير لمن يجي حأتصل عليكي
روز: تمام . قفلت منو وبديت قاعدة ادعي يكون بخير بقيت اهز برجلي بس وقومنا للصلاة صليت وبقيت ادعي فجأة تلفوني رن كان سليمان كأنو ربنا استجاب لدعائي رديت سريع وبلهفة وكنت متأملة
روز: ان شاءلله وصل . جاني صوت سام
سام: رزة . قلبي لمن ارتاح
روز: سام انت من قبيل وين انا قلقلت عليك وليه تلفونك قافل واتأخرت وين كدا
سام: تعالي جنب الباب النص الصغير .
روز: تمام . مشيت سريع لقيتو واقف وكان سليم معافى بقيت اقول في سري الحمدلله
روز: ليه تعمل كدا يا سام انا بسببك حتى ما اكلت لقمة وحدة
سام: اتأخرت في الشغل والتلفون فصل كهربة لمن طلعت من المكتب وفي الطريق الاذآن اذن وفي جماعة وقفوني قال الا انزل افطر حتى اواصل طريقي بالفعل نزلت فطرت معاهم حتى اتحركت وجيت وسليمان قال كنتي قلقانة علي والله اسف هسي امشي اكلي
روز: ما عاوزة ذاتو
سام: عارف انك لسع زعلانة بس ما كان بيدي هسي عشان خاطري امشي اكلي ليكي حاجة
روز: تمام بس نتحاسب في البيت . قام ضحك
سام: جدا نتحاسب . يداب قلبي ارتاح ورجعت اكلت بمزاج وعمتي مستغربة فيني وبقيت اتونس مع هبة ظريفة لمن خلص اليوم ورجعت مع سام البيت وعاقبتو على طريقتي مستحيل اعديها ليهو بالساهل كدا بعد قطع قلبي كدا
في العيد لفينا على اهل سام كلهم وانا اخر رسم واخر توب مغرزة بس انو ولدكم قلعتو قلع منكم
___________
من جانب نوسة
طبعا ماف داعي احكي ليكم حياتي مع رامي لانها اكيد كلها سعادة وبالاخص في فترة حملي كنت بتدلع على رامي شديد وهو متحملني وعندي خمسية مزاج في الثانية وطبعا دا قربني من رامي شديد لاني كنت بحب قربو ودايراهو دايما جنبي ولمن كان باقي لي يومين عشان ادخل الشهر التاسع خليت رامي يقعد معاي ما يمشي المستشفى لانو كنت بقول ليهو الليلة حأولد خلاص وما بطلع صح وهو ما كان راضي امشي لامي لانو اتعود على وجودي جنبو رغم نكدي كلو قال لي من المستشفى ممكن امشي تنفسني بس قبل الولادة لالا
تاني يوم لي في التاسع صحيت الصباح كنت حاسة نفسي ما تمام وانو حأولد الليلة لانو حسيت بشوية قرصات
رامي: نوسة ماشي المستشفى لانو عندي عملية مهمة الليلة
نوسة: رامي لالا حاسة روحي حأولد الليلة خليك الليلة
رامي: عندي يومين قاعد معاكي وقولتي حتولدي بس ماف جديد دي توهمات بس ما حيحصل ليكي حاجة بمشي بعمل العملية وبرجع ولو حاسة روحك تعبانة بكلم ليكي امي تجيكي
نوسة: رامي ما تمشي ياااخ الليلة بس
رامي: العملية مهمة حبيبتي
نوسة: لو حصل لي حاجة انت السبب . ومديت ليهو شفايفي بزعل
رامي: نوسة انتي حاليا كويسة بس المريض محتاج عملية ضرورية لو حصل ليهو حاجة ما حأسامح نفسي
نوسة: تمام خلاص
رامي: اتصل لامي تجيكي؟
نوسة: لالا لو حسيت روحي ما تمام بتصل انا
رامي: تمام . لبس قدمتو لحدي لباب الشقة
نوسة: الليلة لو حصل لي حاجة وولدت اوع تجي تبارك لي نهائي لانو ما حأتكلم معاك . قام ضحك ومسك لي جضومي
رامي: تقدري ما تتكلمي معاي؟
نوسة: مع انو صعبة بس حأعملها
رامي: يلا يا جميل انت . وطلع رجعت رقدت لحدي زمن الفطور كدا حسيت بطلق الولادة في البداية افتكرت فترة وحتروح ذي كل مرة بس المرة دي استمر وخلاص ما قدرت اتنفس بقيت ابكي واصرخ فجأة نزل مني موية الجنين دي كانت حالة ولادة مسكت تلفوني اتصلت لرامي ما رد لي وانا خلاص حيلي مات حاولت تلاتة مرات لمن ما رد اتصلت لروز ردت لي
نوسة: روز الحقيني واااااي
روز: مالك يا نوسة
نوسة: انا بولد واااي انا بموت انا
روز: اتحملي حبيبتي جاية عليكي . قفلت منها حسيت روحي حأموت ما عرفت اعمل شنو عشان اخفف الالم بقيت انفخ بس فتحت الواتس بصعوبة ودخلت الشات حق رامي وسجلت ليهو ريكورد عسى اقول الفي قلبي لانو حسيت انو حأموت وكنت بتكلم بصعوبة
" رامي انت عارف انو انا بحبك وفي فترة حملي دا حبيتك اكتر ما عارفة اذا حأطلع من الولادة دي لاني حاسة روحي حأموت وااااي انا لو حصلت لي حاجة اوع تشيل نفسك الذنب بسبب كلامي الصباح لانو دا قسمة وخلي بالك من ولدنا وقول ليهو امك كانت نفسها تشوفك بس دا عمرها في الدنيا وانا بحبكم الاتنين "
رسلتو وخلاص موية الجنين انتهى وانا انتهيت معاها سامعة صوت الجرس بتاع الباب بس ما كنت قادرة اقوم وسامعة روز بتصرخ بس خلاص عيوني غمضت واستسلمت لانو ديك كانت كل قدرتي.......
__________
من جانب روز
كنت راكبة ركشة و طالعة على السوق بس اتصلت لي نوسة وكانت بتصرخ انو حتولد عقلي كأنو اتوقف قولت لبتاع الركشة انو يوصلني بيتها بالفعل وصلت ركبت للطابق التاني سريع كيف ما عرفت وصلت شقتها ضربت الجرس ماف رد واتصلت ليها ماف رد وما معاي مفتاح الشقة اتذكرت رامي ضربت ليهو ما رد اضطريت اخد ترحال ومشيت مستشفى رامي وصلت وعارفة انو الزمن فات وانو نوسة بكون وصلت مرحلة تانية من الالم سألت من رامي قالو في العملية صرخت وقولت الا يطلع بس رفضو جوطت انو مرتو بتموت وانو لازم اتكلم معاهو بعد جوطة ساقوني غرفة العملية
الممرضه: اقيفي هنا . وقفت وانا البكي كلو كملتو خمسة دقايق جا طالع وهو كلو دم اتخلع لمن شاف منظري
رامي: مالك يا روز في شنو
روز: رامي الحق نوسة
رامي: مالا نوسة
روز: اتصلت لي وهي بتصرخ وقالت هي بتولد مشيت ليها ما فتحت لي واتصلت ليها ما ردت والله حصل ليها حاجة وانا ما عندي مفتاح الشقة . هو ذاتو خاف
رامي: عندي عملية شغال فيها ما بقدر اخلي المريض فاتح بس امشي مكتبي افتحي الدرج فيهو المفاتيح وفي الاستقبال اطلبي اسعاف امشي ليها اكيد حيمشي اسرع وانا بخلص وبنتظركم
روز: تمام . وقومت جارية وعملت ذي ما قال لي ومشينا مع الاسعاف لمن وصلنا فتحت ليهم الباب دخلت لقيتها في غرفتها وهي بتنزف ومغمية عليها قلبي وقع دخلت في صدمة ناس الاسعاف رفعوها وصلوها العربية ركبت معاهم شايفة ركبو ليها جهاز التنفس وبعملو ليها في مساج القلب وانا خلاص الفيني كلو انتهى وصلنا المستشفى لقينا رامي في الاستقبال
رامي: حالتها كيف ؟
رجل الاسعاف: موية الجنين انتهى ونزفت كتير وليها فترة مغمية عليها و ما بتتنفس الكلام وقع على رامي كالصاقعة قبلي انا طوالي رجع ورا بخلعة ........
الثاني والثلاثون
بعد كلام رجل الاسعاف انو نوسة وقفت من التنفس دخل فيني انا ورامي برد طوالي ناس الاسعاف جرو بيها جوا مشيت على رامي
روز: رامي نوسة حتعيش صح؟ . ما رد لي كان مصدوم هزيتو شديد انتبه لي
رامي: انا السبب قالت لي ما امشي بس ما سمعتها
روز: دا ما وقت الندم خلينا نمشي نشوف الحصل ليها شنو . جرينا لقيناها دخلوها غرفة العمليات
الممرضة: دكتور رامي بتعرف المريضة؟
رامي: مرتي
الممرضة: خلاص ارح املأ الاستمارة عشان يبدو ليها العمليات لانو وضعها حرج تقريبا قاطعة تنفس
رامي: خلي يبدو العملية انا بملا الاستمارة . جرت رجعت ورامي مشى ملا الاستمارة وجينا قعدنا
رامي: قالت لي لو حصل لي حاجة ما حاسامحك . ونزل وشو في ايدو وبكى وانا ببكي على رفيقة عمري
روز: انا متأكدة الكلام دا ما من قلبها
رامي: والله قالت حاسة انو حتولد الليلة واترجتني انو ما اخليها براها
روز: رامي خلاص ما تلوم نفسك . اتصل لي سام زحيت من رامي بعيد ورديت
سام: روز كيفك . قومت ابكي
سام: مالك بتبكي
روز: سام نوسة
سام: مالا نوسة
روز: جاها الطلق وما كان معاها زول .... . وحكيت ليهو الحصل كلو
سام: انتو في اي مستشفى
روز: الشغال فيها رامي
سام: تمام جاي عليكم ما تبكي . قفلت واتصلت لامي كلمتها وقولت ليها تكلم اهل نوسة ورجعت لرامي وقعدنا منتظرين طلعت الممرضة مشينا ليها الاتنين
رامي: اها العملية كيف
الممرضة: لسع والله يا دكتور ومحتاجين دم سريع
رامي: تمام تمام . وهي رجعت هو هبش جيوبو تلفونو كان ماف
روز: في مكتبك في الدرج
رامي: صح صح . وجرا جابو وجا وكان بتكلم شوية دبرو ليهو دم . وقعد وانا جنبو ركز في سجل المكالمات
رامي: عايني متصلة علي خمسة مرات يا روز
روز: رامي ما تلوم نفسك خلاص . كان بعاين في التلفون فجأة لمح انو مرسلة ليهو ريكورد في التلفون فتحو
" رامي انت عارف انو انا بحبك وفي فترة حملي دا حبيتك اكتر ما عارفة اذا حأطلع من الولادة دي لاني حاسة روحي حأموت وااااي انا لو حصلت لي حاجة اوع تشيل نفسك الذنب بسبب كلامي الصباح لانو دي قسمة وخلي بالك من ولدنا وقول ليهو امك كانت نفسها تشوفك بس دا عمرها في الدنيا وانا بحبكم الاتنين "
الاتنين اتخلعنا من مضمون الريكورد رامي فجأة وقف فوق والتلفون وقع من ايدو ومسك رأسو شديد
رامي: نوسة لا ما حتستسلمي اكيد ما حتخليني براي . بقى ماشي وجاي وهو مصدوم وانا ببكي بحرقة كأنو كانت بتودعنا قومت مشيت حضنت رامي وبقينا نبكي
رامي: روز نوسة ما تخلينا بالسهولة دي موش؟
روز: نوسة قوية
رامي: بس دا ما نفس كلامها الفي ريكورد
روز: دي في لحظة وجع بس انا متأكدة
رامي: ما حأسامح روحي لو حصلت ليها حاجة . وبقينا خايفين وسام وصل وكان واقف جنبنا ما عرف يطمن منو فينا لانو الاتنين منهارين شديد
سام: روز خلاص اهدي
روز: ما قادرة انا . فجأة حسيت ببطني بوجعني شديد مسكتو شديد
سام: مالك؟
روز: بطني بتوجعني . بقيت ماسكة بطني شديد من الوجع فجأة حسيت في حاجة نزلت مني قومت لقيت لبستي بورا دم اتخلعت
روز: دا شنو انا بنزف . سام اتخلع ورامي جا علي
رامي: دا البريود؟
روز: ما عارفة . ووجع بطني زايد ما قدرت اقيف جرو بي الاسعاف سريع عملو لي اللازم وركبو لي درب
الدكتورة: انتي حامل والنزيف دا من التوتر الشديد والزعل لو واصلتي في الزعل دا احتمال ينزل لانك يداب في الشهر الاول . اتفاجأت بالخبر دا ما عرفت افرح ولا اعمل شنو ما حسيت بالفرحة لانو نوسة تعبانة احلى خبر في حياتي يجيني في ظرف ذي دا هي مشت سام قرب مني
سام: روز سمعتي الدكتورة قالت شنو الزعل ممنوع عارف انو نوسة تعبانة بس حتطلع منها بس انتي اهدي . غمضت عيوني ودموعي نزلو
رامي: كلام سام صح . هو طلع من الاسعاف وخلى معاي سام عشان مركبين لي درب امي جاتني باركت لي بعد خلصت الدرب ما عرفت اعمل شنو لانو ملابسي كلها اتوسخت
روز: سام ملابسي اتوسخت
سام: نرجع البيت ترتاحي وانا بجيبك تاني
روز: لالا ما بقدر اقعد في البيت
سام: خلاص تغيري ونرجع . هزيت رأسي بمعنى تمام سندني مشينا البيت استحميت واخدت احتياطاتي ورجعنا المستشفى
روز: ما طلعت؟
امي: لسع . اتأخرت بالجد في العملية بعدها طلعت
الدكتور: دكتور رامي تعال معاي . ومشى معاهو
__________
من جانب رامي
مشى مع الدكتور مكتبو
الدكتور: رامي لانك دكتور وبتفهم لازم اكلمك بالحاصل العملية كانت خطيرة لانو نزفت كتير شديد وحصل تقرحات في الرحم اضطرينا نشيل الرحم للاسف الشديد
رامي: وهي والطفل بخير؟
الدكتور: هي ما بخير والله دخلت في غيبوبة لانو قلبها ما اتحمل بس حاليا شبه مستقرة حنقرر حالتها بعد 24 ساعة اما الطفل فكانو اتنين توأم ما عارف ليه ما ضهر في السونار بس الف مبروك بت وولد بس حاليا حيدخلو الحضانة يومين للضمان
رامي: شكرا يا دكتور . وطلع وهو مهموم بسببو نوسة فقدت رحمها هل حتسامحو وهل هي حتعيش في الاول مشى للاهل
روز: رامي الدكتور قال شنو
رامي: لسع ما معروف حالتها بس مستقرة وجابت ولد وبت . باركو ليهو بس
امي: حتكون كويسة الحمدلله . هز رأسو ومشى مكتبو وبقى يبكي شديد روز جاتو لانو حست في حاجة
روز: رامي مالك بتبكي موش قولت هي كويسة
رامي: روز نوسة شالو ليها الرحم ما حتسامحني متأكد ........
_________
من جانب روز
بعد رامي قال لي نوسة شالو ليها الرحم بقيت ابكي معاهو ما عارفة نوسة لمن تعرف موقفها حيكون شنو اليوم كان اطول يوم بالنسبة لينا رامي مشى الحضانة شاف اولادو ولمن جا الليل كنت عاوزة انوم في المستشفى بس رامي وسام رفضو
سام: نجي الصباح بدري . بعد تعب اقنعوني ورجعنا كلنا ضربت لي ريان تسلم علي يداب اتذكرت انو ما كلمت الشلة كلمتها لومتني وقولت ليها انا تعبانة وهي تكلم الباقيين وقفلت على كدا سام جاب لي عصير شربني غصب ودخلت استحميت ونومت من التعب الصباح جهزنا نفسنا
روز: سام نغشى بيت رامي نشيل شنطة البيبي وحاجات لنوسة
سام: جدا . بالفعل مشينا والمفاتيح من امس معاي دخلت رتبت ليها غيارات ليها ولرامي وشيلت شنطة البيبي لقيتها جاهزة وطلعنا على المستشفى
روز: نوسة ما صحت؟
رامي: لسع بس حالتها استقرت
روز: الحمدلله . شوية الشلة كلها جات والاهل وصلو وبقينا منتظرين بس لقينا حتة في المستشفى قعدنا فيها منتظرين لمن رامي اتصل لي انو نوسة بدت تصحح مشينا كلنا ودخلنا ليها عدا رامي قعد برا
روز: ما داخل؟
رامي: ما بقدر
روز: كيف يعني
رامي: اكيد ما حابة تشوف وشي واحتمال تتعب
روز: انت اهبل . اصريت عليهو بس رفض دخلت.....
__________
من جانب نوسة
صحيت حاسة رأسي تقيل يعني انا ما موتا وانقذوني حمدت ربي انو حأعيش مع ولدي ورامي عمر زيادة فجأة الباب فتح ودخلو الاسرة كلها والشلة حمد لي السلامة وباركو لي المولود
نوسة: وين البيبي
روز: انتي جيبتي توأم ولد وبت . اتفاجأت ما كنت مصدقة ابدا من الفرحة
نوسة: بالجد احلفي
روز: والله
نوسة: وينم
روز: في الحضانة بعدين حيجيبيهم
نوسة: تمام بس نفسي اشوفهم واشم ريحتهم
الممرضة: خلوها ترتاح هي طلعت من عملية صعبة . طلعو كلهم ناديت روز
نوسة: روز . قربت علي
روز: نعم
نوسة: وين رامي ما جا يشوفني . كنت زعلانة المفروض اول واحد يكون جنبي
روز: رامي خجلان منك قال لو شوفتي احتمال تتعبي لانو لسع عالق في كلامك حق انو لو حصلت ليكي حاجة هو السبب
نوسة: كنت بهظر معاهو بس خلي يجي
روز: تمام . انتظرت شوية جا داخل بالراحة ووقف ورا
نوسة: ما عاوز تقرب . جا قريب مني
نوسة: صلح لي السرير دا . رفعو لي شوية فتحت ليهو ايدي حضني وبقى يبكي وانا ببكي زح مني وقعد في طرف السرير ومسك ايدي
رامي: انا السبب في الحصل ليكي دا اسف والله
نوسة: رامي دا قضاء وقدر انا كويسة هسي ما تشيل نفس الذنب ما سمعت الريكورد؟
رامي: سمعتو
نوسة: ومالك خلاص
رامي: لو ما كان خليتك براكي ما كان حصل ليكي دا كلو
نوسة: بس الواجب كان بناديك
رامي: والله خوفت تزعلي مني وتاني ما تتكلمي معاي
نوسة: حأمشيها ليك المرة دي بس تاني لو ما سمعت كلامي..... . قطع كلامي
رامي: تاني لو عندك صداع وقولتي ما اخليكي براكي حأقعد معاكي . قومت ضحكت
نوسة: يا بختي بيك طبعا يا رامي قالو جيبت توام صحي؟ . قام ضحك
رامي: انا ذاتي ما صدقت . وضحكنا
نوسة: هووي قوم انقلع هسي اهلنا برا يقولو شنو
رامي: والله يقولو اليقولو ما طالع نهائي ما بخليكي براكي
نوسة: انا كويسة
رامي: ما علي . ضحكت عليهو
نوسة: رامي نزل لي السرير بطني وجعتني
رامي: تمام . رجع لي السرير لطبيعتو
رامي: نفسك تنومي؟
نوسة: نفسي اتكلم معاك بس . اتكلم معاي شوية ونومت.......
___________
من جانب روز
بعد اطمنا على نوسة وكانت بخير سام وداني للدكتور تاني وفحصت وقال انو بخير والجنين بخير مشيت على الاهل بثيت ليهم الخبر الحلو دا باركو لي وفرحو لي شديد وحتى انا يداب فرحت بخبر حملي دا قيلنا في المستشفى ورجعنا البيت غيرت ووقفت في نص الغرفة سام كان بصلح في مخدتو
روز: سام . عاين لي
سام: انا
روز: انا حامل . قام ضحك وفتح لي ايدو
سام: تعالي . جريت ليهو لفى بي وانا بضحك يداب حسيت بطعم الفرحة بحملي
سام: حتكوني احلى ام في الدنيا
روز: وانت حتكون احلى اب
اليوم التاني خرجو نوسة من المستشفى بس رامي قال تنزل في بيتها عشان يعتني بيها احسن لانو هو دكتور وكان كاتبين ليها كمية دربات فمشينا معاها البيت وامها قعدت معاها تنفسها في بيتها احسن وانا سام كان واقف لي على الهبشة فيني بسبب الحمل دا........